26/10/2023
我點睇JMS四部未來跑車？
尋日有關Japan Mobility Show，豐田FT-Se、本田Prelude Concept、日產Hyper Force Concept同萬事得Iconic SP Concept四部跑車完全响FB「洗版」。我個人真係好高興日本各大車廠重視返跑車市場，唔再一味推出各式各樣嘅SUV，同埋投放更多心力响新能源汽車上面，老實講日本電動車真係處於落後位置，真係要急起直追喇！不過有關於呢四部「概念車」，全部唔係「不日上映」，就係跟本明顯唔會推出，呢點真係有D失望，大家有興趣不如一齊討論吓。
Honda Prelude Concept
四部車之中，Prelude Concept就真係最「虛」嘅一部，可以同大家分享吓，通常車展擺出嚟嘅Concept Car，如果玻璃位全黑封窗的話，好大機會只係一部「泥塑」作品。呢類型車可以話係非常初型，只係比設計草圖好D，叫做有件1:1實物俾老細真D再方便俾意見。不過Prelude Concept廠方乜資料都冇俾，只知話係一部純電車，會繼續努力開發咁話。推出機會就唔講喇。不過海外車評有一句我幾認同，就係Prelude Concept如果放响本田度吸引力就唔算好高，但如果換個豐田章，改名叫Prius Coupe的話，可能會有更加大嘅驚喜感。
Nissan Hyper Force Concept
外型設計完全冇誠意可言，側身車窗完全嚟自R35線條，車頭嘅頭鏟好似返咗去八十年代長谷見昌弘揸果部R30戰車咁。1,000kW馬力其實都係吹水多，因為冇實際資料數據嘅支持，話佢係未來嘅GT-R 36？機會更微，或者只係一部「不日上映」嘅車款。
Mazda Iconic SP Concept
四部車之中，以呢部線條最靚，我自己最鍾意。不過成部車有濃厚嘅Ferrari同Lotus嘅味道，特別係個車尾。動力係轉子引擎增程油電混合，馬力370匹。萬事得一向最心知將自己品牌+跑車+轉子引擎就係等於「流量密碼」，更何況話佢係MX-5後繼車型就一定可以俾車迷洗版。不過，佢嘅Concept Car要變成真車，一向都要等得比較耐，2015年部RX-Vision去到2020年RX-9當時話好快會出，結果2023就快完都仲未有聲氣，果班大叫「Shut up And Take My Money」嘅車迷應該變晒「長頸鹿」。呢部 Iconic SP Concept，我只可以話大家要等等等等等......！
Toyota FT-Se
四部車之中，我覺得最有機會變成真嘅，應該只係得呢部。不過，大家都唔好咁快開心住，當年豐田由FT-86 Concept到真正推出GT-86都用咗差唔多5年，而FT-1 Concept變Supra A90又係5年，所以 FT-Se就算真係變成電動版嘅MR-2，都可能仲要D時間。不過廠方話電池比bZ4X嘅細D、輕D同薄D，連摩打放响中間位置令部車能夠有中置引擎嘅重量分佈同埋駕駛感，呢點好吸引，另外仲有就係電池生產成本可以比宜家平40%，對車迷嚟講都係一個好消息嘅。
