24/10/2025
🔴⚫️ დაკავებულია ჟურნალისტი ვასილ ივანოვ-ჩიქოვანი და მისი მეუღლე — მაიკო ბოკერია, სამი შვილის დედა
24 ოქტომბერს სამართალდამცველებმა ტელეწამყვანი ვასილ ივანოვ-ჩიქოვანი და მისი მეუღლე, მაიკო ბოკერია დააკავეს. ბოკერია საზოგადოებრივი მაუწყებლის ყოფილი ჟურნალისტია და სამი შვილის დედაა.
„ახლა დამირეკეს, მგონი ვასკაც დაკავებულია, მეზობელს უთქვამს შინდისიდან — ცოლ-ქმარი ერთად წაიყვანესო,“ — წერს ჟურნალისტის დედა დოდო შონავა სოციალურ ქსელ Facebook-ზე.
დაკავება უკავშირდება 23 ოქტომბერს რუსთაველის გამზირზე გამართულ საპროტესტო აქციას, რომლის დროსაც დემონსტრანტებმა გზა გადაკეტეს.
შინაგან საქმეთა სამინისტრომ, ახალი საკანონმდებლო ცვლილებების საფუძველზე, 19 ოქტომბრიდან დაიწყო გამკაცრებული წესების რეალიზება, რაც მნიშვნელოვნად ზღუდავს გამოხატვისა და შეკრების თავისუფლებას.
დაკავებულთა შორის არიან:
🔴 ბაჩო ქიმუცაძე — „კოალიცია ცვლილებისთვის“ წევრი;
⚫ ნათია ლეთოდიანი — პარტია „დროა“-ს წევრი;
🔴 დავით მშვენიერაძე — ილიაუნის სამართლის სკოლის სტუდენტი;
⚫ ნინო ლაღიძე — გარემოსდაცვითი განათლების სპეციალისტი;
🔴 ზურა ცეცხლაძე — პოლიტპატიმრად მიჩნეული ზვიად ცეცხლაძის მამა;
⚫ თენგო კირთაძე — პარტია „ფედერალისტების“ წევრი;
🔴 ანუკა გამსახურდია — სამოქალაქო აქტივისტი;
⚫ დანი მაღრაძე — სამოქალაქო აქტივისტი;
🔴ზვიად კვარაცხელია — მწერალი და ტელეწამყვანი;
⚫ გიორგი ლიფონავა — რეჟისორი;
🔴 მაიკო ბოკერია — ჟურნალისტი, საზოგადოებრივი მაუწყებლის ყოფილი თანამშრომელი;
⚫ ვასილ ივანოვ-ჩიქოვანი — ჟურნალისტი და ტელეწამყვანი;
🔴 აჩი გოჩიტაშვილი — სტუდენტი.
⚫🔴 პოეტმა პაატა შამუგიამ სოციალურ ქსელში დაწერა:
„მწერალი ზვიად კვარაცხელია დააკავეს. 20 წუთის წინ შემხვდა ტელევიზიაში, სიცილით მითხრა, გზაზე მილიციაა, ალბათ, დღეს დამაკავებენო… ერთი ჩვეულებრივი დღე ქოცურ საქართველოში. არ შეგრჩებათ არავის.“
🔴 აღსანიშნავია, რომ გასულ კვირას, დაჩქარებული წესით მიღებული ახალი კანონპროექტები მნიშვნელოვნად ზღუდავს სიტყვის, შეკრებისა და პროტესტის უფლებას, რასაც ოპოზიცია და სამოქალაქო სექტორი „ავტორიტარული ნაბიჯების“ გაგრძელებად აფასებენ.
