17/07/2025
Latibonit/ Vyolans nan Desalin, Bandi mete dife nan Komisarya a
Radio Kiss FM Haïti, 17 Jiyè 2025 — Daprè enfòmasyon divès temwen, vil Desalin sibi yon atak vyolan maten jedi 17 Jiyè 2025 la, kote plis pase 50 bandi ame, ki idantifye kòm manm gwoup Kokorat San Ras, te anvayi komin nan sou twa machin, yon pick-up ak de (2) zòrekèn plen nèg ak zam.
Temwen sa yo fè konnen bandi yo rive mete dife nan Komisarya ak plizyè machin ki te estasyone devan li.
Toujou selon menm sou yo, komisarya vil la ta fin boule nèt, sa ki lakoz gen gwo enkyetid pou sekirite polisye ki te afekte nan zòn nan. Pa gen enfòmasyon klè sou kantite viktim oswa si gen moun ki blese oubyen pèdi lavi yo.
Enfòmasyon yo presize bandi yo pa sèlman mete dife, men yo te siyonnen plizyè ri nan vil la, e yo pote ale anpil motosiklèt ansanm ak lòt byen. Atak sa a te dewoule ak anpil vyolans, e temwen yo rapòte yo t’ap tande bandi yo ki t’ap pale byen fò, pandan y’ap fè deklarasyon menasan kont moun ki sou plas.
Pou kounye a popilasyon an nan Machan Desalin ap viv nan kè sote, otorite yo poko bay okenn deklarasyon ofisyèl sou sa k pase a, ni sou nenpòt repons pou mete lòd ak sekirite nan Desalin.
Roody Cléophat
[email protected]
