24/09/2026
Chè Juliette JP Francisque ,
Komite Miss Saint-Jean, atravè selil kominikasyon li, pa sispann site non w, pale de ou nan diskisyon li yo. Si yon jou ou ta sispèk zòrèy ou ap sonnen, konnen se nou k ap site non w.
Nou site non w an byen, pa an mal. Nou site non w pou sa w ye, pou sa w reprezante pou Jan Rabèl, e sitou pou sa w reprezante pou Miss Saint-Jean.
Aprè plis pase 6 mwa lwen teren an pou rezon sante, nou reyalize ki kalite vid absans ou kreye, e nou reyalize pi plis toujou ki kalite fòs ou reprezante pou kominote a.
Pwoblèm sante a fè w pa t kapab viv dezyèm edisyon Miss Saint-Jean nan fason ou ta renmen an. Ou pa t kapab la pou temwen bèl moman sa yo, ni pou apresye tout bèl imaj ak bèl inisyativ aktè nan domèn espò Jan Rabèl yo te pote pandan vakans lan, ni patisipe jan ou ta renmen nan lavi sosyal ak fizik kominote ou renmen anpil la.
Men, menm lè ou lwen teren an, plas ou nan kè kominote a rete la.
Nan moman difisil sa yo, Miss Saint-Jean pa sispann mande gerizon pou ou. Nou pa sispann mande Mèt Lavi a pou li pwolonje jou ou yo san doulè, ba ou plis fòs, plis kouraj ak plis rezistans moral pou travèse moman difisil sa yo.
Fanm vanyan, Fanm kanson, gen anpil bagay ou poko fè. Gen anpil konsèy ou poko pataje ak kominote w. Gen anpil batay ki poko fini.
Se vre, wout la rèd. Li ka pote doulè, li ka mande anpil kouraj. Men nou kwè nan fòs ou. Nou kwè nan kapasite w pou leve ankò.
Menm apre 17 so, n ap toujou kwè w ap leve kanpe pi rèd.
Nou se Juliette.
Sante pou Juliette. 🙏🏾❤️
