13/07/2016
ქალი ძირს ეგდო და ყურებიდან სისხლი სდიოდა" - სოფელ ხაიშში მომხდარი სასტიკი მკვლელობის დეტალები
"ქალი ძირს ეგდო და ყურებიდან სისხლი სდიოდა" - სოფელ ხაიშში მომხდარი სასტიკი მკვლელობის დეტალები
13-07-2016
"ცოლს სასტიკად ექცეოდა. ქმარი სულ ეჭვიანობდა, შეეძლო ნებისმიერზე ეეჭვიანა, ვინც მათი ეზოს კარს შეაღებდა"
ბოლო ხანს ჩადენილი დანაშაულების სისასტიკემ საზოგადოება შოკში ჩააგდო. შვილისა და ქმრის მკვლელობის ბრალდებით გასამართლებული მაგდა პაპიძის განაჩენის შემდეგ, ბათუმში მამაკაცმა ყოფილი ცოლი, მისი 3 შვილის დედა სასაფლაოზე გაიტყუა და ჩაქუჩით დაჩეჩქვა. გონწასული იქვე დატოვა და მიიმალა. ქალი გამვლელმა იპოვა და გადაარჩინა.
10 ივლისს შემზარავი მკვლელობა მოხდა ახალქალაქის სოფელ ვაჩიანში - ოჯახის 4 წევრი, დედა და შვილები დამნაშავემ ერთად ამოხოცა.
ამავე დღეს თეთრიწყაროს მუნიციპალიტეტის სოფელ ხაიშში, სადაც ეკომიგრანტი სვანები ცხოვრობენ, 40 წლის ზ.ს-მ სტუმრად მყოფი მეზობლის თვალწინ, ცოლს ყურები დააჭრა. როცა შეძრწუნებულმა სტუმარმა ქალის მიშველება სცადა, ზ.ს-მ სამზარეულოს დანით მუცლისა და გულის არეში სასიკვდილო ჭრილობები მიაყენა... ამის შემდეგ მკვლელმა დანა დააგდო და მიიმალა...
გამოძიება ფაქტზე სისხლის სამართლის კოდექსის 108-ე (განზრახ მკვლელობა), 117-ე მუხლის 1-ლი ნაწილით (ჯანმრთელობის განზრახ მძიმე დაზიანება) და 11 პრიმა მუხლით (პასუხისმგებლობა ოჯახური დანაშაულისთვის) აღიძრა. დამნაშავე პოლიციამ მალევე დააკავა, მან დანაშაული აღიარა.
სოფლის მოსახლეობა მომხდარზე საუბრისგან თავს იკავებს, ამბობენ რომ შოკში არიან, თუმცა მკვლელობის რამდენიმე დეტალი მაინც გაგვიმხილეს:
- ვერ ვიტყვით, რომ დანაშაულის ჩამდენი შეურაცხადი იყო, ან სხვასაც აყენებდა შეურაცხყოფას, მაგრამ ცოლს მართლაც სასტიკად ექცეოდა. ცოლ-ქმარი დაახლოებით 40 წლამდე არიან, შვილი არ ჰყავთ და გამუდმებით ჩხუბობდნენ. ქმარი სულ ეჭვიანობდა, შეეძლო ნებისმიერზე ეეჭვიანა, ვინც მათი ეზოს კარს შეაღებდა. ქალს ყველგან წასვლას უკრძალავდა, მეზობელთანაც რომ გადავიდოდა, იმაზეც შარს აუტეხდა... ყველაფერზე შენიშვნას აძლევდა, ელემენტარულად, კერძის მომზადებაზეც კი ისეთ ჩხუბს მოაწყობდა, გეგონებოდა, ამ ქალმა საშინელი დანაშაული ჩაიდინაო. თუ დალევდა, ხომ ჯოჯოხეთს აწყობდა. ყველას გვიკვირდა, რომ ცოლი შინ უჩერდებოდა, ვეუბნეოდით კიდეც, გაერიდე, თავს რატომ აკვლევინებო, მაგრამ როცა წასასვლელი არსად გაქვს, სად უნდა წახვიდე... ახლა ქალი კი დაასახიჩრა, მაგრამ მაინც ცოცხალია, ხუთი შვილის მამა კი შეიწირა. რა ეშველებათ ბავშვებს, აქამდეც უჭირდა ოჯახს, ახლა კი საერთოდ მშივრები დარჩებიან.
- გარდაცვლილს ხშირი ურთიერთობა ჰქონდა დამნაშავესთან?
- ასეთ ადამიანთან ხშირი ურთიერთობა როგორ უნდა გქონდეს, მაგრამ მეზობლები იყვნენ და ყოველთვის ვერ მოერიდები. იმ დღესაც თურმე იმდენი ეხვეწა, წამოდი ჩემთანო, ეს საწყალიც გაჰყვა. ის სიფხიზლეშიც გაუწონასწორებელი იყო და სიმთვრალეში რაღა მოუვიდოდა... როგორც გავიგეთ, სტუმარი სუფრიდან ამდგარა და გარეთ გამოსულა. როცა შებრუნებულა, გასისხლიანებული ქალი დაუნახავს - ყურებიდან სისხლი სდიოდა. რა სცენა მოუწყო ცოლს, რა დააბრალა, არ ვიცით, მაგრამ ეს უბედური სტუმარი რომ ქალს მიეშველებოდა, ამაში დარწმუნებული ვართ. ამისთვის ძალაც ჰქონდა და პატიოსნებაც. 5-შვილიან კაცს ქალის დაცვის ღირსება როგორ არ ექნებოდა? მაგრამ იმან ადგა და ის დანა, ხელში რომ ეჭირა, ამას ჩაარტყა.…ამას ალბათ, არ მოელოდა საწყალი. იმ ნაძირალამ კი მანამდე ურტყა, სანამ არ მოკლა.
- ამ დროს ყვირილის ხმა არ გამოდიოდა უბანში?
- მაგ ოჯახიდან ყვირილის ხმა ყოველთვის გამოდის... შეღამებული იყო და არაფერი გაგვიგონია. ან ვინ იყვირებდა, როცა ყურებმოჭრილი ქალი გონწასული ეგდო. მოგვიანებით, მეზობელმა ნახა ეს უბედურება და იმან გააგებინა ყველას. ქალი საავადმყოფოში გადაიყვანეს... დიდი უბედურება დატრიალდა, სახელმწიფო ალბათ, დაეხმარება გარდაცვლილის შვილებს, მაგრამ ისედაც გაჭირვებულ ოჯახში 5 ბავშვი სრულყოფილად როგორ უნდა გაიზარდოს? ბავშვებს მძიმე ფსიქოლოგიური ტრამვა აქვთ მიღებული, უყურებენ მამის ცხედარს, რომელიც მხოლოდ იმიტომ დაკარგეს, რომ ადამიანს მიეშველა. ეს მთელი ცხოვრების სტრესად გაჰყვებათ.
