Maadhyam

12/09/2026

10/09/2026

અમદાવાદમાં ભિક્ષાવૃત્તિ સામે તંત્રની મેગા ડ્રાઇવ! 161 લોકોનું રેસ્ક્યૂ

AMC, પોલીસ અને ગુજરાત સરકારના Social Security Departmentની સંયુક્ત કાર્યવાહીમાં શહેરના વિવિધ વિસ્તારોમાંથી 89 પુખ્તો અને 72 બાળકોને રેસ્ક્યૂ કરવામાં આવ્યા.

રેસ્ક્યૂ કરાયેલા બાળકોમાંથી 10ને Child Protection Homeમાં ખસેડાયા, જ્યારે 62 બાળકોને ચેતવણી સાથે તેમના માતા-પિતા અથવા વાલીઓને સોંપવામાં આવ્યા.

આ ઉપરાંત બાળકો સાથે ભિક્ષા મંગાવવી, વાહનોના કાચ બળજબરીથી સાફ કરાવવા કે બાળકો પાસે જોખમી કરતબ કરાવવા સહિતના કિસ્સામાં 24 લોકો સામે કાર્યવાહી હાથ ધરવામાં આવી છે.

તંત્રએ આગામી દિવસોમાં પણ આવી સંયુક્ત કામગીરી વધુ તેજ કરવાની જાહેરાત કરી છે.

10/09/2026

કુડાસણમાં નિર્માણાધીન બિલ્ડિંગનો સ્લેબ ધરાશાયી, 15 લોકો કાટમાળ નીચે દટાયા!

ગાંધીનગરના કુડાસણ ખાતે રાત્રિના આશરે 9 વાગ્યે ‘બોસકી ધ એમ્પાયર’ની કન્સ્ટ્રક્શન સાઇટ પર મોટી દુર્ઘટના સર્જાઈ હતી.

નિર્માણાધીન બે બિલ્ડિંગ વચ્ચેનો સ્લેબ અચાનક ધરાશાયી થતાં 15 લોકો કાટમાળ નીચે દટાયા હતા. ઘટનાની જાણ થતાં તાત્કાલિક રેસ્ક્યૂ ઓપરેશન હાથ ધરવામાં આવ્યું હતું અને તમામ 15 લોકોને બહાર કાઢવામાં આવ્યા.

ઇજાગ્રસ્તોમાંથી 12 લોકોને સિવિલ હોસ્પિટલમાં સારવાર માટે દાખલ કરવામાં આવ્યા છે, જ્યારે 3 લોકોને સારવાર બાદ રજા આપવામાં આવી છે.

સદનસીબે આ દુર્ઘટનામાં કોઈ જાનહાનિ થઈ નથી.

મળતી માહિતી મુજબ, ‘બોસકી ધ એમ્પાયર’ ગ્રુપના બિલ્ડર નિલેશ મોદી છે. તેઓ પેથાપુર નગરપાલિકાના પૂર્વ પ્રમુખ હોવાનું જણાવવામાં આવે છે. ઘટનાના સમયે તેઓ તેમની દીકરી બોસ્કીના લગ્ન પ્રસંગે શિકાગોમાં હોવાની માહિતી છે.

સૂત્રોના જણાવ્યા મુજબ, ઘટનાસ્થળેથી આશરે 100 ટન જેટલો કાટમાળ હટાવવાની કામગીરી કરવાની રહેશે.

હાલ સમગ્ર મામલે સંબંધિત તંત્ર દ્વારા તપાસ અને કાટમાળ હટાવવાની કામગીરી ચાલી રહી છે.

09/09/2026

દહેગામ ખેતીવાડી ઉત્પન્ન બજાર સમિતિ (APMC) દ્વારા અમદાવાદ રોડ પર ઔડા તળાવ બહાર ‘ખેડૂત ગ્રાહક બજાર’ શરૂ કરવામાં આવ્યું છે.

આ બજારમાં ખેડૂતો પાસેથી શાકભાજી સીધી ગ્રાહકો સુધી પહોંચાડવામાં આવી રહી છે. જેના કારણે વચેટિયાઓ વગર ગ્રાહકોને અન્ય બજારોની સરખામણીએ ઓછા ભાવે તાજા શાકભાજી મળી રહ્યા છે.

માત્ર બે દિવસમાં 14 ટન જેટલા શાકભાજીનું વેચાણ થયું હોવાનું જણાવાયું છે. ગ્રાહકોના ભારે પ્રતિસાદને કારણે કેટલાક સમયે સ્ટોક પણ ખૂટી ગયો હતો અને વધારાનો જથ્થો મંગાવવો પડ્યો હતો.

આ મોડેલથી ખેડૂતોને સીધા ગ્રાહકો મળતા તેમના પાકનો યોગ્ય ભાવ મળવાની તક ઊભી થઈ છે, જ્યારે ગ્રાહકોને પણ પોસાય તેવા ભાવે શાકભાજી મળી રહ્યા છે.

આ પહેલને પગલે ગાંધીનગરના અન્ય વિસ્તારોમાં પણ આવા ખેડૂત-ગ્રાહક બજાર શરૂ કરવાની માંગ ઉઠી રહી છે.

07/09/2026

અમદાવાદમાં હડતાળના નામે લુખ્ખી દાદાગીરી, રોજીરોટી કમાતા ડ્રાઇવરોને કહ્યું પેસેન્જર ઉતારો નહીં તો ગાડી તોડી નાખીશું

07/09/2026

ઠેર ઠેર રિક્ષાવાળાઓની હડતાળના નાકે દાદાગીરી,પોલીસ કાર્યવાહીના નામે મીંડું

06/09/2026

અપહરણના આરોપો વચ્ચે સિંગર કિંજલ રબારીનો ખુલાસો, કહ્યું “ મારા પતિ અશોક ચૌધરી સાથે મરજીથી ગઈ છું”

06/09/2026

અમદાવાદમાં 3 ફૂડ યુનિટ સીલ! 3,800 કિલોથી વધુ ખાદ્ય સામગ્રીનો વેચાણ પર પ્રતિબંધ

અમદાવાદમાં ખાદ્ય સુરક્ષાના નિયમોના ઉલ્લંઘન સામે AMCના Food Department દ્વારા મોટી કાર્યવાહી કરવામાં આવી છે.

શહેરમાં હાથ ધરાયેલા ચેકિંગ દરમિયાન 3 ફૂડ બિઝનેસને સીલ કરવામાં આવ્યા છે. સાથે જ 3,800 કિલોથી વધુ ખાદ્ય સામગ્રીનો Stop-Sale Order કરવામાં આવ્યો છે, જેની અંદાજિત કિંમત ₹9.22 લાખ છે.

વટવામાં આવેલી M.M. Food Productsમાં જરૂરી FSSAI લાઇસન્સ વગર સોસ અને અન્ય ખાદ્ય ઉત્પાદનોનું ઉત્પાદન થતું હોવાનું સામે આવ્યું હતું. સાથે જ સ્વચ્છતા તથા પેકેજિંગ-લેબલિંગના નિયમોના ભંગ બદલ યુનિટ સીલ કરાઈ અને આશરે 2,516 કિલો સામગ્રીનો વેચાણ પર પ્રતિબંધ મૂકાયો.

વેજલપુરની Shri Mateshwari Chavana & Sweet Martમાં નમકીનમાં પ્રતિબંધિત સિન્થેટિક ફૂડ કલરનો ઉપયોગ મળતાં કાર્યવાહી કરવામાં આવી. આશરે 150 કિલો નમકીનનો Stop-Sale Order કરાયો.

ચાંદલોડિયાની Gujarat Fry Centre જરૂરી FSSAI લાઇસન્સ વગર ચાલતું હોવાનું અને ત્યાં સ્વચ્છતાના નિયમોનું પાલન ન થતું હોવાનું સામે આવતા તેને પણ સીલ કરવામાં આવ્યું.

મધુપુરાની Mahavir Ghee Bhandarમાં અગાઉ Food Laboratory દ્વારા ‘Substandard’ જાહેર કરાયેલ ઘીનું વેચાણ થતું હોવાનું સામે આવ્યું. અહીં 1,140 કિલો ઘી, એટલે કે 15 કિલોના 76 ટીન, વેચાણથી અટકાવવામાં આવ્યા છે. તેની અંદાજિત કિંમત ₹7.17 લાખ છે.

AMC દ્વારા જણાવાયું છે કે Food Safety and Standards Act, 2006 હેઠળ આગળની કાયદેસરની કાર્યવાહી કરવામાં આવશે.