09/16/2025
Òganizasyon pou Asirans Veyikil Kont Tiers (OAVCT), Lanse yon gwo kanpay nan komin Sen Mak ak nan tout ba depatman Latibonit la pou ankouraje chofè motosiklèt yo mete motosiklèt yo an regleman legal.
Kanpay sa a vize sansibilize ak akonpaye chofè yo pou yo ka jwenn tout dokiman nesesè ki legalize motosiklèt yo, tankou asirans, plak, ak papye sikilasyon. Daprè responsab yo, inisyativ la pa sèlman yon obligasyon legal, men li se tou yon mezi sekirite pou chofè yo ak popilasyon an antye.
Nan mesaj OAVCT a, yo mete aksan sou enpòtans pou chofè yo antre nan pwosesis la san pèdi tan, paske ajans lan ap deplwaye sèvis li yo nan komin yo menm, pou evite chofè yo oblije deplase lwen. Sa ap pèmèt plis moun jwenn aksè fasil ak rapid pou regle sitiyasyon yo.
Responsab Motopam Legal fè konnen objektif prensipal kanpay la se diminye kantite motosiklèt ki sikile san papye nan Latibonit, paske sa lakòz anpil difikilte nan domèn sekirite wout ak nan jistis lè gen aksidan. Yo ajoute tou ke se yon chans pou chofè yo pwoteje tèt yo epi mete travay yo nan bon kondisyon legal.
Plizyè chofè ki deja patisipe nan kanpay la fè konnen yo santi yo soulaje dèske sèvis OAVCT ap vin jwenn yo dirèkteman nan zòn yo, sa ki evite yo depans depase ak deplasman fatigan.
Kanpay sa a make yon etap enpòtan nan lit kont ensekirite sou wout yo, pandan li ankouraje respè lalwa ak sekirite piblik nan depatman Latibonit.
Steevenson Destinoble
PDG Boukman Tv Infos
Redaktè
