18/10/2025
📍Სახელი: მარიამი
📍Გვარი: ხარაიშვილი
📍Პროფესია: ხელნაკეთი სამკაულების დიზაინერი.
📍Საქმიანობა: ხელნაკეთი სამკაულების ბრენდი ,, Art-მარისი - ს" დამფუძნებელი და ხელოვანი.
📌 ვინ არის მარიამი? როგორ დაახასიათებდით საკუთარ თავს❓❗
– ვარ 32 წლის ქალი. 4 შვილის დედა. რომელიც მუდამ სიახლის ძებნაშია და არასოდეს ნებდება, თუ მიზანში რამე ამოიღო.
📌გაიხსენეთ თქვენი ცხოვრების გზა... რა იყო ის გარდამტეხი მომენტი, რომელმაც შეგცვალათ ❓❗
– სკოლა რომ დავამთავრე, საკუთარი შრომით, რეპეტიტორების გარეშე ჩავაბარე ეროვნული გამოცდები და პირველივე უნივერსიტეტში მოვხვდი — ჯავახიშვილში. მაგრამ მალე მივხვდი, რომ იქ ჩემი ადგილი არ იყო.მალევე დავოჯახდი, სწავლა შევწყვიტე, და უკვე ორი შვილის დედა ვიყავი, როცა მეორედ ჩავაბარე გამოცდები და ამჯერად კოლეჯ „მერმისს“ მივაშურე,სადაც გავიარე ორ წლიანი სამკერვალოს სრული კურსი . Ეს ორი წელი იყო ერთ-ერთი ყველაზე თბილი და შთამაგონებელი პერიოდი ჩემს ცხოვრებაში — სავსე შემოქმედებით, სითბოთი და ადამიანებით, რომლებიც დღემდე მახსოვს . Კოლეჯის დამთავრებისას უკვე ტყუპებს ველოდებოდი, ამიტომ დროებით ისევ გვერდზე გადავდე საკუთარი ოცნებები. მაგრამ ხელი არ ჩამიქნევია. ვიცოდი, დადგებოდა დღე, როცა ისინი ბაღში წავიდოდნენ და მე კიდევ ერთხელ დავიწყებდი ოცნებისკენ სვლას.
და აი, ერთ დღეს სოციალურ ქსელში შემთხვევით შემხვდა ნინო ნადირაშვილის განცხადება — ის ახალ მოსწავლეებს იწვევდა. მაშინვე ვიგრძენი, რომ ეს იყო ის წამი, როცა უნდა მემოქმედა. მივწერე, შევთანხმდით და დავიწყე ჩემი გზის ახალი თავი.
ნინოსთან მისვლისთანავე მივხვდი — ეს არის სწორედ ის საქმე, რაც სულ მენატრებოდა და მაკლდა. იქ გატარებულმა დღეებმა ამავსო, მომცა რწმენა, რომ ოცნებები არასოდეს გვტოვებენ — უბრალოდ, ელიან როდის გავბედავთ მათკენ ნაბიჯის გადადგმას…
📌 როგორ დაიწყო თქვენი ისტორია ბისერებთან? გახსოვთ პირველი ნამუშევარი❓
– ბისერებთან ჩემი ურთიერთობა ღრმა ბავშვობიდან იწყება. ყოველთვის მქონდა ამ პატარა სილამაზეების სიყვარული — ვხატავდი და ნახატებს ბისერებით ვაფორმებდი, მუდამ მინდოდა ჩემი ტანსაცმელი გამელამაზებინა სხვადასხვა ფურნიტურით.
მახსოვს, სკოლაში ბავშვებს ბისერებით ნაქსოვი ბეჭდები ეკეთათ. ისე მომეწონა, ვთხოვე, ჩემთვისაც ესწავლებინათ, მაგრამ ვერ მოხერხდა. თუმცა სურვილი იმდენად დიდი მქონდა, რომ ერთ დღეს დედას ცეკვის სამკაულები დავუშალე და თეთრი მარგალიტის მძივებით ჩემი პირველი ბეჭედი მოვქსოვე. ისეთი ბედნიერება ვიგრძენი, თითქოს ფრთები გამომესხა… სწორედ მაშინ მივხვდი, რომ ეს იყო ჩემი საქმე — ჩემი სულის გამოძახილი. ვიცოდი, დადგებოდა დღე, როცა ამ სიყვარულს რეალობად ვაქცევდი, და დიდი მოთმინებით ველოდი ჩემ დროს.
📌დედა ხართ ოთხი შვილის — როგორ ახერხებთ დროის განაწილებას ოჯახსა და საქმეს შორის❓
–ეს ნამდვილად არ არის მარტივი. მაგრამ როცა საქმე გიყვარს, დაბრკოლებები უბრალოდ ქრება.
ოთხივე შვილი სკოლაში დადის, ყველა სხვადასხვა დროს და სხვადასხვა წრეზე. Ამას ემატება
სახლის საქმეებიც და მე დღის განმავლობაში დრო საერთოდ არ მრჩება ჩემი საქმისთვის.
ამიტომ ღამე — როცა ბავშვებს დავაძინებ — იწყება ჩემი სიაქმიანობა.
Მქონია შემთხვევები, ჩამძინებია მუშაობისას, მაგრამ მაღვიძარას წინასწარ ვაყენებ, რომ არაფერი დამრჩეს დაუსრულებელი.
რთულია, ძალიან… მაგრამ მე მიყვარს სირთულეები.
📌რა გაძლევთ შთაგონებას ახალი ნივთების შესაქმნელად❓
– ჩემი შთაგონება არის გარშემომყოფების დადებითი სიტყვები, გულწრფელი შეფასებები და გულთბილი მადლობები.
შთაგონება არის გათენება და დაღამება…
ფანჯარაში შემოსული მზის პირველი სხივი, ჩიტების ჭიკჭიკი და ის სიმშვიდე, რაც სულში იმ წამს ჩამოიღვრება.
ჩემი შთაგონებაა მომხმარებლის ემოცია, როცა მისი თვალებით ვხედავ ბედნიერებას, და როცა მწერს — „გმადლობ, ზუსტად ეს მინდოდა“.
📌 როცა ქმნით, რას გრძნობთ — ეს უფრო ჰობია თუ თქვენი შინაგანი სამყარო❓
– როცა ვქმნი, ვგრძნობ, როგორ გადმოდის ჩემი ფანტაზიები, წარმოსახვა, შთაგონება, გრძნობები და ემოციები — ნელ-ნელა, თითოეულ მძივთან ერთად, საქარგავ დაზგაზე.
და როცა ნამუშევარს ვასრულებ, თითქოს ვთავისუფლდები…
ის, რაც იმ წუთებში ჩემში ტრიალებდა, ახლა ყველას თვალწინაა — შეიძლება შეაფასონ, შეეხონ, მოიწონონ ან გააკრიტიკონ.
მაგრამ ამას ჩემთვის, უკვე მნიშვნელობა აღარ აქვს — მთავარია, ჩემი შინაგანი სამყარო გარეთ გამოვიტანე და თვალსაჩინო გავხადე.
ჰობი?! — არა, ეს მხოლოდ ჰობი არ არის. ეს ჩემი ცხოვრებაა, ჩემი სამყარო…სამყარო, რომლის გარეშეც მე — უბრალოდ, მე აღარ ვიქნები.
📌 იყო თუ არა რთული ამ საქმის დაწყება? რა დაბრკოლებებს წააწყდით დასაწყისში❓
– ჩემი ერთადერთი დაბრკოლება ბავშვების გაციება, გრიპი და ვირუსები იყო.
მე თვითონ რომ მომაკვდავი ვყოფილიყავი, მაინც ვერაფერი შემაჩერებდა იმ ერთი დღის გამოტოვებაზე, როცა სტუდიაში უნდა მივსულიყავი.
სწავლების პროცესი პირადად ჩემთვის საერთოდ არ ყოფილა რთული — პირიქით!
📌როგორ აღწერდით თქვენს სტილს? რა განასხვავებს თქვენს ნამუშევრებს სხვებისგან❓
– მე ვარ ადამიანი, რომელიც მუდამ ინოვაციებს ეძებს. სხვას კი არა, საკუთარ თავსაც არ ვბაძავ.ჩემი არცერთი ნამუშევარი არაა ერთნაირი.
ზოგადად არ მიყვარს შაბლონური არაფერი, პირიქით… მუდამ განსხვავებულის ძიებაში ვარ… ვერ ვაპატიებ ჩემს თავს უსუფთაო, არაზუსტ, უხარისხო ნამუშევარს… რადგან ძალიან ვაფასებ სიზუსტეს, სინქრონს, პროპორციებს, ფერთა შეხამებას… ნამუშევარი სუფთა და ლამაზი უნდა იყოს როგორც წინა მხრიდან, ისე უკნიდან.
მომწონს საინტერესო დეტალების დამატება ნამუშევრებში, ამიტომ ახლახანს დამებადა იდეა შემექმნა ინიციალები-კონკრეტული ადამიანებისთვის, ეს ინიციალები კი გამემრავალფეროვნებინა და კიდევ უფრო პერსონალური რომ გამეხადა ამ ადამიანების პროფესიის შესაბამისი დეტალები დავამატე, ძალიან ლამაზი და საინტერესო შერწყმა გამოვიდა, მაგრამ მალე აღარც ეს არ მეყო და საყვარელი ყვავილი, ცხოველი, ფრინველი,ზოდიაქო და საერთოდ ყველაფერი, რაც კი შეიძლება იმ კონკრეტულ ადამიანს უკავშირდებოდეს ერთ სამკაულში მოვაქციე და მივიღე რაღაც ძალიან , ძალიან ლამაზი, განსხვავებული, ექსკლუზიური, საავტორო და უნიკალური სამკაულები, რომლებმაც ძალიან დიდი მოწონება დაიმსახურეს საზოგადოების მხრიდან.
📌რას გეუბნებიან ადამიანები, როცა ხედავენ თქვენს ხელნაკეთ ნივთებს❓
– მეუბნებიან , რომ ძალიან ლამაზი და საინტერესო ნივთების ავტორი ვარ, რომ მსგავსი არსად არ უნახავთ… ზოგს გაუჩნდა ეჭვი, რომ ქარხნული ნამუშევარი იყო და არა ხელნაკეთი. ზოგი საერთოდ ვერ ხვდება ამ ყველაფრისთვის როდისღა ვიცლი. განსაკუთრებით დედაჩემი! რადგან იცის , სულ გადარბენაზე რომ ვარ.
სხვათაშორის ძალიან ბევრმა ადამიანმა მითხრა, რომ ჩემი შექმნილი ნივთები ჩემს აურას ატარებენ… მე ერთი ის ვიცი, რომ მათი ეს სიტყვები და შეფასებები ნამდვილი რწფელია-ვგრძნობ ამას და ეს ყველაზე მეტად მაძლიერებს,მაბედნიერებს, ახალ მუხტს მაძლევს, აღმაფრთოვანებს და თავდაჯერებულს მხდის. მადლობა ამ ყველაფრისთვის.
📌გქონიათ თუ არა რთული ან დანებების მომენტები ამ გზაზე❓ როგორ გადალახეთ ისინი❓
– არა… ეს ის საქმეა , სადაც მე არასოდეს არ დავნებდები… მიუხედავად იმისა, რომ ჩემთვის თითოეული შეკვეთა ახალია, განსხვავებულია და არასოდეს ვიცი რა გამოვა,ჯერ არ მქონია შემთხვევა ,შეკვეთა არ ამეღოს იმის გამო , რომ ჩემთვის გაუგებარი და რთულია. ყველაფერზე ვიღებ პასუხისმგებლობას, რადგან არ ვიცი საიდან და რატომ,მაგრამ დარწმუნებული ვარ აუცილებლად შევძლებ და გამომივა.
ხელოვანი ვარ და შეკვეთა ან მექნება-ან არა, თუმცა ეს სულაც არ ნიშნავს, რომ მე გავჩერდე! არ მაქვს შეკვეთა? სამაგიეროდ მაქვს უამრავი იდეა ახალი სამკაულების შექმნისა, რომლებისთვისაც ვერ ვიცლი შეკვეთების გამო, ხოდა სწორედ მაგ იდეებს ვანხორციელებ… ჩემთვის მთავარი არაა ჩემი შექმნილი ნივთი გაიყიდოს… არა… ჩემთვის მთავარი ისაა , რომ ის რაც ჩემს გონებაში და წარმოსახვაში ტრიალებს, რაც არ მასვენებს და გამოსვლას ლამობს -გამოვუშვა, შევქმნა რაღაც ახალი… არასოდეს არ შემიქმნია არცერთი სამკაული საკუთარი დიზაინით იმის მოლოდინში და ფიქრში , რომ ის გაიყიდოს, არ ვიცი დამიჯერებთ თუ არა და მაგაზე საერთოდ არ ვფიქრობ. უბრალოდ მე ჩემს სათქმელს, ჩემს ემოციებს, ჩემს შინაგან სამყაროს ამ სამკაულებით ვამბობ, რადგან სულის სიმშვიდისთვის მჭირდება ეს… თუ მოხდა ისე, რომ რამდენიმე დღე ვერ მოვიცალე ჩემი საქმისთვის შინაგანად შფოთვა და წრიალი მეწყება, ისეთი განცდა მაქვს, თითქოს საკუთარ თავს ვღალატობ… ასე რომ დანებება და ხელის ჩაქნევა ჩემთვის აქ-წარმოუდგენელი და მიუღებელია.
📌რა გზავნილს გაუზიარებდით სხვა დედებს, რომლებიც ოცნებობენ თავიანთი პატარა საქმის დაწყებაზე, მაგრამ ეშინიათ❓
–არასოდეს შეგეშინდეთ სიახლეების…
არასოდეს შეწყვიტოთ საკუთარი პიროვნების ზრდა-განვითარება.
ოცნებებზე უარი არასოდეს თქვათ, პირიქით-ოცნება მიზნად აქციეთ და ამ მიზნის მისაღწევად ყველაფერი გააკეთეთ…
ირწმუნეთ საკუთარი შესაძლებლობები, ძალა… და მალე სხვებიც გირწმუნებენ თქვენ.
არასოდეს გაჩერდეთ, ხელი არასოდეს ჩაიქნიოთ.
📌Და ბოლოს... Სად ხედავთ მომავალში ქვენს თავს❓❗
– მე მაქვს ჩემი სტუდია და მყავს ძალიან ბევრი მოსწავლე.
ასევე ვაკეთებ პირად გამოფენებს -სადაც უამრავი ადამიანი მოდის, რომ ჩემი ნამუშევრები იხილოს.ისევ და ისევ ამ გარემოში და საქმეში.
Დიდი მადლობა მარიამს 🌟
