https://www.facebook.com/107049654432922/

News Insight Hong Kong, Wan Chai (2025)

24/07/2025

25/7/2025
動漫電玩節開鑼在即參展商嚴陣以待

為期五日嘅香港動漫電玩節，將會喺今朝10點，喺灣仔會展開鑼。參與今屆動漫電玩節嘅參展商，有160家。至於個人參展者，就有610位。另外，「香港國際潮玩博覽」、「國際漫畫大師會」、「國際漫畫展」，以及「香港世界同人祭」，亦會同步舉行。

同以往一樣，今屆香港動漫電玩節會場嘅開放時間，會由朝早10點開始。由今日開始到下星期一，會場會開放到夜晚9點。至於喺下星期二，會場就會提早一個鐘頭，喺夜晚8點關閉。

#香港動漫電玩節
#灣仔會展
#香港國際潮玩博覽
#國際漫畫大師會
#國際漫畫展
#香港世界同人祭

24/07/2025

24/7/2025
首試即場包燒賣手打檸檬茶戴祖儀望小朋友放膽去嘗試

Joey戴祖儀早前獲邀出席太子一間商場嘅宣傳活動。期間佢唔單止即場同小朋友一齊整手打檸檬茶，仲親手包咗一隻又大又多餡嘅燒賣。唔少當日在場嘅fans，都睇到流晒口水。

擁有法律系背景嘅Joey，坦言今次嘅實戰經驗，同佢當年喺律師行實習期間嘅嚴肅氣氛，有相當大分別。畢竟，無論係包燒賣，抑或係製作手打檸檬茶，兩者都好講求雙手嘅靈巧程度。要達致最佳嘅效果，往往需要花時間去累積經驗。身為藝人嘅Joey又認為，今時今日佢呢個身份，可以為佢帶嚟好多機會，嘗試去涉足一啲過往從未接觸過嘅範疇。被問到呢一刻有乜嘢佢最想親身去嘗試，Joey二話不說，即刻答「拍古裝」。原來佢富有時代感嘅外型，可能係令佢至今仍然未有機會以古裝公開亮相嘅原因之一。Joey深信，佢可以透過演技去進行搭救。就算要喺大熱天時拍攝外景，佢都會義不容辭。

Joey亦寄語當今嘅家長，應該放膽畀小朋友，作出多方面嘅嘗試。雖然過程當中，難免會有闖禍嘅時候。不過，從錯誤中學習嘅過程，往往可以令一個人嘅內心，成長得更強大。

#手打檸檬茶
#燒賣
#拍古裝
#放膽嘗試
#從錯誤中學習

23/07/2025

23/7/2025
鍾雪瑩伙蔡思韵出新書書展簽名會過百人輪候

近年同樣喺影壇備受矚目嘅鍾雪瑩同埋蔡思韵，噚日就一齊去到踏入最後一日運作嘅香港書展會場，出席佢哋聯手推出嘅新書《種菜日記》簽名會。過百名支持佢哋嘅讀者，一早就已經喺攤位排隊輪候。由於人數太多，龍尾一度伸延到對面另一組參展攤位。

單憑《種菜日記》呢個書名，大家未必會想像到呢本書嘅主要內容，其實係圍繞住鍾雪瑩同埋蔡思韵，喺過去一年裡面，透過佢哋之間嘅對話，而記錄低嘅成長歷程，以及當中嘅反思。對於原定喺上星期日舉行嘅新書簽名會，因為颱風韋帕襲港而被逼改期之後，仍然可以吸引到過百名讀者到場支持，佢哋兩位多番向讀者致謝嘅同時，亦對於成功爭取到咁熱烈嘅反應，感到既驚且喜。

蔡思韵同鍾雪瑩都希望，透過《種菜日記》呢一本書，可以令讀者識得喺日常生活當中尋找快樂，同時互相陪伴身邊嘅人。被問到日後有無打算推出其他題材嘅書籍，蔡思韵同鍾雪瑩就異口同聲表明，現階段仍然會將事業重心，投放喺電影事業。

#種菜日記
#鍾雪瑩
#蔡思韵
#香港書展
#簽名會
#韋帕襲港
#尋找快樂
#互相陪伴

23/07/2025

23/7/2025
韋帕襲港期間撞招商局碼頭觀光客輪「海龍明珠」今被拖走

日前喺颱風韋帕襲港期間，被吹到堅尼地城招商局碼頭，並且發生碰撞嘅觀光客輪「海龍明珠」號，喺遇事位置停泊超過兩日之後，已經喺今日下晝被拖船拖走。

原本停泊喺西九龍對開海面嘅「海龍明珠」號觀光客輪，喺2010年抵港。過往佢曾經行走由灣仔會展新翼開出嘅維港遊航線，不過自疫情喺香港爆發之後，「海龍明珠」號已經被閒置一段長時間。

#海龍明珠
#觀光客輪
#颱風韋帕
#韋帕襲港
#堅尼地城
#招商局碼頭

23/07/2025

23/7/2025
迪士尼公主仲夏花園暑假進駐新都城中心

四位風靡全球嘅迪士尼公主，由而家去到8月31號，會進駐位於將軍澳MCP新都城中心嘅「迪士尼公主仲夏花園」，陪大家一齊歡渡暑假。

喺超過5000朵仿真花藝設計嘅襯托之下，來自《仙履奇緣》嘅Cinderella灰姑娘、《魔髮奇緣》嘅Rapunzel樂佩、《小魚仙》嘅Ariel艾莉奧，以及《阿拉丁》嘅Jasmine茉莉，會齊集喺「迪士尼公主仲夏花園」，綻放佢哋嘅獨特魅力。安放喺花園裡面嘅1:1經典魔法南瓜車，更加係一個不容錯失嘅打卡位。

對於有收藏迪士尼公主主題精品嘅朋友嚟講，同場開設嘅期間限定店，絕對不容錯過。超過600款迪士尼公主系列精品，相信會令到一眾鍾情於迪士尼公主主題精品嘅朋友，出現選擇困難症。當中有部份由日本直送到香港嘅浴衣套裝、仲夏泳裝，同埋文具精品，更加係全港獨家發售𠻹㗎！

#迪士尼公主仲夏花園
#仙履奇緣
#灰姑娘
#魔髮奇緣
#樂佩
#小魚仙
#艾莉奧
#阿拉丁
#茉莉
#魔法南瓜車
#期間限定店
#浴衣套裝
#仲夏泳裝
#文具精品
#全港獨家發售

22/07/2025

22/7/2025
退役巴士參與電影《我們不是什麼》拍攝

繼上星期有一部被「炸毀」嘅退役雙層巴士，喺銅鑼灣威非路道，參與邱禮濤電影《我們不是什麼》嘅拍攝工作之後，另一部狀態完好嘅同款退役巴士，今日就喺同一位置，拍攝其他戲份。

雖然參與今次電影拍攝工作嘅退役巴士，喺四年前已經退出載客行列。不過，拍攝單位為求逼真，無論係車身標誌、車廂標貼，甚至車長嘅制服，設計上同呢部退役巴士原本隸屬嘅巴士公司，都有一定程度嘅相似之處。至於今日有份到場參與拍攝嘅主要演員，就至少包括黃又南，朱柏謙，以及早前喺電視劇《哪一天我們會紅》當中，憑住演繹角色Kimchi，而備受各界注目嘅Serene林宣妤。

#我們不是什麼
#邱禮濤
#電影拍攝
#銅鑼灣
#威非路道

#黃又南
#朱柏謙
#哪一天我們會紅

21/07/2025

22/7/2025
台灣職棒啦啦女孩芮絲星岑旋風訪港

兩位台灣職棒啦啦女孩—「真人版娜美」Lavender星岑，以及「元氣甜心」Iris芮絲，日前專程飛嚟香港，並且先後去到一間百貨公司嘅兩間分店，出席「一日店長」活動。唔少想一睹佢哋兩位芳容嘅fans，一早就已經去到百貨公司排隊，務求爭取機會同佢哋進行近距離接觸。

芮絲同星岑今次訪港嘅行程，只有三至四日。期間佢哋曾經去過喺灣仔會展舉行嘅香港書展，並且出席寫真集簽名活動。佢哋喺接受傳媒訪問期間就形容，今次聯同品牌合作拍攝嘅泳衣寫真相片，如果論性感程度，其實未及得上其他人出版嘅寫真書。

#台灣職棒啦啦女孩
#真人版娜美

#元氣甜心

#一日店長
#香港書展
#寫真集
#簽名會
#泳衣寫真

21/07/2025

21/7/2025
721元朗恐襲六週年元朗站有軍裝警察駐守

今日係721元朗站恐怖襲擊事件六週年。喺當年爆發事件嘅港鐵元朗站，連接東頭村天橋嘅出口，傍晚時份就有幾名軍裝警員在場駐守。

六年前發生嘅721元朗站恐怖襲擊事件，其中一幕最令人印象深刻嘅場面，正正就係兩名軍裝警員，斯斯然沿住通去東頭村嘅行人天橋，離開元朗站嘅一刻。唔少市民至今依然認為，721元朗站恐怖襲擊事件，係警民關係跌到完全互不信任嘅其中一個重點分水嶺。

#721元朗站恐怖襲擊事件
#元朗站
#東頭村
#軍裝警員
#警民關係
#互不信任

21/07/2025

21/7/2025
韋帕襲港引致大量航班延誤機管局有信心今日內可疏導

隨住熱帶氣旋韋帕進一步遠離本港，天文台已經喺今日清晨5點10分，取消所有熱帶氣旋警告信號。

喺韋帕襲港期間，大批原定抵港或者離港嘅航班，一度需要停飛，或者出現延誤。機管局預計，喺今晚午夜之前，仍然有至少1076班航班，有待安排升降。機管局有信心喺今日裡面，可以處理哂所有受韋帕襲港影響，而滯留喺機場嘅旅客。

#香港國際機場
#機場管理局
#韋帕襲港

20/07/2025

21/7/2025
無視韋帕襲港堅決亞博開Show RIIZE演唱會主辦方成眾矢之的

對於見慣風浪嘅香港人嚟講，大型活動嘅主辦單位，如果喺活動舉行當日，遇上惡劣天氣，基本上點都應該會有一系列嘅應變方案。不過，噚晚喺亞洲國際博覽館舉行《Riizing Loud》演唱會嘅韓國男子組合RIIZE，主辦單位喺颱風韋帕襲港期間，對外公佈嘅惡劣天氣應對方案，唔單止令一眾買咗飛嘅歌迷怨聲載道，有人甚至形容主辦單位今次嘅做法，係顛覆咗香港人對「大型活動應對惡劣天氣方案」嘅應有認知。

根據原定計劃，RIIZE噚日舉行嘅《Riizing Loud》演唱會，應該喺黃昏六點開始。不過，自從天文台喺噚日凌晨時份，發出八號東北烈風或暴風信號之後，本港廣泛地區嘅天氣狀況，都受到颱風韋帕影響，而變得相當惡劣。雖然天文台一早已經表明，八號烈風或暴風信號，以及更高嘅熱帶氣旋警告信號，會喺噚日日間嘅大部份時間維持。之但係RIIZE演唱會嘅主辦方，竟然喺天文台發出十號颶風信號之後，仍然透過社交平台公佈，演唱會將會依時喺黃昏六點舉行。此話一出，唔少買咗飛嘅歌迷，都感到極度錯愕。皆因喺十號颶風信號生效期間，所有往來亞洲國際博覽館嘅對外公共交通工具，都已經暫停服務。主辦單位嘅決定，唔單止置觀眾嘅人身安全於不顧，同時亦明顯無顧及當時嘅實際情況。

中午過後，主辦單位就喺社交平台表示，如果去到噚日黃昏六點半，八號烈風或暴風信號仍然生效嘅話，RIIZE演唱會就會「最終取消」。本來，如果根據主辦單位呢個講法，基於喺噚日下晝四點十分生效嘅八號東南烈風或暴風信號，要去到夜晚七點四十分，先至被三號強風信號取代。如果單純靠字面去理解，呢場RIIZE演唱會，其實理應被取消。之不過，到咗噚日黃昏時份，主辦單位居然以「考慮到已經抵達場館的各位觀眾」為由，宣佈演唱會將會延遲到夜晚九點先至開始。結果有唔少買咗飛嘅歌迷，唯有喺八號烈風或暴風信號仍然生效嘅情況下，起程去亞洲國際博覽館。部份歌迷基於安全考慮，最終唯有決定放棄入場。

無論係最終成功「達陣」亞洲國際博覽館嘅歌迷，抑或係基於安全考慮，而決定放棄入場嘅觀眾，對於主辦單位今次聲稱「以大家嘅安全作為最優先考量」嘅決策，絕大部份人都怨聲載道。佢哋質疑，主辦單位喺明知颱風韋帕，會影響香港一段時間嘅情況下，仍然唔肯取消今次演唱會，唔單止有違一般大型活動嘅主辦單位，應對惡劣天氣嘅慣常做法，同時明顯係將主辦單位嘅商業利益考慮，凌駕喺入場觀眾嘅人身安全之上。

#亞洲國際博覽館
#八號烈風或暴風信號
#十號颶風信號
#颱風
#韋帕
#惡劣天氣應對方案
#人身安全

20/07/2025

20/7/2025
韋帕已登陸台山巿沿海三號強風信號現正生效

天文台已經喺夜晚7點40分，改發三號強風信號。天文台指，雖然熱帶氣旋韋帕已經進一步遠離本港，並且逐漸減弱。不過本港廣泛地區，目前仍然受到強風影響。預計三號強風信號，將會維持一段時間。

根據中國中央氣象台嘅公佈，熱帶氣旋韋帕已經喺今日下晝5點50分左右，喺廣東省台山市沿海登陸。喺登陸嗰一刻，韋帕嘅最高持續風速，大約有每小時119公里。

而喺韋帕襲港期間，天文台喺本港多處地區，都錄得介乎烈風至颶風程度嘅風力。天文台形容，相比起喺2023年襲港期間，一度令天文台需要發出十號颶風信號嘅超強颱風蘇拉而言，今次韋帕襲港期間，本港整體嘅風力大致相約。

#三號強風信號
#天文台
#熱帶氣旋
#韋帕
#中國中央氣象台
#廣東省
#台山市
#十號颶風信號
#超強颱風
#蘇拉

20/07/2025

20/7/2025
天文台改發八號東南烈風或暴風信號

天文台已經喺下晝4點10分，改發八號東南烈風或暴風信號。

天文台指，颱風韋帕正逐漸遠離本港。目前本港嘅風力正逐步減弱，不過同韋帕相關嘅雨帶，正為本港帶嚟頻密嘅狂風大驟雨。

喺度提提大家，紅色暴雨警告信號，雷暴警告，以及新界北部水浸特別報告，現正同時生效。

#八號東南烈風或暴風信號
#天文台
#颱風
#韋帕
#狂風大驟雨
#紅色暴雨警告信號
#雷暴警告
#新界北部水浸特別報告

News Insight Hong Kong

24/07/2025

24/07/2025

23/07/2025

23/07/2025

23/07/2025

22/07/2025

21/07/2025

21/07/2025

21/07/2025

20/07/2025

20/07/2025

20/07/2025

Address

Website

Alerts

Contact The Business

Shortcuts

Share

Category