16/09/2025
Paul Scholes pawh a ngawi thei ta bik lo!
Manchester United legend Paul Scholes chuan nipui bazarah khan an mamawh ni loin an mit-it zawng player an lei ringawt niah a ngai a, coach Ruben Amorim-a duh ber 3-4-3 formation chu a ngaina ve lo bawk.
Man United hian 1992-93 season hnua season bul an tan chhiat ber tum an tawng mek. Premier League match li an khelh tawh atangin point li chauh an la hmu!
Pound maktaduai 200 bawr sengin Matheus Cunha, Bryan Mbeumo leh Benjamin Sesko te an lei a, hmatawng pathum lei thar mah se league goal vawi li chiah an la khung, heng zinga goal hnih chu an khingpui ten anmahni lama an tihluh palh a ni.
Goal hnih chiah an la khung pangngai tihna a ni a, pakhat zawk hi Bruno Fernandes-a'n penalty atanga a khung a la ni zui.
Scholes chuan, "Midfield-ah tu pawh lut se an inman lo vek ni berin ka hria, hei hi buaina chhan lian tak niah kei chuan ka ngai hmiah. Tuna bazar danah kha chuan hmasawnna tur lam a awm lo.
"Midfielder tha, a lai atanga ball sem bakah inkhel thunun thei, a hun inkhel ti muang a ti rang thei, hemi mi hi Man United mamawh chu a ni zawk.
"Midfielder bakah Goalkeeper chu chinfel ngai a ni bawk. Gianluigi Donnarumma lak theih a nih laia lak loh kha thil tihsual lian tak a ni, bazar hun hman dan kha a dik lo.
"Forward lei chu a pawimawh tho, chutihrualin sum tam taka forward pathum lei kha Man United mamawh a ni ber pawhin ka hre lo," tiin a sawi.
Arsenal leh Liverpool ten tlarhnung an remphui hnuah striker an zawng a, anni boruakah hian Manchetser United hian an mamawh ni lem lo striker an lo buaipui ve chiam niin a ngaih theih bawk.
Kar tawpah Chelsea an hmachhawn leh dawn, an tlawm leh a nih chuan Amorim dinhmun pawh a nghing mai thei a ni.
