https://www.facebook.com/248587795272098/

Humanity Of Islam, Juhapura, Ahmedabad (2026)

ye Page ka maqsad Deen e Islam ki sahih taalimaat aur Fiqah e Hanafi k Masaail logon tak pahonchana. Ummid he aap sab Hamare iss page ko LIKE karenge aur dostong me SHARE karenge. Jazakallaho Khaira.

06/06/2026

Hazrat Allama Maulana Sayyed Muhammad Naeem-ud-deen Muradabadi rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

Alqaab :
‾‾‾‾‾‾‾
Sadr-ul-Afaazil, Fakhr-ul-Amaasil, Qudwat-ul-Ulama.

*********************
Aap ki wilaadat 21 Safar 1300 Hijri (1 January 1887 A.D.) ko Muradabad me hui.

*********************
Aap ke waalid ka naam Hazrat Maulana Sayyed Moeen-ud-deen rahmatullāhi alaihi hai.

Aap ke par-daada Mughal baadshaah Aurangzeb ke zamaane me Mash'had (Iran) se Hindustan aaye the. Mukhtalif maqaamaat par safar karte hue wo Lahore pahunche aur phir Abul Hasanat ke qareeb muqeem hue. Baadshaah ne unhe kuchh zameen jaagir me ata ki thi.

*********************
Aap ne apne waalid ke paas Urdu aur Faarsi ki ta’aleem haasil ki.
Hazrat Shaah Fazl Ahmad rahmatullāhi alaihi ke paas Dars-e-Nizaami mukammal kiya.
Aap 8 saal ki umr me Haafiz e Qur'ān hue.
Phir Madrasa e Imdaadiya, Muradabad me Hazrat Shaah Muhammad Gul rahmatullāhi alaihi ke paas ta’aleem haasil ki aur 1320 Hijri (1900 A.D.) me ‘M***i’ ki sanad haasil ki.

Aap Aalim, M***i, Qaazi aur Mufassir the.
Aap Hadeeṡ, Tafseer, Fiq'h, Falsafa aur Ilme Istadlaal [Mantiq] ke maahir the.

Aap ne Allama Hakeem Shaah Fazl Ahmad Amrohi rahmatullāhi alaihi se Ilme Tibb ki ta’aleem haasil ki.

*********************
1328 Hijri (1910 A.D.) me Aap ne Madrasa Anjuman Ahle-Sunnat-wal-Jama’at qaa'im kiya jo ‘Jaamia Naeemiya’ ke naam se mash'hoor hai.

Aap ke mash'hoor shaagird :
(1) Hakeem-ul-Ummat Ashraf-ul-Mufassireen M***i Ahmad Yaar Khan Naeemi,
(2) Taaj-ul-Ulama M***i Muhammad Umar Naeemi,
(3) Sarkar e Kalaan Sayyed Mukhtaar Ashraf Kichhochhawi,
(4) Mujaahid e Millat Maulana Habeeb-ur-Rahmān
(5) Haafiz e Millat Haafiz Abdul Azeez Mubarakpuri,
(6) Imaam-ul-Nahw Sadr-ul-Ulama Sayyed Ghulaam Jeelaani Meeruti,
(7) Mufassir e Aazam e Pakistan Allama Sayyed Abul Hasanaat Ahmad Lahori,
(8 ) M***i e Aazam e Pakistan Allama Sayyed Abul Barakat Ahmad Lahori,
(9) Ustaad-ul-Ulama Allama M***i Younus Naeemi Sambhali,
(10) Ameen-e-Shariat M***i Rafaaqat Husain Ashrafi Naeemi Kanpuri,
(11) Allama Ikraam-ul-Haq Ansaari,
(12) Allama Maulana Haafiz M***i Abdul Azeez Khan Fatehpuri,
(13) Allama Haafiz M***i Abdur Rasheed Khan Fatehpuri,
(14) M***i Muhammad Husain Naeemi,
(15) Ajmal-ul-Ulama M***i Muhammad Ajmal Husain Qaadri Razawi Sambhali,
(16) Faqeeh-e-Aazam Allama M***i Muhammad Noorullāh Naeemi Bashirpuri,
(17) Najm-ul-Ulama M***i Sayyed Ghulaam Moeen-ud-deen Naeemi,
(18) Habeeb-ul-Ulama M***i Habeebullāh Naeemi Bhagalpuri,
(19) Zia-ul-Ummah Allama Peer Karam Shaah Chishti Azhari,
(20)Allama Ghulaam Fakhr-ud-deen Naeemi,
(21) Allama Khuda-Bakhsh Naeemi,
(22) Allama M***i Ameen-ud-deen Naeemi,
(23) Allama Hakeem Mukhtaar Ahmad bin Allama M***i Ahmad Yaar Khan Naeemi,
(24) Allama Ahmad Saeed Naeemi,
(25) Allama Muhammad Saalih Naeemi,
(26) Allama Ghulaam Muhiy-ud-deen Naeemi,
(27) Allama M***i Moeen-ud-deen Ashrafi Naeemi.
(28) Allama Muhammad At'har Naeemi,
(29) Allama Ghulaam Yazdaani Naeemi,
(30) Allama Ghulaam Jeelaani Aazami,
(31) Shams-ul-Ulama Allama Qaazi M***i Shams-ud-deen Ahmad Qaadri Razawi Naeemi Jaunpuri,
(32) Imaam-ul-Ma’aqulaat Allama Sulaimān Ashrafi Bhagalpuri,
(33) Allama M***i Abdur Rasheed Ashrafi Fatehpuri,
(34) Sultaan-ul-Manazireen Allama M***i Ateeq-ur-Rahmān Naeemi Ashrafi Mohaddiṡ Tilsipuri,
(35) Allama Ahsan-ul-Haq Naeemi Ashrafi Bahra'ichi,
(36) Allama Nazeer-ul-Akram Ashrafi Naeemi Muradabadi,
(37) Allama Zahoor Ahmad Naeemi Ashrafi Muradabadi,
(38) Shaikh-ul-Islaam Peer Sayyed Mahmood Shaah Mohaddiṡ Hazarwi.

*********************
Aap ki likhi hui mash'hoor kitaaben :

(1) Khaza'in-al-Irfaan (Tafseer-e-Kanz-ul-Eimaan)
(2) Kitaab-ul-Aqaa'id
(3) Fataawa Sadr-ul-Afaazil
(3) Sirat-e-Sahaabah
(4) Sawaaneh Karbala
(5) Zaad-ul-Haramain
(6) Adab ul Akhyaar fee Ta’azeem-ul-At'har
(7) Al-Kalimaatul ulya li iylayi ilm-ul-Mustafa
(8 ) Atyab al-bayaan Radd-e-Taqwiyat-ul-eimaan
(9) At-Tahqeeqat li daf-ul-talbisat
(10) Aswat ul Azaab li Qami’y ul Qubab
(11) Kashf ul Hijaab un Masaa'il Isaal ul Sawaab
(12) Irshaad ul Anaam fi Mehfil li Maulud wal Qiyaam
(13) Taskin ul Zaakireen wa Tanbih al Munkireen
(14) Ahqaaq-e-Haq
(15) Gulban Ghareeb Nawaaz.

♦ Riyaaz-e-Naeem aur Deewaan-e-Urdu me aap ki likhi hui Nazmo ka majmua hai.

*********************
Tehreek e Khilaafat me bhi Aap ne hissa liya aur is ke liye kai josh bhari taqreer farmai.

12 Zil Hijjah 1336 Hijri (18 September 1918 A.D.) ko Aap ne ‘All India Sunni Conference’ ke iftataahi jalse [opening ceremony] me ek azeem-ush-shaan taqreer farmai aur 1361 Hijri (1942 A.D.) me Banaras ke jalse me Aap Sadr Naazim [Chief organizer] the.

1337 Hijri (1919 A.D.) me Aap ne maah-naama ‘Al-Sawaad al-Aazam’ jaari kiya.

*********************
Pariwaar :
‾‾‾‾‾‾‾‾‾‾‾‾
Aap ka nikaah 1322 Hijri (1904 A.D.) me hua.

Aap ke 4 saahabzaade aur 4 saahabzaadiya hain.

Saahabzaade :
(1) Sadr-ul-Ulama M***i Sayyed Zafar-ud-deen,
(2) Allama Sayyed Iktisaas-ud-deen,
(3) Allama Hakeem Sayyed Zaheer-ud-deen,
(4) Allama Hakeem Sayyeed Izhaar-ud-deen urfe Hanafi Miyan.

*********************
Aap Hazrat Shaah Muhammad Gul Kabuli Qaadri rahmatullāhi alaihi ke Mureed aur Khalifa hain.

Aap ko Aa’la Hazrat Imaam Ahmad Raza khan Bareilwi rahmatullāhi alaihi ne ‘Qaadri Razawi’ silsila ki aur Aa’la Hazrat Allama Sayyed Shaah Ali Husain Ashrafi miya Kichhauchhawi rahmatullāhi alaihi ne ‘Chishti Ashrafi’ silsila ki khilaafat ata farmai hai.

Aap se 'Qaadri Naeemi' silsila jaari hai.

Aap ke khulfa :
(1) Hazrat Taaj-ul-Ulama M***i Muhammad Umar rahmatullāhi alaihi,
(2) Hazrat Hakeem-ul-Ummat Ashraf-ul-Mufassireen M***i Ahmad Yaar Khan rahmatullāhi alaihi,
(3) Hazrat Faqeeh-e-aazam M***i Muhammad Noorullāh Basirpuri rahmatullāhi alaihi,
(4) Hazrat Najm-ul-Ulama M***i Sayyed Ghulaam Moeen-ud-deen
(5) Hazrat Maulana Qaari Abdul Lateef.

*********************
Aap ka wisaal 18 Zil Hijjah 1367 Hijri (13 October 1948 A.D.) ko Jum’aa ke din beemaari ke sabab hua.

Aap ki namaaz e janaaza Hazrat Taaj-ul-Ulama M***i Muhammad Umar Naeemi rahmatullāhi alaihi ne padhaai.

*********************
Aap ka mazaar Muradabad (Uttar Pradesh) me Madrasa Jaamia Naeemia ke bagal me hai.

*********************
Mazeed Posts ke liye Website dekhen :
(For more posts Visit this website) :

http://fikreummat.net/

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sadr-ul-Afaazil Allama Maulana Sayyed Naeem-ud-deen Muradabadi rahmatullāhi alaihi aur Ahle bait aur Tamaam Auliya Allāh ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko duniya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

06/06/2026

Hazrat Abu Ubaida, Aamir bin Jarrah radiy-Allāhu ta’ala anhu :
♦♦♦♦♦♦♦♦♦♦♦♦♦♦♦♦♦♦♦♦♦♦♦

Laqab :
‾‾‾‾‾‾‾‾
Ameen-ul-Ummat.

*************
Aap ki wilaadat 583 A.D. me Makkah me hui.

*************
Aap ke waalid ka naam Abdullāh ibn Jarrah aur waalida ka naam Hazrate Umaima binte Ghanam hai.

Aap Quraish ke Banu Haariṡ ibn Fihr khaandaan se hain.

*************
Aap as-Saabiqoon al-Awwaloon me shaamil hain.
610 A.D. me Huzoor Rasool-Allāh sallallāhu alaihi wa sallam ke ailaane nabuwwat ke ba’ad Aap ne dusre hi din Hazrat Abu Bakr Siddeeq radiy-Allāhu ta’ala anhu ki da’awat se Islaam apnaaya.

Musalman hone ke ba’ad Quraish Aap ko beshumaar takleef di. Aap ne har takleef aur sakhti bardaasht kar li magar Islaam na chhoda.

5 Nabawi (615 A.D.) me aap ne Habasha [Abyssinia] ki taraf hijrat ki. Muhaajireen ke is giroh [qaafile]) me 87 mard aur 17 aurten thi.
Kuchh arse ba’ad Makka waapas aaye to Quraish ne phir se un ko takleef dena shuru kiya.

*************
1 Hijri (622 A.D.) me Aap ne Madeena hijrat ki.
Huzoor Rasool-Allāh sallallāhu alaihi wa sallam ne Hazrat Muaz bin Jabal radiy-Allāhu ta’ala anhu ko Aap ka bhaai banaaya.

*************
Aap Ashra e mubashshira me shaamil hain.

Huzoor Rasool-Allāh sallallāhu alaihi wa sallam ne farmaaya hai ki
“Har Ummat me ek Ameen [Trustee /Custodian] hota hai aur is ummat ke Ameen Abu Ubaida bin Jarrah hai.”

*************
Aap ne Kuffaar ke khilaaf tamaam jung me shirkat ki sa’adat haasil ki.

Aap ka shumaar Jungi umoor ke maahireen me hota hai. Aap ki tadaabir maidaane jung ka naqsha badal diya karti thi.
Aap ki qiyaadat me musalmano ne us waqt ki sab se badi taaqat Room se takkar li aur kaamyaabi haasil ki.

Ramazaan 1 Hijri (November 622 A.D.) me Aap Sarya e Hamza me shareek hue jis me Hazrat Hamza ibn Abdul Muttalib radiy-Allāhu ta’ala anhu 30 ashaaba ke saath Quraish ke qaafile ke saath jung ke liye gaye the lekin jung nahi hui thi.

Junge Badr me Aap ke Kaafir baap ne jab Aap par hamla kiya to Aap ne us ka muqaabala kiya aur us ka sar qalam kar diya.

Junge Uhad me Abdullāh ibne Qamiya ne Huzoor sallallāhu alaihi wa sallam par talwaar se waar kiya to Huzoor sallallāhu alaihi wa sallam ke rukhsaar mubarak khaud [helmet] ki kadiyan paivast hone se zakhmi ho gaye. Aap un ke paas pahunche aur foran un kadiyo ko apne daanto se nikaalne lage. Un kadiyo ko nikaalne me aap ke agle 2 daant toot gaye.

Aap ‘Bai'at-ur-Ridwaan’ me bhi shareek hue.

Jamaadi-uṡ-ṡaani 8 Hijri (September 629 A.D.) me Huzoor Rasool-Allāh sallallāhu alaihi wa sallam ne Hazrat Amr bin Aas radiy-Allāhu ta’ala anhu ko 300 musalman ke saath Banu Qudah ke khilaaf jung ke liye bheja. Waha pahunchkar jab unhe pata chala ke dushmano ki ta’adaad bahot ziyada hai to unho ne Madeena Huzoor sallallāhu alaihi wa sallam ko madad ke liye paighaam bheja. Huzoor sallallāhu alaihi wa sallam ne Hazrat Abu Ubaida, Aamir bin Jarrah radiy-Allāhu ta’ala anhu ki sardaari me 200 musalmano ko rawaana kiya jin me Hazraye Abu Bakr Siddeeq aur Hazrate Umar Faarooq radiy-Allāhu ta’ala anhuma bhi shaamil the. Yeh jung ‘Junge Zaat-us-Salaasil’ ke naam se mash'hoor hai.

Rajab 8 Hijri (October 629 A.D.) me Huzoor sallallāhu alaihi wa sallam ne Aap ko 300 musalmano ke saath Banu Juhaynah par hamla karne ke liye Khabat bheja. Magar kaafiro ko is ki khabar mil g*i aur waha se bhaag gaye.

Fatah Makka ke mauqe par raat ko Makka se 10 mile door Marr-uz-Zahran maqaam par musalmano ke lashkar ne wuqoof karne ke ba’ad 20 Ramazaan 8 Hijri (11 January 630 A.D.) ko Huzoor sallallāhu alaihi wa sallam ne lashkar ke 4 giroh banaakar Makkah ki taraf k***h ki.
Pehle giroh ne Hazrat Abu Ubaidah, Aamir ibn Jarrah radiy-Allāhu ta’ala anhu ki sardaari me Azakhir ki jaanib se k***h ki, jis me Huzoore akram sallallāhu alaihi wa sallam bhi shareek the. Yeh giroh baghair koi muqaabale ke aage badha aur Makkah me daakhil hua.

*************
Huzoore akram sallallāhu alaihi wa sallam ke wisaal e zaahiri ke ba’ad Khalifa muqarrar karne ke liye log jama hue tab Hazrate Umar Faarooq radiy-Allāhu ta’ala anhu Hazrat Abu Bakr Siddeeq aur Hazrat Abu Ubaida ibn Jarrah radiy-Allāhu ta’ala anhuma ke saath waha pahunche. Hazrat Abu Bakr Siddeeq radiy-Allāhu ta’ala anhu ne logo se farmaaya ke “Ye do afraad mere pasandeeda hain. In dono me se jis se chaahe Bai'at kar lo.” to Hazrate Umar Faarooq ne Hazrat Abu Bakr Siddeeq ki ta’areef karke un se bai'at ki to Aap ne bhi foran Hazrat Abu Bakr Siddeeq se bai'at ki.

*************
Hazrat Abu Bakr Siddeeq radiy-Allāhu ta’ala anhu ke zamaane me Aap Hazrat Khaalid bin Waleed ke saath Junge Bosra, Junge Ajnadayn, Junge Yakusa, Junge Maraaj-ul-Safar, aur Junge Sanita-ul-Uqab me shareek hue.

Hazrate Umar Faarooq radiy-Allāhu ta’ala anhu ke zamaane me Junge Fahl, Junge Maraaj-al-Room, Junge Damishq, Junge Emesa, Junge Yarmouk, Junge Jerusalem, Junge Hazir, Junge Antioch, Junge Qaadisiyyah, aur Junge Jazeera me shareek hue.

*************
Ek martaba Aap ne Islaami lashkar ke saath Maqaame Shaijar par qayaam kiya. Rozaana kuchh musalman jungle jaakar lakdiya jama kake laate aur unko jalaakar khaana pakaate. Ek din jab wo gaye to waapas na aaye. Pata chala ki Jabla bin Aeham ki fauj ne unhe pakadkar qaid kar liya hai.
Hazrate Khaalid bin Waleed radiy-Allāhu anhu 10 sahaaba ko saath lekar musalman qaidiyo ko chhudaane ke liye gaye. Raaste me hi the ke unka muqaabala taqreeban 10,000 kuffaar ke ek lashkar se hua. Wo 10 sahaaba aisi bahaaduri se lade ki kuffaar ka lashkar bokhla gaya. Bil aakhir Musalman ladte ladte thakaan se behaal ho gaye aur kuffaar ba-zaahir un par galba paane lage.
Aap apne khaime me aaraam farma rahe the ki achaanak uth khade hue aur lashkar ko foran jung ke liye tayyaar hone ka hukm diya. Logo ne Aap ki khidmat me arz ki “Huzoor! Kya baat hai? Aap ne achaanak hi jung ki tayyaari ka hukm diya hai?” Aap ne farmaaya “Abhi abhi maine khwaab me Huzoor Rasool-Allāh sallallāhu alaihi wa sallam tashreef laaye aur mujh se irshaad farmaya :- Aye Ibne Jarrah! Utho aur Khaalid bin Waleed ki madad ke liye pahuncho, unhe kuffaar ne gher liya hai.”
Yeh sunkar pure lashkar ne foran tayyaari shuru kar di aur Hazrat Khaalid bin Waleed ke paas pahunche. Islaami lashkar ko dekhkar kuffaar bhaag khade hue. Lekin musalmano ne unka ta’aaqub jaari rakha aur is zor se hamla kiya ki un ke qadam ukhad gaye aur unhe ibrat-naak shikast ka saamna karna pada aur tamaam musalman qaidiyo ko bhi chhuda liya gaya.

*************
Qasreen shaher (Misr) fatah hone ke ba’ad Aap ki ta’aleem wa husne sulook ko dekhkar waha ke nasraani [Christian] qabeele Banu Tanookh aur Banu Saleej ke logo ne Islaam apanaaya.

*************
Phir Hazrate Umar Faarooq radiy-Allāhu ta’ala anhu ne Aap ko Shaam ka governor banaaya taake mulk ki hifaazat ho.

Ek martaba Hazrate Umar Faarooq radiy-Allāhu ta’ala anhu Madeena munawwara se Mulke Shaam tashreef laaye. Aap se mulaaqaat ke duraan Hazrate Umar Faarooq ne farmaaya ke “Main apne bhai ka ghar dekhna chaahta hu.” Aap ne farmaaya “Huzoor! Aap waha na aayen yehi behtar hoga.” Hazrate Umar Faarooq ne jab israar kiya to Aap un ko saath lekar apne ghar par le gaye. Shahere Damishq ki aabaadi khatm hone ke ba’ad aakhir me khajoorke patto se bani hui ek jhonpadi nazar aai jis ke andar sirf ek musalla tha aur ek talwaar aur dhaal thi. Hazrate Umar Faarooq ne puchha ke “Is me koi saamaan nahi hai. Tum is me kaise rehte ho?” Aap ne jawaab diya “Alhamdulillāh. Is me meri zaroorat ka saara saamaan hai. Is musalle par ibaadat kar leta hu aur raat ko so bhi jaata hu.” Phir haath uthakar chappar me se ek piyaala nikaala jis me paani bhara hua tha aur sukhi roti ke tukde bhige hue the. Aap ne farmaaya “Ameer-ul-mo’mineen! Saara din hukoomat ke kaam anjaam dene me mujhe fursat nahi milti. Ek khaatoon mere liye rotiya paka deti hai. Main use khaa leta hu aur jab wo sukh jaaye to paani me bhigokar khaa leta hu.” Yeh sunkar Hazrate Umar Faarooq ki aankho me aansoo aa gaye. Aap ne farmaaya “Maine pehle hi kaha tha ke Aap yaha na aayen yehi behtar hoga.”

*************
Hazrate Umar Faarooq ke zamaane me Arab me qahet saali hui to unho ne tamaam governor ko khat likhkar Madeena munawwara me anaaj bhejkar madad karne ke liye guzarish ki. Aap ne foran anaaj se lade hue 4000 oonto Madeena munawwara rawaana kiye. Hazrate Umar Faarooq ne Aap ko Madeena munawwara aur qareeb me rehne waale logo me is anaaj ko taqseem karne ki zimmedaari sonpi. Aur Aap ko 4000 deenaar batore hadiya diye. Aap ne narmi wa adab ke saath use lene se inkaar kar diya.

*************
Pariwaar :
‾‾‾‾‾‾‾‾‾‾‾‾
Aap ka nikaah Hind binte Jaabir se hua.

Aap ke 2 saahabzaade hain :
Yazeed aur Umair.

*************
18 Hijri me mulke Shaam me taaoon [plague] ki beemaari is qadar phaili ke beshumaar log is ki wajah se marne lage. Ameer-ul-mo’mineen Hazrate Umar Faarooq radiy-Allāhu ta’ala anhu ko is ki khabar mili to unho ne foran Hazrat Abu Ubaida, Aamir bin Jarrah radiy-Allāhu ta’ala anhu ko khat likhkar paighaam bheja ke “Aap foran Madeena munawwara aa jaao. Yaha aap ki bahot zaroorat hai.” Jab Aap ne khat padha to jaan gaye ke ‘Hazrate Umar Faarooq radiy-Allāhu ta’ala anhu meri jaan bachaana chaahte hain.’ Aap ne jawaaban khat likha ke “Main jaanta hu ke Ameer-ul-mo’mineen ko mera kya kaam hai. Magar jab musalman shadeed takleef me ho to aise haalaat me main unhe chhodkar Madeena munawwara nahi aa sakta. Jaisi ALLĀH ta’ala ki marzi hogi waisa hi hoga. Ummeed hai ke aap meri is na-farmaani ko muaf kar denge.”
Jab Hazrate Umar Faarooq radiy-Allāhu ta’ala anhu ne Aap ka khat padha to un ki aankho me aansoo aa gaye. Yeh dekhkar sahaaba ne puchha ke “Kya Hazrat Abu Ubaida ka inteqaal ho gaya hai?” Hazrate Umar Faarooq ne farmaaya “Nahi, Magar woh aise haalaat me hai ke kabhi bhi duniya se rukhsat ho sakte hain.”

*************
Apne wisaal ke kuchh waqt pehle Aap ne logo se irshaad farmaaya ke “Meri chand naseehaten yaad rakhna taake tum hamesha amn o sukoon paao. Paabandi ke saath Namaaz, Roza, Sadqa-Zakaat, Qurbaani, Hajj-Umrah ada karte rehna, ek dusre ko neki ki da’awat dena, Ameer-ul-mo’mineen ke wafadaar rehna, kabhi bhi un ke khilaaf koi kaam na karna, apna farz sahi tareeqe se ada karte rehna aur dunya ki khwaahishaat me mat kho jaana.”
Phir farmaaya “Agar insaan hazaar baras bhi duniya me zinda reh le lekin aakhirkaar ise chhodkar jaana hi hai. ALLĀH tum sab par beshumaar rahmaten naazil farmae aur tumhari hifaazat farmae.”
Phir Hazrat Muaz bin Jabal radiy-Allāhu ta’ala anhu se farmaaya ke “Jab mera inteqaal ho jaaye to aap meri namaaze janaaza padhaana.”

*************
Aap Bait-ul-Muqaddas me namaaz padhne ke liye jaa rahe the ki raaste me hi inteqaal ho gaya aur Taaoon ke sabab Shahaadat ka martaba paaya.

Aap ka wisaal 19 Zil Hijjah 18 Hijri (December 639 A.D.) ko 58 saal ki umr me hua.

Hazrat Muaz bin Jabal radiy-Allāhu ta’ala anhu ne Aap ki namaaze janaaza padhaai.
Hazrat Muaz bin Jabal, Hazrat Amr bin Aas aur Hazrat Jahhaak bin Qais radiy-Allāhu ta’ala anhuma ne Aap ko qabr me utaara.

****************
Aap ka mazaar Gaur Baisaan [Jordan Valley] (Jordan) me hai.

****************
Mazeed Posts ke liye Website dekhen :
(For more posts Visit this website) :

http://fikreummat.net/

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Abu Ubaida, Aamir bin Jarrah radiy-Allāhu ta’ala anhu aur sahaaba aur tamaam Auliya Allāh ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko duniya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

05/06/2026

Jum'aa Muabarak.

*******************
Hajj par jaane waale Madeenah munawwara me Roza e Rasool par pahunchkar khud ko khushnaseeb mehsoos kar rahe honge aur keh rahe honge :

****************
Arshe ula se a’ala mere Nabi ka Roza,
Hai har makaan se baala mere Nabi ka Roza.

Kaisa hai pyaara pyaara yeh sabz gumbad,
Kitna hai meetha meetha mere Nabi ka Roza.

Aansoo chhalak pade aur betaab ho gaya dil,
Jis waqt maine dekha mere Nabi ka Roza.

Firdaus ki bulandi bhi chhoo sake na is ko,
Khulde bari se hai ooncha mere Nabi ka Roza.

Makka se is liye hi afzal hua Madeena,
Hisse me is ke aaya mere Nabi ka Roza.

Ka’abe ki azmaton ka munkir nahi hu lekin,
Ka’abe ka bhi hai Ka’aba mere Nabi ka Roza.

Baadal ghire hue hain baarish baras rahi hai,
Lagta hai kaisa suhaana mere Nabi ka Roza.

Hogi shafa’at us ki jis ne Madeene aa kar,
Khwaah ek nazar bhi dekha mere Nabi ka Roza.

Hijr o Firaaq me jo Yaa Rab tadap rahe hain,
Un ko dikha de Maula mere Nabi ka Roza.

Us aankh par kyun na main ho jaaun qurbaan,
Jis aankh ne hai dekha mere Nabi ka Roza.

Jis waqt rooh tan se ‘Attaar’ ki juda ho,
Ho saamne Khudaya mere Nabi ka Roza.

(sallallāhu alaihi wa sallam)

*******************
Assalaatu wassalaamu alaika Ya Rasool-Allāh,
Assalaatu wassalaamu alaika Ya Habeeb-Allāh,
Assalaatu wassalaamu alaika Ya Khair khalqillāh,
Wa ala aalika wa as'haabika Ya Noor-Allāh
(Sallallāhu alaihi wa sallam).

*******************
ALLAH ta’ala tamaam ke Hajj aur Ziyarat ko qubool farmae aur un ki Duao ko qubool farmae.
Sab mo’mino ko Roza e Rasool ki Ziyarat ata farmae aur Masjide Nabawi me Ibaadat aur Dua karne ki sa’adat ata farmae.
Aameen.

05/06/2026

Hazrat Imaam Shahaab-ud-deen Abul Fazl Ahmad ibne Hajar Asqalani rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

Aap ki wilaadat 4 Sha’abaan 773 Hijri (18 February 1372 A.D.) ko Cairo me hui.

***************
Aap ke waalid ka naam Noor-ud-deen Ali bin Muhammad bin Hajar hai.

Aap ke waalid ko koi aulaad nahi thi. Woh Hazrat Shaikh Sanakabari ki khidmat me haazir hue aur arz kiya “Huzoor! Mere yaha jo bacha paida hota hai woh mar jaata hai. Aap ki baargaah me dua ke liye haazir hua hu.” Hazrat ne farmaaya “Jaao, is baar tumahri pusht se ek aisa bacha paida hoga jo apne ilm se puri dunya ko bhar dega.”

***************
Bachpan hi me aap ke waalidain ka inteqaal ho gaya. Hazrat Zaki-ud-deen al-Kharrubi ne Aap ki aur aap ki bahen Sitt-ul-Rakb ki parwarish ki.

****************
Hazrat ne 5 saal ki umr me Aap ko madrasa me Qur'ān ki ta’aleem ke liye daakhil kiya.
Aap ne ek hi din me Soorah al-Maryam hifz kar li aur 9 saal ki umr me Aap haafize Qur'ān hue.

Is ke ba’ad Aap ne Ibne Hajib ki Fiq'h ki kitaab ‘Al-Hawi’ ko yaad kar liya.

785 Hijri me 12 saal ki umr me Aap Hazrat Zaki-ud-deen al-Kharrubi ke saath Makka mukarrama tashreef le gaye. Waha Aap ko Taraaweeh padhaane ki sa’adat haasil hui.

788 Hijri (1386 A.D.) me Hazrat ke wisaal ke baad Aap ne Hazrat Shams-ud-deen ibn al-Qattan se Hadeeṡ aur Shaafi fiq'h ki ki ta’aleem haasil ki.
Phir Damishq aur Jerusalem jaakar Shams-ud-deen al-Qalqashandi, Badr-ud-deen al-Balisi, anur Faatima bint Manja al-Tanukhiya se ta’aleem haasil ki.
Phir Makka mukarrama, Madeena munawwara aur Yemen jaakar ta’aleem haasil ki.
Aap ne Hazrat Zain-ud-deen al-Iraqi ki khidmat me 10 saal tak ta’aleem haasil ki.
Aap ne Hazrat Shaikh Siraaj-ud-deen al-Bulqini, Ibn al-Mulaqqin aur deegar ulama se ta’aleem haasil ki.
Aap ne Izz-ud-deen bin Jama’a se Qur'ān aur Hadeeṡ ki, Majd-ud-deen al-Fairuzabadi se Ilme Nahaw ki, aur Al-Amari se Arabi ki ta’aleem haasil ki.
Phir Cairo waapas tashreef laaye.

****************
Aap kai baar Misr ke Qaazi bhi rahe.

*******************
Tasannif :
‾‾‾‾‾‾‾‾‾‾‾‾
Aap ne Hadeeṡ, Fiq'h, Tafseer, Tawaarikh aur Sirat ki taqreeban 150 kitaaben likhi hain.

Aap ki likhi hui mash'hoor kitaaben :
(1) Fat'h-ul-Baari (Sharh Saheeh Bukhari)
(2) Al-Isaaba fee tamyiz al-Sahaaba
(3) Al-Durar al-Kamina
(4) Tahzeeb-ul-Tahzeeb
(5) Taqreeb-ul-Tahzeeb
(6) Ta'jil al-Manfa'ah
(7) Bulugh al-Maram min adillat al-ahkaam
(8 ) Nata'ij al-Afkaar fee Takhrij Ahaadeeṡ al-Azkaar
(9) Lisaan-ul-Mizaan
(10) Talkhis-ul-Habeer fee Takhrij-ull-Rafi`i al-Kabir
(11) Al-Diraaya fee Takhrij Ahaadeeṡ al-Hidaaya
(12) Taghliq al-Ta’aliq ala Saheeh al-Bukhari
(13) Risaala Tazkirat al-At'har
(14) Al-Matalib al-Aliya bi Zawaa'id al-Masanid al-Ṡamaniya
(15) Nukhbaat-ul-Fikar
(16) Al-Nukat ala Kitaab ibn al-Salaah
(17) Al-Qawl al-Musaddad fee Musnad Ahmad
(18) Silsilatul-Zahab
(19) Ta’areef Ahl-ul-Taqdees bi Maraatib al-Mawsufeen bi al-Tadlees.

****************
799 Hijri (1397 A.D.) me Aap ka nikaah Uns Khaatoon se hua.
Aap ki jauza Hadeeṡ ki maahir thi aur un ko Hazrat Haafiz al-Iraqi se Ijaazat mili thi aur woh Ulama ki mehfil me Hadeeṡ ki ta’aleem deti thi.

****************
Aap ka wisaal 9 Zil Hijjah 852 Hijri (2 February 1449 A.D.) ko baad namaaze Ishaa hua.

Taqreeban 50,000 log Aap ke janaaza me shareek hue jin me Sultaan Saif-ud-deen Jaqmaq aur Khalifa Al-Mustakfi Ṡaani bhi the.

****************
Aap ka mazaar Cairo (Egypt) me hai.

****************
Mazeed Posts ke liye Website dekhen :
(For more posts Visit this website) :

http://fikreummat.net/

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Imaam Ahmad ibne Hajar Asqalani rahmatullāhi alaihi aur tamaam Auliya Allāh ke waseele se
Sab ke Eimaan ki hifaazat farmae aur Sab ko mukammal ishqe Rasool ata farmae aur Sab ko ikhlaas ke saath nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

05/06/2026

Hazrat Uṡmaan Ghani radiy-Allāhu ta’ala anhu :
♦♦♦♦♦♦♦♦♦♦♦♦♦♦♦♦♦

Alqaab :
‾‾‾‾‾‾‾‾
Zun-Noorain, Ghani-ul-Afzal, Sayyed-ul-Askhiya, Shaheed-e-Mazloom.

***********
Aap ki wilaadat 579 A.D. me (Huzoor Rasool-Allāh sallallāhu alaihi wa sallam ki wilaadat ke 6 saal pehle) Taa'if me hui.

***********
Aap ke waalid ka naam Affaan ibn Abul Aas ibn Umayya aur waalida ka naam Arwa bint Karaiz hai.

Aap Quraish ke Banu Umayya qabeele se hain.
Jo Makka ke bahot raees aur izzatdaar khaandaano me se hain.

Aap ki naani Ummul Hakeem Baida binte Abdul Muttalib Huzoor sallallāhu alaihi wa sallam ke waalid Hazrate Abdullāh ki Tuwaama [judwa bahen] thi aur Huzoore akram sallallāhu alaihi wa sallam ki phuphi thi.

*********
Aap ne 611 A.D. me Shaam [Syria] se tijaarat ke safar se waapas aane ke baad Hazrate Abu Bakr Siddeeq radiy-Allāhu ta’ala anhu ki da’awat se Islaam apnaaya.
Aap musalman hone waale chothe (4) mard hain aur as-Saabiqoon al-Awwaloon me shaamil hain.

Aap ke musalman hone par aap ki 2 biwiya : Umme Amr bint Jundab aur Faatima bint Waleed, Aap ko chhodkar chali g*i.

Aap ke chacha Haqam bin Abul Aas ko jab Aap ke musalman hone ka pata chala to unho ne Aap ko pakadkar baandh diya aur kaha “Tum apne baap-daada ka deen chhodkar ek naya deen ikhtiyaar karte ho. Main tumhe us waqt tak nahi chhodunga jab tak tum is naya deen ko na chhod doge.”
Aap ne farmaaya “Khuda ki qasam! Main deene Islaam ko kabhi nahi chhodunga aur kabhi is se juda na hounga.” Baar baar yeh jawaab sunkar aakhirkaar aap ke chacha ne Aap ko chhod diya.

*********
Huzoor sallallāhu alaihi wa sallam ke farmaan par 3 Nabawi (613A.D.) me Aap ne apni biwi Ruqayya bint Huzoor Muhammad Mustafa sallallāhu alaihi wa sallam ke saath Habasha [Abyssinia] hijrat ki. Muhaajireen ke is giroh me 11 musalman mard aur 4 aurte thi.
Huzoor sallallāhu alaihi wa sallam ne farmaaya ke “Hazrate Uṡmaan Ghani un musalmano me se hai jinho ne deene islaam ki khaatir sab se pehle hijrat ki hai.”

Phir kuchh waqt ba’ad Aap Hazrate Ruqayya radiy-Allāhu ta’ala anha ke saath Makka waapas aa gaye aur tijaarat shuru ki.

622 A.D. me Aap ne apni biwi Hazrate Ruqayya ke saath Madeena hijrat ki aur Aap Hazrat Abu Talha, Aus ibn Ṡaabit al-Najjaari radiy-Allāhu ta’ala anhu ke yaha thehre. Phir kuchh waqt baad Aap ne apna khud ka makaan bana liya.
Madeena me sukoonat ikhtiyaar karne ke ba’ad Aap Tijaarat karte rahe aur Aap ki imaandaari ki wajah se ALLĀH ke fazl se Aap ke kaarobaar me hamesha barkat rahi.

**********
Aap Ashra e mubashshira me se hain.

Huzoor sallallāhu alaihi wa sallam ne Aap ko 2 baar Jannati hone ki bashaarat di.
Aur Huzoor sallallāhu alaihi wa sallam farmaaya karte the ke “Jise Jannati insaan ko dekhna ho woh Uṡmaan Ghani ko dekh le.”
Ek martaba Huzoor sallallāhu alaihi wa sallam ne irshaad farmaaya ke “Har Nabi ka ek rafeeq hota hai Uṡmaan Jannat me mera rafeeq hoga.”

******************
Ek martaba Hazrat Maula Ali al-Murtaza radiy-Allāhu ta’ala anhu ne ek mehfil me farmaaya “Hazrate Uṡmaan un logo me se hain jin ke liye ALLĀH ta’ala ne yeh aayat naazil farmai : Un logo par jo eimaan laaye aur nek amal karte rahe us me koi gunaah nahi jo wo pehle khaa p*e chuke hain jab ke (is ke ba’ad un se) wo bachte rahe aur (naazil hone waale ahkaam par) eimaan laaye aur aamaale saaleh karte rahe aur phir (haraam ki hui cheezo se) parhez karte rahe aur (mukammal) eimaan laaye, Phir taqwa waale hue aur (phir) ehsaan waale ban gaye, Aur ALLĀH ehsaan waalo se mohabbat farmaata hai.” (Qur'ān : Soorah al-Maa'idah, Aayat 93)

*********
Huzoor sallallāhu alaihi wa sallam akṡar Aap ko apne khat likhne ka kaam dete the.
Aur kai baar ‘Wahi’ (Aayate) bhi likhwate the.

*********
Hazrate Uṡmaan Ghani ne Jung e Badr ke ilaawa har Jung me shirkat ki.

Jung e Badr ke mauqe par Aap ki biwi Ruqayyah shadeed beemaar thi aur Huzoor sallallāhu alaihi wa sallam ke farmaan par aap un ki khidmat wa timaardaari ke liye rooke the. Lekin jab Junge Badr me musalmano ki fatah ki khabar mili us se pehle hi Hazrate Ruqayya radiy-Allāhu ta’ala anha ka inteqaal ho chuka tha.
Aap ki is farmaan bardaari ki wajah se Huzoor sallallāhu alaihi wa sallam ne Aap ko As'haabe Badr me shumaar karke Aap ko ṡawaab bhi ata farmaaya aur maale ghanimat me bhi hissa ata farmaaya.

*********
Is ke ba’ad Huzoor sallallāhu alaihi wa sallam ne apni saahabzaadi Umme Kulṡoom ka nikaah Hazrate Uṡmaan Ghani se kiya.

Is tarah Huzoor sallallāhu alaihi wa sallam ki 2 saahabzaadiya ek ke ba’ad ek Aap ke nikaah me aai. Is liye Aap ‘Zun-Noorain’ kehlaate hain.

Huzoor sallallāhu alaihi wa sallam kehte the “Agar meri aur koi beti hoti to main woh bhi Uṡmaan ke nikaah me deta.”

***************
3 Hijri me Maarka e Banu Ghaftan aur 4 Hijri me Maarka e Zaat-ur-Riqa ke mauqe par Huzoor sallallāhu alaihi wa sallam Aap ko Madeena munawwara me apna naa'ib banakar tashreef le gaye.

**********
Aap ki Sakhaawat mash'hoor hai.
Aap ko ‘Ghani-ul-Afzal’ ya’ani tamaam sakhiyo me bartar [Ghani ka ma’ana hai be-hisaab sakhaawat karne waala] aur ‘Sayyed-ul-Askhiya’ kaha jaata hai ya’ani ‘Tamaam sakhiyo ke sardaar’.

Aap ko ALLĀH ta’ala ne bahot maal o daulat ata farmaaya tha. Magar Aap hamesha saadgi se rehte the aur sunnate rasool par amal karte the aur ALLĀH ki raza ke liye ishqe Rasool ke saath ziyada se ziyada khairaat karte rehte the.

**********
Madeena me musalmano ki ta’adad badhne lagi aur Masjide Nabawi me jagah kam padne lagi tab aap ne masjid ko badi karne ke liye apne maal se mazeed zameen khareedkar di.

**********
Ek martaba Huzooor Nabi e kareem sallallāhu alaihi wa sallam irshaad farmaaya ke “Jo shakhs (masjid se mutassil) ghar khareed kar Masjide Nabawi me shaamil kare use ALLĀH ta’ala bakhsh dega.” Hazrate Uṡmaan Ghani radiy-Allāhu ta’ala anhu ne wo ghar khareed kar masjid me shaamil kar diye. Phir ek martaba Huzoor Sayyede Aalam sallallāhu alaihi wa sallam ne farmaaya “Jo shakhs falaan qabeele ke murbad ya’ani khajoore aur galla sookhaane ki jagah khareed kar musalmaano par waqf kar de us ko ALLĀH ta’ala bakhsh dega.” Hazrate Uṡmaan Ghani radiy-Allāhu ta’ala anhu ne us jagah ko khareed kar musalmaano par waqf kar diya. Phir ek martaba Huzoor Nabi e kareem sallallāhu alaihi wa sallam ne irshaad farmaaya “Jo shakhs jaishe asraat ka saamaan muhayya kara de ALLĀH ta’ala us ko bakhsh dega.” Hazrate Uṡmaan Ghani radiy-Allāhu ta’ala anhu ne tamaam lashkar ka mukammal saamaan faraaham kar diya, yaha tak ke us me ek uqaal bhi kam na thi.

(Kanz-ul-Ummal, Kitaab-ul-Fazaa'il, Hadeeṡ -36249)

**********
Jab Muhaajireen Makka mukarrama se hijrat karke Madeena munawwara me aaye to yaha ka paani pasand na aaya jo khaari tha.
Madeena Munawwara me ek shakhs ki milkiyat me kunva tha, jis ka naam ‘Beer e Rumaa’ tha. Woh shakhs apne kunve chashme ka paani bechta tha.
Huzoor sallallaāhu alaihi wa sallam ne us se farmaaya “Tum yeh kunva mujhe jannat ke chashme ke badle bech do aur Jannat ka chashma mujh se le lo.” Us ne arz kiya “Meri aur mere ahl o ayaal ki rozi isi se hai.”
Yeh khabar Hazrat Uṡmaan Ghani radiy-Allāhu ta’ala anhu ko pahunchi to aap ne jaakar use kunva bechne ki darkhwaast ki. Badi mushkil se woh 12000 dirham me kunve ka aadha haq bechne par raazi hua aur yeh tay hua ke ek din Yahudi ki baari hogi aur ek din Hazrat Uṡmaan Ghani ki baari. Jis din Aap ki baari hoti us din saare musalman do din ka paani bhar lete. Ba’ad me us yahudi ne baaqi aadha hissa bhi aap ko bech diya. Is tarah kul 35000 dirham dekar aap ne woh kunva khareed liya.
Phir Aap ne Huzoor Sarware kaunain sallallāhu alaihi wa sallam ki baargaah me haazir hokar arz kiya “Ya Rasool-Allāh sallallāhu alaihi wa sallam! Jis tarah aap us yahudi ko jannat ka chashma ata farma rahe the agar main yeh chashma us se khareed lu to kya Huzoor woh Jannat ka chashma mujhe ata farma denge?” Huzoor sallallāhu alaihi wa sallam ne farmaaya “Beshak woh main tumhe de dunga.” Hazrat Uṡmaan Ghani ne khush hote hue arz kiya “Ya Rasool-Allāh sallallāhu alaihi wa sallam! Woh chashma maine khareed liya hai aur ab use main musalmano ko waqf karta hu.”
Woh kuan ‘Beer e Uṡmaan’ ke naam se mash'hoor hai. Madeena shareef jaane waale khusnaseeb us kunve ki ziyarat ke liye jaate hain.

**********
Ghazwa e Tabook ke dauraan aap ne ek tihaai musalman lashkar (taqreeban 1000 aadami) ka kharch apne zimme liya aur saath me baaqi lashkar ko madad karne ke liye 1000 deenaar aur 1000 oont aut 15 ghode bhi diye.

**********
Ek martaba Huzoor sallallāhu alaihi wa sallam ne ek shakhs ko Hazrat Uṡmaan radiy-Allāhu ta’ala anhu ke paas bheja. Jab woh Aap ke makaan ke qareeb pahuncha to us ne suna ke Aap apne khaadim se keh rahe hain ke “Tune khaane me namak thoda ziyada daal diya hai. Agar tum namak kam daalte to woh kal ke liye kaam aata.” Yeh sunkar woh shakhs waapas chala gaya.
Dusri martaba jab raat ko woh pahuncha to suna Aap apne khaadim se keh rahe hain ke “Tune chiraagh ko thoda ziyada tez rakha hai. Agar tum tail bachaate to woh kal ke liye kaam aata.” Yeh sunkar woh waapas chala gaya.
Huzoor sallallāhu alaihi wa sallam ne use phir se bheja aur kaha ke “Uṡmaan ko mera naam dena.” Us ne aisa hi kiya. To Aap ne kaha ke “Tum andar waale kamre me chale jaao aur jo chaaho le lo.” Woh andar gaya aur zaroorat ke mutaabiq maal lekar baahar aaya.
Phir us ne puchha ke “Jab main kal aaya tha to aap apne khaadim ko namak aur tel jaisi chhoti baato ke liye daant rahe the aur aaj mujhe itna saara maal de rahe hain. Yeh baat meri samajh me nahi aai.”
Aap ne kaha ke “Fuzool-kharchi gunaah hai. Aur (is se bachkar) main pyare Aaqa sallallāhu alaihi wa sallam ki sunnat par amal karta hu. Aur yeh sab maal mujhe ALLĀH ne Huzoor sallallāhu alaihi wa sallam ke sadqe me diya hai. Is liye use Aaqa sallallāhu alaihi wa sallam ki raza ke liye kharch karne me mujhe khushi hoti hai aur uska koi hisaab main nahi rakhta. Agar tum pehle hi bata dete to tumhe 3 martaba aana na padta.”

*********
Islam apnaane ke baad Aap ka ma’amool tha ke Aap har Ju’maa ko ek ghulaam aazaad karte.

Ek martaba Aap ne Huzoor Rasool-Allāh sallallāhu alaihi wa sallam ko apne ashaaba ke saath apne yaha da’awat ke liye arz kiya. Huzoor sallallāhu alaihi wa sallam ne da’awat qubool farmai.
Waqt par Huzoor sallallāhu alaihi wa sallam apne ashaaba ke saath Hazrat Uṡmaan Ghani ke ghar tashreef le chale. Hazrat Uṡmaan Ghani Huzoor sallallāhu alaihi wa sallam ke pichhe pichhe chalne lage aur aap ke qadam mubarak ginne lage. Huzoor sallallāhu alaihi wa sallam ne puchha “Aye Uṡmaan! Kya kar rahe ho?” Hazrat Uṡmaan ne arz kiya “Ya Rasool-Allāh sallallāhu alaihi wa sallam! Mere maa-baap aap par qurbaan. Main chaahta hu ki aap ki azmat par aap ke har qadam ke badle me ek ek ghulaam aazaad karu.”
Chunaanche, Hazrat Uṡmaan ke ghar tak Huzoor sallallāhu alaihi wa sallam ke jitne qadam pade utne ghulaam Hazrat Uṡmaan ne aazaad kiye.

**************
Ek martaba Huzoor sallallāhu alaihi wa sallam ashaaba ke saath da’awat par gaye. Khaana khaate waqt Aap ke haath se niwaala gir gaya to Aap ne use saaf karke khaa liya. Yeh dekhkar Huzoor sallallāhu alaihi wa sallam ne farmaaya ke “Yehi wajah hai ke Uṡmaan kitna bhi kharch karte hain lekin is amal ki wajah se us ke maal me barkat hi hoti hai.”

*********
Zil Qa’ada 6 Hijri (March 628 A.D.) me Huzoor sallallāhu alaihi wa sallam sahaaba ke saath Umrah ke liye Makka tashreef le gaye. Raaste me Huzoor sallallāhu alaihi wa sallam ne Hazrate Kharash ibn Ummayya al-Khuzai radiy-Allāhu ta’ala anhu ko apne oont par aage bheja. Hazrate Kharash ibn Ummayya Makka pahunche to Quraish ne oont ko maar daala aur Hazrate Kharash ibn Ummayya bahot mushkil se bachkar bhaage aur Maqaame Asfan par Huzoor sallallāhu alaihi wa sallam ki khidmat me haazir hokar saara waaqya bataaya.
Maqaame Hudaibiyyah pahunchkar Huzoor sallallāhu alaihi wa sallam ne Hazrate Umar Faarooq ko Makka jaane ke liye farmaaya to unho ne arz kiya “Ya Rasool-Allāh sallallāhu alaihi wa sallam! Kuffaare Quraish mere sakht dushman hain aur Makkah me mere qabeele ka aisa koi shakhs nahi hai jo mujhe un kaafiro se bacha sake.”

Phir Huzoor sallallāhu alaihi wa sallam ne Hazrate Uṡmaan Ghani radiy-Allāhu ta’ala anhu ko safeer banakar Makka bheja ke Quraish ke sardaaro ko bataaye ke “Musalman Umrah ke liye aaye hain jung ke liye nahi.”
Hazrate Uṡmaan Ghani jab Makka pahunche to Quraish ne kaha “Tum Tawaaf e Ka’aba aur Safa wa Marwa ki Saee karke apna Umrah ada kar lo. Magar hum Muhammad (sallallāhu alaihi wa sallam) ko hargiz Ka’aba ke qareeb na aane denge.” Aap ne kaha “Main Huzoor Rasool-Allāh sallallāhu alaihi wa sallam ke baghair tanha tawaaf nahi kar sakta.” Quraish ne Aap ko Makkah me rok liya.
Hazrate Uṡmaan Ghani ko aane me bahot der hui to yeh andesha hua ke shaayad Quraish ne unhe qatl kar diya ho.
Huzoor sallallāhu alaihi wa sallam ne 1400 sahaaba ko ek darakht ke neeche jama karke bai'at ki. Tamaam sahaaba ne Huzoor sallallāhu alaihi wa sallam ke haath par apna haath rakha aur yeh ahad kiya ke “Agar Quraish ne Hazrate Uṡmaan Ghani ko shaheed kar diya hai to hum us ka badla lenge aur har haal me Huzoor sallallāhu alaihi wa sallam ka saath denge.” Aakhir me Huzoor sallallāhu alaihi wa sallam ne sab se upar apna baaya haath rakha aur farmaaya “Mera yeh haath Uṡmaan bin Affaan ki taraf se hai.”
Yeh bai'at ‘Bai'at-ur-Ridwaan’ ke naam se mash'hoor hai.
Is ke ba’ad Urwa bin Mas'ood ke samjhane par Quraish ne Hazrate Uṡmaan Ghani ko chhod diya aur Suhayl ibn Amr ko guftgu karne ke liye bheja. Musalmano aur Quraish ke b**h Muahida hua, jise Sulah Hudaibiyyah kehte hain.

Aap jab Makka me the tab ba’az Sahaaba e kiraam ne kaha ke “Hazrat Uṡmaan Ghani khush-qismat hain ke woh Baitullāh shareef ka tawaaf karke aaenge.” Huzoor sallallāhu alaihi wa sallam ne farmaaya “Uṡmaan mere baghair tawaaf nahi karega.”
Hazrat Uṡmaan Ghani Makkah se jab waapas aaye to sahaaba ne un se puchha ke “Kya aap ne Baitullāh ka tawaaf bhi kiya?” Aap ne jawaab diya “ALLĀH ki qasam. Quraish tawaaf karne ke liye israar karte rahe. Lekin agar main waha [Makkah me] ek saal bhi muqeem rehta to bhi Huzoor Nabi e kareem sallallāhu alaihi wa sallam ke baghair tawaaf na karta.”

*********
Ek martaba Huzoor sallallāhu alaihi wasallam ki baargaah me ek Janaaza laaya gaya. Aap ne us ki namaaze janaaza padhaane se inkaar kiya. Aur farmaaya “Yeh Uṡmaan se bughz rakhta tha. Lihaaza ab ALLĀH bhi is shakhs se naraaz hai.”

*********
Zil Qa’ada 7 Hijri (629 A.D.) me Aap ne Huzoor sallallāhu alaihi wa sallam ke saath Umrah kiya.

8 Hijri (630 A.D.) me Fatah Makka ke ba’ad Aap ki waalida aur pariwaar musalman hua.

Shawwaal 8 Hijri me Junge Hunain ke ba’ad Aap ne Huzoor sallallāhu alaihi wa sallam ke saath Umrah ada kiya.

9 Hijri (631 A.D.) me Aap ne Ameer-ul-Hujaaj Hazrat Abu Bakr Siddeeq radiy-Allāhu ta’ala anhu ke saath Hajj ada kiya.
Phir 10 Hijri (632 A.D.) me Huzoor sallallāhu alaihi wasallam ke saath Hajj ada kiya.

*********
Aap roz raat ko ek khatm Qur'ān tilaawat karte.

*********
Huzoor sallallāhu alaihi wasallam ke wisaal ke ba’ad Hazrat Umar Faarooq aur Hazrat Abu Ubaida ibn Jarrah radiy-Allāhu ta’ala anhuma ke ba’ad Aap ne Hazrat Abu Bakr Siddeeq radiy-Allāhu ta’ala anhu se Bai'at ki.
Aap Hazrat Abu Bakr Siddeeq radiy-Allāhu ta’ala anhu ke musheer rahe.
Hazrat Abu Bakr Siddeeq radiy-Allāhu ta’ala anhu ne apne wisaal ke din Hazrate Uṡmaan ko aur Hazrat Abdur Rahmān bin Awf radiy-Allāhu ta’ala anhu ko Hazrat Umar Faarooq radiy-Allāhu ta’ala anhu ko khalifa banaane ki wasiyat ki.

*********
Hazrat Umar Faarooq radiy-Allāhu ta’ala anhu ke zamaane me Madeena munwwara me qahet pada. Logo ke liye anaaj nahi the. Hazrat Umar Faarooq ko pata chala ke Hazrate Uṡmaan Ghani ke gandoom se lade hue oont aa rahe hain. Unho ne Aap ko paighaam bheja ke “Agar Aap aadhe daam me gandoom beche to sab ke liye anaaj muhayya kiya jaa sake.” Aap ne farmaaya “Ameer-ul-mo’mineen se kehna ke Uṡmaan to 10 guna lena chaahta hai.” Jab Hazrat Umar Faarooq ne ye suna to jalaal me aa gaye aur farmaaya ke “Kya yeh wohi Uṡmaan hai jis ne musalmano ke liye kunva khareed kar waqaf kiya tha aur apne maal se islaami lashkar ki madad ki thi. Aise haalaat me 10 guna daam kaun dega?” Aap ne farmaaya “Ameer-ul-mo’mineen se kehna ke ek darbaar aisa hai jo 700 bhi de sakta hai.” Jab Hazrat Umar Faarooq ne yeh suna to un ki aankho me aansoo aa gaye aur farmaaya “Beshak Rabbul aalameen ke darbaar me 700 guna bhi mil sakta hai.”
Hazrate Uṡmaan Ghani ne tamaam gandoom musalmano me taqseem kar diye.

*********
Aap 5 Moharram 24 Hijri (11 November 644 A.D.) ko Hazrat Umar Farooq radiy-Allāhu ta’ala anhu ke baad teesre Khalifa hue.

Aap ke zamaane me Azarbaijan, Armenia, Faars [Iran] aur Khurasan me baghaawat hui jin me jung fatah ki. Islaami saltanat Asia aur Africa me Faars [Iran] aur Khurasan [Afghanistan] tak aur Tunisia aur Morocco tak phaili.

Aap ke zamaane me saraa, nahere wa chashme, baandh, pul, sadaken, chaara-gaah banaaye gaye. Kabhi kabhi Khaibar ki taraf se Madeena me baadh aa jaati thi. Aap ne Madeena se thodi doori par ek baandh baandha aur ek naher khudvawakar baadh ka raasta mod diya.

Aap ke zamaane me Masjide Nabawi ko bada karne ki zaroorat pesh aai. Masjide Nabawi ke qareeb ki jis jagah ki zaroorat thi waha jin logo ke makaanaat the wo apne makaan bina qeemat liye dena chaahte the. Is me kuchh arsa guzar gaya. Phir ek martaba Aap ne khutba e jum'aa me pur aṡar taqreer farmai aur guzarish ki ke “Logo ki zyaadati ke sabab masjid ko bada karna bahot zaroori ho gaya hai.” Jis se sab logo ne aap ki baat ko tasleem kar liya. Phir Aap ki nigraani me 10 mahine me naye sire se Masjide Nabawi ki ta’ameer ka kaam mukammal hua.

Aap ke zamaane me Qur'ān majeed ko jama karke Kitaab banaane ka kaam mukammal hua, jo Hazrate Abu Bakr Siddeeq radiy-Allāhu ta’ala anhu ke zamaane me Hazrate Umar Faarooq radiy-Allāhu ta’ala anhu ke mashware par shuru kiya gaya tha.

*********************
Ek martaba ek shakhs ne raasta chalte hue ek ajnabi aurat ko ghoor ghoor kar galat nazar se dekha. Is ke ba’ad woh Ameer-ul-Mo’mineen Hazrat Uṡmaan Ghani radiy-Allāhu ta’ala anhu ki khidmat me haazir hua to us shakhsh ko dekhkar aap ne pur jalaal lehje me irshaad farmaaya “Tum log aisi haalaat me mere paas aate ho ki tumhari aankhon me Zina ke aṡraat hote hain.” Us shakhs ne kaha ki “Aye Ameer-ul-Mo’mineen! Kya Rasool-Allāh ke ba’ad aap par 'Wahi' utarne lagi hai? Aap ko kaise m’aaloom hua ki meri aankhon me Zina ke aṡraat hain?”
Aap ne irshaad farmaaya ‘”Mere upar wahi to naazil nahi hoti magar maine jo kaha wo bilkul sachi baat hai, Kyun ki ALLĀH ta’ala ne mujhe aisi Firaasat ataa farmai hai jis se main logon ke dilo ke haalaat aur khayaal jaan liya karta hu.”

*********
Ek martaba ek qabr ko dekhkar Aap rone lage. Logo ne kaha “Huzoor! Aap kyun ro rahe hain? Aap ko to Huzoor Rasool-Allāh sallallāhu alaihi wa sallam ne jannat ki bashaarat ata ki hai.” Aap ne farmaaya “Qabr aakhirat ki pehli manzil hai. Sab ko is se guzarna hai. Waha kya haalaat honge woh koi nahi jaanta. Agar ALLĀH ta’ala kisi khata par hamari pakad kare to us ke azaab se koi bacha nahi sakta.”

*********
Aqwaal :
‾‾‾‾‾‾‾‾‾‾
Aap irshaad farmaate hain :
(1) Ta’ajjub hai us par jo Jannat par eimaan rakhta hai aur phir dunya ke aish o aaraam se waabasta rehta hai.
Ta’ajjub hai us par jo Dozakh (ke azaab) ke baare me jaanta hai phir dunya me gunaah se door nahi hota.
Ta’ajjub hai us par jo shaitaan ko dushman jaanta hai aur phir us ki ita’at karta hai.
(2) Gunaah kisi na kisi surat me dil ko pareshaan rakhta hai.
(3) Zabaan ki lagzish paanv ki lagzish se zyada khatarnaak hai.
(4) Khaamoshi ghusse ka behtareen ilaaj hai.
(5) Haqeer se haqeer pesha ikhtiyaar karke mehnat karna haath failaane se zyada behtar hai.
(6) Kisi ki aankh tumhari wajah se nam na ho, Kyun ki tumhe us ke har aansoo ka qarz chukana hoga.
(7) Hamesha sach bolo taake qasam khaane ki zaroorat na pade.
(8 ) Dunya ke liye pareshaan hona yeh qalb ki taariki hai aur aakhirat ke liye pareshaan hona yeh qalb ka noor hai.

*************
Aap se 146 ahadeeṡ marwi hai.

Aap riwaayat karte hain ki :
(1) Huzoor Rasool-Allāh sallallāhu alaihi wa sallam ne irshaad farmaaya,
“Jis ne namaaze Ishaa ba-jama’at ada ki use aadhi raat ki ibaadat ka ṡawaab milega aur jis ne namaaze Ishaa aur namaaze Fajr ba-jama’at ada ki use puri raat ki ibaadat ka ṡawaab milega.”

(2) Huzoor Rasool-Allāh sallallāhu alaihi wa sallam roz subah aur shaam 3-3 martaba yeh dua padhte the
“Bismillāhillazee laa yadurru ma’a-asmihī shay'un fil-ardi wa laa fis-samaăi wa huwas-samee'ul aleem.
بِسْمِ اللَّهِ الَّذِي لَا يَضُرُّ مَعَ اسْمِهِ شَيْءٌ فِي الْأَرْضِ وَلَا فِي السَّمَاءِ وَهُوَ السَّمِيعُ الْعَلِيْمُ
[Tarjuma : ALLĀH ke naam se aur ALLĀH ki barkat ke saath (khaata hu).
ALLĀH ke naam se jis ke naam ke saath zameen aur aasmaan me koi cheez nuqsaan nahi pahunchaati aur woh sab sunne waala aur jaanne waala hai.]”
(Abu Daawūd;
Tirmizi)

(3) Huzoor Rasool-Allāh sallallāhu alaihi wa sallam ne irshaad farmaaya,
“Baroze Qayaamat 3 qism ke log Shafa’at farmaenge : pehle Ambiya, phir Ulama, phir Shohada.”
(Ibne Majah, Safah -330;
Mishkaat, Safah -494)

*********
Ek martaba Hazrat Ubaid ibne Imraan radiy-Allāhu ta’ala anhu ne Hazrat Uṡmaan Ghani se kaha “Ek raat ko main Behar e Kulzum ke kinaare par tha aur us ke paani se wuzu kar raha tha. Jab maine us paani ko chakha to mujhe behad ta’ajjub hua ke woh paani khaara hone ke bajaay shahed se bhi zyaada meetha ma’aloom hua.” Yeh sunkar Aap ne farmaaya “Aye Ubaid! Woh Lailatul Qadr hogi.” Phir farmaaya “Jis shakhs ne is raat ko ALLĀH ta’ala ki yaad me guzaari us ne jaise hazaar maah se bhi ziyada arsa ibaadat ki aur ALLĀH ta’ala uske tamaam gunaah ko muaaf farma dega.”

*********
Pariwaar :
‾‾‾‾‾‾‾‾‾‾‾‾
Musalman hone se pehle Aap ki 2 biwiya, 6 bete aur 2 betiya thi.
(1) Umme Amr bint undab se
4 bete : Amr, Khaalid, Abaan, Umar;
1 beti : Maryam.

(2) Faatimah bint Waleed se
2 bete : Waleed, Saeed;
1 beti : Umme Saeed.

♦ In me se sirf Hazrate Abaan radiy-Allāhu ta’ala anhu musalman hue.

Musalman hone ke baad Aap ki 6 biwiya aur 3 saahabzaade aur 4 saahabzaadiya hain.

(1) Ruqayya bint Huzoor Muhammad Mustafa sallallāhu alaihi wa sallam (Wisaal 2 Hijri) se
1 beta : Abdullāh.
(2) Umme Kulṡoom bint Huzoor Muhammad Mustafa sallallāhu alaihi wa sallam (Wisaal 8 Hijri).
(3) Fahida bint Ghazwan se
1 beta : Abdullāh al-asghar.
(4) Ummul Baneen bint Einiyah se
1 beta : Abdul Malik.
(5) Ramla bint Shaibah se
3 betiya : Aa'isha, Umme Abaan, Umme Amr.
(6) Nailah bint Fraizah se
1 beti : Maryam.

♦ Aap ke teeno bete kam umr me wafaat paaye.

*********
35 Hijri me Kufa, Basra aur Misr [Egypt] se 3000 baaghi Madeena ke ird gird ke Zi-Khashab, Zi-Murwah aur Awas ilaaqe me jama hue. Phir unho ne hamla karke Hazrate Uṡmaan Ghani radiy-Allāhu ta’ala anhu ke makaan par ghera daala. Aap ne apne saathiyo ko musalmano ke khilaaf jang karne se mana farmaaya. Baaghiyo ne Aap ke ghar me khaane p*ene ki cheeze pahunchane par rok laga di.
Hazrate Hasan ibn Ali, Hazrate Husain ibn Ali , Hazrate Abdullāh ibn Zubair radiy-Allāhu ta’ala anhuma aur Marwaan bin Hakam ne Aap ki hifaazat ke liye Aap ke ghar par pehra diya. Ummul mo’mineen Hazrat Safiya bint Huyay radiy-Allāhu ta’ala anha ne Aap ko khaana aur paani pahunchaane ki koshish ki magar woh nakaam hui.

Shahaadat se kuchh waqt pehle Aap ne apne ashaab se farmaaya “Mujhe khwaab me Huzoor Rasool-Allāh sallallāhu alaihi wa sallam ne farmaaya : Aye Uṡmaan, aaj iftaar hamare saath karna. Is liye aaj maine roza rakha hai.”
Aap ki ahalya mohtarama farmaati hain ke “Aap ko neend aai aur bedaar hote hi aap ne farmaaya : Ye muhaasara kiye hue log mujhe shaheed kar denge. Maine kaha : Aye Ameer ul mo’mineen! Hargiz nahi. Aap ne farmaaya : Huzoor Sarware Kaunain Rasool-Allāh sallallāhu alaihi wa sallam ne khwaab me aakar farmaaya Tum is Jum’aa ko hamare paas haazir hone waale ho.”

Jab Raafziyo ne dekha ke darwaaze se andar jaana mumkin nahi to ghar ki chhat par chadh gaye aur use todkar andar pahunche.
Unho ne tilaawate Qur'ān kar rahe Hazrate Uṡmaan Ghani ke sar par zordar waar kiya aur Aap ko zahkmi kar diya. Jab Aap par waar kiya gaya to aap ne farmaaya “Bismillāhi tawakkaltu al-Allāh.” Aur Aap ki daadhi mubarak se behta hua khoon Qur'ān majeed par girne laga.
Maana jaata hai ke Aap ko zakhmi karke shaheed karne waale ka naam ‘Hemaar’ tha.

*********
Aap ka wisaal 18 Zil Hijjah 35 Hijri (656 A.D.) ko 77 baras ki umr me hua.
Aap ki namaaz e janaaza Hazrat Jaabir bin Muta’am radiy-Allāhu ta’ala anhu ne padhaai.

*********
Aap ka mazaar Jannatul Baqi, Madeena munawwara me hai.

*********
Mazeed Posts ke liye Website dekhen :
(For more posts Visit this website) :

http://fikreummat.net/

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Uṡmaan Ghani radiy-Allāhu ta’ala anhu aur sahaaba ke waseele se
Sab ke Eimaan ki hifaazat farmae aur Sab ko mukammal ishqe Rasool ata farmae aur Sab ko ikhlaas ke saath nek amal karne ki taufiq ata farmae.
Aur Sab ko duniya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

Address

Juhapura
Ahmedabad
380055

Website

facebook.com

Alerts

Be the first to know and let us send you an email when Humanity Of Islam posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Humanity Of Islam:

Humanity Of Islam

06/06/2026

06/06/2026

05/06/2026

05/06/2026

05/06/2026

Address

Website

Alerts

Contact The Business

Shortcuts

Share

Category