02/06/2026
Gonayiv an limyè : yon seremoni vodou pote omaj grandyoz pou manman yo
Dimanch 31 me 2026, vil Gonayiv te viv yon moman ki make listwa sosyal ak kiltirèl li, kote sèvitè ak sanba Roberd Destiné te rasanble plizyè dizèn manman nan tanp Papa Pyè Danmbala pou rann yo omaj nan yon seremoni chaje emosyon, rekonesans ak valè tradisyonèl.
Nan yon anbyans ki melanje sakre ak solidarite, tanp Papa Pyè Danmbala ki chita kò l nan Gonayiv, ri libète te tounen sant yon selebrasyon espesyal nan onè manman yo. Se anba direksyon sanba Roberd Destiné, yon figi enpòtan nan vodou ayisyen an, seremoni sa a te dewoule avèk anpil disiplin ak respè pou prensip espirityèl yo.
Depi nan kòmansman aktivite yo, patisipan yo te plonje nan yon atmosfè kote rit, chante ak dans tradisyonèl yo te bay ton an. Manman ki te prezan yo te resevwa benediksyon espirityèl, pandan seremoni an te mete aksan sou plas yo nan sosyete a kòm poto mitan fanmi ak kominote a.
Youn nan moman ki te plis touche asistans lan se te prezans manman pa Roberd Destiné li menm. Prezans sa a te bay evènman an yon dimansyon plis entim ak senbolik, kote respè pou manman te pran yon sans pwofon, pa sèlman nan pawòl men nan aksyon.
Nan yon jès konkrè solidarite, plizyè manman te resevwa kado kòm siy rekonesans pou sakrifis yo fè chak jou. Distribisyon kado sa yo te fèt nan yon lespri pataj, ki reflete valè kolektivite ak lanmou ki makonnen ak tradisyon vodou a.
Plizyè temwen ki te asiste seremoni an pa t kache satisfaksyon yo. Yo dekri aktivite a kòm yon modèl inisyativ ki mete kilti ak respè pou fanm nan sant devlopman sosyal. Pou anpil ladan yo, se yon egzanp ki merite repwodui nan lòt rejyon peyi a.
Seremoni omaj sa a vini kòm yon rapèl enpòtans manman nan lavi pèp ayisyen an, pandan li montre kijan espas espirityèl yo kapab sèvi kòm zouti pou ranfòse lyen sosyal yo. Atravè inisyativ sa a, sanba Roberd Destiné kontinye make angajman li nan pwomosyon valè kiltirèl ak imanitè yo nan kominote a.
Nan yon kontèks kote sosyete a ap chèche repè, aktivite konsa pote yon souf espwa, kote rekonesans, inite ak tradisyon vin mare ansanm pou selebre lavi ak diyite fanm ayisyèn.
Charles Édouard Mondélus!
