09/09/2025
„შენ ხარ ვენახი“ XI საუკუნეშია დაწერილი და მასში ვენახი და ღმერთი გაიგივებულია.“
"საქართველოში ქრისტიანობის შემოსვლამ ქვევრს და მეღვინეობას კიდევ უფრო განსაკუთრებული, უმნიშვნელოვანესი დატვირთვა შესძინა. ახალი აღთქმის 7 საიდუმლოში, რომელიც დააწესა მაცხოვარმა ¬ – ნათლისღება, მირონცხება, ზიარება, სინანული, მღვდლობა, ქორწინება და ზეთის კურთხევა, რაც ჟამიანობის დროს მარანშიც სრულდებოდა და ამით ქართველთა ნაშენებ და იმ დროს იავარქმნილ ეკლესიებსაც კი ცვლიდა რაღაც დროით – ღვინოს უდიდესი ადგილი უკავია. ღვინო, ისევე როგორც ქრისტიანობა, ჩვენი კულტურის განუყოფელი ნაწილია. ღვინომ ჩვენი კულტურა მრავალი მიმართულებით განავითარა და უნიკალურადაც კი აქცია. დღევანდელი ქართული კულტურა ქრისტიანული საქართველოს განუყოფელი ნაწილია, ქრისტიანობა კი ღვინის გარეშე, უბრალოდ წარმოუდგენელია.
ამიტომაც ვამბობ, რომ პრექრისტიანული საქართველოსა და ქრისტიანული საქართველოს კულტურების გამაერთიანებელი ერთადერთი უცვლელი ხაზი ღვინოა. პრექრისტიანული საქართველოდან ღვინო ქრისტიანობაში თავისი როლით გადმოდის და მას კიდევ უფრო მეტი ფუნქციური დატვირთვა ენიჭება.
ქვემო იმერეთში, ვანთან წარმოებული არქეოლოგიური გათხრების დროს აღმოჩენილია 4,500 წლის სასაფლაო, სადაც სხვადასხვა ასაკის ადამიანები არიან დაკრძალულები და კუჭთან ღვინის მჟავა ყველას ესინჯება. ეს ჩემმა არქეოლოგმა მეგობარმა მიამბო. ეს ფაქტი იმაზე მიგვანიშნებს, რომ მაშინაც კი ზიარების მსგავსი რიტუალი ღვინით ტარდებოდა, ადამიანის სამარადისო სასუფეველში გაცილება ღვინით ხდებოდა – გარდაცვალების წინ ეძლეოდათ ღვინო. არის ასეთი ფრაგმენტებიც, როდესაც იმქვეყნად მიცვალებულს ქვევრში ჩასვენებით აცილებდნენ. ეს დიდი პატივი იყო. ქვევრით გაცილების მეთოდს ჩვენი წინაპრები ქრისტიანობამდე მიმართავდნენ."
როგორია ქართული ღვინის ისტორია, ამის შესახებ ცნობილი ენოლოგი და ღვინის მკვლევარი - ლადო უზუნაშვილი ჟურნალ “ომნიას” #1 ნომერში მოგვითხრობს.
