08/06/2026
औषधे ही सामान्य वस्तू नसून ती थेट नागरिकांच्या आरोग्याशी संबंधित असल्याने औषध विक्री करताना पात्र आणि नोंदणीकृत फार्मासिस्ट उपस्थित असणे कायद्याने बंधनकारक आहे. मात्र अनेक ठिकाणी फार्मासिस्टशिवाय मेडिकल दुकाने सुरू असल्याच्या तक्रारी प्रशासनाकडे प्राप्त झाल्या होत्या.
या पार्श्वभूमीवर आयुक्त मुंडे यांनी राज्यातील संबंधित अधिकाऱ्यांना विशेष तपास मोहीम राबविण्याचे निर्देश दिले आहेत. तपासादरम्यान फार्मासिस्ट अनुपस्थित आढळल्यास संबंधित मेडिकल दुकान तात्काळ सील करण्याचे आदेश देण्यात आले आहेत.
तसेच बनावट कागदपत्रे, दुसऱ्या फार्मासिस्टच्या नावाचा गैरवापर, परवान्याच्या अटींचे उल्लंघन आणि नियमबाह्य औषध विक्री करणाऱ्यांविरोधातही कठोर कारवाई करण्यात येणार असल्याचे प्रशासनाने स्पष्ट केले आहे.
नागरिकांच्या आरोग्याशी कोणतीही तडजोड सहन केली जाणार नाही. औषध विक्रीच्या नियमांचे काटेकोर पालन करण्यासाठी ही मोहीम राज्यभर राबविण्यात येणार असल्याची माहिती संबंधित विभागाकडून देण्यात आली आहे.
