Zalên News, Treasury Square, Aizawl (2026)

13/04/2026

Lungdai-a chhiatna thlengah k*m 14 mi thi, a nu leh a nau ICU-ah enkawl mek

ZALEN April 13, 2026 : Lungdai-ah tukin khan chhungkaw pakhata mi pathum chennah chhiatna a thleng a, pakhat a thi a, pahnih chu ZMC&H lamah hruai an ni.

ZALEN Thudawn danin Chhungkaw nu ber Lalremsangi (Tei) chu a hnathawhna hmunah a thlen huna a thlen loh avangin zing dar 10 vel khan a thawhna dawr neitute ngaihtha lo chuan an kawngkhar tichhia in an lut a, an fanu Priskil Vanlalhriatpuii k*m 14 mi chu thi in hmuh a ni.

Chhungkaw nu Lalremsangi leh a fapa Austin Vanlalmalsawmna te chu an lo la thaw a, buaipui nghal niin Lungdai PHC panpui an ni a, anni hian hmunpui lama refer-in Durtlang hospital panpui leh an ni a, Durtlang-ah hian ICU an chan loh vangin ZMC&H panpui leh an ni.

Lalremsangi hi ICU-ah Ventilator hmanga thawk tir niin, Austin-a pawh hi ICU ah enkawl mek a ni.

Priskil Vanlalhriatpuii hi Lungdai PHC-ah postmortem a nih hnuah Zanlawn-ah a ruang hi lak a ni. Zaninah lumen tur niin naktuk chhunah vui tur a ni.

Lalremsangi te In luah hi RCC niin kawngka pawh a phui tha hle niin sawi a ni a, gas an harsat avangin meihawl-in rawng an bawl nia ngaih a ni , oxygen tlachham avanga hetiang hi thlengah a hmutute chuan an ngai, In chhung pawh hi a lo uap lum hle niin a lutte chuan an sawi.

13/04/2026

LZ Juice-in buhfai Grade ‘A’ aiah C-Rice an supply: MPCC

ZALEN April 13, 2026 :MPCC Vigilance Cell chuan vawiinah khan Aizawl Press Club-ah thu thar lakhawmtute an kawm a. Mizoram sawrkarin buhfai supply tura tender chhang hniam zawk thlang loa a chhang sang zawk LZ Juice te a thlan danah thil fel tawk lo tam tak a awm ngei nia hriain an chhui a, rihlelh ang ngeiin LZ Juice hian Mizoram mipuite buhfai ei tur an supply danah thil fel lo tam tak an hmu chhuak tih an puang.

ZPM hian an sawrkar tirh phat atanga Mizoram mipuite ei tur buhfai Mizoram sawrkarin a supply tir danah t**i a tam nghal hle niin an sawi a. Food, Civil Supplies & Consumer Affairs Department chuan buhfai supply tur a thlan danah thil fel tawk lo awmin, buhfai Grade ‘A’ supply tura tender chhang hniam ber RL Store, Kulikawn, Aizawl chu thlang loin, a aia quintal khat Rs. 149 zela chhang to zawk LZ Juice chu Grade ‘A’ buhfai supply tura thlan a ni an ti.

LZ Juice in buhfai a supply tur zat chungchang RTI hmanga mi pahnihin zawhna an zawh pawh chhanna inang lo pek niin, LZ Juice in k*m 2024-2025 chhungin buhfai quintal 1,80,000 supply anga chhanna pek a ni a, zawhna zawttu dang hnenah erawh quintal 2,00,000 supply tir angin chhanna pek a ni thung a, a dik zawk tihchian an phut a ni.

FCS & CA Department-a RTI Act hmanga an dil chhanna an dawnah LZ Juice hian Grade ‘A’ buhfai supply tura tender chhang siin Grade ‘A’ buhfai supply loin Common Rice (C-Rice) buhfai zawk an supply ngei tih finfiah a ni an ti a. LZ Juice ten an buhfai supply tur an leina Suhanna Enterprise, Assam hnen atangin Grade ‘A’ buhfai ni loin buhfai man tlawm Common Rice (C-Rice) ngei an lei thu finfiah a ni an ti bawk a. Mizoram sawrkarin buhfai Grade ‘A’ a nih leh nih loh thu finfiahna nei loin C-Rice chu Grade ‘A’ angin an supply ta mai a, hei hi mipuite zah lohna lian tak a ni an ti.

LZ Juice ten Common Rice buhfai an supply dan kalphungah hian thil mak tak tak a tam hle niin an sawi a. Mizoram pawn lam atanga buhfai an phurh luh danah Mizoram chanchina thil thleng ngai lo thil mak tak tak a awm nual mai a. LZ Juice ten phai lam atanga Muanna Godown, Zuangtuia buhfai an phurh luh dan mak thenkhat an tarlan zingah JCB-in Zuangtui Muanna Godown-ah buhfai bag 720 a phur thleng a, Mahindra Pick Up-in 147 hmangin Zuangtui Muanna Godown-ah buhfai bag 157 a phur thleng a, autorickshaw-in Zuangtui Muanna Godown-ah buhfai bag 500 a phurh thlen laiin truck ke 6 nei chi niin Zuangtui Muanna Godown-ah buhfai bag 2 chauh a phur thleng thung.

Heng buhfai leh a phurtu motor intuha lo tak tak hi tum 36 zet a awm tih sawiin, Press mite hnenah hian document te nen an sem a. Heng an tarlan bakah hian challan-a motor number inziak, chhui zui ngial pawha motor registration record awm lo buhfai phur motor tam tak hmuhchhuah a ni an ti bawk.

ZPM sawrkar hnuaia Supply Minister in duhsak taka buhfai a supply tir LZ Juice ten phai lam atanga Zuangtui Muanna Godown a Zoram mipuite ei tur buhfai an phurh luh danah thil mak leh fel lo tam tak a awm ngei a ni tih a nemnghet a ni an ti.

LZ Juice in Zuangtui Muanna Godown-a buhfai an phurh luhna challan a buhfai phurtu motor number te hi ziah sual palh leh ngaih hai palh awm thei a nih avangin chutiang chu a thleng reng em tih Zuangtui Muanna Godown thuneitute chu March ni 11, 2026 ah khan MPCC Vigilance Cell ten an zawt fiah a. Godown-a buhfai phur luttu lirthei reng reng te chu uluk taka en fiah leh buk nawn vek a nih thin thu leh thil dik lo hrang hrang awm thei te uluk taka enfiah a nih thin thu an lo sawi a ni an ti.

March ni 21, 2026 a Zemabawk West Local Council inthlan campaign laia Supply Minister-in a thusawi chanchinbua lo chhuakah ‘LZ Juice ten buhfai an supply na motor number chu ziah sual palh a ni’ tia a sawi chu MPCC Vigilance Cell chuan mak a ti hle a. Heng motor number te hi ziah sual palh ni loin, LZ Juice ten buhfai an supply zat tur ziah mil nana dawhkan atanga phuailuai taka challan phuahchawp an siam avanga an motor number tarlan leh a lirthei dik tak dinhmun inang ta lo niin MPCC Vigilance Cell chuan a ngai an ti bawk.

13/04/2026

AMC 2026 atan Home Voting kalpui tan || K*m 102 miin vote thlak

ZALEN April 13, 2026: General Election to Aizawl Municipal Corporation (AMC) 2026 tukin zing atanga khan atana k*m upa te, damlo natna khirh bik nei polling station pan theilo te leh pianphung a rualbanlo polling station pan theilo te tana a vote thlak theihna tura ruahman, Home Voting chu kalpui tan a ni.

Home Voting hi ni 13.4.2026 (Monday) atanga ni 16.4.2026 (Thursday) thleng kalpui tura ruahman a ni. Home Voting hi AMC Ward 19-ah kalpui vek tur a ni a, Ward tinah Home Voting Team pakhat theuh awm in, Home Voting ti tura dilna lut zat hi 2769 a ni a, ni 4 chhunga vote thlak hi zawh hman tura ruahman a ni, Municipal Ward – 2 ah dilna hi lut tamber in diltu mi 209 an awm a ni.

Home Voting Team tirhchhuahnaah hian General Observers te, DEO aiawh Election Officers & staffs te, Ward tin MROs leh AMROs te, Home Voting Nodal Officer te, EVMs Nodal Officer te, Information & Publicity Nodal Officer te leh Political Party aiawh te an tel a ni.

Hriat theih chinah vawiin Home Voting a, Vote thlak upa ber chu Nghakliani, K*m 102, Dawrpui veng, Ward-IX hnuai a mi a ni.

13/04/2026

Sawrkar-in AMC area-ah zu khap bur ni 'Dry Day' a puang

ZALEN April 13, 2026 : General Election to the Aizawl Municipal Corporation, 2026 neih tur inpuahchahna kalpui mek zelah Commissioner of Excise & Narcotics, Excise & Narcotics Department, Mizoram chuan Section 4A of the Mizoram Liquor (Prohibition) Amendment Act, 2025 in thuneihna a pek tlawhchhanin zu khap burna ni 'Dry Day' a puang.

Dry Day puan hian April ni 20, 2026 (Thawhtanni) tlai dar 4:00 atanga vote thlak ni April ni 21, 2026 (Thawhlehni) tlai dar 4:00 thleng (darkar 24 chhung) bakah, vote thlak that a tul chuan April ni 23, 2026 telin, leh Vote chhiar hun tura ruat April ni 27, 2026 (Thawhtanni) a vote chhiar zawh fel a nih hma chu Aizawl Municipal Corporation huam chhungah zu khap burna ni 'Dry Day' puan a nih thu a puang.

13/04/2026

Electric bill a sang, smart meter vuah vang?

ZALEN April 13, 2026: Tun hnaiah electric consumer tam takte bill a sang hle a, thla danga an bill aiin a let eng emaw zatin a pung a. Electric bill a pun chhan hi a tlangpuiin smart meter vuah vang niin Power & Electricity department thawktute chuan an sawi.

Electric consumer pakhat chuan tum danga Rs. 1,000 vel chawi thin kha sing chuang fe a lo kal nia sawiin a chhan a hriat loh thu a sawi a. Pa pakhat pawhin Rs. 400/500 vel an chawi thinnaah bill lo kal hnuhnung berah chuan Rs. 8,000 chuang a lo kal niin ZALEN a hrilh bawk.

Bill sang chungchangah hian ZALEN chuan Power & Electricity department thawktute thil awm dan a zawt fiah a, chhan hrang hrang awm thei zingah smart meter vuah vanga bill hun chhung a rei tak vangin bill hi tun hma lama chawi ai chuan a tam tlangpui niin an sawi.

Power & Electricity department thawktute chuan electric meter reading hi mihring hmanga lak thin niin meter reader-ten reading an lak chu office-ah an thehlut leh a, office-a bill siam hun chhung hi thla khat vel a ni a. Consumer hnena bill a thlen meuh chuan thla a lo liam tawh thin avangin consumer-ten thla khat hnuah chauh bill an hmu thin niin an sawi a. Smart meter-ah chuan reading lak ruala bill siam nghal a ni a, a hma lama thla khat liam ta bill siam thin kha awl awm tawh lovin thla hnih bill kha tum khatah a lo thlen tak avangin bill hi a sang ta niin an sawi a. A hnu zelah erawh chuan a san phah dawn lo tih sawiin êng chhit man chu tihsan a ni lo niin an sawi bawk.

Hei bakah hian meter hlui (tam tak hman mek)-ah chhia a tam a, a thara thlak dawnin sum tam tak sen a ngai dawn a. Hei vang hian tlem tete-in bill thin a ni a, smart meter hman a nih takah chuan bill a sang thei niin an sawi a. Chutihrualin tihsual palh hrim hrim pawh a awm ve tho niin ZALEN an hrilh a. Hetianga tihsual awmte chu an hriat chuan an siam thatsak leh zel niin an sawi bawk.

P&E thawktute chuan Aizawl khawpuiah electric consumer nuai khat vel an awm tih sawiin heng zinga a chanve tling lo deuhah smart meter vuah hna hi zawh a ni tawh tih an sawi a. ‘Electric bill sang’ tia harsatna tawk tam ber 80% vel pawh heta tang hian a ni tih an sawi a. Harsatna tawk zinga 10% vel chu tihsual palh ve hrim hrim a ni tih sawiin electric bill chu hard copy leh soft copy an hmuhah sofy copy chu rin zawk tur a ni tih sawiin hard copy ah tihsual a awm fo niin an sawi bawk.

P&E thawktute chuan electric bill sang chungchanga harsatna tawkte tan mahni awmna hnai ber Power & Electricity department office-ah zawh fiah theih a ni tih an sawi bawk.

Mizoram Consumers’ Union President Thanglura chuan software thar hman a nih avangin reading lak kawngah tihsual palh a awm thei tih sawiin harsatn tawk an awm chuan MCU chuan an pui thei reng tih a sawi a. Deptt. tih dan a lungawi lo chuan Electricity Redressal Forum-ah thehluh theih a ni a, an chin fel dan a lungawi lo chu Ombudsman-ah a kal leh theih tih a sawi bawk.

13/04/2026

MTM-in MLA leh ex MLA ten MUHCS zawm ve se an duh

ZALEN April 13, 2026: Mizoram Transformation Movement (MTM) chuan thuchhuah siamin MLA leh minister te, ex-MLA hian MUHCS hi a tha hlea an hria a nih chuan zawm ve ngei se, damlo mangang leh chhungkaw harsa tam takin an bill theih lohna hospital-a awm a ngaih si laia annin an duhtawka an lo bill thei hi a dik tawk lo hlein an hria tih an sawi.

Nimin khan thuchhuah siamin MTM chuan Mizorama private hospital empanelled loah damlo an luhin bill theih lova a awm hi a dik lo a. Mizoram Health Care Society-in empanelled hospital list a tihchhuahah hian deemed empanelled hospital, cashless hman theih lohna, MR bill theihna chauh hospital list a dahah Silchar-a hospital te, Shillong-a private hospital Woodland, Bethany leh Nazareth Hospital te, Guwahati-a Downtown Hospital pawh an tel a. Hnam dang private hospital zawka tih theih si Mizoram entreprenuer-ten an siam private hospital a phal a ni ve loh hi a dik lo a, sawrkar hian ngaihtuah tha se an duh.

MTM chuan sawrkar hnathawkten MUHCS awm hma a an duhna hospital-ah an kal a, MR an bill leh mai thin ang khan an duhna leh mamawhna hospital ah kal a, cashless a an kal theih lohna hmunah pawh MR an bill phalsak leh nise an duh tih an sawi a. Pensioner-te pawh an phut angin MUHCS 1.0 ang talin dahsak leh nise tha an ti tih an sawi bawk.

13/04/2026

Aizawl district police-in thubuai 1,805 ziak lut || Inrawk & rukruk thubuai tam lawr lak

ZALEN April 13, 2026: Aizawl district police-ten nik*m chhung khan thubuai chi hrang hrang 1,805 an ziak lut a. Inrawkna leh rukruk thubuai a tam lawr hle.

ZALEN-in Superintendent of Police, Aizawl district hnen atanga thu a dawn danin nik*m chhunga thubuai ziah luh 1,805 zinga 1,508 hi The Bharatiya Nyaya Sanhita, 2023 (BNS) hnuaia ziah luh a niin pahnih hi IPC hnuaia ziah luh a ni a. Local & Special Law hnuaiah 295 ziah luh a ni bawk.

BNS hnuaia thubuai ziah luhah hian in rawk (burglary) leh rukruk (theft) thubuai a tam lawr lak a, BNS hnuaia thubuai ziah luh zawng zawng zing 1,197 niin 79.27% a tling pha a. Hei bakah hian intihnat, lirthei chetsualna, mi bum te chu a langsar zual te an ni.

Nik*m chhung hian Aizawl district-ah tualthah thubuai 12, tualthah tum thubuai panga, pawngsual thubuai 13 ziah luh a ni bawk a. Nik*m chhung vek khan mihring thihna thlen lirthei chetsualna tum 31 leh thihna thlen lohna lirthei chetsualna tum 20 a thleng bawk.

Aizawl district police-te hian nik*m chhung vek khan Local & Special Law hnuaiah thubuai 295 an ziak lut bawk a. Heng zingah hian zu khapna dan bawhchhiatna chu case ziah luh luh tam ber a niin 91 ziah luh a ni a, hei hi Local & Special Law hnuaia thubuai ziah luh atangin 35% a tling a. Hei bakah hian POCSO thubuai chu tam lehin 68 ziah luh a ni a, ND&PS Act hnuaiah case 32 ziah luh a ni bawk.

ZALEN zawhna chhangin Aizawl district police chuan nik*m chhunga thubuai ziah luh kaihhnawiha man zat hi mi 2,324 an ni a, Police case siam zinga court-in thiam loh a chantir (convict) mi 1,369 an awm bawk.

K*m 2025 chhung vek hian ruihhlo kaihhnawihah mi 140 man an ni a, ruihhlo pawh he**in (No.4) 1,759.34 gram, crystal m**h 13.232kg, g***a 17.412kg man a ni bawk.

Aizawl district police hian k*m 2025 Krismas leh 2026 k*mthar vuakvetah halpuah leh halmawi kaihhnawiah mihring man an nei lo thung.

13/04/2026

K*m 21 chhunga chhiah hmuh tam ber k*m thleng

ZALEN April 13, 2026: Mizoram sawrkara taxation department-in k*m liam ta, 2025-26 chhunga chhiah a hmuh zawng zawng zat chu Rs. 12,78,55,13,765 a tling a, hei hi k*m 21 chhunga chhiah hmuh tam ber k*m a ni.

Taxation department tar lan danin k*m liam ta chhunga chhiah hmuh zinga Rs. 9,31,62,76,931 chu GST atanga hmuh a ni.

Profession tax atangin Rs. 17,00,64,331 hmuh ni bawkin sales tax atangin Rs. 2,38,53,23,620, road maintenance cess atangin Rs. 45,65,46,042, entertainment tax Rs. 70,000 leh chhiah hmuhna dang atangin Rs. 1,13,650 hmuh a ni.

Hetih lai hian taxation department hian k*m 2024-25 chhung khan chhiah chi hrang hrang atangin Rs. 11,49,81,88,170 an hmu.

Sawrkar k*m kalta chhung khan April, 2025-ah chhiah hmuh tam berin hemi thla hian Rs. 1,79,51,94,242 hmuh a ni a, sum hmuh tlem ber thla, August, 2025-ah Rs. 73,85,45,328 hmuh a ni.

2025-26 chhunga chhiah hmuh Rs. 12,78,55,13,765 hi k*m 21 chhunga taxation department-in chhiah hmuh tam ber k*m niin k*m 20 liam ta, 2005-06 chhiah hmuh zat chu Rs. 45,95,99,733 a ni.

Taxation department-in chhiah an hmuh that theih nan kawng hrang hrangin hma an la tih Commissioner of State Tax HK Lalhawngliana chuan ZALEN a lo hrilh tawh a, nik*m September atanga hman tan, GST rate thar hman hnuah rate thar zawm tha lo pawisa chawitir mi eng emaw zat an neih tawh thu leh chung mite pawisa chawi chu Rs. Nuai 10 chuang a tlin tawh thu a lo sawi tawh bawk.

12/04/2026

Club inelnaah Mizoram Police Badminton Club champion

ZALEN, Apr. 12, 2026: Kar liam taa Yonex-Sunrise LBS SUZUKI MBA Inter Club Badminton Championship 2026-ah Mizoram Police Badminton Club (MPBC) chuan gold medal pathum lain a pum puiah an champion.

Champion MPBC
Thawhlehni atanga Mizoram Badminton Centre, Zuangtui, Aizawla khelh tan inelna hi Inrinni khan zawh niin MPBC-in tun hma atanga an player neih thatte chhawr tangkaiin harsatna lian tawk lovin category pathumah an champion.

35+ men’s team-ah Zarkawt Badminton Club hnehin Lalmuanawma, Samuel Lalnunmawia leh Lalbiaksanga te an langsar a. 45+ men’s team-ah pawh team rualkhai leh intluktlang tak an nei a. Muanawma leh Lalbiakmawia te hmangin New Serchhip Badminton Club (NSBC) hnehin an champion.

55+ men’s team championship-ah pawh MPBC tan player tha leh invawng rual an inlan thei a. C. Lalzahngoa, K. Laltluangliana, Lalthanzuala, leh R. Lalmuankima te langsarin final-ah Saron Badminton Club hnehin an tumpui zawng zawngte straight set vekin an hneh thei a ni.

Inelna ngaihhlutah Mission Veng
Team inelna ngaihhlut hlawh ber, men’s team championship final-ah Mission Veng Badminton Club (MBC) chuan Sihphir Badminton Club (SPBC) lakah 3-1-a hnehna changin an champion.

MBC tan C. Lalramsanga inlan hmasa berin Lalpekhluzuala lakah straight set-a chakin a team chu 1-0-in hma a hruaipui a. Second singles-ah SPBC tan Saitluangpuia Sailo a inlanin C. Lalramzauva a hneh veleh a, 1-1 a ni.

Doubles-ah Ramsanga leh Joseph VL Ringngheta tang dun chu SPBC aiawha pen chhuak, Saitluangpuia Sailo leh Joseph Lalhruaitluanga te lakah 2-1-a ding chang zawkin hma an hruai zui.

Reverse singles khelh a ni a, hetah hian hian Joseph-a ve ve inhmachhawnin MBC tana ding zawk, Joseph VL Ringngheta chuan doubles-a Ramsanga nena an hneh tawh, Joseph-a lakah a theihna sanzia lantirin straight set-in a chak a. MBC hian 3-1-a hma an hruai tak avangin lehpelh theih an ni ta lo va, inelna ngaihhlut ber, mipa team champion nomawi an la.

Result dangte
Women’s team championship-ah NSBC-in National Centre of Excellence (NCOA), Guwahati, Assam-a inzir mek, Lalrempuii chhawrin danglamna siamtu pawimawh a ni a, a team a champion-pui a, final-ah SPBC chu 2-0-in an hneh.

Inelna ngaihven hlawh dang, U-19 boy’s team-ah Chaltlang Badminton Club (CTBC)-in SPBC chu 2-0 bawkin an hneh a. Vanlalpekhlua Sailo leh a nau, Vanlalhruaia Sailo te chu CTBC tana langsar an ni.

U-15 boy’s team-ah CTBC-in an player tha leh thangduang, Liansangpuia leh Dennis Romawia Rivung te hmangin NSBC an hneh a, U-15 girl's team-ah Lalthakimi leh Lalruatkimi te hmangin NSBC-in Saron an hneh ve bawk.

Medal lak dan:
1. Mizoram Police Badminton Club: 3 Gold
2. New Serchhip Badminton Club: 2 Gold, 2 Silver, 2 Bronze
3. Chaltlang Badminton Club: 2 Gold, 3 Bronze
4. Mission Veng Badminton Club: 1 Gold
5. Sihphir Badminton Club: 3 Silver
6. Saron Badminton Club: 2 Silver, 2 Bronze
7. Zarkawt Badminton Club: 1 Silver
8. Chanmari Shuttlers Club: 3 Bronze
9. Ramhlun United Badminton Club: 2 Bronze
10. Kulikawn Badminton Club: 1 Bronze
11. Electric Veng Badminton Club: 1 Bronze

11/04/2026

NEUROSURGEON TAWNHRIAT NEI THA GREENWOOOD HOSPITAL-AH

Nghawng leh hnungzang nain k*t leh ke a khawih, ruh che, lu na, phungzawl, luhai leh thluaka bawk awm inenkawl mek tan manganna tur a awm lo.

Neurosurgeon tawnhriat nei thain in hmunhma ngeiah a lo pan che a, April ni 16 chawhma dar 12:00 atangin Greenwoood Hospital-ah a rawn theih ang.

ADVERTISEMENT

11/04/2026

Lil Kiki-a leh Rebecca Lallawmsangi te nupa-in fapa thar nei

ZALEN April 11,2026 : Nicky Lalchhanhima leh a nupui Rebecca Lallawmsangi te chuan vawiin chawhnu dar 2;30 khan BN Hospital-ah fapa duhawm tak an nei. Naute hi Kg 3 a ni.

Beck-i leh ‘Ka nula ngei i ni’ tih hla larpuitu, a dawhsan hminga Lil Kiki tia hriat lar, rapper & singer Nicky Lalchhanhima te hi July 8, 2025 khan Bualpui Presbyterian Kohhran Hall-a innei an ni.

ZALEN chuan Lil Kiki-a te nupa kan lawmpui hle a, nupa hlim tâk ni zel tûrin duhsakna kan hlan e.

10/04/2026

AMC ah ZPM rorel tura enchhin tlak an nih lohna chhan Ex MLA in a sawi
ZALEN April 10, 2026: Vawiin khan Mizo Hnamrun chhung inkhawm ah Prof.F Lalnunmawia Ex-MLA, General Secretary, GHQ leh Lalringliana, Ex-Executive Corporator, Adviser GHQ-ten AMC inthlan lo awm tur chungchang leh Mizoram politics kal vel dan an sawi.

Prof.F Lalnunmawia Ex-MLA chuan Mizoram State University Aizawla dah fel tawh sawn chhuaktu, State Capital sawn tum tu, AMC sum tam tak ti lapse-tu leh Aizawlah thil thar hmasawnna reng reng dah an duh tawh loh thu Assembly House-a sawi chhuaktu ZPM-te hi AMC-ah rorel tura enchhin tlak an nih loh thu a sawi. "Assembly House-ah CM Adviser pakhatin Aizawl a thil thar engmah dah belh tawh loh hi hmasawnna chi khat ani a tih nen khan a inzul chho viau a ni," a ti.

Tun hnaia ZPM kaihhruai sorkarin Mizoram State University (MZSU) Aizawla din tura Assembly House a pawm fel tawh zan khat thil thua Lungleia dah anih tur thu CM-in a puang ta thut khan mi tam tak mak tih a hlawhin a barakhaih hle thu a sawi a. "Sorkar laipui National Education Policy (NEP) 2020 angin Central University-te hi zirbingna hmun (Research Intensive) atana ruahman niin State University chu College affiliation petu ani tawh ang. Chutiang chuan Mizoram a College-te pawh Mizoram University (MZU) hnuaia awm tawh loin Mizoram State University (MzSU) hnuaiah an in affiliate vek tawh dawn a ni," a ti.

Prof. Mawitea chuan Assembly Session-ah MNF Legislature party chuan State University Aizawla dah tura tih hi sut kher loin Lungleiah pawh University hi dah ve mai ni se an ti thung. Lunglei a University dah hi Lunglei leh chhimlam mipuite pawhin an phu hle a ni a ti.

Lunglei ah chauh State University dah ni ta se, Aizawl leh hmarlam zawnga College te hi MzSU hnuaiah an in affiliate a ngai dawn a, College a thawkte meeting chi hrang hrang- Academic Council, and School Board, Board of Studies, Central evaluation, Scrutiny, Moderation etc nei tura Lunglei an kal deuh fo a ngai dawn a, TA/DA ringawt pawh a hautak hle ang. Chu mi piah lamah chuan Mizo thalai (MZU a seat changlo) tam tak Lunglei ah University an kal a ngai dawn tihna a ni a, chu chu an dawl zo a ngem tih ngaihtuah tel a ngaih thu a sawi bawk.

"Lunglei leh chhim lama University din hi MNF party chuan tul kan ti a, kan sorkar liam ta ah pawh khan Mizoram University Southern Campus din turin theihtawpin hma kan lo la tawh a, UGC leh Ministry lam in MZU Southern Campus chu mahni a senso intum tura min tih tak avangin kan puitlin hman ta lo a ni. State University hi a tira ruahmanna angin Aizawl a dah a tul hle a, Lunglei leh chhim lam mamawh phuhru turin Lunglei a University din pawh a tul hle," Prof.F.Lalnunmawia chuan a ti bawk.

Lalringliana Ex-Dy. Mayor pawhin MNF kaihruai AMC kal liam ta khan Aizawl khawpui tan nasa taka hna a thawh thu sawiin, ZPM in a zar an zo nasat hle a ni a ti.

Covid vanga cheng vbc 13.99 kan chan lai khan, vengtin hmasawnna tam tak bakah AMC complex Tuikual, AMC Plaza Bawngkawn, AMC EcoPark Zonuam-Ailawng-Reiek, AMC Sports Complex Bawngkawn, Chaltlang to Chanmari kawng zauh, City park nuam taka chei that, TNT ah Tui pump siam sak, AMC area-a Tuikhur tha tak siam vek, Local Council House 83 sak vek leh steel almirah dahkim, AMC City Bus Terminal Zemabawk sak zawh, faina lamah nasa taka hma an lak avanga bawlhhlawh paih dan mumal kan nei tak te, online hmanga building sak dilna an tih that avanga Central-in cheng vbc 31 AMC a pek thute a sawi.

Lalringliana chuan ZPM sorkarin financial management a thiam loh avanga AMC leh LMC cheng nuai 3400 chuang an tih lapse thute sawi chhuakin, AMC enkawl tlak an nih lohzia leh, AMC hmangaihtu MNF candidate-te thlang tling turin Aizawl mipui a ngen.

Zalên News

13/04/2026

13/04/2026

13/04/2026

13/04/2026

13/04/2026

13/04/2026

13/04/2026

13/04/2026

12/04/2026

11/04/2026

11/04/2026

10/04/2026

Address

Telephone

Website

Alerts

Contact The Business

Shortcuts

Share

Category