11/09/2026
૧૦ વર્ષની ભારતીય શૂટર નાયરા શર્માએ રચ્યો ઇતિહાસ
માત્ર 10 વર્ષ અને 3 મહિનાની ઉંમરે દિલ્હીની શૂટર નાયરા શર્માએ એક એવી સિદ્ધિ મેળવી છે, જેનાથી તે દેશની સૌથી નાની વયની નેશનલ ક્વોલિફાયર બની ગઈ છે. નાયરાએ 10 મીટર એર રાઇફલ સ્પર્ધામાં અદ્ભુત પ્રદર્શન કરીને નેશનલ ચેમ્પિયનશિપ માટે ક્વોલિફાય કર્યું છે.
નાયરાએ હાલમાં જ ભોપાલમાં આયોજિત 'ઓલ ઇન્ડિયા ઇન્ટર સ્કૂલ શૂટિંગ ચેમ્પિયનશિપ'માં 400માંથી 363 પોઈન્ટ મેળવ્યા હતા. આ જ પ્રદર્શનના દમ પર તેણે રાષ્ટ્રીય ચેમ્પિયનશિપમાં પોતાની જગ્યા પાકી કરી છે. મહત્વની વાત એ છે કે સ્પર્ધાત્મક શૂટિંગમાં નાયરાએ થોડા મહિના પહેલા જ શરૂઆત કરી છે.
નાયરાએ જૂનમાં દિલ્હી સ્ટેટ ચેમ્પિયનશિપથી પોતાના શૂટિંગ કરિયરની શરૂઆત કરી. ત્યાર બાદ તેણે જુલાઈમાં દેહરાદૂનમાં આયોજિત 'ઇન્ડિયા ઓપન'માં ભાગ લીધો. પોતાની ત્રીજી જ સ્પર્ધામાં 363 અંકનો સ્કોર કરીને તેણે નેશનલ ચેમ્પિયનશિપની ટિકિટ મેળવી લીધી.
નાયરા હાલ દિલ્હીની 'ટોપગન શૂટિંગ એકેડમી'માં તાલીમ લઈ રહી છે. હવે તેની નજર વર્ષના અંતમાં યોજાનારી નેશનલ ચેમ્પિયનશિપ પર છે. આટલી નાની ઉંમરે સતત શ્રેષ્ઠ પ્રદર્શન કરવું એ તેની મહેનત, અનુસાશન અને શૂટિંગ પ્રત્યેના સમર્પણને દર્શાવે છે.
નાયરાના પિતા પ્રશાંત શર્માએ દીકરીની આ સિદ્ધિ પર ગર્વ વ્યક્ત કર્યો. તેમણે કહ્યું કે આ સફળતા નાયરાની મહેનત અને દ્રઢ સંકલ્પની સાથે ટોપગન શૂટિંગ એકેડમીના માર્ગદર્શન અને સહયોગનું પરિણામ છે.
10 વર્ષની ઉંમરે રાષ્ટ્રીય સ્તરે પોતાની જગ્યા બનાવનારી નાયરાની આ સિદ્ધિ દેશના એ બાળકો માટે પણ પ્રેરણારૂપ છે, જેઓ નાની ઉંમરે જ રમતના ક્ષેત્રમાં પોતાનું કરિયર બનાવવાનું સપનું જુએ છે. હવે સૌની નજર નાયરાના નેશનલ ચેમ્પિયનશિપમાં પ્રદર્શન પર રહેશે.
