24/03/2025
「網上嘈，不如落地做」。住加香港人，大家都頂L住！
#住加男人 #加拿大
救生艇變鐵達尼號
1，對於今個星期移民加拿大的香港人有兩件熱烈討論的事，一，移民部更新救生艇要2027年先處理。二，有個叫KO阿佬的KOL，出帖暗批救生艇下的KOL Brandy兩口子，引發拍片反擊。兩件事係有相連，而重點應該放係IRCC，即加拿大聯邦移民、難民及公民部。
2，KO阿佬並唔係第一個以上咗岸的心態冷眼睇呢代移民潮的KOL，比佢更出名嘅都有，唔熟書到亂咁解釋俾大家聽，收唔到PR係因為Canada Post罷工，仲叫香港人唔好集會唔好立亂嘈，慢慢等。你唔可以期望每個人都有同理心，所以呢類人唔係第一個，亦唔會係最後一個，還望各位唔好太嬲太上心，專注返刻下面臨無證、斷證等問題。
3，加拿大聯邦政府移民部2021年推出救生艇以嚟，中間經歷疫情、聯邦大選、移民部長都換過三個人，加拿大近年內部政治經濟氣氛不穩，所以我想整理好呢條救生艇點解變咗鐵達尼號，當中移民部將救生艇由臨時公共政策，正式納入H＆C（Humanitarian and Compassionate），從而令大家等候時間更長，但我必需負責任話俾各位知，對於部份人冷嘲熱諷叫加拿大做「運之國」，想當年我都要等幾耐呢種說話，移民部政策成日轉等等，唔係全無道理，但時代轉變亦唔係毫無辦法，上一代做唔到嘅事，唔代表呢一代唔得。
4，有關移民部更新救生艇要2027年後先處理到申請永居積壓事件，我哋已經喺上周五的直播解釋咗俾大家知，並唔係咩新料，而係移民部根據2024年11月18日國會移民委員會(CIMM)的會議當中，新民主黨的關慧貞議員（Jenny Kwan，救生艇推手之一）就香港人面臨斷證或永居輪候無期等問題，向IRCC官員James McNamee發炮質詢究竟救生艇處理的具體時間表，其答覆為「基本估計4年」，「根據申請數字變化，時間可長可短」、「計劃只有第一年是固定，往後可以改變亦可進行調整」從而得出驚人答案「4年」，即2028年。及後CIMM於11月25日在官網，將救生艇列入H＆C，然後於3月18日，新任移民部長Rachel Bendayan上任後更新現時大家所睇到的資訊，引來迴響。
5，有人誤解係，我已經入紙一年，仲要等2年先處理？答案係未必咁灰，首先，我唔覺得已經官僚主義的政府，國會仲要停擺緊，大選又在即，仲會專登開會要救生艇擺吓先，再者，按照移民部上月接受本地華文傳媒查詢數字所得，在11月18日的會議後的幾個月，IRCC仍有處理救生艇的審批，大概每月幾百宗申請，接照現時情況，越早入紙申請的人，理應係較快處理到，未必係個個都要等到2027或2028後先拎到永久居民，更多情況可能係2025、2026年尾班車入紙，始終官員的解釋，係指整個救生艇計劃，而非每一宗申請都要等到2027、2028。不過現時積壓的救生艇永居申請已過萬宗，按照現時速度，的確難以樂觀。我的觀察認為，未必需要真係4年，只係官腔講突好過講實，以免日後被抽秤。
6，但等候期間衍生的另一個大問題，就係Stream A＆B的簽證面臨到期，而IRCC因疫情擴充增聘的人手，對救生艇政策不熟悉，胡亂拒批（但我亦觀察到部份港人填錯填漏文件），令到好似Brandy呢類救生艇出現生活上的難題，再受無理冷嘲，於是半夜三點不忿反擊。
7，關於強者弱者成功定失敗，一個人用幾錢買風筒，返幾多份工，Chill同懶的界線同定義，人人不同，有人貴買平用，有人貪新鮮，你開心就好，況且慘過我的人同好過我的人多的是，同公眾利益無關嘅嘢比嚟做乜？我自己都未做好，真係無資格去批評人。但就Brandy及其他救生艇遇上的問題，令大家咁上心的原因係咩，要好好拆解。
8，救生艇的推出源自港區國安法於2020年6月30日刊憲後，加拿大跨黨派共識支持，於2021年2月推出救生艇（正名為Hong Kong Pathway），2021年中開始接受申請。時任移民部長Sean Fraser宣佈政策時並無提及救生艇是屬於H&C通道。只以「特別通道」形容。當時我形容「一為神功二為弟子」，經歷疫情考驗，經濟受挫、加上人口老化，加拿大對移民有需求，另外支持民主亦係加拿大的核心價值，win-win。我當時講過，想嚟嘅盡早嚟，雖則話申請截止日期是2026年8月，但政策變化、政黨輪換、大環境氣氛難以估計。但同時，由2021年正式宣佈後，要移民唔係去旅行，好多事情要盤算好，能夠動身起行，快則都一年半載，遲則可能兩三年，所以最高峰的審批簽證是2022、2023年，2024年開始回落。
9，偏偏呢三年，無論救生艇、加拿大國情、經濟，可以話經歷咗180度的轉變。我記得逢周五晚的Phone in節目，有觀眾21年入境，22年儲夠鐘，申請PR時間只是3個月。呢一批「前人」的往績，或多或少，會令到救生艇的各位會有錯誤印象，認定「幾個月」就有永居身份。但其實移民部的輪流時間，簡單講，係有彈弓手，而IRCC 200萬宗積壓非一日之寒，所以輪候時間越變越長，令救生艇後來者失預算。
10，2023年11月係救生艇災難形成的轉捩點，Sean Fraser轉任房屋部長，移民部長由Marc Miller上任，當時的救生艇輪候時間約6-12個月不等，Marc Miller上任初期曾受本地華文傳媒訪問，當時仍提及救生艇「優先處理」，但到卸任前，已拒絕接受相關訪問，「優先處理」在官網亦已經唔存在。上任部長未有提及救生艇為H&C, 亦都從2024年2月開始提及。而H&C的配額係相當低，加上未及處理積累個案，從而令救生艇等候時間更長。
11，回顧Marc Miller不足一年半的任期，而家睇返，佢嘅任務其實只有一樣：「削減移民」。Sean Fraser在任，救生艇早期，加拿大疫後自救要人，審批寬鬆，職位空缺多，但在2023年起，加拿大經歷八次加息至5％，通脹升至8％，2023年3月樓價衝破歷史新高，生活變得艱難，本地人開始對移民接受程度，由正面變負面。聯邦政府雖然於2024年初曾宣佈要吸納大量移民至3年150萬人口，其實另一邊Marc Miller上任後，開始審視學簽Free rider，過渡吸納臨時外國工人而影響民生，從而收緊不同政策。直到年中起，全國民怨上升，聯邦政府不得不在同年底宣佈削減移民配額目標20％。差不多同時期，救生艇被明文刊登為H&C類別，此通道的配額由去年13,750個將每年遞減至2027年只有4,300個。
12，部份救生艇苦主表明，唔介意等，反正都生活緊，問題係救生艇Stream A&B的簽證係有期限，當輪候時間過長會面臨無證的真空階段，產生的問題多不勝數。包括紮唔到根，究竟我去定留？呢邊無身份，有BNO仲可以揀英國，又或者你覺得香港無問題，回流返香港亦得。另外，無證即刻唔返得工、無得返學、無醫療、無車牌等如無埋對腳。上周五直播，26歲的Hanna Phone-in 確診癌症三期，需接受1年治療，但PR無期，工簽亦於9月面臨到期，慶幸的是Hanna非常正面樂觀，致電是鼓勵其他觀眾一同面對救生艇的寒冬。當然仲有其他好多唔同問題，續證黑洞家庭變得入不敷支等等。近幾個月，積壓越多、配額越少，導致輪候時間更長，陸續收到朋友或網友撤退加拿大的消息。無論你哋喺邊度生活都好，第時睇返呢幾年加拿大日子不似如期都好，學李鴻彥話齋，走過必留下痕跡，移民只係生命中的一點，往後的路仍然漫長。呢關捱唔到，祝願你哋下一關汲取經驗可以過得更好。
13，對於救生艇的心理狀況，原本大家一條船，眼見身邊有人跳船就開始擔心、動搖、焦慮。又因為救生艇門檻較以往移民項目低，人多口雜，形成新一輪移民潮，又因資訊比上兩個移民潮豐富得多，開始上演「十個救火的少年」，再演變今次罵戰。移民路從來都唔易，無論Stream A, B, C, 或者以前的投資移民、省提名、SUV、自僱人士等都會有不同問題。我哋過去5年，去過全國九省兩地區接觸以千計加港人，專業未能配對、生意難做、搵工難、入不敷支、適應主流及天氣，重點都係一個，前路未定。
14，各種重擔同時肩負再因前景未明，其實移過民的都體會過，有苦自己知，假如生活的小確幸都無埋，更容易跌入「我移民為乜？」呢種自我質疑而產生更多的焦慮，再加埋無證／被誤拒，從而令移民路更難行 。移民，本來係憧憬未來生活的一個動作，點解要變到苦行僧先係合資格？但呢點唔係花生口水戰重心，其實核心目標只係得一個，就係針對IRCC行政失誤導致救生艇眾人的產生的問題。
15，以下首先提出問題，繼而建議可行方法
一）能唔能夠基於IRCC行政處理審批時間在國情轉變下大幅延長，自動將簽證延長，簡化申請待批程序至PR申請有結果為止？既可讓IRCC減輕文書處理而引致的滯後，同時救生艇眾人可以繼續在加如常生活？
二）2021年時任移民部部長Sean Fraser提出的救生艇，未有提及是H&C類別，但後在2024年正式寫入網站，能否將整個救生艇剔出H&C？轉為配額較多的項目甚至是變回特別公共政策？
三）新任移民部長Rachel Bendayan，曾於2020年時在國會表達支持港人，繼而推動救生艇，現時在加港人在她支持過的臨時公共政策出現嚴重的生活問題，會否在就任後有任何修訂去令問題舒緩？
一人之力有限，諗到暫時係得咁多，但最基本我希望大家的要求，可以既合乎加拿大利益，又滿足到救生艇訴求，頭兩點，都有諗埋減輕IRCC行政及滯後問題，諗法未必全面，有能之仕請幫忙補充修改。至於可行方法，我知道已有組織籌備三省請願活動，亦有主動聯絡過主流傳媒希望關注報導（當然而家大選在即，好難有資源），有心人製作英語YouTube片解釋。但我希望無論點做，有幾點大家要守得穩，唔好提族裔，唔好魚蛋論，要俾橋，仲要諗埋俾IRCC，當係政策建議。請願，可以係雙向溝通，唔一定卑躬屈膝。呢度職場，小薯一樣可以俾Feedback老細。
當然會有一堆人衝出嚟講：「你哋憑咩？加拿大欠咗你架？政客都好信嘅？你有票咩？唔等得就扯啦！」。救生艇眾人生活喺加拿大，即使未係加拿大人，同樣受到《權利與自由憲章》第2條（基本自由，例如言論自由、和平集結自由）、第7條（生命、自由與人身安全的權利）以及第15條（平等權利）保障。憑嘅就係呢一點，加拿大無欠大家但保障大家爭取的自由。你爭取到，將來就會有一票。
再者，我做就五五波，唔做就零。與其網上嘈，不如落地做。
16，無論你有無身份，可以出謀獻計的就幫吓手，有時間做到義工的就幫幫忙，文書好的可以擬訂文件信件交予相關部門，人脈夠廣的就正確傳遞一吓本地社區、傳媒、國會，究竟救生艇出咗咩問題，有問題就解決，就算鐵達尼號要沉，救得一個係一個。
17，我唔知大家咩理由揀咗加拿大，但我好欣賞呢度小學教育的加分制，無論你做咩，唔係搶住批評你，而係先睇到你做咗咩，讚吓你加吓分，再提吓你有咩改善空間或者有咩難題需要協助，等你將來再好啲，而唔係好似我細時讀書咁，100分滿分做基礎，錯就扣分，100分係應份，99分就係有錯嘅扣分制。呢場罵戰，對我嚟講，係後者。我希望多啲人做到前者，但智慧係可遇不可求，我都無，所以佛系算。
18，最後，我想講，救生艇當然都會有搭順風車又老奉的人，從而令部份老華僑睇得好唔順眼，一位生活喺度30年本地NGO負責人同我講過，政府批出的預算，其實無包救生艇港人，但知道時移勢易香港轉變急速而形成的移民潮，自己私底下左掉右掉都希望撥出資源幫到呢班香港人，開設好多模擬見工班、英語班，報稅班呢種在地生活的服務，但遇上投機又唔客氣嘅人，都有試過灰心，大家傾咗陣，結論係，如果你係救護員，意外現場大批人等你救，你會揀危急的人先救，定性格優劣去先救？結果佢而家仍然做緊同一樣工作。
無呢代新移民，又點會多咗咁多美食、生意機會俾呢班老華僑？
無呢批老華僑，喺加拿大做開荒牛，呢代又點會有咁多服務、專業、美食等大家生活易過返啲？
對我嚟講，新舊世代唔係必然會發生問題，仲可以互補不足，單花生係人格問題，無必要演變成世代之爭。雖然準備入春，但救生艇的寒冬路仲有一段，各位起碼都捱過呢個冬天，另一個冬天惟有見步行步，共勉。
