04/06/2026
Monsoon News: દેશમાં જેની આતુરતાથી રાહ જોવાઈ રહી છે તે દક્ષિણ-પશ્ચિમ ચોમાસાની ઋતુ હવે શરૂ થવા જઈ રહી છે. ભારતીય હવામાન વિભાગની આગાહી અનુસાર, આજે ચોમાસું ગમે ત્યારે કેરલમ અને તમિલનાડુમાં દસ્તક આપી શકે છે. ચોમાસાના આગમનની સાનુકૂળ પરિસ્થિતિઓ વચ્ચે દેશના 17 રાજ્યોમાં પ્રિ-મોન્સૂન એક્ટિવિટીના ભાગરૂપે ભારે આંધી-વંટોળ અને વરસાદનું ઍલર્ટ જાહેર કરવામાં આવ્યું છે.
હવામાન વિભાગના જણાવ્યાનુસાર, આગામી 5થી 7 દિવસમાં કેરલમના મોટાભાગના વિસ્તારોમાં ભારેથી અતિ ભારે વરસાદ પડી શકે છે અને કેટલાક સંવેદનશીલ વિસ્તારોમાં 7થી 20 સેમી જેટલો વરસાદ ખાબકવાની સંભાવનાને પગલે કેરલમના અનેક જિલ્લાઓમાં ઑરેન્જ ઍલર્ટ પણ જાહેર કરાયું છે. બીજી તરફ, દિલ્હી અને આસપાસના વિસ્તારોમાં છેલ્લા કેટલાક દિવસોથી પડી રહેલી અસહ્ય ગરમીથી આજે આંશિક રાહત મળવાના સંકેત છે કારણ કે ત્યાં મહત્તમ તાપમાન 38°C થી 40°C વચ્ચે રહેવાની અને સાંજના અથવા રાત્રિના સમયે 50 કિમી પ્રતિ કલાકની ઝડપે ધૂળની આંધી ફૂંકાવાની સાથે વરસાદ પડવાની શક્યતા છે.
આગામી 24 કલાકમાં પંજાબ, હરિયાણા, દિલ્હી, રાજસ્થાન, મધ્ય પ્રદેશ, પશ્ચિમ ઉત્તર પ્રદેશ, મહારાષ્ટ્ર અને દક્ષિણ ભારતના વિવિધ રાજ્યોમાં ભારે વરસાદની સંભાવના સેવાઈ રહી છે, જ્યારે રાજસ્થાનના કેટલાક વિસ્તારોમાં ધૂળના તોફાન સાથે કરા પડી શકે છે. કેરલમ, કર્ણાટક, આંદામાન અને નિકોબાર ટાપુઓમાં પણ ભારે વરસાદની આગાહી છે. આ પ્રિ-મોન્સૂન વરસાદને કારણે આગામી દિવસોમાં દેશભરમાં તાપમાનનો પારો ગગડશે, જેનાથી સામાન્ય જનતાને કાળઝાળ ગરમીમાંથી મોટી રાહત મળશે. પરિસ્થિતિને ધ્યાનમાં રાખીને હવામાન વિભાગે માછીમારો અને પહાડી વિસ્તારોમાં રહેતા લોકોને દરિયા કિનારે કે જોખમી વિસ્તારોમાં ન જવાની ખાસ અપીલ કરી છે.
