17/12/2025
鵝唔單止係一隻企鵝，仲同一則銅鑼灣嘅傳說有關。鵝最近就從西西手縫嘅公仔身上，知道咗好多關於佢嘅得意故事～
(o(ﾟ▽ﾟ)o))
作家西西三年前離世，西西基金會整理同修復佢嘅遺物，2023年喺灣仔富德樓建立西西空間，重現佢嘅生活同寫作環境，等大家用新嘅視角認識呢位香港作家。
經歷幾個月嘅籌備，第一個展覽「西西空間：從縫熊開始」終於舉行啦！一行入去，首先見到西西歷年來眾多出版作品，再行前就睇到展覽。幾個櫃放滿晒珍貴嘅公仔，仲有佢縫熊時會用到嘅材料同書籍等等！
鵝知道西西由 2000 年初開始學習縫熊，廿年間縫過好多唔同造型、唔同種類嘅毛熊。佢哋同鵝一樣都係手造㗎，一針一線縫出嚟，軟綿綿～造形仲好百變添呀～例如《水滸傳》嘅中國服飾，亦都有美女與野獸入面嘅公主裙。鵝大時大節會換裝，不過大部分時間都只係著住披肩，睇見都好想試上身啊！
(✪∀✪)!!
鵝從來都無去過西西屋企，但置身呢個溫馨空間，已經好有親切感，就好似去咗一位識咗好耐嘅朋友屋企咁呀。今次展覽去到明年 1 月 31 號咋，有興趣嘅鵝友要把握機會喇～
(*´∀`)~♡
