27/05/2026
𝐋𝐚𝐭𝐢𝐛𝐨𝐧𝐢𝐭 : 𝐌𝐒𝐏𝐏 𝐥𝐚𝐧𝐬𝐞 𝐦𝐢𝐧𝐢 𝐤𝐚𝐧𝐩𝐚𝐲 𝐯𝐚𝐤𝐬𝐢𝐧𝐚𝐬𝐲𝐨𝐧 𝐤𝐨𝐧𝐭 𝐝𝐢𝐟𝐭𝐞𝐫𝐢 𝐩𝐨𝐮 𝐩𝐥𝐢𝐬 𝐩𝐚𝐬𝐞 𝟗𝟏 𝐦𝐢𝐥 𝐭𝐢𝐦𝐨𝐮𝐧
𝐑𝐚𝐝𝐢𝐨 𝐊𝐢𝐬𝐬 𝐅𝐌 𝐇𝐚𝐢̈𝐭𝐢, 𝟐𝟕 𝐦𝐞 𝟐𝟎𝟐𝟔 — Ministè Sante Piblik ak Popilasyon (MSPP), atravè Direksyon Depatmantal Sanitè Latibonit (DSA), lanse ofisyèlman, mèkredi 27 me 2026 la, yon mini kanpay vaksinasyon kont difteri. Objektif prensipal inisyativ sa a se rive vaksinen 91,577 timoun nan plizyè komin depatman Latibonit la.
Nan kad seremoni lansman an, Direktè Jeneral MSPP a, Doktè Gabriel Timothé, ki te akonpaye ak plizyè kad nan sistèm sanitè a, fè konnen kanpay la ap dewoule an plizyè faz pou asire tout timoun ki vize yo rive jwenn sèvis vaksinasyon an.
Daprè eksplikasyon li, premye faz la ap konsantre sou timoun ki nan lekòl, sitou sila yo ki gen laj ant 6 rive 15 lane. Nan yon dezyèm faz, ekip medikal yo pral deplwaye nan kominote yo pou idantifye epi pran an chaj timoun ki pa lekòl, yon demach ki vize ogmante kouvèti vaksinasyon an epi garanti siksè kanpay la.
Otorite sanitè yo presize kanpay sa a ap fèt sitou nan komin Gonayiv, Ennri ak Machann Desalin, kote risk pou pwopagasyon difteri a pi elve.
MSPP lanse yon apèl bay Direktè etablisman eskolè, paran ansanm ak responsab kominotè yo pou kolabore ak ajan sante yo, yon fason pou tout timoun ki konsène yo ka resevwa vaksen an nan delè ki fikse a.
Roody Cléophat
[email protected]
Radio Television Caraibes Ministère de la Santé Publique et de la Population Primature de la République d'Haïti Radio Télé Megastar
