02/01/2025
Carita Semi Misteri
"Cimata Indung"
Balik ti lembur mah hate teh asa bungangan bungah kacida, lantaran geus bisa panggih jeung nu jadi indung. Tapi sabada peutingan taun baru pangacian kuring nu kabawa ka sapuluh taun ka tukang, kalah malik nalangsa teu sakara kara.
Sapuluh taun ka tukang kabeh gambaran peutingan taun baru mangsa harita, narembongan deui dina kongkolak panon, nu teu karasa ngeclakkeun cimata.
Mangsa harita teh, moal bisa poho bulan Desember 2014. Kabeneran libur samesteran harita teh aya kana samingguna.
Teu kacaturkeun di jalanna, sanajan saukur tunggang motor, kuring indit ka lembur jeung anak pamajikan, bari jeung rebo ku babawaan, da hayang nyugemakeun nu jadi indung.
Hate nu sapapanjang jalan kumejot hayang geura panggih jeung nu jadi indung, barang nepi ka lembur teh bungangang kacida, samalah kacape oge harita ngadadak leungit taya tapakna.
Nu jadi indung oge katingali pisan kacida bagjana, kuring sakulawarga dibageakeun ku pameunteu anjeunna anu marahmay, komo ka anak kuring mah, teu sirikna digalentoran.
Sabada ngariung di rohangan kulawarga, indung kuring katingali pisan beuki bungah.
"Mah, ieu acuk kangge Mamah!" ceuk pamajikan kuring, bari ngasongkeun bungkusan nu eusina daster kencana ungu.
"Nuhun geulis, meuni ngarepotkeun." tembal indung kuring, meuni marahmay. Samalah kabungahna katingal beuki nambahan basa kuring ngaluar-luarkeun babawaan, minangka oleh oleh jang nu jadi indung.
"Ari kalender pesenan Mamah mana?" pokna sabada nunda bungkusan nu ditarima ti pamajikan kuring.
Asa diingetan kupananya nu jadi indung, basa ngaWA menta kalender, sangkan bisa nyaho waktu liburan nu jadi anak anakna.
Kuring tuluy ngarongkong rangsel, bari muka resletingna, laju nyokot kalender nu memang geus disiapkeun ti anggalna.
Kalender nu ku kuring diasongkeun rikat dijewang laju dibuka. Ngan nu jadi teu kaharti, sabada nempo eta kalender, pameunteu nu jadi indung katingali ngadadak alum, samalah tina dua juru panonna katingali aya cai mata meuni nyurulung.
Eta kajadian teh, nepi ka ayeuna jadi misteri pikeun kuring. Ngan sakainget kuring, eta kalender teh memang hadiah ti pagadean, basa kuring ngagadekeun geulang nu jadi pamajikan pikeun bekel ka lembur, basa harita. TAMAT
