21/12/2025
Kalaallit aassuutisiortarsimanerisa isumavia.
Kaperlaap nalaani โnunarsuaq/silarsuaโ anaanami naavinut pulaqqittarpoq, taamaattumik ullut naaliartortarput, taarnerulersarlutillu. Kaperlak isumaqarpoq โpooq pisoqarsuaqโ, takorloorneqartarsimalluni soorlu naalugiarsuup, suli erniunngitsup anaanami naavisa iluani puua.
Nunarsuaq ernioqqittarpoq, suullu tamarmik uumassusillit nutaamik inuuneqaqqilerlutik.
Unnummi โaassuutisiorfimmiโ (ullukinnersiorfimmi) itsaq inuit nalliuttorsiutigisarsimavaat inuunitoqqap naanera, inuunerullu nutaap aallartinnera. โUnnumi aassuutisiorfimmiโ silarsuarmi uumassusillit tamarmik nutaamik inuuneqaqqilersarput, inuunitoqaq qaamanitoqarlu โtoqullutikโ peeruppata, inuuneq qaamanerlu nutaaq takkutissaaq, ullorissat aassuutit qilammi takussaaqqilerneranni. Siulitta upperisatoqaat taamaassimavoq.
Silarsuup nutaamik inunngoqqinnera ullorissat โaassuutitโ oqariartuugisarpaat. Seqernup qummut aallaqqinnissaa, qaamarnullu uteqqinnissaa. Pisoq pingaartorsuaq nalliuttorsiutigineqartussaq. Inuit tamarmik nutaanik assukkersorlutik, tunissutinik tunisillutik, ullunilu tullerni nalliuttorsiornerit inngernernik, uvaajeernernik, nerrinnernik, qaminngaaqatigiinnernillu (atoqatigiinnernik) imaqartarsimapput, angutimmi arnallu imminnut atoqatigiinnerisigut aatsaat inuuneq nutaaq pilersarmat. Ulloq aassuutisiorfik illernartuummat piniartut aallaqqusaasarsimanngillat, aallassangaluarunik anersaanik toqunneqarlutik angerlanngitsuussammata.
Ukiumut qaangiuttumut qujaneq, ukioq nutaamut tikilluaqqusarsineq nalliuttorsiornerni taakkunaniippoq. Suut tamarmik naggateqarput, suulli tamarImik aamma aallartiffeqarlutik. Tassaniippoq inuunerup nigaliata naaffigalugulu aallarteqqiffia.
Juaaka Lyberth, atuakkiortoq.
Inuit ileqquinik upperisaannik oqaasinillu ilisimatusarsimasoq. ( Cand.mag).
Aallerfik: Juaaka facebookimini allataa 21. Juni, 2021. Kingusinnerusukkut KNR-imi โnunatta nipaaniโ atuarneqarpoq. Ullukinnerup kalaallini inuianni naaliuttorsiorfittut pisortatigoortumik atuutsinneqalernissaanut 2024-mi Inatsisartut akuersimmata, Inatsisartut ataatsimiittarfianni atuarneqarpoq.
PS: Singajimmik kinguaavinillu oqaluppalaamiippoq ullukinnermi qanoq kusanartigisunik atisalersortoqartarsimanersoq: โunami inuusuttoq. Tungujortorsuarnik qarlilik, kamii takisoorsuit, qarliisa ataasa qilerutaat aappalaartut annoraamernit, timimigut atisai appat qungasiinnarluinnaat, nutaarluinnaatโ ( oqaluttuartoq: Isaaja noorlermiu. Kalaallit oqaluttuaat oqalualaavilu III, 1957).
*** *** Asseq Leiff Josefsenip 2014-mi assilisaraa, Katuami inngerutinik tiffasinillu isumasioqatigiittoqarnerani.
