16/09/2026
USમાં રહેતા નિતિન મલ્હોત્રા નામના એક ઈન્ડિયન યુવકે સાંજે લગભગ 6 વાગ્યે તેના અસામાન્ય રીતે શાંત વિસ્તારનો વિડીયો શેર કરીને સોશિયલ મીડિયા પર નવી ચર્ચા જગાવી છે. નિતિન મલ્હોત્રાએ આ વિડીયોમાં મોંઘા મકાનોની હરોળ દર્શાવી હતી, પરંતુ તેમણે કહ્યું હતું કે, બહાર ભાગ્યે જ કોઈ વ્યક્તિ જોવા મળે છે. તેમણે આ દ્રશ્યની સરખામણી ભારતીય વિસ્તારોમાં સામાન્ય રીતે જોવા મળતી ધમધમતી અને ચહલપહલ વાળી શેરીઓ સાથે કરી હતી. તેમણે દાવો કર્યો હતો કે, આ સોસાયટીમાં મકાનોની કિંમત રૂ.5 કરોડ, રૂ.10 કરોડ અને રૂ.15 કરોડ સુધીની છે, છતાં શેરીઓ સાવ સૂમસામ થઈ જાય છે.
USમાં પાંચ વર્ષથી રહેતા નિતિન મલ્હોત્રાએ જણાવ્યું હતું કે, આ અનુભવ માત્ર ફ્લોરિડા પૂરતો સીમિત નથી, પરંતુ ટેક્સસ, કેલિફોર્નિયા અને ન્યૂયોર્કના પણ કેટલાક વિસ્તારોમાં આવા જ દ્રશ્યો જોવા મળે છે. તેમણે સ્વીકાર્યું હતું કે, કેટલાક ઈન્ડિયન્સ અથવા "દેશી" કોમ્યુનિટી વધુ એક્ટિવ હોય છે, પરંતુ ઘણા અમેરિકન સબર્બન (ઉપનગરીય) વિસ્તારો આટલા જ શાંત લાગે છે. આ વિડીયોને કારણે સોશિયલ મીડિયા યુઝર્સ વચ્ચે અમેરિકાના સબર્બન લાઈફ અને ભારતના પાડોશના જીવન વચ્ચેના તફાવતો પર ચર્ચા શરૂ થઈ હતી.
