02/04/2026
KONSÈY MINISIPAL (ELICIA MILFORT)
Sou direksyon Majistra Elicia Milfort, an kolaborasyon ak Thelemaque Henry Claude ak Jacques Bernadin,
Konsèy minisipal Milot la prezante bilan jeneral aksyon li yo, ki makonnen ak devlopman lokal, amelyorasyon sèvis piblik ak modènizasyon administrasyon kominal la, epi gras yon refòm yo anklache nan meri a ak yon plan kominal pou devlopman komin nan yo elabore. Men kèk reyalizasyon konsèy minisipal ki t ap dirije pa Elicia Milfort :
1. Enfrastrikti ak amenajman iben
__ Konstriksyon Place de la Reine nan sant vil la, grasa soutyen pwojè PAST.
__ Amenajman ansyen batiman Meri Milo a nan kad pwojè MDUR, ansanm ak ranfòsman kapasite administratif la ak ekipman pou chak sèvis.
__ Betonaj plizyè ri nan sant vil la, tankou :
__ Site Salem
__ Ri Grégoire Dorvil
__ Ri Vadius Étienne
__ Dignitaire 2
__ Ri de la Reine prolongée
__ Aménagement ak antretyen wout nan seksyon kominal yo fèt regilyèman.
2. Enèji ak ekleraj piblik
__ Enstalasyon 74 lanpadè nan twa seksyon kominal yo ak nan sant vil la rive jiska Chwazèy.
__ Lansman pwojè elektrifikasyon nan premye seksyon Perches-de-Bonnet, finanse atravè fon kominal (MICT).
__ Konsèy la te pran dispozisyon pou garanti bon jan egzekisyon pwojè a, avèk yon retansyon 500,000 goud ki rete sou kont meri a jiskaske travay yo fini.
__ Nan kad patenarya ak GRAHN-Monde ak ISTEAH, twazyèm seksyon an (Génipailler) sou wout pou benefisye kouran 24/24, avèk ekstansyon pwogresif nan lòt seksyon yo.
3. Dlo potab ak anviwònman
__ Amenajman rezèv dlo Nasis ak ekstansyon liy distribisyon an rive Dikòs.
__ Lansman operasyon pou konbat konstriksyon anachik ak pwoteje kanal drenaj yo, pou limite risk inondasyon epi amelyore imaj vil touristik la.
4. Òganizasyon mache ak devlopman ekonomik
__ Delokalizasyon mache enfòmèl ki te devan espas lopital la, an patenarya ak Hôpital Sacré-Cœur de Milot pou kreye yon nouvo mache ki fonksyonel nan nouvèl antre lopital la.
__ Konstriksyon yon mache modèn nan Dignitaire 3 (an kou).
__ Validasyon yon pwojè drenaj ak gabyonaj rivyè bò mache a, finanse pa Ministè Enteryè a pou yon montan 16 milyon goud, pou pwoteje enfrastrikti a kont inondasyon.
5. Edikasyon ak enfrastrikti sosyal
__ Planifikasyon pwojè amenajman Lekòl Nasyonal Bòd (1ère seksyon), ak yon bidjè yon milyon goud (fon kominal MICT).
__ Inogirasyon yon sant sante modèn nan Génipailler, an kolaborasyon ak ISTEAH, ki reponn ak estanda entènasyonal yo.
6. Gouvènans ak modènizasyon administratif
__ Konstriksyon nouvo lokal Meri Milo a, ki ekipe ak materyèl modèn pou tout sèvis ak direksyon, ansanm ak twa biwo pou majistra yo.
__ Refòm administrasyon minisipal la pou ogmante resèt fiskal yo atravè yon plan relans ekonomik, ak objektif pou rive nan plis otonomi finansyè. Apati ane sa, Meri mwa mas 2026 la, Meri Milo deja bat yon rekò antre nan fiskalite, grasa refòm administrasyon an, meri Milo ap antre plizyè milyon goud pou bay plis sèvis. Sa pa t janm fèt avan, Meri Milo pa t janm konn antre yon milyon goud avan manda konsèy minisipal sa. Plan an se pou grès kochon an kwit kochon an nan 10 pwochen lane yo. Men sa mande anpil kontinwite nan plan refòm sa direksyon jeneral meri a ap administre.
Vizyon an se pèmèt komin nan :
__ peye anplwaye li yo regilyèman,
__ finanse pwojè devlopman nan tout seksyon yo ak nan vil la,
__ diminye depandans li anvè Leta santral. Kesyon leta santral ap dwe anplwaye meri yo plis pase yon lane travay la, plan refòm sa ap fini ak sa depi gen kontinwite ak espri ekip nan byen kominote a.
7. Sekirite ak lòd piblik
__ Kreyasyon yon polis minisipal, ki gen kounye a 23 ajan, pou sipòte sekirite ak bon fonksyònman aktivite nan komin nan.
__ Estrikti sa a gen pou l ranfòse plis epi entegre nan refòm administratif an kou a.
8. Pwoteksyon teritwa ak planifikasyon iben
__ Elaborasyon Plan Kominal pou devlopman Milo. Se yon dokiman ki plis pase 100 paj. Li di kòman vil la dwe devlope nan kontinwite. Menm si majistra ranplase lòt ki te la yo, epi ki pral la yo, plan sa dwe respekte .
__ Operasyon idantifikasyon ak regilarizasyon konstriksyon ki sou trotwa ak kanal yo.
__ Anpil desizyon pou fè respekte plan ibanis vil la parapò estanda vil touristik la.
__ Elatriye...
Konklizyon ak rekòmandasyon
Konsèy minisipal ki t ap dirije pa Majistra Elicia Milfort kite dèyè l yon seri reyalizasyon konkrè ki mete baz pou devlopman dirab komin Milo a.
Plizyè pwojè estriktiran deja lanse oswa an kou, e yo mande swivi serye.
Nou ankouraje nouvo ekip minisipal la pou :
__ asire kontinwite pwojè yo ;
__ ranfòse refòm administratif yo de konsè ak direksyon jeneral la ak kad ki nan meri Milo yo ki deja ede plizyè lòt meri nan egzekisyon plan refòm sa ke yo elabore ak ;
__ finalize pwojè enfrastrikti ak enèji yo ;
__ pa janm sispann chèche patenarya pou Milo ka plis devlope nan tou lè 3 seksyon yo ;
__ fasilite pou envestisè ka vin enstale yo Milo pandan Meri a ap ofri yo kèk avantaj jan lalwa mande sa ;
__ epi konsolide sekirite ak planifikasyon vil Milo a.
Kontinwite aksyon piblik yo se kle pou garanti pwogrè dirab ak byennèt popilasyon Milot la.
Nou swete nouvo katèl la bon travay !
