http://lamtluangnews.blogspot.in/

Lamtluang, Aizawl (2026)

10/09/2026

Chief Minister-in Ruihhlo dona lama hman tur Bolero Camper pe
Aizawl the 10th September 2026: Vawiin khan Chief Minister Pu Lalduhoma chuan a office tualah Serchhip District Excise & Narcotic Office-in ruihhlo dona lama a tul apianga an hman atan Bolero Camper a pe a. Excise & Narcotics Department Commissioner Pu Z. Lalhmangaiha chuan a dawng a ni.

Pu Z. Lalhmangaiha chuan Chief Minister chungah lawmthu sawiin, Serchhip district office tan a tangkai hle dawn a ni, a ti.

Source: DIPR Mizoram

10/09/2026

Dan phalloh thil man chungchanga Mizoram Police Press Statement

Aizawl the 10th September, 2026:

DAN PHALLOH THILTE MAN A NI

Ni 09.09.2026 khan Champhai PS team-te chuan Chalbawia Junction, Khankawn Police Checkgate-ah random checking neiin Maxi cab pakhata chuang passenger pakhat, Hrang Thawm Hnim (39), Sathmuhzung, Myanmar nia inchhal k*t aṭangin Methamphetamine ni ngeia hriat gram 994 a rit, cheng 7,952,000/- (vel) man hu chu an man sak.
Ni 09.09.2026 khan Champhai PS team, Chalbawia Junction, Khankawn Police Checkgate-a duty-te chuan Zokhawthar aṭanga Aizawl pan lirthei pakhata chuang passenger mipa pahnih, Awngminnine (19), Falam leh Bawithawng (18), Mangkheng, Falam nia inchhal te k*t aṭangin he**in nia rinhlelh gram 141, Rs 28,20,000/- vel man hu chu an man sak.
Ni 09.09.2026 bawk khan Champhai Police, Chalbawia Junction Khankawn Police Checkgate-a duty-te chuan lirthei (Truck) B/R No. MZ-04/A- 6929 aṭangin kuhva ro, Kg 3360 (bag 42) an man bawk. Thil man takte hi dan lova Myanmar aṭanga lak luh nia rin niin, hmun danga phurh phalna permit te, sumdawnna phalna license te leh lehkha pawimawh dang engmah an neilo a ni.
Ni 08.09.2026 khan Saitual District Police Special Team-te chuan Kualmawi, Keifang-ah random checking neiin Chinzalian (26) Rangoon, Myanmar (P/A Champhai Dinthar) leh Thiankhatmuanga (27) Rangoon, Myanmar (P/A Champhai Bethel) nia inchhalte k*t aṭangin Methamphetamine nia rinhlelh Kg 12.746, cheng 10,19,68,000/- man hu vel chu an man sak bawk.
Ni 07.09.2026 khan Kolasib District Police, Phaisen Police Check Gate-a duty-te chuan Aizawl aṭanga Karimganj pan lirthei Mahindra Scorpio (ML-04-E- 3839) pakhat chu ringhlelin an lo tiding a. An dap hnuin Methamphetamine ni ngeia hriat Kg 3.910, cheng vb 3.2 vel man hu chu hmuchhuakin an man sak. Guljar Hussain (23), Fatepur Pt-1, Karimganj, Assam nia inchhal chu man a ni.

Source: DIPR Mizoram

09/09/2026

Minister of State Prof. Lalnilawma’n Entrepreneur Awareness & Special Vendor Development Programme a hman pui

Dated Aizawl, the 09 September 2026: Vawiin khan Minister of State leh Rural Development& Administration Department changtu Minister ni bawk Prof. Lalnilawma chuan I&PR Conference Hall, Treasury Square-ah Ministry of Micro, Small and Medium Enterprise leh PHD, Chamber of Commerce & Industry Govt. of Mizoramte tangkawp buatsaih Entrepreneur Awareness & Special Vendor Development Programme chu khuallian niin a hmanpui.

He hunah hian khuallian Minister of State leh RD&A Minister ni bawk Prof. lalnilawma chuan thusawiin, a mamawhtu takte nen hun hmanga NSCST Hub chungchang inhrilhhriatna hun buatsaih a ni chu a lawmawm a tih thu a sawi a. Khawvel thang zelah entrepreneurship chu India ram leh Mizorama ngei pawh thil thang duang tak, a bikin Sawrkar inrelbawlna kawnga pawimawh tak leh thalaite cho phurna hmanraw pawimawh ber pakhat a ni tih sawiin, National SCST Hub chu Chumi kaihhnawihah thil tangkai ber pakhat a ni a ti a. He hub-in a a ken tel entrepreneurship kaihhnawih scheme hrang hrangte chu hmang tangkai ve tura kalkhawmte chu fuihin, khawvel hmun dang ang bawkin Mizoramah pawh thalaite chu hna zawngtu chauh ni mai lo va, midangte tana eizawnna siamsaktu nih tum zawk turin a chah a. Ni khat chauh awh mahse, Workshop chu tangkai taka hmang a, Entrepreneurship-a mi hlawhtling tak takte leh Mithiam zawkte atangin a tam thei ang ber zir chhuak turin Minister chuan kalkhawmte chu duhsakna a hlan nghal a ni.

NATIONAL SCHEDULED CASTE & SCHEDULED TRIBE HUB hi Sawrkar laipui chuan k*m 2016 October thla khan, Ministry of MSME hnuaiah, ram chhunga ST leh sc, entrepreneurship lama tuite tan a lo din a. Vawiin thleng hian website hi Sawrkar leh mimal ang pawhin an hmang nasa hle a ni.

Vawiina hun hman hi Pu A Tovi Chophi, hmarchhak bial PHDCCI Chairman, chuan kaihruaiin, kalkhawmte a lo lawm a. NSSH Scheme chungchang tarlanna lemchan tawite thlirho a nih nuah, Pu Siba Barua, In-Charge, NSSH, NSIC chuan NSSH chungchang a sawifiah a. Hemi zawh hian Mithiam sawm bik ten thupui hrang hrang: GeM, Public Procurement Policy (PPP) bakah Banking Support leh a dang dangte hmangin kalkhawmte chu an zirtir a. Hun hman chhung zawng hian a hmunah, a duh apiang tan Udyam / GeM-a in-register-na chu kalpui pah reng a ni a. Meghmala Choudhury, Assistant Resident Director & I/C NER Chapter PHD Chamber of Commerce and Industry chuan lawmthu sawiin hun hi a khar a ni.

Source: DIPR Mizoram

09/09/2026

New Delhi-ah International Literacy Day 2026 hman a ni; Mizoram Education Minister Dr. Vanlalthlana'n Guest of Honour niin thu a sawi

9th September, 2026: September ni 8 khan k*m 2026 International Literacy Day lawmna chu Dr Ambedkar International Centre (DAIC), New Delhi-ah neih a ni a. He hun hi Union Minister of State for Education Pu Jayant Chaudhary-a uapna hnuaia hman niin, fully literate-a inpuang tawh state leh UT Education Minister-te chu Khual Zahawm tura sawm an nih angin, Mizoram Education Minister Dr. Vanlalthlana chuan he hun hi Khual Zahawm niin a hmanpui.

Mizoram Education Minister chuan thu sawiin, Mizorama ziak leh chhiar thiam an tam theih nana Mizoram Sawrkar hmalakna leh dinhmun tlangpui a tar lang.

Dr Vanlalthlana chuan Mizoram chu India rama Fully Literate State-a inpuang hmasa ber a nih thu sawiin, Periodic Labour Force Survey Annual Report thar ber tar lan danin Mizoram literacy rate chu 99.8% a tling tawh tih a sawi a. Ziak leh chhiar thiam tam ber a nihna chu k*m 2027 chhiarpuiah chhunzawm zel tumin Mizoram Sawrkar chuan hma a la reng a ni a ti a. Hemi atan hian state sawrkar scheme Rapid Action for Eradication of Residual Illiteracy Project (RAERIP) leh Central scheme ULLAS (Understanding Lifelong Learning for All in Society) kal tlangin hma lak chhoh mek a ni a ti.

India ram state zinga ziak leh chhiar thiam tam ber a nih theih nana Mizoram Sawrkar hmalakna hlawhtlinna tur hian kohhran, tlawmngai pawl hrang hrang bakah zirtirtute leh zirlaiten an thawh hlawk hle tih a sawi a. NEP 2020 zulzuiin Critical Life Skills and Occupational Skill Development Programme hnuaiah thiamna chi hrang hrang zirtir ṭhin a nih thu sawiin, k*m 2026 thlengin training chhuak mi 634 an awm tawh tih a sawi bawk.

K*mina International Literacy Day vawi 60 tlinna hi ‘Literacy for people, the planet and prosperity’ tih thupui hmanga khawvel puma hman a ni.

Education Minister Dr Vanlalthlana hi SCERT Director Pi Carolyn Zoramthangi, School Education Joint Director Pi NG Fanchun, Samagra Shiksha State Project Director Pu C. Lalthanzira leh State Centre for Literacy Nodal Officer Pi Lianhlupuii ten an ṭawiawm a ni.

Source: DIPR Mizoram

09/09/2026

Minister Pu Lalnghinglova Hmar leh Union Labour & Sports Minister inkawm

New Delhi, the 9th of September, 2026: New Delhi-a cham mek Minister of State Pu Lalnghinglova Hmar leh sorkar laipuia Labour & Employment leh Sports Minister Dr. Mansukh Mandaviya-te chu September 8, 2026 khan New Delhi-a Dr Mansukh Mandaviya chenna inah an inkawm.

LESDE Minister Pu Lalnghinglova Hmar chuan Mizoramah labour-te hamthatna tur zawnga sorkar laipui rawtna chak taka bawhzui a nih mek dan te, Mizoram Building and Other Construction Workers Welfare Board-a inziak lut an pun chak dan leh an hamṭhatna tura ruahmanna thar siam a nih dante Union Labour Minister hi a hrilh.

LESDE Minister chuan tun hnaiah nasa takin Employees' State Insurance Corporation (ESIC) hnuaiah registration a pun thu leh, hmuh theiha hmasawnna a awm thu hrilhin, "Mihring cheng kan tlem avangin ESIC Hospital din tura tehnaah Mizoram tan tlin a harsa a, a mihring inziak lutin kan tlin chiah lo chung hian kan hmasawnna enin ESIC Hospital din dan min ngaihtuahsak rawh," tiin a ngen.

Union Labour Minister Dr. Mansukh chuan LESDE Minister ngenna hi tihhlawhtlin a tum thu leh ESIC meeting awm leh hunah hospital pek tum a nih thuin a lo chhang a, Mizorama labour welfare chungchanga hmalakna leh hmasawnna chu Delhi aṭanga an lo hriat thute a sawi bawk.

Sports and Youth Services Minister ni bawk Pu Lalnghinglova Hmar chuan Khelo India hnuaia sorkar laipuiin sum ṭhahnem zawk a neih tak avanga Mizorama sports infrastructure dinna tura ruahmanna siamte Union Sports Minister hnenah hian a thehlut bawk a, Khelo India fund hman theih a nih hunah Mizoram chu ngaih pawimawh hmasak zingah an telh dawn tih Union Sports Minister chuan a lo hrilh a ni.

Mizoram Sports Minister hi September 8 tlaia Asian Games-a tel tur infiammite thlahna, New Delhi-a neihah a tel bawk a ni.

Source: DIPR Mizoram

08/09/2026

Khawzawl DC-in PwD leh k*m upa te puala buatsaih Assessment Camp tlawh

Dated Khawzawl, the 8th September, 2026 : Khawzawl DC Office leh Artificial Limbs Manufacturing Corporation of India (ALIMCO) tangkawp chuan PwD leh k*m upa lam te pualin Assessment Camp an buatsaih mek a. Khawzawl DC Pu K. Vanlalthiana chuan vawiina he camp neihna District Hospital, Khawzawl District chu a tlawh a, ALIMCO lama thawktu te leh doctor te nen an inkawm a. DC hian District Hospital sak mek chu a hmunah a enfiah nghal bawk a ni.

He Assessment Camp hi taksa-a harsatna awmte chhawk zangkhai thei tur hmanrua hrang hrang dilna a ni a. District Hospital, Khawzawl District, Rabung PHC, Kawlkulh PHC, Khawhai PHC leh Sialhawk PHC ah te buatsaih a ni dawn a ni.

Source: DIPR Mizoram

08/09/2026

ADVISER TO CM PU TBC LALVENCHHUNGA’N COMBINED CIVIL SERVICE OFFICERS TE BASIC FOUNDATION TRAINING A HAWNG

Aizawl, ni 8 September, 2026: Vawiin khan Pu TBC Lalvenchhunga, Adviser to CM (Finance & Planning) chuan Administrative Training Institute (ATI), Training Hall- ah Combined Civil Service Officers thar 34 te tana buatsaih Basic Foundation Training Course a hawng. He Training hi ni 8 September atanga ni 30 October, 2026 thleng neih tur a ni a. Riak lutin (Residential) kalpui a ni ang.

Pu TBC Lalvenchhunga chuan, officer tharte chu an kal zelna turah duhsakna a hlan a. Induhsakna (favouritism) vanga tling ni lovin, in phu vanga tling in ni a, in chhuanawm hle a. Amaherawh chu, officer tlin hi a tawpna ni lovin, a bul tanna zawk a ni. In thutna tur office pawh nangmahni ta ni lovin mipui ta a ni zawk a. A lalna lai nuam ti a, mawhphurhna hlamchhiah si in nih chuan officer hlawhchham in ni dawn a ni.

"Sorkar hnathawkte hi sorkar khawl nghet in ni a, democracy-ah in pawimawh em em a, danglamna thlentu tur in ni. File in khawih pawhin 'file phena mihring (nunna) awm' kha ngaihtuah thleng phak zel rawh u. Thlemna hrang hrang in la tawk dawn a, chutiang hunah chuan, 'Dan chhungah a awm em?' tiin inzawt thin ula, dik ngam ang che u.

Officer zingah mahni ram hrechiang lo an awm thin tih tarlangin, ram chhunga zin chhuak tam tur leh kan lui te, kan ram awm dan te, hnam hrang hrang chengte leh an eizawnnate chena hrechiang turin a chah a. Mahni thawhna ram hre chiang lo Officer nih hi a zahthlak a ni, a ti.

Digital lama hmasawnnain awlsamna tam tak min pek rualin Artificial Intelligence rin leh lutuk a him lo tih sawiin, AI in a thlak (replace) theih turin awm suh u, a ti bawk.

Department-centric official te, service-centric officials-te vangin sorkarin harsatna a tawk thin a, mipui dah pawimawh ber (citizen-centric) ula. In career hi chu in thil tih, in result leh in thawhchhuah (delivery) atanga teh ni zawk rawh se, chu chu in hnuhma (legacy) tur a ni. He Basic Foundation Training pawh hi service hrang hrangte inkara inpawhna leh thawhhona tha thlentu ni ngei rawh se, a ti a ni.

A hawnna inkhawm hi Pi Lalrimawii Hmar, Joint Director (Trg.), ATI chuan a kaihruai a. Pi Rita Lalnunmawii Pachuau, Director, ATI pawhin thu sawiin, an training kalpui dan tur chu tawnhriat (experience) behchhana buatsaih a ni a ti a. Dan (rules) ringawt zir lo va, hnathawhna hmuna hman tangkai tur 'soft skills' ngaih pawimawh a nih tur thu a tarlang. Service hrang hrangte riak luta an training chuan inpawhna tha zawk a hring chhuak dawn tih a sawi a. Combined Civil Service-a tlingte chu a ruala training vek theih dan tur an ngaihtuah mek thu leh 'Smart ATI' a an hmalakna sawrkarin a tih hlawhtlinsak avanga an lawmthu a sawi a ni.

Inkhawm hi Pi Lalnunmawii Varte, Core Faculty, ATI chuan lawmthu sawiin a khar a ni.

Source: DIPR Mizoram

07/09/2026

Sports Minister Pu Lalnghinglova Hmar-in MHIP Golden Jubilee hmanpui

Dated Aizawl, the 7th of September, 2026: Vawiin khan Sports Minister leh Bialtu MLA ni bawk Pu Lalnghinglova Hmar chuan Mizo Hmeichhe Insuihkhawm Pawl (MHIP) Vaivakawn Branch, Golden Jubilee lawmna, Cultural Centre-cum-Auditorium, Aizawl-a neih chu khuallian niin a hmanpui a. Minister hian jubilee pual souvenir tlangzarh nghalin, MHIP Vaivakawn branch-te chu Jubilee puala mi harsa zawkte hnena hlan tur lawmpuina thilpek a hlan bawk.

He hunah hian Khuallian Sports Minister Pu Lalnghinglova Hmar chuan thu sawiin, tunlai dinhmunah inchhung atanga khawtlang leh ram pum nghawng theitu chu nute chauh an nih thu leh an pawimawhziate a sawi a.K*m 50 dang lo awm leh tura hma an sawn dan tur ngaihtuah chungin nute chuan tan la thar a, ram leh khawtlanga harsatna hrang hrangte siam that kawngah anmahni chu bultanna tur an ni tih a sawi a. Nu kalkhawmte chu faten an thlakhlelh chhungkaw nuam siam tuma, inchhungkhur uap theuh turin a chah bawk.

Minister hian nu kalkhawmte chu fuihin, pianpun kawngah te, fate hnena zo nunmawi hrang hrang zirtir kawngahte tanlak a tul hle tih a sawi a. Mizoram chuan nu tha a mamawhin jubilee chuan chu ngei chu hring chhuak se a duh thu a sawi bawk.

Jubilee lawmna inkhawm hi MHIP Vaivakawn Branch President Pi H.Lalawmpuii chuan kaihruaiin, Pi Ramdinliani, Secretary hnen atangin report ngaihthlak a ni a. AMC Corporator Pu Vanlalhruaia chuan MHIP Golden Jubilee pual hian MHIP In a hawng a. Jubilee pual vek hian MHIP Vaivakawn branch chuan an branch huamchhunga K*m 80 chinte hnenah thilpek an hlan a. Pi C. Lalawmpuii, Financial Secretary chuan lawmthu sawiin hun hi a khar a ni.

Source: DIPR Mizoram

07/09/2026

MIZORAM CHHUNGA BUHFAI DINHMUN MIPUITE HNENA HRIATTIRNA

Aizawl the 7th September, 2026: Tunhnai ruahsur nasain Rel kawng a tihchhiat avangin Mizoram chhungah bungraw chawkluh khaihlak deuh chungchangah mi thenkhatin buhfaiah harsatna tawh mai an hlau tih thuthang a awm a. Hei hi FCS&CS department chuan tun dinhmunah chuan buhfai stock a tam tawk a ni tih mipui-te a hriattir.

Tun dinhmuna Mizoram chhunga buhfai stock zat chu hetiang hi a ni (as on dt.04.09.2026):-

Mizoram chhunga FCI Godown hrang hrangah - 1,95,345.10 qtls.
Mizoram chhunga Supply Godown hrang hrangah - 1,34,430.93 qtls.
A vaiin - 3,29,776.03 qtls.
Tun dinhmuna FCS&CA department-in thlakhata ration buhfai a sem chhuah thin chu 97000.00 qtls. vel a ni a, tuna stock neih sa hian Thlathum (3 months) mamawh aia tam a daih a ni.

Chuvangin buhfaiah chuan mipui-te thlaphanna tur a awm Io a ni tih an hriattir.

Source: DIPR Mizoram

07/09/2026

Chief Minister-in Administrative Training Institute Smart Apps, Smart Classroom leh Digital Learning Laboratory te hawng

Aizawl the 7th September 2026: Vawiin khan Chief Minister Pu Lalduhoma chuan Administrative Training Institute (ATI) ah, ATI office application thar Smart ATI App te, Smart Classroom leh Digital Learning Laboratory-te a hawng.

A hawnna thu sawiin Chief Minister chuan, Internet hmang tangkai zawnga hmalakna kan uar chho zel a. Digital lama hmasawnnain khawvel min tuam lai a ni a, awlsamna tam tak min thlen mek a. Keini pawhin kan hman uar tial tial hi a tul a ni. Ka mimal vision-ah phei chuan Mizoram hi Digital State-a siam ka duh a, ka tum bawk a ni.

Digital State ni tur hian a hranpa takin Mission emaw Scheme emaw nei rih lo mah ila, thil tih theih niin ka hria a. Mipui kan la tlem a, ziak leh chhiar thiam kan tam a. Nih theihna remchang kan ngah a ni. Kan sorkar hnua ICT Department kaltlanga portal thar kan siam hi, siam zawh tawh kan hman mek portal 19, hman mai theiha zawh fel thawkhat tawh 4, siam mek 7, hmalak mekna 6, an vaiin portal 36 kan nei tawh a. Firm dang nena kan siam zawng zawngte nen phei chuan a tam ve tawh viau ang. e-office kan kalpui mek hi office zawng zawngah hmang bawk ila, kan fel deuh duak mai dawn a ni.

Heng service delivery system tharte hi a taka hmang turin a thawktute lam kha kan lo tahhriam ve zel a lo ngai leh a. Chu hna chu ATI mawhphurhna pawimawh tak zinga mi a ni. Group A atanga Group C thlengin, Training chi hrang hrang in pe a. A lut tharte tana training te, a thawk mekte tana training-te bakah tunlai thiamna thar hman dan thlengin training in pe a. He Institute hi a that poh leh kan trainee ten an hlawkpui dawn tihna a ni.

Sorkar hnathawkte capacity building hi kan ngaipawimawh tial tial dawn a. Chu hna kan thawhna hmun chu ATI hi a nih avangin Institute changkang tak nihtir a, Technology thar ber ber hmanga thuam chhoh zel hi kan tum tlat a ni, a ti.

Khualzahawm Pu TBC Lalvenchhunga, Adviser to CM leh Pu Vanlaldina Fanai, Commissioner & Secretary to CM te pawhin thu an sawi bawk.

Technical Report hi Pu Isaac Zothanpuia, Project Manager, MSeGS chuan a pe a. Vawiina digital service thar hawnte hi ATI Training Programme-te hmuh theihna, Registration tih theihna leh Training chungchang Information an dawnna tur platform a ni a. He App atang hian Course Material leh Training Certificate-te pawh pek a ni tawh dawn a. Training Catalogue, Course Information, Eligibility, Application Status, Notification, Attendance leh Training History thlengin digital-a vawn leh enkawl vekna tur a ni. User-ten an Bio-data leh Service Details vawikhat an register tawh chuan an hmang nawn zel thei tawh ang.

Mission Karmayogi kalphung angin Digital Learning Laboratory (DLL) pawh DoPT atanga sum hmuh Rs. 67.19 lakh hmangin din a ni tawh a. ATI Officer leh Faculty-ten Mizo tawng ngatin Training Course 6 lai in record tawh a.DoPT lam pawhin rawn pawmpui tawh a, iGOT Karmayogi portal-ah onboard vek tawh a ni.

Dr. YLN Reddy, IAS, Secretary, DP & AR (GG & TW) chuan kal khawmte lawmna thu a sawi a, Pi Rita Lalnunmawii Pachuau, Director, ATI chuan lawmthu sawiin inkhawm a khar a ni.

Source: DIPR Mizoram

Lamtluang

10/09/2026

10/09/2026

09/09/2026

09/09/2026

09/09/2026

08/09/2026

08/09/2026

07/09/2026

07/09/2026

07/09/2026

Address

Website

Alerts

Contact The Business

Shortcuts

Share

Category

Listing takedown request