04/11/2025
🇭🇹 NÒT ENFÒMASYON OFISYÈL – MERI MILO
Meri Milo ap enfòme popilasyon an ke, nan kad bon fonksyònman komin nan, gen kèk desizyon enpòtan ki pral pran nan jou k ap vini yo. Desizyon sa yo se pou amelyore sèvis yo epi garanti pi bon kondisyon lavi pou tout sitwayen.
Aprè analiz bidjè nou ak nesesite sèvis yo, nou konstate gen gwo difikilte pou kenbe anplwaye yo, peye yo alè, epi asire prezans chak jou nan travay. Lè yon ajan vwari nan komin nan ap touche mwens ke salè minimòm, li difisil pou mande li yon sèvis regilye ak efikas. Se youn nan rezon ki fè gen reta nan plizyè sektè nan komin nan.
Pou n amelyore sitiyasyon an, nou pral mete an aplikasyon mezi pou ranfòse koleksyon taks yo. Sa ap pèmèt nou peye anplwaye yo regilyèman, asire sèvis netwayaj, sekirite, amenajman wout, ekleraj, ak lòt sèvis kominotè. Fòk nou sonje: se grès kochon an ki kwit kochon an.
Anplis, nou vle raple popilasyon an ke Meri a fonksyone grasa kontribisyon kontribyab yo. Si w pa peye enpo lokatif, patant, otorizasyon pou konstriksyon, fonksyònman, afichaj, pa p ka gen sèvis. Se pou sa, nou swete tout moun pran responsabilite sitwayèn yo epi kolabore.
Sou kesyon lòd piblik la, Meri a pral mete Polis Minisipal la an fonksyon pou :
– Pwoteje byen piblik yo tankou twotwa, pon, espas vèt
– Regle aktivite ki mete popilasyon an an danje
– Evite konfli epi fasilite dyalòg
_ Pou evite konstriksyon anachik nan tou lè 3 seksyon yo sòti Lory (Odikap) rive jis Sitadèl.
Polis Minisipal la pa la pou konfwontasyon. Li la pou ede, oryante, ak kolabore avèk popilasyon an. Men pou li egzekite wòl li, fòk chak sitwayen respekte règleman yo.
Dènyèman, gen plent sou aktivite car wash ki ap domaje twotwa ki fèt pou pyeton yo. Meri a pral pran mezi pou pwoteje espas piblik sa yo. Nou mande tout moun konprann se pa kont pèsonn nou ye, men pou enterè tout kominote a.
Nou konstate tou gen refi pou peye taks nan plizyè zòn. Nou raple tout moun ke san taks pa gen sèvis. Nou bezwen kolaborasyon nou pou pwogrè.
Meri Milo mande popilasyon an:
– Sipò nan aplikasyon nouvo mezi yo
– Respè règleman komin nan
– Kolaborasyon ak Polis Minisipal la
– Patisipasyon nan pwoteksyon byen piblik yo
Objektif nou se mete lòd, ofri plis sèvis, epi avanse komin lan.
Nap kontinye nan dyalòg, transparans, ak respè.
Pou Milo avanse, fòk nou travay ansanm.
Popilasyon an mande sèvis, men pou gen sèvis, sa mande pou nou tout kontribye. Fòk enstitisyon Milo yo peye taks minisipal yo. Nan tan k ap vini yo, meri a pral pibliye lis enstitisyon ki peye taks yo pou popilasyon wè klè ki enstitisyon ki ede komin nan, kiyès ki pa ede komin nan.
Yon nouvo meri pou plis sèvis ✊🏾
© Mairie de Milot - Nord - Haiti
