18/08/2025
的士、網約車與感情關係：我們看不到的啟示
香港的士，好多人都會投訴：車舊、拒載、飛車、司機態度差，搭程車經常換來一肚氣，卻又繼續忍受，因為無得揀。
的士司機也有佢哋嘅困境。工時長、收入唔穩定，牌價跌，車租無跌，加上網約車嘅競爭，影響佢地收入，不難理解大多的士司機都齊聲反對網約車。
直到網約車出現，大家先發現——原來可以有選擇。
我以前常常搭的士，遇過不少態度好又有耐性的好司機，但更多的是態度一般的司機。現在大多uber叫車，因為安心一些。網約車司機態度也參差，有不少經驗淺的新手司機常走錯路，但整體也算好些。
你有無諗過，點解自己咁多年都習慣咗「差」，仲當係理所當然？
感情關係，其實好似香港的士。
好多時候，我哋留喺一段唔開心、甚至消耗自己嘅關係，唔係因為覺得好，而係因為覺得「冇得揀」。
有啲人日日受冷漠對待，有啲人長期活喺無止境嘅爭吵裡面，有啲人感覺被忽視、冇被尊重，但依然話服自己：「算啦，現實就係咁，繼續忍啦。」
結果，就好似硬係搭上一架唔舒服嘅的士，雖然知道唔好，但依然話：「冇選擇吖嘛。」
但事實係——人生，永遠都有選擇。
網約車來港，多年來引起好多爭議，激起好多車主和的士司機的反對。但多年下來，網約車用服務贏了得多客人。就算唔係好好，但也算有改善。
的士提醒我們，一件事差，唔代表冇更好嘅選擇。
愛情亦如是。
你可以選擇離去，可以選擇重新出發，可以選擇用一個全新嘅態度同習慣去經營。
你有自由，唔需要被困喺「無選擇」嘅幻覺裡面。
真正嘅愛，唔係勉強留下。
被迫留下，只會變成習慣、依賴，甚至枷鎖。
真正嘅愛，是在自由的空間下，仍然揀你。
唔係因為「要」，唔係因為「冇辦法」，而係因為「想」。
所以，當一個人話：「我同你一齊，因為我冇選擇。」——其實已經唔係愛。
愛，應該係：「我可以走，但我唔想走。我有自由，但我選擇留低，因為我想同你繼續行。」
香港人太多時候，被困喺「冇選擇」嘅心態。
工作如是，生活如是，感情亦如是。
但其實，選擇權一直都喺你手上。
下一次，你問自己：
你而家嘅關係，係因為「冇得揀」定係因為「我真心想揀」？
呢個答案，會決定你哋嘅愛，到底係枷鎖，定係自由。
立即到我首頁下載我的免費關係指南，尋找持久愛情!
