07/10/2025
Ansyen senatè Denis Cadeau, nan yon reyinyon sere ak ekip li ansanm ak majistra Miragwàn yo, fè konnen klèman majistra ki an plas yo se "moun pa l", epi li mete an dout tout manm ekip li ki ta gen tandans apiye mouvman jenès la kont katèl la. Sa ki pi cho, se lè li poze yon kesyon nou ka tradui konsa: "Si se kont katèl la n ap batay, kiyès n ap mete ki pou vini fè sèvis mwen si nou di nou se ekip mwen?"
Fraz sa yo pa senp. Yo montre yon mantalite enkyetan ki trayi lespri demokrasi ak jistis lokal: Majistra yo pa la pou sèvi pèp la, men pou sèvi enterè politik yon gwoup. Lè yon ansyen senatè di klèman ke tout moun ki ta pran plas katèl la ta dwe vini "au service" li, li mete sou tab la yon vizyon pèvèti de pouvwa lokal la.
Nou anfas yon sistèm kote pèp la pa konte, kote fonksyon piblik vin tounen byen prive. E se sa ki pa fè sans pou yon moun ki te deja jwi konfyans pèp la kòm senatè, jodi a chita ak yon gwoup moun pèp la rejte, epi ap poze kesyon sou kiyès ki pral vin sèvi enterè li si katèl la ale.
Majistra pa la pou sèvi yon senatè. Majistra la pou sèvi komin nan.
