Zalên News, Treasury Square, Aizawl (2025)

11/10/2025

'MUAL HLA KAR DAN' SA LARTU THI

ZALEN, October 11, 2025: Zaithiam Lalbiaktluanga (Tetea), k*m 50, 'Mual hla kar dan' sa lartu chu tukin dar 04:00 khan a thi.

Lalbiaktluanga hi — Mual Hla Kar Dan — hla avanga hriat hlawh a ni. He hla hi a larpuiin, Zoram dung leh vang a deng chhuak a. Tun hnu thlengin thangthar zaithiamte pawhin an rawn 'cover' thin a ni.

A hla sak — Mual Hla Kar Dan — hi Dr Ringluaia fapa, Mafela phuah a ni a. Manipur nula Rakhi a phuah chhan a ni.

Mafela hian Synod Hospital, Durtlang-a, khatih laia Manipur lam mi nurse zirlai, Rakhi chu a ngaizawng a, a duh em em a. Mahse, Rakhi hian a zirlaite a zir zawh hnuah, Manipur lamah a haw a tul ta si a. Khatih lai, Thuampui atanga night bus chhuah thin vanglai khan, helai hmun atangin ngai leh ui tak chungin a thlah liam nghe nghe.

Mual Hla Kar Dan — hla chang tin maiah hian a thu a rawn chhawpchhuak nalhin, a rawn sawifiah vek mai.

A ruang hi vawiin chhun dar 01:00 khan a chenna in Durtlang ah vuiliam a ni.

11/10/2025

MIZO IDOL: A thiam 10 zingah Emmanuel-a leh Sylvia-i

ZALEN, October 11, 2025: Zonet buatsaih LESDE Mizo Idol Season 8 intihsiakna neih mekah a thiam zual 10 thlan chhuahte hming puan a ni ta.

Inrinni zan khan Top 20 atangin a tha zual 10-te hming hi puan a ni a, mipui tan hlawh, Tuikual South tlangval, Emmanuel Lalremruata pawh beisei leh rin ang ngeiin Top 10-ah a inhlangkai a. Ani bakah Champhai Vengthlang nula, Sylvia Malsawmpuii pawh a la kal tluang zel.

Top 20 intihsiakah khan contestant-te chu hla pahnih ve ve sain Ningani zan leh Zirtawpni zan khan an intihsiak a. Zan khatnaa an hla sak ni lo, Mizo hla dang pakhat chu zan hnihnaah an sa a ni.

Top 10 intihsiak hi Mualpui, Aizawla R. Dengthuama Hall-ah neih a ni tawh dawn a, sound track hmanga neih tur niin Top 5 atangin live music hmanga intihsiakna tura ruahman a ni a. Top 3 hnu lamah chuan ‘Entu ngah ber’ chu judge pakhat anga ngaih a ni tawh ang.

Top 10 intihsiak atang hian Zonet Zawlbuk channel leh Zonet YouTube channel-ah man neia en a ngai tawh dawn a, a hmunah ticket leia chhim theih a ni bawk ang.

A THIAM ZUAL 10-TE CHU:
1. Emmanuel Lalremruata, Tuikual South
2. Eunice Rosangpuii, Kolasib Venglai
3. Laldinsanga Ralte, Upper Republic
4. Lalthakima, Mamit Hmar Veng
5. Lawmsangzuali, Shillong/Tuikual North
6. Maria Lalhriatzuali, Chhinga Veng
7. Remlalvuani, Thenzawl
8. Sylvia Malsawmpuii, Champhai Vengthlang
9. Vanlalneihpuii, Chamring
10. Zomuansanga, Dawrpui Vengthar

11/10/2025

Drop Doubt-in ‘Khawngaihna’ music video buaipui mek

ZALEN, October 11, 2025: Mizo gospel progressive rock band ropui, Drop Doubt chuan rimawi thar an nei dawn a, an buaipui mek e. Hei lo liama an rimawi ngainatute tana thu lawmawm a awm chuang hauh lo vang.

Drop Doubt hian September thla tir khan Aeris Records-ah record an ti tan. Live vekin an record a. Tunah hian recording an zo vek tawh a. September 27, 2025-a recording an tihzawh chu mixing leh mastering chiah an hmabak a ni tawh mai. Hei pawh hi thil harsa a ni tawh lo va, rei lote chhungin an zo fel mai thei tawh dawn a ni.

An hla thar tur hi — Khawngaihna — tih a ni. An hla dangte ang bawkin an original tho a ni. He Mizo band-a member-te thlir pawhin original nei thei reng tur pawh an ni.

Khawngaihna — hla hi rock ballad lam rawng a kai dawn a. Mizo rilrem tur ang chi-a siam a ni a. Hla tluangtlam pangngai tak ni si, thothang tha chi tak a ni dawn a. A technical lam hawi zawng chuan tun tumah hian an hla hmasa dangte a pha lutuk lo vang a, anni pawhin chutiang chu an tum ber a ni lem lo. Tun tumah hian an manager Joe Ralte hian part a pe nghe nghe.

Drop Doubt hian tuna an buaipui mek — Khawngaihna — hi music video-a tihchhuah an tum a. A hun tur tak hi an la tichiang thei lo. Chawlhkar thar lamah shooting neih tan an tum a. An music video hmasa khawihtu RDS Shots bawk an hmang leh dawn a. Tun thla chhung hi chuan tichhuak hman turah an inngai.

MS-a (vocal), ZTPA Rokhum (guitar), Michael Rokhum (bass), John Tetea (drums) leh David Pachuau (Keyboard)-te awmna Drop Doubt hian k*min tir, January thlaa an music video — Hmangaihna — an tihchhuah hnua an single tihchhuah leh hmasak ber tur a ni.

Hetih lai hian, music video an buaipui a, album lam erawh chu tumna em em an la nei rih lo. Tun tuma an music video buaipui chhan chu, “A bul berah chuan music kan tui em emna piah lamah, music thar tihchhuah zel hi a tha kan tu a. Chubakah, pathian fak leh chawimawi kan duh vang a ni ber,” tiin Drop Doubt guitarist ZTP-a’n Zalen Thalai Khawvel a hrilh.

10/10/2025

Zaninah Top-20 intihsiak zan hnihna, Inrinni zanah result puang dawn

ZALEN October 10, 2025 : Zonet buatsaih LESDE Mizo Idol Season 8, Top 20 intihsiak zan hnihna chu zanin ah neih chhunzawm leh tur niin result hi Inrinni zan dar 8 ah puan tur a ni.

Top 20 Intihsiak zankhatna hi Ningani zan khan khan neih a ni a, content ten hla pakhat theuh an sa, zan hnihnaah pawh hian hla pakhat theuh an sa leh ang.

Top 20 atang hian Zonet Youtube, Facebook & Instagram-ah Contestant te zai, a rualin post thin a ni a, a belhkhawma entu ngah berin top 10 a tling nghal dâwn a ni.

10/10/2025

INTER VILLAGE VOLLEYBALL: Champion lai an tla, Zirtawpni tlai atangin final

ZALEN, October 10, 2025: G.I.G Motors Inter Village Volleyball Tournament 2025-ah champion lai, Khawhai Village Council chuan an nomawi an humhim zo ta lo va, Ningani zan semifinal-ah ITI Veng Local Council lakah 3-2-in an tlawm.

R. Dengthuama Hall, Mualpui, Aizawla inelna kal mek hi Zirtawpni tlaiah hmeichhe final khelin zanah final khelh zui a ni dawn.

Ningani zana mipa final luhna inkhel hmasa zawkah veng/khua anga team tha ber ang hiala chhal theih, Khawhai hian ITI Veng hi set hmasa ber hlohva a hnu set hnih la zawnin set lina leh deciding set-ah an chak zo ta lo va, 3-2 (25-22, 19-25, 15-25, 25-21, 17-15)-in an tlawm.

Semifinal hnuhnung zawkah inelna hnuhnung bera finalist leh sulhnu nei tha ber, Hunthar chuan Nursery Veng chu 3-1 (25-15, 19-25, 25-12, 25-16)-in an hneh ve thung a. Team hnih hi a hmasa set hnih an inlak chhawk hnuah set thumna leh linaah erawh tawnhriat ngah tawh zawk, Hunthar hian harsa lutuk lo ve vein an la a ni.

Mipa final-a inhmachhawn turte hi pakhat tawnhriat nei tha an ni dawn a, lehlam hi tun season kal meka hmeichhe lama Pro Volleyball League club pawh nei thar, intuaihnum mek a, k*m lamah pawh naupang tak tak an ni a. Intumtawk hle tura ngaih theih an ni.

Hmeichhe final-ah Thenzawl South leh Bungkawn an inhmachhawn dawn a. Ningania semifinal khelhah team hnih hi deciding set hmanga tlang ve ve an ni a, Thenzawl hian Thingdawl VC I lakah 2-1-a an hnufual hnuah 3-2 (25-12, 23-25, 22-25, 25-11, 15-10)-a lehthalin final an inbeng thleng.

A hnuhnung zawkah YMA volleyball champion lai leh Pro Volleyball League club nei veng, Bungkawn hian tun hma lama team tha thin, Dawrpui Vengthar chu set hmasa ber an hloh hnuah 3-2 (15-25, 25-22, 15-25, 25-18, 15-9)-in an lehthal bawk.

October 10, 2025 Zirtawpni Final
Hmeichhia (04:00 pm)
Thenzawl VC Vs Bungkawn LC

Mipa (08:00 pm)
ITI LC Vs Hunthar LC

09/10/2025

Travel Fest 2025 — Nostalgia Nite, Zirtawp zanah a hunlai a Mizo zaithiam leh lâr ber ber an zai dâwn

ZALEN October 09, 2025 : Hranghlui zaithiamte zaiin i lung a la tileng a nih a, an zai i ngaithla duh a i hmu duh a nih chuan i tan hun tha a inhawng mek e.
Mizoram Tourism department leh Mizo Zaimi Inzawmkhawm (MZI) General Headquarters tangkawp chuan, October 8-10, 2025 chhung hian Aijal Club Park-ah Mizoram Travel Fest 2025 — Nostalgia Nite — an buatsaih a, zanhnih chhung hian mipui thahnem tak pungkhawm in, naktuk zan hi a tawp zan niin hrang hlui zaithiam tâk tâk an zai dâwn a, a thlawn in a tel ve theih dawn.

Zirtawpni zana hranghlui zaithiam inlan tur te :-
Oct 10 zan zai turte:
1. C. Lalhmingmawii
2. Mimi Renthlei
3. Elizabeth Zodinpuii
4. Peter C Lalrinmawia
5. Vanlalhlana
6. Sailothangi Sailo
7. Siamthangi Hauhnar
8. Vansangkimi
9. Zosangliani
10. C Vansanga
11. Lalenkawli Pautu
12. C. Lalzahngoa IPS

09/10/2025

Model hriathlawh Zuali leh Timothy channa, ‘LASI EM NI?’ tlangzarh dawn

ZALEN, October 08, 2025: Tun laia model lar ber ber pahnih, Zuali Chhangte leh Timothy Vangchhia te channa, ‘LASI EM NI?’ chu Zirtawpni zan hian Vana Pa Hall, Aizawlah tlangzarh a ni dawn.

‘LASI EM NI?’ hi k*tchhuak hriat hlawh tak tak nei tawh, Bs Pictures k*t chhuak a ni a, a ziaktu hi a changtupa, Timothy ziah a ni a, director a ni nghal bawk a. Ani hi lemchana sulhnu tam tak nei tawh, Mizo mipa model hriat hlawh ber zinga mi a ni.

A thawnthu hi tlangval pakhatin ramhnuaia hmeichhe danglam tak a tawn dan leh a hmeichhia tawnin a nun a khawih danglam dan a ni.

A changtunu, Zuali hi Femina Miss India 2023-a Mizoram aiawha lo inlan tawh leh lemchan lama sulhnu nei tha tak a ni a, tun hnai lawkah pawh H.O.M nena an channa, ‘Hretu der’ chu tihchhuah a ni nghe nghe.

‘LASI EM NI?’ hi tlangzarh zan atangin Runmawi app-ah lei theiha nghal a ni dawn a. A hmunah ticket lei theih a ni ang a, online-a hauh theihna kalpui mek bawk niin a leite tan vanneihna siam a ni ang.

09/10/2025

Sairang Rel Station atangin Kutdawh pali leh ILP nei lova lo lut mi pali thawn let tawh

ZALEN October 9, 2025: Home Minister K. Sapdanga hovin vawiin khan Mizorama rel lo lutin nghawng a neihte thlirho a ni. Meeting-ah hian Sairang Rel Station a Inner Line Permit (ILP) pekchhuah a nih dan thlirho a ni a. Kutdawh pali leh ILP nei lova lo lut mi pali man chhuah an ni a, heng mite hi thawn let leh an nih thu report a ni.

Meeting-ah hian Rel station-ah te hian documents nei fello chunga luh ruk kawng a awm em tih te thlirho a ni a, DC leh SP Aizawl tangkawpin hetiang a thlen theih leh theih loh hi a hmunah chiang zawkin lo finfiah se tih a ni.

SP Kolasib David H. Lalthangliana chuan Kolasib District chhunga ILP pek chhuah a nih dan report a pe a. ILP pekchhuah buaipui tur hian Bairabi-ah mi 8, Hortoki-ah mi 2, Kawnpui-ah mi 2 leh Mualkhang-ah mi 2 duty dah an nih thu a sawi a. Kolasib chhunga rel station-ah bik hian ILP 38 pek chhuah a nih tawh thu a sawi a. Sairang thlenga rel service a awm hnu atangin Vairengte a ILP pek chhuah leh Inter-state sumo service chu 30%-40% vel laiin a tlahniam niin an hriat thu a sawi bawk.

Aizawl Additional SP Lalringliana Pachuau chuan Sairang Rel Station a ILP pekchhuah dan a report a. Rel station hawn tirh, 13.09.2025, atangin counter pali(4) siam a ni a. A tirah police pariat (8) duty dah niin tunah hian paruk (6) dah belh leh an ni tawh a. Ni 08.10.2025 thleng khan ILP 4,064 pek chhuah tawh an ni a. Kutdawh pali (4) leh ILP nei lova Mizoram lo lut mi pali (4) man chhuah an ni a, heng mite hi thawn let leh an ni. Hei bakah hian Sairang Zero-Point ah a khat tawkin ILP surprise checking neih thin a nih thu a sawi bawk.

Meeting hian rel station-a ILP pekchhuah mek dan leh hmasawn zel ngaihna lai te an ngaihtuah mai bakah Government Railway Police din a nih chungchang pawh an sawiho bawk a ni. Tourist ILP neite chu Tourism Department-a an in report dan tur pawh ruahmanna siam a ni bawk.

Meeting hian Home Minister leh Chief Secretary hovin Sairang rel station chu Mizorama passenger lo thlen tam ber, Guwahati – Sairang service, a lo thlen hunah tlawh ni se an ti a. A hun atan hian ni 14.10.2025 (thawhlehni) zing dar riat (8) ruat a ni.

09/10/2025

VINOO MANKAD TROPHY: Nagaland sawpin Mizo rawltharten hnehnain bul an tan

ZALEN, October 09, 2025: Mizo rawltharte chuan Vinoo Mankad Trophy-ah Nagaland sawpin hnehnain bul an tan.

Board of Control for Cricket in India (BCCI) buatsaih, an hnuaia association awmte rawlthar k*m 19 hnuai lamte inelna atana one-day cricket tournament-ah hian Mizoram hi Plate Group-ah awmin an khelh hmasak berah Naga rawltharte chu wicket riatin an hneh a ni.

Cricket Stadium, Sector-16, Chandigarh-a inkhelah hian Mizoram captain F. Lalnunkima (Valpuia) chu thumvawrah chakin vawm hmasak a thlang a, a tifuh.

Mizo bowler-te an che tha a, Nagaland batter zingah tumah run 10 siam tlintir nei lovin over 16.3-ah run 37 chauh siamin an vawm hlum kim a. Naga team tana run siam tam ber chu an captain, Aloto Somi niin ani pawhin run riat chiah a vaw chhuak a, team pum puiin boundary (4 runs) pawh vawi nga chiah an vaw chhuak bawk.

Mizoram tan hian Malsawmzela chuan over 7.3 a vawmah batter paruk vawm hlumin run 21 an vuak chhuahsak a, Rodawngzela pawhin over li a vawmah pathum vawm hlumin run khat chiah an vuak chhuahsak bawk a, Naga batter-ten an ngam lo hle.

Chak nana run mamawh tam lo tak an umnaah Mizoram opener Immanuel Lalpekhlua chuan run kua a vaw chhuak a, captain Valpuia’n thi lovin run 17 a vuak chhuak nen mi wicket hnih chauh hlohvin hnehna an chang a ni.

Vinoo Mankad Trophy-ah hian Mizo rawltharte hian Plate Group-ah hian Nagaland bakah Sikkim, Manipur, Arunchal Pradesh leh Meghalaya an awmpui a, an inkhel kual hnuah a sang pahnihin final khelin champion-in season thar (2026-27)-ah Elite Group an kai ang.

Mizoram hian Tau Devi Lal - PKL, Chandigarh-ah Sikkim an hmachhawn leh dawn a ni.

09/10/2025

Kan mikhual tam ber tur Vai te lo hlauh ngawt tur a ni lo - Chief Minister

ZALEN October 9, 2025: Mizoram Tourism leh Ministry of Tourism tangkawp buatsaih Travel Fest 2025 ni hnihna chu vawiin khan Aijal Club-ah neih chhunzawm leh a ni a, hun hmanpuitu Chief Minister Lalduhoma chuan Mizoram-in a mikhual tam ber tur Vai te lo hlauh ngawt tur a ni lo a ti.

Chief Minister chuan, "Mizoramah Tourism Industry hi nasa takin a thang chho mek a, k*m hmasa statistics atanga kan hmuh danin khualzin hi 139.50% laiin an pung a ni. Mi nuai nga leh singhnih chuang an rawn zin a, kan ram mipui zatve deuh thaw a ni. Rel lo lut hian nasa lehzualin a ti pung ngeiin a rinawm."

"Chuvang chuan mipuite hi mikhual nei thiam, hnam dangte khawsakpui thiam kan nih a ngai. Kan ramah hnam dangte ngaihngam takin an rawn zin thei tur a ni. Zo nun ze mawi, tlawmngaihna leh rinawmna, hawihhawmnate kan lo chawi nun thiam chuan sum leh paiah chauh hlawkpui lovin kan ram leh hnam hi a lo par vul tel dawn a ni."

"Mikhual lo kal tam ber turte hi Vai kan tih mai, kan Indian-puite an ni dawn a. Tumah hi lo hlauh ngawt tur an ni lo, lo hmuhsit tur pawh an ni hek lo. Dan ang taka rawn zin, an haw a huna haw ve leh mai tur an ni a. Kan rama sum leh pai an rawn thlauh kha kan tan a tha em em a ni."

"Hma kan sawn zel theih nana kan mamawh dik tak hriat zel a tul a, hmalakna tur dik takah zel k*t hi thlak chat chat ila, kan resource neih ang angte hlawk takin kan hmang thei ang. Chumi atana tangkai Mizoram Travel Fest 2025 kan buatsaih hi a hlu a. A ngaihtuah chhuaktu kan Minister leh a thawhpuite chungah lawmthu ka sawi a ni," a ti.

Lalnghinglova Hmar, Tourism Minister chuan kal khawmte lawmna thu a sawi a, Tourism hmasawnna tura sorkar hmachhawpte a tarlang. Tourism department leh EF&CC te chuan Eco-Tourism kalpuina tur inremna (MoU) an ziak bawk.

09/10/2025

Mizo rawltharten BWF World Junior C’ship semifinal-ah India luhpui

ZALEN, October 09, 2025: Guwahati, Assam-a Badminton World Federation (BWF) World Junior Championship 2025 khelh mekah Mizo rawlthar, C.Lalramsanga chuan team event-ah India chu semifinal a luhpui.

India team hian Ninganiah South Korea hnehin a thiam pariat zingah an tel a, Zirtawpni hian Indonesia nen final luh inchuhin an khel ang.

Quarterfinal-ah hian Durtlang, Aizawl rawlthar, Ramsanga hian mixed doubles-ah vawi thum leh men’s doubles-ah vawi hnih khelin India chakna kawngah tha thawh hlawk ber zinga mi a ni.

India team-ah hian Ramsanga bakah H. Lalthazuala, Chanmari West, Aizawl chu men's singles khelin a tel bawk a. Quarterfinal an luh theih nan ani pawhin a thawh hlawk hle bawk.

Mizo rawlthar telna India team hi Seeded No. 2 niin group pariat thenah Group H-ah Hongkong, China, Nepal leh Ghana te nen an awmho va, an groupa sang berin quarter final an lut a. Semifinal an invaw thleng leh ta a ni.

Suhandinata Cup tia hriat lar, World Junior Championship-a team inelna hi tun kar chhung khelh tur a ni a, karlehah mi mal inelna a awm zui dawn a. National Centre of Excellence-ah khelh niin Thazuala leh Ramsanga te thian dun hi India aiawha hmarchhak atangin tel phak awm chhun an ni.

09/10/2025

Sairang rel station atangin ILP 3,852 pe chhuak tawh
ZALEN Oct 8, 2025 : Rel station hawn a nih tuk September ni 14, 2025 atanga October ni 7, 2025 thlengin ILP 3,852 pekchhuah tawh a ni a, k*tdawh thawn kir mi 6 an awm tawh.

Vawiin Aizawl press club a thuthar thehdarhtute an kawmnaah he thu hi sawiin Mizo Zirlai Pawl (MZP) president, Dr. C Lalremruata chuan, October ni 8, 2025 khan Sairang Rel station an tlawh tih sawiin, ILP pek chhuah dan an zirchian bakah a hmunhmate an enfiah tih a sawi.

MZP president sawi danin, ni khat chhunga ILP pek chhuah tam ber tum in mi 360 niin, pek chhuah tlem ber tum in mi 46 hnenah pek an ni a, Guwahati atanga Rel ticket Sairang thleng a full reng laia, ILP pek chhuah tlem lutuk hi MZP chuan mak a ti a, hei hian ILP nei lo a bi bo tam tak an awm tih chiang takin a lantir. MZP ten he station an tlawh lai pawhin ILP neilo a a ruk a chhuah tum mi 30 vel an man chhuak nghe nghe.

MZP president chuan Mizoram a hnamdang lo lut te hi tourist ang veka ILP pek an ni a, an lut lam chhinchhiah ni mahse an haw lam chiang taka chhinchhiah a ni lo tih sawi bawkin, hei hian Mizoramah awlsam taka luhna atan mi tam takin an hmang dawn tih a chiang a, cham hlen ta pawh tam tak an awm dawn tih a chiang niin a sawi.

MZP in Sairang Rel statioin a zirchianna dinhmun tlangpui :
1. ILP check leh pe chhuaktu Mizoram police duty an indaih lo hle.
2. ILP pekchhuah hi manual a tih vek a nih avangin a la felfai tawk lo hle.
3. CCTV engmah vuah a la awm lo.
4. Gate mumal tak siam a la ni lo.
5. Fencing a tha tawk lo.
6. X-Ray baggage scanner khawl pawh hman theih a la ni lo.
7. Mizoram hi dry state a nih angin, Excise & Narcotics duty dah an ni lo bawk.
8. Parking area a fel fai lo.

Zalên News

11/10/2025

11/10/2025

11/10/2025

10/10/2025

10/10/2025

09/10/2025

09/10/2025

09/10/2025

09/10/2025

09/10/2025

09/10/2025

09/10/2025

Address

Telephone

Website

Alerts

Contact The Business

Shortcuts

Share

Category