04/09/2026
Hijrate Nabi ka bayaan :
♦♦♦♦♦♦♦♦
Qur'ān :
16 Soorah al-Nahl, Aayat 40 :
Aur jinho ne ALLĀH ki raah me hijrat ki us ke ba’ad ke un par zulm dhaaye gaye to hum zaroor unhe duniya me behtar thikaana denge, Aur (un ke liye) aakhirat ka ajr to yaqeenan bahot bada hai, Kaash wo (is raaz ki baat ko) jaante hote.
8 Soorah al-Anfaal, Aayat 74-75 :
Aur jo log eimaan laaye aur hijrat ki aur ALLĀH ki raah me jihaad kiya aur jin logo ne un (muhaajiro) ko jagah di aur madad ki wohi log haqeeqat me sache musalman hain, un logo ke liye bakhshish aur karam [izzat] waali rozi hai.
Aur jo log us ke ba’ad eimaan laaye aur hijrat ki aur tumhare saath milkar jihaad kiya wo bhi tum hi me se hain.
9 Soorah at-Tawbah, Aayat 40 :
Agar tum unki madad na karoge (lekin) beshak ALLĀH ne unko madad se nawaza tha jab kaafiro ne unhe nikaal diya tha wo do me doosre the jab ke dono ghaar me the jab woh apne saathi se farma rahe the ghamzada na ho beshak ALLĀH hamare saath hai pas ALLĀH ne un par apni taskeen naazil farmai aur unhe aise lashkar ke zariye quwwat bakhshi jinhe tum na dekh sake aur us ne kaafiro ki baat ko past kar diya, Aur ALLĀH ka farmaan to buland o baala hai , Aur ALLĀH ghaalib aur hikmat waala hai.
****************
610 A.D. me Maahe Ramazaan me Huzoor Muhammad Mustafā sallallāhu alaihi wa sallam Makka ki Ghaare Hira me ibaadat e ilāhi me aur ghaur o fikr me mashgool the. Ek martaba jab aap wuzu ke liye ghaar se baahar tashreef laaye tab ALLĀH ta’ala ne Hazrat Jibr'eel alaihis salaam ke saath Wahi bheji aur dunya me kufr, Shirk (but-parasti) aur jahaalat ka andhera door karke Islaam ka noor zaahir karne ka farmaan hua.
Shuruat me Huzoor Rasool-Allāh sallallāhu alaihi wa sallam ne khufiya taur par Islaam ki da’awat di. Shuru me chand log eimaan laaye.
3 saal baad 613 A.D. me aap ne hukme Rab se Islaam ki da’awat ko aam kiya aur Safa ki pahaadi par chadhkar Tauhid wa Risaalat ka ailaan kiya. Quraish ise apne baap-daada ke mazhab ke mukhaalifat maankar Huzoor sallallāhu alaihi wa sallam ko aur musalmano ko shadeed takleef dena shuru kiya.
Dusre mulko se log tijaarat ke liye aur Hajj ke liye Makka aate the. Huzoor Rasool-Allāh sallallāhu alaihi wa sallam ne unhe bhi Islaam ki da’awat di.
Aap ki Sadaaqat wa Amaanatdaari, Husne Akhlaaq wa Ta’aleem aur Moazizaat dekhkar aahista aahista log musalman hone lage.
**************************
3 Nabwi (613 A.D.) me Huzoor sallallāhu alaihi wa sallam ke farmaan par musalmano ke ek giroh ne Habasha [Abyssinia] ki taraf hijrat ki. Muhaajireen ke is qaafile me 11 musalman mard aur 4 aurte shareek the.
Kuchh arse ke baad Musalman Makka waapas aaye to Quraish ne phir se un ko takleef dena shuru kiya.
5 Nabawi (615 A.D.) me musalmano ke giroh ne dusri martaba Habasha [Abyssinia] ki taraf hijrat ki. Muhaajireen ke is qaafile me 87 mard aur 17 aurten shareek the. Waha Najaasi baadshaah Ashama ibn Abjar ne musalmano ko panaah di.
Kuchh arse ke ba’ad un me se chand musalman Makka waapas aaye to Quraish ne phir se un ko takleef dena shuru kiya.
*********************
Yaṡrib [Madeena] me 2 bade qabeele the : Banu Aws wa Banu Khazraaj. Wo log Makka aate the tab Huzoor Rasool-Allāh sallallāhu alaihi wa sallam se Islaam ki ta’aleem haasil karte rehte the aur Huzoor sallallāhu alaihi wa sallam se be-intiha mohabbat karte the.
11 Nabawi (621 A.D.) me maqaame Aqaba par Yaṡrib [Madeena] ke 12 aadamiyo ke giroh ne Huzoor Rasool-Allāh sallallāhu alaihi wa sallam se bai'at ki.
Is ke ba’ad Huzoor sallallāhu alaihi wa sallam ne Hazrat Mus'ab bin Umair radiy-Allāhu anhu ko Yaṡrib [Madeena] bheja. Woh Hazrat As'ad bin Zuraarah radiy-Allāhu anhu ke ghar par thehre. Hazrat As'ad bin Zuraarah radiy-Allāhu anhu sab se pehle Ansaari sahaabi hain. Hazrat As'ad bin Zuraarah ne apne qabeele ki zameen par ek makaan [ibaadat-gaah] banaaya aur us me logo ko islaam ki ta’aleem dena shuru kiya. Dono sahaaba ki ta’aleem aur mahenat se aahista aahista Yaṡrib [Madeena] ke log Islaam apnaane lage. Hazrat Mus'ab bin Umair ki imaamat me sahaaba ne namaaz padhna shuru kiya.
*********************
Rajab 12 Nabawi (621 A.D.) me Huzoor Rasool-Allāh sallallāhu alaihi wa sallam ko ALLĀH ta’ala ne Me'araaj ata farmaai. Is ke ba’ad badi ta’adaad me log Islaam me daakhil hone lage. Kuffaar ne aap ko bahot ziyada takleef dena shuru kiya.
*********************
Zil Hijja 12 Nabawi (June 622 A.D.) me Yaṡrib [Madeena] ke 73 mard aur 2 aurto ke giroh ne maqaame Aqaba par Huzoor Rasool-Allāh sallallāhu alaihi wa sallam se phir se bai'at ki aur har haal me aap ki ita’at karne ka aur aap ko madad karne ka wa’ada kiya [Bai'at-ul-Aqaba Ṡaani].
*******************
Phir hukme ilāhi se Huzoor sallallāhu alaihi wa sallam ne musalmano ko Yaṡrib [Madeena] hijrat karne ke liye farmaaya jo Makka se taqreeban 339 kilometer (211 mile) ki doori par tha. Aap ke farmaan par musalman chhote chhote giroh me hijrat karke Makka se Yaṡrib [Madeena] jaane lage.
Hazrat Mus'ab bin Umair ke ba’ad Yaṡrib [Madeena] jaane waale sahaabi Hazrat Abdullāh ibn Umme Maktoom radiy-Allāhu anhu hain. In ke ba’ad Hazrat Abu Salama, Abdullāh ibn Abdul Asad al-Makhzumi ne hijrat ki. In ke ba’ad Hazrat Bilaal ibn Rawaaha Habashi, Hazrat Ammaar bin Yaasir aur Hazrat Sa’ad ibn Abi Waqqaas radiy-Allāhu anhuma ne Hijrat ki. Phir Hazrat Umar Faarooq radiy-Allāhu anhu ne 20 sahaaba ke saath Hijrat ki.
*********************
13 Nabawi (622 A.D.) me Abu Jahl ne apne saathiyo ko jama karke mashwara karke ek tarkeeb sochi ke har qabeele ka ek ek aadmi jama ho aur sab milkar Muhammad (sallallāhu alaihi wa sallam) ka ghar gher len aur jab woh ghar se niklen to sab ek saath hamla kar den taake kisi ek ke upar ilzaam na aaye aur Banu Haashim Quraish ke tamaam logo ka muqaabala nahi kar paayenge. Is tarah Huzoor sallallāhu alaihi wa sallam qatl kar dene ki saazish banaai aur un logo ne Huzoor sallallāhu alaihi wa sallam ke ghar par muhaasira kiya.
1 Rabi-ul-Awwal ko ALLĀH ta’ala ne hijrat ka hukm farmaaya to Huzoor sallallāhu alaihi wa sallam ne Hazrat Ali Murtazā radiy-Allāhu ta’ala anhu ko apne bistar par sulaaye aur aap ke paas rakhi hui amaanaten logon ko pahunchane ki wasiyat farmaai. Aur aap ghar se baahar nikle aur mutthi me kankariya lekar Soorah Ikhlaas padhkar un logo par phenki to ALLĀH ta’ala ne un logo par ghaibi parda daal diya aur wo Huzoor sallallāhu alaihi wa sallam ko dekh na paaye.
Phir Aap Hazrate Abu Bakr Siddeeq radiy-Allāhu anhu ke ghar pahunche aur darwaaze par halki si dastak di ke Siddeeq e akbar ne foran darwaaza khol diya. Aap ne farmaaya “Abu Bakr! Hume hijrat ka hukm mila hai. Kya tum hijrat me saathi banne ke liye tayyaar ho?” Siddeeq e akbar ne farmaaya “Ya Rasool-Allāh sallallāhu alaihi wa sallam, Maine to tab se tayyaari kar li hai jab aap ne hijrat ke liye farmaaya tha. Aur roz raat ko main jaagta rehta tha ke agar hijrat ke liye nikalna ho to mere aaqa ko der na ho.”
Hazrate Abu Bakr Siddeeq ne yeh sochkar ke shaayad zaroorat pesh aaye apna maal bhi saath me liya jis ki miqdaar 5000 dirham thi.
Makkah se nikalte waqt Huzoor sallallāhu alaihi wa sallam ne Ka’abatullāh par hasrat bhari nigaah daalkar farmaaya “Aye Makkah! Khuda ki qasam, Tu mujhe dunya ke tamaam shahero me sab se ziyada pyaara hai. Agar meri qaum ki wajah se mujhe yaha se nikalna na padta to main hargiz tujhe na chhodta.”
********************
Jab kuffaar Huzoor sallallāhu alaihi wa sallam ke ghar me daakhil hue to dekha ke bistar par Hazrat Ali soye hain. Bahot talaash karne par bhi Huzoor sallallāhu alaihi wa sallam na mile to Abu Jahl ne Suraaqa bin Ja’asham Kina’aani ko khat likha ke “Muhammad ibn Abdullāh yaha se bhaagkar Yaṡrib ki jaanib jaata hai so tum ko jaha par bhi mile us ko pakadkar mere paas lekar aao.”
Raaste me Suraaqa bin Ja’asham ko aata dekhkar Hazrate Abu Bakr Siddeeq thode pareshaan hue to Huzoor sallallāhu alaihi wa sallam ne farmaaya “Fikr mat karo. ALLĀH hamare saath hai.” Suraaqa bin Ja’asham ne jab Huzoor sallallāhu alaihi wa sallam ko dekha aur aap ki taraf aage badhna chaaha tab hukme khuda se uske ghode ke pair zameen me ghans gaye. Suraaqa ne is museebat se chhudaane ke liye aap se iltija ki aur kaha ke “Jo log aap ka pichha kar rahe hain un ko main rok dunga.” Aap ki dua se ALLĀH ke hukm se zameen ne Suraaqa ko chhod diya. Suraaqa ne apne wa’ade ke mutaabiq kuffaaro ko dusri taraf pher diya.
********************
Phir jab aage badhe to Hazrat Abu Bakr Siddeeq radiy-Allāhu ta’ala anhu Huzoor sallallāhu alaihi wa sallam ke saath chalne lage. Kabhi Huzoor sallallāhu alaihi wa sallam ki daahini taraf ho jaate, kabhi baayi taraf, kabhi aage, kabhi pichhe chalte ke kisi bhi taraf se koi dushman Huzoor sallallāhu alaihi wa sallam ko nuqsaan na pahuncha sake.
Phir raaste me Huzoor sallallāhu alaihi wa sallam ne Ghaar e Ṡaur me theharne ka iraada kiya. Hazrate Abu Bakr Siddeeq ne kaha “Ya Rasool-Allāh sallallāhu alaihi wa sallam! Is pahaad par chadhte waqt kankar –patthar se aap ko takleef ho sakti hai. Agar aap ki ijaazat ho to aap mere kandho par baith jaayen. Main aap ko lekar upar chadhunga.”
Is tarah Hazrate Abu Bakr Siddeeq Huzoor sallallāhu alaihi wa sallam ko apne kandho par bithakar upar chadhne lage. Raaste me aap kabhi Huzoor sallallāhu alaihi wa sallam ke daayen paanv ko chumte, kabhi baayen paav ko chumte. Huzoor sallallāhu alaihi wa sallam ne puchha “Abu Bakr! Kya kar rahe ho?’ Hazrate Abu Bakr Siddeeq ne farmaaya “Ya Rasool-Allāh sallallāhu alaihi wa sallam! Main me'araaj kar raha hu. Aap ki me'araaj ye hai ke aap Rab ta’ala ke paas laa-makaan tak pahunche aur Abu Bakr ki me'araaj yeh hai ke woh aap ke qadmo tak pahuncha.”
Phir Ghaar e Ṡaur me pahunche to ALLĀH ta’ala ke hukm se ek makdi ne gaar ke darwaaze par jaal bana diya aur ek kabootari ne gaar ke baahar ande diye. Kuffaar aap ka pichha karte hue waha pahunche to ye sab dekhkar yeh socha ke agar koi andar gaya hota ye ande aur jaal yaha na hote aur waapas chale gaye.
Hazrate Abu Bakr Siddeeq ne ghaar ko saaf kiya aur apna jhubba phaadkar ghaar ke suraakho ko band kar diye ke koi jaanwar aakar mere aaqa ko nuqsaan na pahunchaye. Magar ek suraakh baaqi reh gaya. Jab Huzoor sallallāhu alaihi wa sallam letkar Hazrat Abu Bakr Siddeeq ki god me aaraam karne lage to unho ne us suraakh par apna paav (edi) rakh diya. Thodi der me ek azdahe ne aakar un ke paav par kaata. Hazrat Abu Bakr Siddeeq ne dard aur takleef bardaasht kar liya ke mere aaqa ko khalel na ho. Magar baar baar kaatne par aakhir me un ki aankh se be-ikhiyaar aansoo nikal gaye. Huzoor sallallāhu alaihi wa sallam ke chehra e anwar par jab aansoo gire to aap ne farmaaya “Abu Bakr! Kya baat hai?” Hazrat Abu Bakr Siddeeq ne saari baat batai to Huzoor sallallāhu alaihi wa sallam ne aap ko pair hataane ke liye farmaaya.
Pair hataate hi suraakh se azdaha baahar aaya aur salaam pesh kiya aur kehne laga “Ya Rasool-Allāh sallallāhu alaihi wa sallam! Main ek zamaane se aap ke deedaar ke liye ghaar me rehta tha magar aap ke saathi ne ye sab suraakh band kar diye aur ek suraakh par apna paav rakh diya to majbooran mujhe aap ke dost ko kaatna pada.”
Huzoor sallallāhu alaihi wa sallam ne Siddeeq e akbar ke zakhm par apna luaabe dahen lagaaya aur un ko foran aaraam ho gaya.
Hazrat Abu Bakr Siddeeq ke saahabzaade Abdullāh rozaana raat ko Ghaar ke munh par sote aur subah hote hi Makka chale jaate aur pata lagaate ke Quraish kya tadbeere kar rahe hain. Jo kuchh khabar milti shaam ko aakar Huzoor sallallāhu alaihi wa sallam se arz kar dete.
Hazrate Abu Bakr Siddeeq ke ghulaam Hazrate Aamir bin Fuhaira der raat ko chaaragaah se bakariya lekar ghaar ke paas aa jaate aur un bakariyo ka doodh Huzoor sallallāhu alaihi wa sallam aur un ke Rafeeq e khaas p*e lete the.
Hazrate Abu Bakr Siddeeq ki is khidmat se khush hokar Huzoor sallallāhu alaihi wa sallam ne farmaaya ke “Main chaahta hu ke ALLĀH ta’ala se tumhare liye dua karu ke tumhe apna fazle khaas ata farmaaye.” Hazrate Abu Bakr Siddeeq ne arz kiya “Ya Rasool-Allāh sallallāhu alaihi wa sallam! Aap jaante hain ke mere liye kya behtar hai.” Huzoor sallallāhu alaihi wa sallam ne haath uthakar dua farmaai ke “ALLĀH ta’ala qayaamat tak tumhari aulaad me aise afraad ata farmaaye jo uloom e zaahiri aur baatini se faizyaab ho aur jo siraat-e-muataqeem par qaa'im ho aur logo ko bhi un ke zariye hidaayat haasil ho.”
Is tarah Jum’aa se Itwaar tak 3 raat tak ghaar me qayaam pazeer rahe. Phir Abdullāh bin Urayqit (jo abhi musalman nahi hue the) ujrat lekar 2 oontniya lekar aaye, jin me se Hazrat Abu Bakr Siddeeq ne ek oontani khareedkar Huzoor sallallāhu alaihi wa sallam ke saath Tihama ke raaste se safar shuru kiya.
********************
Madeena ke is safar me husn ittefaaq se maqaam e Kharrar par Hazrate Talha bin Ubaidullāh radiy-Allāhu ta’ala anhu se mulaaqaat hui jo mulk e Shaam se tijaarat ka saamaan lekar aa rahe the. Unho ne Huzoor sallallāhu alaihi wa sallam aur Hazrate Abu Bakr Siddeeq radiy-Allāhu ta’ala anhu ki khidmat me chand nafees kapde bataur nazraana pesh kiye. Un kapdo ko Huzoor sallallāhu alaihi wa sallam aur Hazrate Abu Bakr Siddeeq radiy-Allāhu ta’ala anhu ne qubool farmaaye.
********************
Jab Huzoor sallallāhu alaihi wa sallam Madeena ke qareeb pahunche to Buridaa Aslami Qabeela e Bani Saham ke 70 sawaaro ke saath lekar is laalach me aap sallallāhu alaihi wa sallam ke giraftaari ke liye aaye ki Quraish se 100 oont in'aam me mil jaayega.
Jab woh Huzoor sallallāhu alaihi wa sallam ke saamne aaye aur puchha ki “Tum kaun ho?” to Aap ne farmaaya ki “Main Muhammad bin Abdullāh hu, Khuda ka Rasool hu.”
Jamaal wa jalaale Nabuwwat ka in ke qalb par aisa aṡar hua ki foran Kalma e Shahaadat padhkar musharraf e Islaam ho gaye aur darkhwaast pesh ki ke “Ya Rasool-Allāh sallallāhu alaihi wa sallam! Meri tammana hai ki Yaṡrib me Huzoor sallallāhu alaihi wa sallam ka daakhila ek jhande ke saath hona chaahiye.”
Yeh kehkar apna amaama sar se utaarkar apne neje par baandh liya aur Huzoor sallallāhu alaihi wa sallam ke Alambardaar bankar aage aage Madeena ki jaanib chalte rahe.
********************
Jab Huzoor sallallāhu alaihi wa sallam maqaam e Ghanam par pahunche to waha ka sardaar 700 aadamiyo ke saath aap ki khidmat me aaye aur tamaam musalman hue.
********************
Phir waha se rawaana hue aur 16 Rabi-ul-awwal ko Peer ke din Madeena ke qareeb maqaame Quba par pahunche aur Qabeela Banu Amr bin Awf ke Hazrate Kulṡum bin Hidam radiy-Allāhu ta’ala anhu ke makaan me tashreef farma hue. Akṡar saahaba e kiraam jo Huzoor sallallāhu alaihi wa sallam se pehle Hijrat karke Madeena munawwara aaye the wo bhi usi makaan me thehre hue the.
Hazrat Ali radiy-Allāhu ta’ala anhu bhi farmaan e Nabawi ke mutaabiq Quraish ki amaanate waapas lautakar teesre din Makka se nikal gaye aur Madeena aa gaye.
Quba me qayaam ke dauraan Huzoor sallallāhu alaihi wa sallam ki ta’aleem se bahot saare log musalman hue.
Huzoor sallallāhu alaihi wa sallam ne ashaaba ke saath Qabeela Banu Amr bin Awf ki khajoore sukhaane ki jagah par ek masjid bunyaad rakhi. Yeh masjid ‘Masjide Quba’ ke naam se mash'hoor hai. Jo Islaam ki sab se pehli masjid hai.
Masjid ki ta’ameer ke kaam ashaaba ko josh dilaane ke liye Aap Hazrate Abdullāh bin Rawaaha radiy-Allāhu ta’ala anhu ka sher padhte jaate :
“Woh kaamyaab hai jo Masjid ta’ameer karta hai,
Aur uthte baithte Qur'ān padhta hai aur sote hue raat nahi guzaarta.”
Phir Jum’ah ke roz Hazrate Abu Bakr Siddeeq ko apne saath sawaari par bithakar Aap Quba se Madeena ki taraf rawaana hue. Raaste me Banu Najjaar qabeele se guzre to wo apni talwaaro ke saath aaye aur Aap ke saath Yaṡrib [Madeena] tak aaye.
Raaste me Bani Saalim ki aabaadi me 100 sahaaba ne Huzoor sallallāhu alaihi wa sallam ki imaamat me pehli namaaz e Jum’ah ada ki. Namaaz se pehle Aap ne khutba diya. Is maqaam par ek masjid ta’ameer ki g*i hai, jo ‘Masjide Jum'aa’ ke naam se mash'hoor hai.
******************
Ahle Madeena ko jab se pata chala ke Huzoor sallallāhu alaihi wa sallam Madeena tashreef laane waale hain to sab khushi ke saath aap ki raah dekh rahe the.
Do din ke intazaar ke ba’ad 20 Rabi-ul-awwal ko Aap Madeena munawwara me tashreef laaye. Jab Ahle Madeena ko Aap ki aamad ki khabar mili to tamaam sardaar aap ke istaqbaal ke liye aaye.
Aap ka qaafila Juloos ki shakl me jhande ke saath Madeena me daakhil hua. Jab Aap aaye to logo ne raaste ke dono kinaaro par khade hokar “Ya Sayyidi Ya Rasool-Allāh Ya Muhammad Mustafā, Ahlan wa sahlan Marhaba” [Aye Sardaar Aye Allāh ke Rasool Aye Muhammad Mustafā, Aap hum me se hain aur itminaan se aaiye Khush aamdeed] ke naaro ke saath Aap ka istaqbaal kiya. Parda-nasheen khawateen deedaar ke liye gharo ki chhat par chadh g*i. Aap ke aane ki khushi me bachchiya taraane gaati thi :
“Tala al Badru alayna Min ṡaniyyatil wadaai,
Waajaba shukru alayna ma da’aa lillāhi daa'i”
[Tarjuma : Chaand tulu ho gaya hum par wadaa ki ghaatiyon se,
Hum par khuda ka shukr waajib hai,
Ab tak ALLĀH se (is ke liye) dua maangne waale dua maangte rahe.]
Aur yeh bhi gaati thi “Hum khaandaane Banu Najjaar ki bachchiya hain,
Waah, Kya khub hua ki Hazrat Muhammad sallallāhu alaihi wa sallam hamare padosi hue.”
Har ek ki yeh khwaahish thi ke Huzoor sallallāhu alaihi wa sallam mere ghar me qayaam karen. Aakhirkaar yeh tay hua ke Huzoor sallallāhu alaihi wa sallam ki oontni jaha thehre un ke yaha Huzoor sallallāhu alaihi wa sallam qayaam farmaenge. Marzi e khuda se Huzoor sallallāhu alaihi wa sallam ki oontni Qaswa Hazrat Abu Ayyoob Ansaari radiy-Allāhu ta’ala anhu ke ghar ke saamne thehri aur Huzoor sallallāhu alaihi wa sallam ne wahi par qayaam farmaaya. Is tarah Hazrat Abu Ayyoob Ansaari ko mezbaani ki sa’adat mili.
Zaayireen [mulaqaatiyo] ki aasaani ke liye Huzoor sallallāhu alaihi wa sallam ne neeche ki manzil ko pasand farmaaya. Lekin raat me Hazrate Abu Ayyoob Ansaari radiy-Allāhu ta’ala anhu ne socha “Hamare chalne se qadmo ki aawaaz ki wajah se Huzoor sallallāhu alaihi wa sallam khalel pahunche ya agar upar paani ka maskija gir jaaye aur paani neeche aaye to Huzoor sallallāhu alaihi wa sallam ko takleef hogi.” Phir subah ko Huzoor sallallāhu alaihi wa sallam ko arz kiya aur upar ki manzil pesh ki Huzoor sallallāhu alaihi wa sallam ne Aap ka ishq aur adab dekhkar Aap ki baat maan li.
7 mahine tak Hazrate Abu Ayyoob Ansaari aur un ki biwi ishq aur adab ke saath Huzoor sallallāhu alaihi wa sallam ki khidmat karte rahe.
*****************
Hazrate Abu Ayyoob Ansaari ke makaan ke saamne Hazrat Sahal wa Suhayl bin Amr al-Najjaari naami 2 yateemo ki zameen thi. Un ke wali Hazrat Muaz bin Ufra radiy-Allāhu ta’ala anhu ne un bacho ki jaanib se us zameen ko waqaf karna chaaha. Magar Huzoor sallallāhu alaihi wa sallam ke farmaan par Hazrate Abu Bakr Siddeeq ko 10 deenaar dekar use khareedi aur us zameen par Masjide Nabawi ta’ameer ki g*i. Aur Masjid ke muttasil Huzoor sallallāhu alaihi wa sallam ka hujra [qayaamgaah] banaaya gaya.
Masjid ki ta’ameer ke dauraan sahaaba e kiraam ko josh dilaane ke liye Aap yeh sher padhte : “Aye ALLĀH! Bhalaai to sirf aakhirat hi ki bhalaai hai, Lihaaza Aye ALLĀH! Tu Ansaar wa Muhaajireen ko bakhsh de.”
Masjid ke kinaare par ek chabutra tha jis par khajoor ki pattiyo se chhat banai g*i thi, jise ‘Suffa’ kehte hain. Jin Sahaaba ke ghar nahi the wo is chabutre par sote- baithte the. Un sahaaba ko ‘Ashaab-ul-Suffa’ kehte hain.
Masjide Nabawi ki ta’ameer ke ba’ad shuruat me Hazrat Bilaal radiy-Allāhu ta’ala anhu ‘Assalaatu Jaamia'atun’ pukaarkar paancho namaazo ke waqt ailaan karte the.
Is darmiyaan Hazrate Abdullāh bin Zaid Ansaari radiy-Allāhu ta’ala anhu ne khwaab me dekha ki koi Azaan e sharai ke alfaaz suna raha hai. Is ke ba’ad Huzoor sallallāhu alaihi wa sallam ko aur Hazrate Umar radiy-Allāhu ta’ala anhu aur dusre sahaaba ko bhi isi qism ke khwaab nazar aaye.
Huzur sallallāhu alaihi wa sallam ne is ko min jaanibillāh [ALLĀH ka hukm] samajhkar Hazrate Abdullāh bin Zaid radiy-Allāhu ta’ala anhu ko hukm diya ki “Tum Bilaal ko Azaan ke kalimaat sikhaa do. Kyun ki us ki aawaaz tum se ziyada buland hai.” Is tarah namaaz ke liye Azaan ki shuruat hui.
*****************
Hijrat ke kuchh mahine baad Huzoor sallallāhu alaihi wa sallam ne Hazrat Zaid ibn Haariṡah radiy-Allāhu ta’ala anhu ko apne aur Hazrate Abu Bakr Siddeeq radiy-Allāhu anhu ke pariwaar ko Makka se Madeena laane ke liye bheja.
Hazrat Zaid ibn Haariṡah radiy-Allāhu ta’ala anhu ke saath Ummul mo’mineen Sawdah binte Jam'ah radiy-Allāhu anha, Shehzaadi e Rasool-Allāh Umme Kulṡum auu Faatimah Zahara radiy-Allāhu anha, Khaadim Abu Raafi, Hazrate Abu Bakr Siddeeq radiy-Allāhu anhu ki zuaja Umme Rummaan, aur un ke bache Asma, Abdullāh aur Aa'isha, Zaid ibn Haariṡah ki zauja Baraaka aur beta Usaama bin Zaid, Umme Aiman, Talhah ibn Ubaydullāh, Abdullāh ibn Urayqit radiy-Allāhu anhu Makka se Madeena aaye.
*****************
Hijrat ke ba’ad kuchh arse tak Hazrat Ali radiy-Allāhu ta’ala anhu roz raat ko Huzoor sallallāhu alaihi wa sallam ke hujre par pehra dete rahe. Phir Huzoor sallallāhu alaihi wa sallam ne Hazrat Ali se farmaaya “Ab tumhe pehra dene ki zaroorat nahi. ALLĀH ta’ala ne meri hifaazat ke liye intazaam kar diya hai.”
*******************
★ Jis saal Huzoor sallallāhu alaihi wa sallam Madeena munawwara hijrat karke aaye us saal se ‘Hijri san’ ki ginti ki jaati hai.
★Hijrat-ul-Habasha aur Hijrat-ul-Madeenah dono me shareek hone waale sahaaba ko ‘Saahib-ul-Hijratain’ kaha jaata hai.
Makkah se jo musalman Madeenah pahunche wo ‘Muhaajir’ kehlaaye. Muhaajir apna sab kuchh Makka me chhodkar aaye the aur be sar o saamaan the. Madeena ke musalmano ne har tarah se un ki madad ki. Is liye wo ‘Ansaar’ kehlaaye.
★ ‘Yaṡrib’ ab ‘Madeenatun Nabi’ ke naam se mash'hoor hua. Is ke dusre naam Madeena munawwara, Madeena tayyaba, Taybaah, Taaba aur Daar-ul-Abraar hain.
**************
Hijrat ke ba’ad ibtidaai saalo me pesh aane waale chand khaas waaqiyaat :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Huzoor sallallāhu alaihi wa sallam ne Muhaajireen aur Ansaar Mawaakhaat qaa'im ki, ya’ani Ansaar aur Muhaajireen ko ek doosre ka bhaai banaaye. Ansaar ne muhaajir bhai ko rehne ke liye ghar diye, un ke nikaah karaaye, kaarobaar me shareek kiya, maal wa milkiyat me hissa diya aur har baat me un ko apne se ziyaada samajhne lage. ALLĀH ta’ala ne un ki ta’areef farmaai hai.
(2) Muhaajireen sahaaba ko Yaṡrib ki aab o hawa muwaafiq na aaye aur wo beemaar hone lage. Jab Huzoor sallallāhu alaihi wa sallam se arz kiya to aap ne dua farmaai “Aye ALLĀH! Tune Makkah me jo barkat rakhi hai us se dugni barkat Madeenah me rakh de.” Aap ki dua se ALLĀH ta’ala ke fazl se Madeenah rahamat, barkat, raahat aur sukoon waala maqaam ban gaya.
(3) Huzoor sallallāhu alaihi wa sallam ne Madeena ko Haram qaraar diya aur dua farmaai ke “Aye ALLĀH! Maine Madeena ko isi tarah Haram qaraar diya hai jis tarah tune Makkah ko Haram banaaya hai.”
Madeena ka Haram Jabale Air (jo Waaqi e Aqeeq ke qareeb hai) se Jable Ṡaur (jo Madeena ke shimaal me Jable Uhad ke qareeb hai)
(4) 2 Hijri me musalmano par Maahe Ramazaan ke Roze farz hue.
(5) Madeena me logo ne saal me 2 din muqarrar kiye the jinhe wo khel kood aur naachne gaane me guzaarte the. Huzoor sallallāhu alaihi wa sallam ko jab is baat ka pata chala to aap ne farmaaya “Islaam khel kood aur naachne gaane ki ijaazat nahi deta. Hum in 2 din me khaas ibaadat karke ALLĀH ki raza haasil karenge.”
Is tarah ye 2 din ‘Eidain’ ke muqarrar kiye gaye : Eid-ul-Fitr (1 Shawwaal) aur Eid-ul-Ad'ha (10 Zil Hijja).
(6) 2 Hijri (624 A.D.) Huzoor sallallāhu alaihi wa sallam ka nikaah Hazrat Aa'isha bint Abu Bakr Siddeeq radiy-Allāhu ta’ala anha ke saath hua.
(7) Hijrat ke ba’ad pehle aur dusre saal me 1 Sariya aur 3 Ghazwaat pesh aaye magar kaafiro ke saath jung na hui.
Sariya e Hamza :
1 Hijri me Huzoor sallallāhu alaihi wa sallam ne Hazrate Hamza bin Abdul Muttalib ki sardaari me 300 mujaahido ko kaafiro ke muqaabale ke liye bheje. Wo Saif-ul-Bahr tak pahunche. Magar Mujdi bin Amr Juhani ki darmiyaan-giri se jung mauqoof hui.
Ghazwa e Safwaan :
Rabi-ul-Awwal 2 Hijri (September 623 A.D.) me Kurz ibn Jaabir Fuhari ne Madeena ki chaaragaah me daaka daala aur kuchh oonto ko bhagaakar le gaya. Huzoor sallallāhu alaihi wa sallam ne Hazrate Zaid bin Haariṡa radiy-Allāhu ta’ala anhu ko Madeena me apna khalifa banaaya aur Hazrate Ali radiy-Allāhu ta’ala anhu ko alam-bardaar banaakar Sahaaba ki jama’at ke saath Waadi e Safwaan tak us daaku ka ta’akub kiya, jo Badr ke qareeb hai. Magar woh tezi ke saath bhaaga aur haath nahi aaya. Aur Huzoor sallallāhu alaihi wa sallam waapas Madeena tashreef laaye.
Ghazwa e Zil Uraish :
2 Hijri (624 A.D.) me Kuffar e Quraish ka ek qaafila maal e tijaarat lekar Makka se Shaam jaa raha tha. Huzoor sallallāhu alaihi wa sallam 150 muhajireen ashaaba ko saath lekar is qaafile ka raasta rokne ke liye Maqaame Zil Uraisha tak tashreef le gaye, jo Unbbua ki bandargaah ke qareeb hai. Magar waha pahunchkar ma’aloom hua ki qaafla bahot aage badh gaya hai.
Ghazwa e Abwa [Ghazwa e Waddan] :
Safar 2 hijri me Huzoor sallallāhu alaihi wa sallam Hazrate Sa’ad bin Ubaida radiy-Allāhu ta’ala anhu ko Madeene me apna Khalifa banaakar aur Hazrate Hamza radiy-Allāhu ta’ala anhu ko alam bardaar banaakar 60 Mujaahideen ko apne saath le kar Maqaam e Abwaa tak kuffaar ka pichha karte hue tashareef le gaye. Magar Kuffaar e Makkah bhaag gaye. Is liye Jung na hui.
Aap (Madeena se 80 mile door) Abwa me chand din thehre. Aur Qabeela e Banu Jamraa ke sardaar Mukhhi bin Amr Jamri se bahaami imdaadi ka ek tehreeri muahida kiya aur phir Madeena waapas tashareef laaye.
(9) Ramazaan 2 Hijri me Jung e Badr hui.
17 Ramazaan 2 Hijri (13 March 624 A.D.) ko Maqaam e Badr par Kaafiro ke saath Musalmano ki jung hui. Jis me ALLĀH ke fazl se 313 Musalmano ke lashkar ne 1000 kaafiro ke lashkar ko haraakar azeem fatah haasil ki. 14 Musalman shaheed hue (6 Muhaajireen aur 8 Ansaar). 70 Kaafir qatl hue aur 70 qaid kiye gaye.
Jung e Badr me shareek hone waale ashaaba ka martaba Ashra e mubashara ke baad sab se afzal hai.
(10) Jung e Badr ke mauqe par Huzoor sallallāhu alaihi wa sallam ki saahabzaadi Hazrate Ruqayyah radiy-Allāhu ta’ala anha shadeed beemaar thi aur Hazrate Uṡmaan Ghani radiy-Allāhu ta’ala anhu un ki khidmat ke liye rooke the. Lekin jab Jung e Badr me musalmano ki fateh ki khabar mili us se pehle hi Hazrate Ruqayya radiy-Allāhu ta’ala anha ka inteqaal ho gaya.
(11) Safar 2 Hijri (623 A.D.) ko Hazrate Ali Murtazā aur Sayyeda Faatima Zahra radiy-Allāhu ta’ala anhuma ka Nikaah hua.
(12) 15 Shawwaal 3 Hijri (19 March 625 A.D.) me Jung e Uhad hui. Jis me bhi ALLĀH ke fazl se musalman fatehyaab hue. Is jung me 70 sahaaba shaheed hue aur Huzoor sallallāhu alaihi wa sallam ke dandaane mubarak shaheed hue.
(13) Jung e Uhad ke ba’ad Huzoor sallallāhu alaihi wa sallam ne apni dusri saahbzaadi Hazrate Umme Kulṡum ka nikaah Hazrate Uṡmaan Ghani radiy-Allāhu ta’ala anhu ke saath karaaya.
****************
Mazeed Posts ke liye Website dekhen :
(For more posts Visit this website) :
http://fikreummat.net/
****************
ALLĀH ta’ala us ke Habeeb sallallāhu alaihi wa sallam ke sadqe me
Aur tamaam sahaaba, Auliya Allāh aur Ahle bait ke waseele se
Sab ke Eimaan ki hifaazat farmae aur Sab ko mukammal ishqe Rasool ata farmae aur Sahaaba aur Buzurgaane deen ki sachi mohabbat ata farmae aur Sab ko nek amal karne ki taufiq ata farmae aur Islaam ki hifaazat ke liye qurbaani dene ka jazaba ata farmae.
Aur in baato ko yaad rakhne ki aur dusro ko bataane ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.
