https://www.facebook.com/248587795272098/

Humanity Of Islam, Juhapura, Ahmedabad (2025)

02/11/2025

Hazrat Shaikh Abul Jannaab, Najm-ud-deen Ahmad al- Kubra rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

Mazeed Posts ke liye Website dekhen :
(For more posts Visit this website) :

http://fikreummat.net/

****************
Alqaab :
‾‾‾‾‾‾‾‾
Shaikh e Wali taraash [Sculptor of Saints], Taamatul kubra.

****************
Aap ki wilaadat 540 Hijri (1145 A.D.) me Khwarazm (Turkmenistan) me hui.

****************
Aap ke waalid ka naam Umar bin Muhammad hai.

****************
Aap ne Qur'ān aur Kalaam ki ta’aleem haasil ki.
Aap ne Iran aur phir Misr jaakar Hadeeṡ ki ta’aleem haasil ki.
Aap ne Hazrat Allama Abul Ma’ali Faraadi Nishapuri, Haafiz Abul Ula aur Imaam Abu Taahir Salfi Misri se ta’aleem haasil ki.

****************
Ek arsa tak Aap ki dilchaspi uloome zaahiri aur Dars o tadrees tak mahdood thi. Ek martaba Aap Tabriz me muqeem the tab Hazrat Muhiy-us-Sunnah Imaam Baghawi rahmatullāhi alaihi ke ek shaagird se Imaam Mausuf ki kitaab 'Sharh-us-Sunnah' padh rahe the ke ittefaaq se Hazrat Baaba Farj Tabrizi rahmatullāhi alaihi darsgaah ki taraf se nikle aur ek bharpur nigaah Aap par daali.
Us nigahe faiz ne Aap ke dil ka aalam badal diya. Aap Baaba Farj Tabrizi ki khaanqaah shareef me haazir hue aur Hazrat ki khidmat me Uloome baatini ki ta’aleem haasil ki. Harzat ne apna Khirqa mubarak pehnaaya. Phir Aap raahe Sulook par aage badhte rahe.

Misr [Egypt] me Aap ne Hazrat Baaba Farj Tabrizi rahmatullāhi alaihi, Hazrat Moeen-us-Sunnah Shaikh Ruzbihan Yamaan Kabeer al-Wazzan Suharwardi Misri rahmatullāhi alaihi, Hazrat Shaikh Ismāeel al-Qasri rahmatullāhi alaihi aur Hazrat Shaikh Ibrāheem Kurdi rahmatullāhi alaihi se Tasawwuf ki ta’aleem haasil ki.

Phir Hazart Shaikh Ismāeel al-Qasri ke rahmatullāhi alaihi mashware par Hazrat Shaikh Zia-ud-deen Ammaar bin Yaasir al-Bitlisi rahmatullāhi alaihi ke mureed hue aur apne peer ke wisaal ke ba’ad Aap Misr waapas aaye.

Aap ne Hazrat Ghauṡ-ul-aazam Shaikh Sayyed Abdul Qaadir Jilani radiy-Allāhu ta’ala anhu aur Hazrat Shaikh Zia-ud-deen Abul Najeeb Suharwardi rahmatullāhi alaihi se bhi faiz haasil kiya.

********************
Shaikh Ruzbihan al-Misri ke mashware par Aap ne nikaah kiya.

Aap ke saahabzaade Hazrat Baaba Mufrah rahmatullāhi alaihi hain.

****************
Phir 582 Hijri (1185 A.D.) me Khwarazm waapas aaye aur ta’aleem e deen karte rahe.

****************
Tasannif :
‾‾‾‾‾‾‾‾‾‾‾‾
Aap ki mash'hoor kitaaben :

(1) Fawaatih-ul-Jamaal wa fawaatih-ul-Jalaal
(2) Usool-ul-Ashrah
(3) Risaalat al-kha'if al-ha'im min lawmaat al-la'im.
(4) Fi Adab al-saalikeen
(5) Taweelaat-ul-Najmiyah
(6) Adab al-sulook ila Hazrat Malik-ul-Mulook.

****************
Aap ne apne shaagirdo ko bhi apni ta’aleem aur faiz se aala darje ke Wali e kaamil banaaye. Is liye Aap ka laqab ‘Shaikh e Wali taraash [Sculptor of Saints]’ hai.

Ek martaba ek Saudagar Aap ki khaanqaah shareef me haazir hua. Aap par us waqt khushi ki kaifiyat taari thi. Aap ne us Saudagar par ek nigaahe kimiya aṡar daali aur martaba e Wilaayat ataa farma kar puchha ke “Kis mulk se aaye ho?” Us ne mulk ka naam bataaya. Aap ne use Ijaazat naama likh kar diya aur farmaaya ke “Jaao! tumhe us mulk ka Qutb-ul-irshaad muqarrar kiya.”

****************
Karaamat :
‾‾‾‾‾‾‾‾‾‾‾‾‾‾
(1) Ek din Aap apne saathiyo ke saath baithe hue the. Ek baaz hawa me ek faakhta ka pichha kar raha tha. Achaanak Hazrat ki nazar us faakhta par padi. Foran faakhta pichhe palti aur baaz ko pakad kar Aap ke qadmo me la phenka.

(2) Ek din Aap ki majlis me Ashaabe Kahf ke baare me guftagu ho rahi thi. Aap ke ek mureed ke dil me khayaal paida hua ke Ummate Muhamamdi me bhi koi aisa shakhs hai jis ki sohbat se Kutta faizyaab ho jaaye?
Aap ne us mureed ke dil ki baat ma’aloom kar li aur Khaanqaah ke darwaaze par jaa kar khade ho gaye. Waha se ek Kutta guzra. Aap ne us Kutte par nazar daali to woh usi waqt mutahayyar wa bekhud ho gaya aur shaher se baahar qabrastan me jaa kar muqeem ho gaya aur woh apna sar hamesha zameen par ragadta rehta tha.
Woh Kutta jaha jaata 50-60 kutte us ke aas paas jama hokar halqa bana lete aur adab o ehtaraam ke saath us ke saamne khade rehte.
Kuchh arse ba’ad us kutte ka inteqaal hua to Hazrat ne farmaaya ke “Is ko dafn kar do.”

****************
Aap Hazrat Shaikh Zia-ud-deen Ammaar bin Yaasir al-Bitlisi rahmatullāhi alaihi ke mureed aur Khalifa hain.
Aap ko Hazrat Shaikh Ismāeel al-Qasri rahmatullāhi alaihi se bhi (Suharwardi aur Kumaili silsila) ki khilaafat mili hai.

Aap se ‘Suharwardi Kubrawiya’ silsila jaari hai.

Aap ke khulfa :
(1) Hazrat Shaikh Sa’ad-ud-deen Muhammad Hamuwayi rahmatullāhi alaihi,
(2) Hazrat Shaikh Razi-ud-deen Ali ibn Laala Ghaznawi rahmatullāhi alaihi,
(3) Hazrat Shaikh Majd-ud-deen Ahmad Baghdadi rahmatullāhi alaihi,
(4) Hazrat Shaikh Najm-ud-deen Abdullāh Razi rahmatullāhi alaihi,
(5) Hazrat Shaikh Saif-ud-deen Abul Ma’ali Sa’ad Bakharzi rahmatullāhi alaihi,
(6) Hazrat Shaikh Baha-ud-deen Walad ibn Husain rahmatullāhi alaihi,
(7) Hazrat Shaikh Baaba Kamaal Khanjari Jundi rahmatullāhi alaihi,
(8 ) Hazrat Shaikh Ain-ul-zamaan Jamaal-ud-deen Gili rahmatullāhi alaihi,
(9) Hazrat Shaikh Mas'ood-ud-deen Hamawi rahmatullāhi alaihi
(10) Hazrat Shaikh Qaazi Sayyed Shahaab-ud-deen Peer Jagjot Kashgari rahmatullāhi alaihi (Jethuli, Bihar).

****************
618 Hirji (1221 A.D.) me Mongol [Taataari] lashkar ne Khwarazm par hamla kiya tab Aap Islaam aur watan ki hifaazat ke liye jung ke liye tayyaar hue. Mongol lashkar ne Aap se kaha ke agar aap jung karne ke liye na aaye to wo aap ko chhod denge. Magar Aap na maane aur bahaaduri se jung karte hue shaheed ho gaye.

****************
Aap ka wisaal 10 Jamaadi-ul-awwal 618 Hirji (1221 A.D.) ko hua.

****************
Aap ka mazaar Urgench, Khwarazm (Turkmenistan) me hai.

****************
Mazeed Posts ke liye Website dekhen :
(For more posts Visit this website) :

http://fikreummat.net/

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Najm-ud-deen Ahmad al-Kubra rahmatullāhi alaihi aur tamaam Auliya Allāh aur ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko duniya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

01/11/2025

Hazrat Sayyed Shaah Abdul Lateef Qaadri Kaazmi rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

Mazeed Posts ke liye Website dekhen :
(For more posts Visit this website) :

http://fikreummat.net/

****************
Laqab :
‾‾‾‾‾‾‾‾‾
Bari Imaam Sarkaar.

****************
Aap ki wilaadat 1026 Hijri (1617 A.D.) me Karsal (Zila Chakwal, Punjab) me hui.

****************
Aap ke waalid ka naam Sayyed Sakhi Mahmood hai.

Aap Husaini saadaat hain.

****************
Aap ki umr 8 saal ki thi tab Aap ka pariwaar Bagh Bhattan (maujooda Aabpara) aa gaya aur yaha kaasht kaari [kheti] shuru ki.
Aap apne waalid ko madad karne ke liye jaanwar charaane jaate the. Bachpan se hi Aap khel kood e dilchaspi nahi thi. Jaanwaro ko charaate waqt alaahidgi me ibaadat me masroof rehte.
ALLĀH ta’ala ke fazl se Aap ki zabaan me ye Taaṡir paida ho g*i ke jo baat munh se kehte woh puri ho jaati.

****************
Aap ne apne waalid se ibtidaai ta’aleem haasil ki.

12 saal ki umr me Aap Ghor Ghashti (Maujooda Attock) gaye aur 2 saal tak Qur'ān, Tafseer, Hadeeṡ, Fiq'h, Mantiq, Ilme Riyaazi aur Ilme Tibb ki ta’aleem haasil ki.

****************
Phir Aap Kashmir, Badakhshan, Najaf, Karbala, Baghdaad, Bukhara, Misr, aur Damishq ka safar karke sair o siyaahat karte rahe. Phir waha se Makka mukarrama aur Madeena munawwara tashreef le gaye aur Hajje Baitullāh ada kiya.
Taqreeban 25 baras ki umr me Aap apne ghar waapas tashreef laaye.

Aap Hazrat Sayyed Hayaat-ul-Meer Qaadri rahmatullāhi alaihi ke mureed hue aur Hazrat ki khidmat me rehkar ta’aleem wa faiz haasil karte rahe.

****************
Aap ka nikaah Bibi Nek daaman se hua. Jin se Aap ko ek ladki hui jis ka 6 mahine me intiqaal hua. Phir kuchh arse me Aap ki zauja ka bhi intiqaal hua.

****************
Is ke ba’ad Aap mujaahida me masroof ho gaye.

Ek martaba Aap Noorpur ki ek badi ghaar me Chille ke liye daakhil hue aur kai saal tak baahar nahi nikle. Aakhir Aap ke Peer o Murshid Hazrat Sayyed Hayaat ul Meer Qaadri quddasa sirrahu tashreef laaye aur ghaar ke darwaaze par khade ho kar aawaaz di “Aye Abdul Lateef! Ab baahar aa jaao, Aaj ka din bada mubarak hai.” Aap ne ghaar ke andar se jawaab diya “Khair Mubarak Ya Hazrat.” aur phir baahar aaye.
Hazrat ne Aap se muaanaqa kiya aur masarrat ke saath farmaaya ke “Abdul Lateef! Ab tum zaahiri wa baatini Rumooz o Asraar se ma’amoor ho chuke ho. Aaj se tum Bari Imaam ho.”

****************
Aap ek Aalime Ba-amal the.
Aap Hanafi mazhab ke muqallid the.

Aap Mohalla Khan Alampura, Saharanpur me Masjid Shah Jahani me 31 saal tak Imaam wa Khateeb rahe.

Phir Aap ne Churpur (maujooda Noorpur Shahan) me qayaam kiya aur waha rushd o hidaayat ka silsila shuru kiya. Deene mubeen ko munazzam andaaz me jaari karne ke liye Darsgaahen qaa'im ki aur ta’aleem wa faiz ata farmaate rahe.
Aap ne Madrase ta’ameer karke Qur'ān, Arabi Uloom aur Darse Nizaami ki ta’aleem wa tadrees shuru ki. Khaanqaah ta’ameer karke Tasawwuf ki ta’aleem o tarbiyat shuru ki. Masaajid ta’ameer karke wa’az o hidaayat karte rahe.

Aap ki ta’aleem wa faiz se beshumaar logo ne islaam apnaaya.

****************
Karaamat :
‾‾‾‾‾‾‾‾‾‾‾‾
Ek Roz Aap Churpur ke Jungle me ek khushk shisham ke darakht ke neeche baithe hue the ke chand Hinduo ka qaafla waha se guzra. Aap ne un Yaatriyo se daryaaft kiya “Tum sab itne saaz o saamaan ke saath kaha jaa rahe ho?” Un me se ek ne jawaab diya ke “Prayaag.” Aap ne puchha “Waha jaa kar kya karoge” Jawaab mila “Ganga aur Jamna ke sangam par Snaan karke apne paap dhoenge.” Aap ne farmaaya ke “Gunaah nahaane se door nahi hote, Nekokaari aur ibadate Ilāhi se hi gunaah saaf hain.” Ek shakhs bola “Agar makhfi Ibaadat hi se insaan khuda ke qareeb ho sakta hai to Aap kai barso se is khushk aur puraane darakht ke neeche ibaadat kar rahe hain, magar Khuda ne Aap par raham nahi farmaaya. Warna woh is darakht ko hara bhara kar ke Aap ke sar par chhaanv ka intezaam kar deta.”
Us Hindu ki is baat par Aap muskuraae aur farmaaya “Mere Khuda ke liye ye koi badi baat nahi hai. Hum musalman uski zaat par tawakkul rakhte hain. Woh bada Ghafoor aur Raheem hai. Woh agar chaahe to is darakht ko foran hara bhara ho jaaye.”
Yeh kehkar Aap ne Aayate paak padhi aur Dua ke liye haath uthaae. ALLĀH ke fazl se woh puraana aur khushk shisham ka darakht foran hara bhara ho gaya, uski shaakhen badh g*i. Yeh dekh kar Hindu Yaatriyo ka pura qaafla hairaan reh gaya aur foran sab log musalman ho gaye.

****************
Aakhri arse me Aap aalame mazdoobiyat me rehne lage.

****************
Aap Hazrat Sayyed Hayaat-ul-Meer Zinda Peer Qaadri rahmatullāhi alaihi ke mureed aur khalifa hain.

Aap ke khulfa :
(1) Hazrat Shaikh Hasanain rahmatullāhi alaihi,
(2) Hazrat Shaah Bahlool Daryai rahmatullāhi alaihi.

****************
Aap ka wisaal 4 Jamaadi-ul-awwal 1114 Hijri (1705 A.D.) ko hua.

****************
Aap ka mazaar Noorpur Shahan, Islamabad (Pakistan) me hai.

****************
Mazeed Posts ke liye Website dekhen :
(For more posts Visit this website) :

http://fikreummat.net/

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Shaah Abdul Lateef Qaadri Kaazmi urfe Bari Imaam Sarkaar rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko duniya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

01/11/2025

Hazrat Maulana Shaah Nizaam-ud-deen Muhamamd Sihaliwi Firangi mahali rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

Mazeed Posts ke liye Website dekhen :
(For more posts Visit this website) :

http://fikreummat.net/

****************
Aap ki wilaadat 22 Zil Hijjah 1087 Hijri (2 March 1677 A.D.) ko Sihali (Zila Barabanki) me hui.

****************
Aap ke waalid ka naam Mulla Qutb-ud-deen hai.

Aap Hazrat Abu Ayyoob, Khaalid al-Ansaari radiy-Allāhu ta’ala anhu ki nasl se hain.

****************
Mughal baadshaah Aurangzeb ke zamaane me Aap Firangi mahal tashreef laaye aur sukoonat ikhtiyaar karke dars o tadrees karte rahe.

****************
Aap ne ‘Dars-e-Nizaami’ ki tadween ki, jis ka dars Barr-e-Sagheer ke madaaris me diya jaata hai.

****************
Aap Hazrat Sayyed Abdur Razzaaq Qaadri Bansawi rahmatullāhi alaihi ke mureed aur khalifa hain.

****************
Aap ka wisaal 9 Jamaadi-ul Awwal 1161 Hijri (8 May 1748 A.D.) ko hua.

****************
Aap ka mazaar Firangi mahal (Uttar Pradesh) me hai.

****************
Mazeed Posts ke liye Website dekhen :
(For more posts Visit this website) :

http://fikreummat.net/

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Maulana Shaah Nizaam-ud-deen Muhamamd Sihaliwi Firangi mahali rahmatullāhi alaihi :
aur tamaam Auliya Allāh ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko duniya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

31/10/2025

Hazrat Maulana Haafiz Jamaalullāh Chishti Multani rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

Mazeed Posts ke liye Website dekhen :
(For more posts Visit this website) :

http://fikreummat.net/

****************
Aap ki wilaadat 1160 Hijri (1747 A.D.) me Multan me hui.

****************
Aap ke waalid ka naam Hazrat Mohammad Yousuf bin Haafiz Abdur Rasheed hai.

Aap Awaan qabeele se hain.

Aap ke daada Aawaankaari ke ilaaqe se Multan tashreef laaye the aur Multan ke Sharq me sukoonat ikhtiyaar ki thi.

Aap ke waalid Multan ke haakim Abul Qaasim aur Abul Haashim ke Wazeer the.

****************
Aap bachpan me hi Haafize Qur'ān hue aur bahot saare uloom ki ta’aleem haasil ki. Ta’aleem ke daur me bhi Aap mubaahisa me hamesha kaamyaab hote the.

****************
Aap akṡar raat ko Hazrat Rukne aalam Shaikh Rukn-ud-deen Abul Fat'h Suharwardi rahmatullāhi alaihi ke mazaar shareef par haazir hokar ibadaat o riyazat me masroof rehte. Roz raat ko ek Kalaame paak khatm farmaate aur Peer e kaamil ke liye dua maang kar so jaate.

Ek raat Aap ne khwaab me dekha ke Hazrat Rukne aalam aur Hazrat Khwaja Noor Muhammad Maharwi rahmatullāhi alaihi ek saath baithe hue hain. Hazrat Rukne aalam ne Aap ka haath pakad kar Hazrat Khwaja Noor Muhammad Maharwi ke haath par rakh diya aur farmaaya ke “Jamaal! Yeh Tumhare Peer hain. Inka naam Noor Muhammad Maharwi hai aur watan Multan ka ek qasba hai. Tum inki khidmat me haazir ho jaao.”
Subah ko Aap Mahar shareef ke liye rawaana hue aur Hazrat Khwaja Noor Muhammad Maharwi rahmatullāhi alaihi ki khidmat me haazir ho kar Silsila e Chishtiya Nizaamiya me Bai'at se musharraf hue.

****************
Peer ke farmaan Aap ne Multan me ‘Chishti’ Khaanqaah ta’ameer ki aur ta’aleem wa faiz ata farmaate rahe.

Aap bahot narm dil the. Agar koi ghareeb ya museebat zada Aap ke paas aata to aap use tasalli dete aur madad farmaate.

Aap ke paas ek angoothi thi jis me ‘Allāhu jameelun wa yuhibbul jamaal’ [ALLĀH jameel hai aur Jamaal ko pasand karta hai.] naqsh kiya hua tha.

****************
Aap ne Siraiki me ‘Seeharfi’ naam se nazam likhi hai jis me 29 ash'aar hain.

****************
Aap Tirandaaji me maahir the aur Ranjeet Singh ne jab hamla kiya to Nawaab Muzaffar Khan ke lashkar me shareek hokar jung me bhi shareek hue.

****************
Karaamat :
‾‾‾‾‾‾‾‾‾‾‾‾
(1) Muhammad Husain naami Aap ka mureed jawaani me gunaaho ke kaam me mashgool ho gaya. Aap ke ek Khaadim ne Aap ki baargaah me haazir ho kar arz ki “Huzoor! Yeh Nau-jawaan Aap ka mureed hai lekin bure kaamo me mubtila ho gaya hai. uski aaqibat ka kya hoga?” Aap ne farmaaya ke “Uski aaqibat ba-khair hogi. Use bukhaar aayega aur is beemaari me woh 3 saal tak takleef uthaaega, Apne bure kaamo se tauba karega aur in shaa Allāh main us ka janaaza padhunga.”
Chand saalo ke ba’ad use bukhaar ho gaya jo 3 saal tak raha, aakhir ek din faut ho gaya. Jab uska janaaza qabrastan le g*e to Khaadim ne socha ke Hazrat to Mahar shareef tashreef le g*e hain, ab janaaza kaise padhaaenge? Abhi yeh soch hi raha tha ke chand sawaariyo aur paidal aane waalo ki gard udi. Dekha to Hazrat tashreef le aae hain. Aap ne namaaze janaaza padhaai aur farmaaya “Aye Muhammad Husain! Tumhe Khuda ke supurd kiya.”

(2) Ek martaba Aap apne qaafle ke saath Singhad se aa rahe the. Jab Dariya e Sindh par pahunche to dekha ke dariya tugyaani par hai. Kashti bhi maujood na thi. Aap ne Ghaazi Baloch naami ek mureed ko dariya me daakhil hokar paani ka andaza lagaane ke liye kaha.
Woh paani me utre aur ek kianaare se dusre kinaare g*e to dekha ke paani sirf ghutno tak tha. Aap ne farmaaya ke “Bismillāh padh kar daakhil ho jaao.” Durwesho ki jamaa'at, oont, ghode aur gadho ke saath dariya me daakhil ho g*e. Har aadami aur jaanwar ke ghutne tak paani tha. Is tarah sab us ghehre toofaani dariya se kashti ke baghair guzar g*e.

****************
Aap Hazrat Khwaja Noor Muhammad Maharwi rahmatullāhi alaihi ke mureed aur khalifa hain.

Aap ke khulfa :
(1) Hazrat Khwaja Khuda bakhsh Multani Khairpuri rahmatullāhi alaihi
(2) Hazrat Maulana Abdul Azeez Parharwi rahmatullāhi alaihi
(3) Hazrat Maulana Zaahid Shaah Bukhari rahmatullāhi alaihi
(4) Hazrat Qaazi Maulana Isā Khanpuri rahmatullāhi alaihi
(5) Hazrat Maulana Haamid rahmatullāhi alaihi.

****************
Aap ka wisaal 5 Jamaadi-ul-Awwal 1226 Hijri (29 May 1811 A.D.) ko 66 saal ki umr me hua.

****************
Aap ka mazaar Multan (Punjab, Pakistan) me hai.

****************
Mazeed Posts ke liye Website dekhen :
(For more posts Visit this website) :

http://fikreummat.net/

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Maulana Haafiz Jamaalullāh Chishti Multani rahmatullāhi alaihi aur tamaam Auliya Allāh ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko duniya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

31/10/2025

Hazrat Shaikh Wasi Ahmad Mohaddiṡ Surati rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦♦♦♦

Mazeed Posts ke liye Website dekhen :
(For more posts Visit this website) :

http://fikreummat.net/

****************
Alqaab :
‾‾‾‾‾‾‾‾
Shaikh-ul-Muhaddiṡeen, Haafiz-ul-Bukhari.

****************
Aap wilaadat 1252 Hijri (1836 A.D.) me Rander, Surat (Gujarat) me hui.

****************
Aap ke waalid ka naam Hazrat Maulana Muhammad Tayyib bin Muhammad Taahir Surati hai.

Aap Hazrat Muhammad ibnul Hanafiya bin Hazrat Ali al-Murtaza radiy-Allāhu ta’ala anhu ki nasl se hain.

Aap ke pardaada 1060 Hijri (1650 A.D.) me Mughal baadshaah Shaah-jahaan ke zamaame me Madeena se Surat tashreef laaye the.

****************
1857 A.D. me angrezo ke khilaaf Hindustan ki aazaadi ki pehli jung me Aap apne pariwaar ke saath shareek hue. Is jung me Aap ke 2 bhai shaheed hue.
Angrezo ne Aap ke pariwaar ki milkiyat par qabza kar liya. Aap ka pariwaar hijrat karke Iraq chala gaya. Waha 3 saal rookne ke baad Aap ka pariwaar Hajje baitullāh ke liye gaya aur wahi se Hindustan waapas aane ke liye rawaana hua. Raaste me Aap ke waalid ka inteqaal hua. Bahot takleef bardaadsht karke Aap ka pariwaar Hindustan pahuncha aur bahot mehnat karke apna kapdo ka kaarobaar phir se jamaaya. Is ke kuchh waqt baad Aap ki waalida ka inteqaal hua.

****************
Is ke ba’ad Aap apne bhai Shaikh Abdul Lateef ke saath Delhi gaye aur Madrasa Husain Bakhsh me ta’aleem haasil ki. Phir Aligarh me Maulana M***i Muhammad Lutfullāh Aligarhi se ta’aleem haasil ki. Phir 1281 Hijri (1865 A.D.) me Saharanpur jaakar Maulana Ahmad Ali Mohaddiṡ Saharanpuri se Hadeeṡ ki ta’aleem haasil ki aur un se Sanad aur Ijaazat haasil ki. Phir Kanpur me Madrasa Faiz e Aam se 1286 Hijri (1870 A.D.) me deegar uloom ki mazeed ta’aleem haasil ki.

Phir Maulana Lutfullāh Aligarhi ke mashware par Gunjmuradabaad jaakar Hazrat Maulana Shaah Fazle Rahmān Gunj-muradabaadi rahmatullāhi alaihi ke mureed hue.
Aap ne Maulana Shaah Fazle Rahmān Gunj-muradabaadi se Sihah Sittah aur Mishkaat-ul-Masaabeeh ki ta’aleem lekar Sanad haasil ki.

Is ke ba’ad 3 mahine tak Aap ne Dhaka, Sylhet, Chittagong aur Kishan ganj ka safar kiya. Is dauraan Aap ki mulaaqaat Hazrat Shaikh Sayyed Abdul Hayy Islamabadi aur Hazrat Peer Sayyed Mehar Ali Shaah Golrawi se hui.

1283 Hijri (1867 A.D.) me Shaah Fazle Rahmān Gunjmuradabaadi ke farmaan par aur Shaikh Hakeem Khaleel-ur-Rahmān Pilibhiti ki da’awat par Aap Pilibhit tashreef laaye.

1301 Hijri (1882 A.D.) me Aap ne Pilibhit me Madrasa Daar-ul-Hadeeṡ ki ibtida ki. Jis ke bunyaadi jalse me Hindustan ke bahot saare mash'hoor mohaddiṡeen aur ulama tashreef laaye the aur A’ala Hazrat Imaam e Ahle Sunnat Ahmad Raza Khan rahmatullāhi alaihi ke mubarak haatho se Madrasa ki sange bunyaad rakhi g*i aur A’ala hazrat ne lagaataar 3 ghante tak Ilme Hadeeṡ, Usoole Hadeeṡ aur is se muta’alliq mozu par shaandaar taqreer farmaai.

Aap A’ala Hazrat ki bahot ta’azeem karte the. Aap farmaate hain ke ‘A'ala Hazrat is daur ke Ameer-ul-mo’mineen fil Hadeeṡ hain.’

****************
Aap 40 saal tak ta’aleeme Hadeeṡ karte rahe.
Aap Fajr ke ba’ad se lekar der raat tak darse Hadeeṡ dars karte. Sirf namaaz ke waqt aur apne zaroori kaamo ke liye hi thehrte.

Aap Haafiz-ul-Bukhari the ya’ani Saheeh Bukhari ki puri kitaab tamaam raawiyo ke naam [Isnaad] aur Hadeeṡ ke matan ke saath zabaani yaad thi.

Aap ne Wahaabi aur dusre bad-mazhab firqo ke khilaaf daleel pesh ki aur ta’aleem wa dars ke zariye musalmano ko hidaayat dete rahe aur tahaffuz e aqaa'id e Ahle Sunnat wal jama’at ka kaam anjaam dete rahe.

****************
Tasannif :
‾‾‾‾‾‾‾‾‾‾‾‾
Aap ki likhi hui mash'hoor kitaaben :
(1) Haashiya Sunan Nisai
(2) Haashiya Ma’ani al-At'har e Imaam Tahaawi
(3) Haashiya Tafseer al-Jalaalain
(4) Haashiya Mishkaat al-Masaabeeh
(5) Ta’aliqaat al-Mujalla Sharh Muniyaat al-Musalla
(6) Jaami-ul-Shawaahid bi Khiraajil Wahaabain anil Masaajid.

****************
Aap ke shaagirdo me Sadr-ush-Shariah Maulana Amjad Ali Aazami, Mohaddiṡ e aazam e Hind Maulana Sayyed Muhammad Kichhauchawi, Maulana Khaadime Husain bin Sayyed Jama’at Ali Shaah Mohaddiṡ Alipuri, Qutb-ul-Madeena Maulana Zia-ud-deen Ahamd Madani, Malik-ul-Ulama Maulana Zafar-ud-deen Bihari, Maulana Fakhir Allahabadi, Raees-ul-Mutakallimeen Sayyed Sulaimān Ashraf Bihari, Allama Maulana Abdus Salaam Qaadri Razawi Aazami, Maulana Abdul Qaadir Lahori, Shaikh Mushtaaq Ahmad Qaadri Kanpuri, Shaikh Nisaar Ahmad Qaadri Kanpuri, Muhammad Shafi Baisalpuri, Shaikh Abdul Azeez Mohaddiṡ Bijnori, Maulana Sayyed Shaah Misbaah-ul-Hasan Chishti, Maulana Abdul Hayy Mohaddiṡ Pilibhiti, Maulana Sultaan-ul-Waa'izeen Maulana Abdul Ahad Pilibhiti mash'hoor hain.

****************
Aap Hazrat Maulana Shaah Fazle Rahmān Gunjmuradabaadi rahmatullāhi alaihi ke mureed aur khalifa hain.
Aur ‘Naqshbandi Mujadiddi’ silsila ki Shaikh hai.

Aap ke khulfa :
(1) (Aap ke saahabzaade) Hazrat Maulana Abdul Ahad Pilbhiti rahmatullāhi alaihi,
(2) Hazrat Qutb-e-Madeena Maulana Ziā-ud-deen Ahmad Madani rahmatullāhi alaihi.

****************
Aap ka wisaal 7 Jamaadi-ul-awwal 1334 Hijri (12 March 1916 A.D.) ko hua.
Aap ke wisaal ke waqt ‘Mishkaat-ul-Masaabeeh’ Aap ke seene par thi.

Aap ki naamaze janaaza Hazrat Hujjat-ul-Islaam Haamid Raza Khan Bareilwi rahmatullāhi alaihi ne padhaai.

****************
Aap ka mazaar Pilibhit (Uttar Pradesh) me Madrsatul Hadeeṡ ke bagal me hai.

****************
Mazeed Posts ke liye Website dekhen :
(For more posts Visit this website) :

http://fikreummat.net/

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Wasi Ahmad Mohaddiṡ Naqshbandi Surati rahmatullāhi alaihi aur tamaam Auliya Allāh ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko duniya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

30/10/2025

Hazrat Abdullāh ibn Rawaahah radiy-Allāhu ta’ala anhu :
♦♦♦♦♦♦♦♦♦♦♦♦♦♦♦♦♦♦♦♦♦

Mazeed Posts ke liye Website dekhen :
(For more posts Visit this website) :

http://fikreummat.net/

****************
Aap ke waalid ka naam Rawaahah bin Ṡalaba aur waalid ka naam Kabsha binte Waqeed hai.

Aap Madeena ke Ansaar sahaabai e Rasool hain aur Banu Khzraaj qabeele ke Banu Haariṡ khaandaan se hain.

*********************
Aap as-Saabiqoon al-Awwaloon me shaamil hain.

Zil Hijja 12 Nabawi (June 622 A.D.) me Aap Yaṡrib (Madeena) ke 73 mard aur 2 aurto ke giroh me shareek the jis ne maqaam e Aqaba par Huzoor Rasool-Allāh sallallāhu alaihi wa sallam se Bai'at-ul-Aqaba ṡaani ki. Aur har haal me un ki ita’at karne ka aur un ko madad karne ka waada kiya.
Is ke ba’ad Huzoor sallallāhu alaihi wa sallam ne Yaṡrib (Madeena) ke 12 sahaaba ko Nuqaba banakar apne apne khaandaan ko islaam ki ta’aleem ke liye muntakhab farmaaya. Aap ko Khajraz ke Banu Haariṡ khaandaan ke Naqib banaa’ya.

*****************
Huzoor sallallāhu alaihi wa sallam ne Hazrat Miqdaad ibn Amr Muhaajir radiy-Allāhu ta’ala anhu ko Aap ka bhaai banaaya.

*****************
Aap ne Ita’at e Rasool se mukammal ishqe Rasool ka ṡaboot diya.
Ek martaba Aap masjide Nabawi me daakhil ho rahe the ke Aap ne Huzoor sallallāhu alaihi wa sallam ko farmaate hue suna ke “Jo shakhs jaha hai wahi par baith jaaye.” Aap foran darwaaze ke qareeb hi baith gaye. Huzoor sallallāhu alaihi wa sallam ne jab dekha to irshaad farmaaya “ALLĀH ta’ala tumhe ita’at me barkat ata farmaaye.”

*****************
Hazrat Abu Darda Aap ke khaas dost the. Jab woh musalman nahi hue the tab ek but ko apne ghar me rakha tha. Aap ne un ke ghar me jaakar us but ko tod diya. Jab Abu Darda ghar par aaye to un ki biwi khauf ki wajah se ro rahi thi ke “Shaayad koi aafat aa jaayegi.” Lekin Hazrat Abu Darda radiy-Allāhu ta’ala anhu ne socha ke “Jis but ko hum khuda maan rahe the woh apni hifaazat nahi kar saka to munaasib hai ke hum ALLĀH ko apna ma’abood maane jo har cheez par qaadir hai.”

*****************
Aap Hadeeṡe Nabawi ko yaad rakhte aur dusre as'haaba ko bataate the.

*****************
Aap Shaayaraan e Islaam me shaamil hain. Aap ne kai mauqe par Huzoor sallallāhu alaihi wa sallam ki shaan me Qaseeda padhe hain.

*****************
Aap ne Junge Badr, Junge Uhud, Junge Khandaq aur Junge Khaibar me shareek hokar apni shuja’at dikhaai.

Junge Badr me fatah ke baad Huzoor sallallāhu alaihi wa sallam ne Aap ko Hazrat Zaid ibn Haariṡah radiy-Allāhu ta’ala anhu ke saath fatah ki khush-khabari dene ke liye Madeena bheja.

Zil Qa’ada 4 Hijri (April 626 A.D.) me Junge Badr al-Maw'id ke mauqe par Huzoor sallallāhu alaihi wa sallam Aap ko Madeena me apna naa'ib banaaya tha. (Quraish ka qaafla darkar bhaag jaane ki wajah se jung nahi hui.)

*****************
Abu Raafi Sallam ibn Abul Huqaiq ke qatl ke ba’ad 6 Hijri (628 A.D.) me Yusayr ibn Rizaam Khaibar ka naya sardaar bana. Huzoor Rasool-Allāh sallallāhu alaihi wa sallam ko jab pata chala ke woh lashkar ke saath musalmano se saath jung karne ki saazish kar raha hai to Hazrat Abdullāh ibn Rawaaha radiy-Allāhu ta’ala anhu ko 3 sahaaba ke saath Khaibar ke haalaat jaanne lene ke liye bheja.
Aap ne waapas aakar waha ke haalaat bataaye to Huzoor sallallāhu alaihi wa sallam ne Aap ko 30 as'haaba ke saath Khaibar bheje. Yusayr ibn Rizaam apne saathiyo ke saath Huzoor sallallāhu alaihi wa sallam ke paas aane ke liye tayyaar hua aur Hazrat Abdullāh ibn Unais radiy-Allāhu ta’ala anhu ke saath oont par sawaar hokar Madeena ki jaanib rawaana hue. Lekin Khaibar se 6 mile door Maqaam e Qarqarat par us ne apna iraada badal diya aur oont par se neeche kood gaya. Hazrat Abdullāh ibn Unais ne us par hamla kiya aur woh maara gaya. Isi tarah dusre sahaaba ne bhi oont par sawaar kaafir ko qatl kar diya. 29 yahudi maare gaye aur ek bachkar bhaag gaya.

*****************
6 Hijri me Aap Bai'at-ur-Ridwaan me bhi shareek hue.

Aap Zil-Qa’ada 7 Hijri (628 A.D.) me Umratul Qada me bhi shareek hue.
Aap Huzoor sallallāhu alaihi wa sallam ke oont ki lagaam pakadkar chal rahe the aur musalmano ke waqaar aur shuja’at ke ash'aar padh rahe the. Hazrate Umar Faarooq radiy-Allāhu ta’ala anhu ne Aap ko roka aur kaha ke “Baitullāh ke qareeb sher padhte ho?” Yeh sunkar Huzoor sallallāhu alaihi wa sallam ne farmaaya “Ise padhne do. Is ke alfaaz teer se bhi zyada taaqatwar aur aṡardaar hai.” Phir Hazrat Abdullāh ibn Rawaahah se yeh padhne ke liye farmaaya “Laa ilāha illallāh wahdahu laa shareek lahū sadaqa wa’adahu wa nasar abdahu wa hazam al-ahzaab wahdahu.” Aap ne yeh padhna shuru kiya aur musalman Aap ke saath dohraane lage.

*****************
7 Hijri (629 A.D.) me Huzoor sallallāhu alaihi wa sallam ne apne sahaaba ko khato ke saath Islaam ki da’awat ke liye alag alag mulko ke baadshaah ke paas bheje.
Hazrat Haariṡ bin Umair Azdi radiy-Allāhu ta’ala anhu ko safeer banakar Bosra ke baadshaah ki jaanib bheja. Hazrat Haariṡ bin Umair Azdi jab maqaame Mu’tah par pahunche to waha ke governor Sharjeel Ghassani ne unhe rokkar shaheed kar diya.

Jab Huzoor sallallāhu alaihi wa sallam ko pata chala to Aap ne Jamaadi ul awwal 8 Hijri (September 629 A.D.) ko Hazrate Zaid bin Haariṡa radiy-Allāhu ta’ala anhu ko saalaar banakar 3000 musalmano ka lashkar bheja.
Jab musalman Musharif pahunche to pata chala ke Byzantine aur un ke saathiyo ka lashkar taqreeban 200000 ka hai. Musalmano ne intazaar karne ka aur Madeena se madad mangwaane ka mashwara kiya. Magar Hazrate Abdullāh ibn Rawaahah radiy-Allāhu ta’ala anhu ne irshaad farmaaya ke ‘Musalman baatil se jung karne se ya shaheed hone se darta nahi hai.’

Hazrat Zaid ibn Haariṡa radiy-Allāhu ta’ala anhu ne pehle kaafiro ko islaam ki daawat di magar wo na maane.
Aakhirkaar maqaame Mu’tah par muslim lashkar ne kaafiro ke saath jung ki.
Jung me Hazrate Zaid bin Haariṡa radiy-Allāhu ta’ala anhu shaheed hue to Hazrat Ja’afar bin Abu Taalib radiy-Allāhu ta’ala anhu islaami lashkar ke saalaar bane. Un ki shaahadat ke ba’ad Aap radiy-Allāhu ta’ala anhu saalaar e lashkar bane.
Ek kaafir ne khanjar se Aap ke chehre par waar kiya. Aap shadeed zakhmi hone ke ba-wajood bahaaduri se jung karte hue shaheed ho gaye.
Aap ke ba’ad Hazrat Khaalid bin Waleed radiy-Allāhu ta’ala anhu ne haalaat ko dekhkar tarkeeb se muslim lashkar ki hifaazat ki.

*****************
Aap ka wisaal 5 Jamaadi-ul-awwal 8 Hijri (September 629 A.D.) ko Junge Mu’tah ke dauraan hua.

****************
Aap ka mazaar Mu’tah (Jordan) me hai.

****************
Mazeed Posts ke liye Website dekhen :
(For more posts Visit this website) :

http://fikreummat.net/

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Abdullāh ibn Rawaaha radiy-Allāhu ta’ala anhu aur tamaam Auliya Allāh aur Ashaaba ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko duniya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

Humanity Of Islam

02/11/2025

01/11/2025

01/11/2025

31/10/2025

31/10/2025

30/10/2025

Address

Website

Alerts

Contact The Business

Shortcuts

Share

Category