27/01/2021
პასუხი კითხვაზე - მჭირდება თუ არა ფსიქოთერაპია?
მჭირდება თუ არა ფსიქოთერაპია?
თუ ახლა ამ პუბლიკაციას კითხულობ ეს ნიშნავს, რომ გაინტერესებს ფსიქოლოგია:
· ვინ ხარ? როგორი ხარ?
· საკუთარი ფიქრების და ქმედებების მიზეზები
· თუ როგორ ფუნქციონირებს ადამიანის ფსიქიკა
· ფსიქოსომატური დაავადებების გამომწვევი მიზეზები
· და სხვა
როცა რამე გვაინტერესებს, ესე იგი, კითხვები გვიჩნდება; თუმცა არსებობს უამრავი ადამიანი, ვისაც მიუხედავად სურვილისა, უჭირს საჯაროდ ან პირადად კითხვის დასმა. ვითვალისწინებ რა ამ თავისებურებებს, გთავაზობთ მზა კითხვა-პასუხს.
ვფიქრობ, დაგეხმარებათ 🙂
დავიწყებ ამით:
ვინ არის ფსიქოთერაპევტი?
ფსიქოთერაპევტი სპეციალისტია, რომელიც გვეხმარება ფსიქოლოგიური და ცხოვრებისეული სირთულეების გადალახვაში და ფსიქოსომატური თუ სხვა ნეგატიური გამოვლინებების მიზეზების აღმოჩენაში.
როგორ, რა მეთოდით გვეხმარება ფსიქოთერაპევტი?
ფსიქოთერაპევტის მთავარი ინსტრუმენტი საუბარია. პროფესიული ცოდნის გამოყენებით და საუბრით, სწორად ფორმულირებული კითხვებით, მას მიჰყავხართ პრობლემის გამომწვევ მიზეზთან. გამოდის, რომ ფსიქოთერაპევტი გეხმარებათ იპოვოთ მიზეზები და თქვენი ერთგვარი მეგზურია მათი დაძლევის გზაზე.
რაში მეხმარება ფსიქოთერაპევტი, რას მასწავლის?
ფსიქოთერაპევტი არ გაძლევთ მზა რეცეპტებს და რჩევებს, ის არ არის მასწავლებელი, ან მენტორი; ის თქვენთან ერთად ეძებს პრობლემის მიზეზს და მისი დაძლევის გზასაც; გეხმარებათ, იპოვოთ საკუთარი თავი და მიიღოთ ისეთი, როგორიც ხართ; ასევე - გაერკვეთ თქვენს ამჟამინდელ მდგომარეობაში და აღმოაჩინოთ ძალები სხვადასხვა მდგომარეობის მისაღებად ან შესაცვლელად.
როგორ მივხვდე, რომ ფსიქოთერაპია მჭირდება?
არსებობს მითი, რომ ფსიქოთერაპევტი მხოლოდ ძლიერი ფსიქიკური აშლილობის დროს სჭირდება ადამიანს, მაგრამ ეს ასე არ არის. ნებისმიერ ადამიანს, ვინც ცხოვრებისეული სირთულეების წინაშეა, თერაპია აუცილებლად დაეხმარება.
განვმარტოთ, რა ტიპის პრობლემებზეა საუბარი. ეს შეიძლება იყოს:
· განშორება
· საცხოვრებელი ადგილის, სამსახურის, სკოლის ან ინსტიტუტის შეცვლა
· დაავადება
· ძვირფასი ადამიანის დაკარგვა
· შიში, შფოთვა, ფობიები
· დეპრესია
· დაბნეულობა, გაურკვევლობა
· კომპლექსები
· სურვილების და ემოციების გაღარიბება
· ეჭვიანობა
· აგრესიის შეტევები
· დაბალი თვითშეფასება
· უმადობა ან მომატებული მადა
· კონცენტრაციის სიძნელეები
· ძილის დარღვევები
· მოტივაციის დაკარგვა
· უსიამოვნო ფიქრები
· სექსუალური ხასიათის პრობლემები
· ადიქციები (დამოკიდებულება ნებისმიერ რამეზე)
· პიროვნული განვითარების შეჩერება
· მიჯაჭვულობა სხვა ადამიანებზე
· პირადი სივრცის არ ქონა
· მიზნების არ ქონა
· ეგზისტენციალური კრიზისი
· საკუთარი თავის შეცნობის სურვილი
· საკითხი, რომელზეც ვერავის ესაუბრებით
· და სხვა უამრავი უნიკალური და ინდივიდუალური საკითხი, რომლის შესახებაც მხოლოდ თქვენ იცით
როგორ ვანდო ჩემი საიდუმლო ფსიქოთერაპევტს?
მთელი ინფორმაცია, რასაც გაანდობთ ფსიქოთერაპევტს, ასევე თქვენი ვიზიტიც მასთან, მკაცრად კონფიდენციალურია და თქვენი თანხმობის გარეშე ამ ინფორმაციას ვერ მიიღებს ვერცერთი მესამე პირი.
წამლებს თუ დამინიშნავს?
ფსიქოთერაპევტი არ ნიშნავს წამლებს. ეს ფსიქიატრის კომპეტენციაა.
რამდენი სეანსი დამჭირდება?
სეანსების რაოდენობა დამოკიდებულია საკითხზე, რომელზეც მუშაობთ, თუმცა სასურველია მინიმუმ 10 სეანსი, იმისათვის, რომ მიიღოთ თვალსაჩინო შედეგი. შემდეგ შეგიძლიათ იმდენჯერ მიხვიდეთ, რამდენიც დაგჭირდებათ და სურვილი გექნებათ. აუცილებელია ამ საკითხის პირველივე სეანსზე განხილვა და შეთანხმება ერთმანეთთან.
რამდენ ხანს გრძელდება სეანსი?
საშუალოდ 1 საათი, თუმცა მოლაპარაკების საკითხია. სეანსი შეიძლება იყოს 2-საათიანიც.
P.S. სამყაროს დღევანდელი მდგომარეობიდან გამომდინარე, აქტუალურია ონლაინ სეანსებიც.
