05/03/2025
Në këtë përvjetor të qëndresës së Prekazit, kujtojmë një familje që me sakrificën e saj sublime shkroi një nga faqet më të lavdishme të historisë sonë. Familja Jashari u bë kështjella e pamposhtur e lirisë, frymëzim për çdo shqiptar që beson në lirinë, drejtësinë dhe pavarësinë e kombit tonë!
Në këtë përvjetor, përulemi me nderim të thellë para heroizmit të tyre, duke kujtuar se liria që gëzojmë sot, nuk ishte “e lirë” por u pagua shtrenjtë me gjakun e Familjes Jashari dhe mijëra dëshmorëve të tjerë sindhe me lotët e prindërve dhe fëmijve të tyre të mbetur jetimë.
Prandaj, është detyra jonë që këtë liri të mos e marrim kurrë si të mirëqenë, por ta mbrojmë, ta kultivojmë dhe ta përcjellim te brezat e ardhshëm me të njëjtin përkushtim dhe sakrificë që treguan ata që na e mundësuan.
Për më tepër në këtë përvjetor, ndihem veçanërisht i gëzuar për brezat e rinj të sotshëm që e këndojnë natyrshëm e krenarë këngën “Mora Fjalë” dhe ndihen të çliruar nga komplekset e prindërve të tyre, të cilët, përballë okupatorit, zgjodhën bashkëpunimin ose arratisjen. Pavarësisht mungesës së lidhjeve familjare, ata krenohen me Epopenë e UÇK-së si arritjen më të madhe të kombit, që jo vetëm solli lirinë, por edhe ripërcaktoi dinjitetin e shqiptarëve në histori.
