19/10/2025
'ടിആർഎ ഭക്ഷ്യ നീതി: എവിടെയും മായമില്ലാത്ത ഭക്ഷണം മനുഷ്യരുടെ അവകാശം'
ഭക്ഷണം പങ്കുവെക്കുകയും പാഴാക്കാതിരിക്കുകയും വേണം: ബിഷപ് ഡോ. ജയിംസ് റാഫേൽ ആനാപറമ്പിൽ
ആലപ്പുഴ: ഭക്ഷണം പങ്കുവെക്കുകയും പാഴാക്കാതിരിക്കുകയുമാണ് മനുഷ്യർ നിർബന്ധമായും ചെയ്യേണ്ടതെന്നു ആലപ്പുഴ ബിഷപ് ഡോ. ജയിംസ് റാഫേൽ ആനാപറമ്പിൽ.
തത്തംപള്ളി റസിഡന്റ്സ് അസോസിയേഷന്റെ 'ടിആർഎ ഭക്ഷ്യ നീതി: എവിടെയും മായമില്ലാത്ത ഭക്ഷണം മനുഷ്യരുടെ അവകാശം' പ്രചാരണത്തിന് ടിആർഎ 3-ൽ ഔപചാരിക തുടക്കം കുറിച്ചു സംസാരിക്കുകയായിരുന്നു ബിഷപ്.
ദൈവം അനുഗ്രഹിച്ച ആഹാരം മറ്റുള്ളവരുമായി പങ്കുവെക്കുമ്പോഴാണ് അതിന്റെ യഥാർത്ഥ മൂല്യം നിറവേറുന്നത്. ഭക്ഷണം ദൈവത്തിന്റെ അനുഗ്രഹമാണ്. നന്ദിയോടെ, നിയന്ത്രണത്തോടെ, മറ്റുള്ളവരോടു പങ്കുവെച്ച് ജീവിക്കുക എന്നതാണ് ബൈബിളിന്റെ പ്രധാന സന്ദേശമെന്ന് ബിഷപ് ചൂണ്ടിക്കാട്ടി.
മായം ചേർക്കാത്ത ഭക്ഷണം എന്ന ആശയം, എല്ലാ മനുഷ്യർക്കും ആരോഗ്യകരവും മലിനമാകാത്തതുമായ ഭക്ഷണത്തിന്റെ പ്രാധാന്യം ഊന്നിപ്പറയുന്നുവെന്നും അതിനായി സർക്കാർ, സർക്കാറിതര സ്ഥാപനങ്ങളുടെ സേവനങ്ങൾ കൃത്യമാക്കാനുള്ള ജനകീയ ശ്രമമാണിതെന്നും ടിആർഎ പ്രസിഡന്റ്‌ തോമസ് മത്തായി കരിക്കംപള്ളിൽ വിശദീകരിച്ചു.
ടിആർഎയുടെ ലാൻഡ്മാർക്കായ കോർത്തശേരി കുരിശടി (ടിആർഎ 62എ) പരിസരം പ്രയോജനപ്രദമായി നിലനിർത്തുന്നതിന് 'ടിആർഎ - കോർത്തശേരി കുരിശടി പ്രാർത്ഥനയും ഭക്ഷണവും: ഉള്ളവർ സമർപ്പിക്കുക,
ഇല്ലാത്തവർ വിനിയോഗിക്കുക'
എന്ന ആശയം നടപ്പിലാക്കി
ക്കൊണ്ടിരിക്കുന്നതിനോട് ചേർന്നാണ് 'ഭക്ഷ്യ നീതി' കാമ്പയിൻ.
പെട്ടെന്ന് കേടാകാത്ത ഭക്ഷ്യ വിഭവങ്ങൾ പ്രാർത്ഥനാപൂർവം നേർച്ചയായി സമർപ്പിക്കുകയും അത്‌ വേണ്ടവർ ആവശ്യാനുസരണം സൗജന്യമായി എടുത്ത് ഉപയോഗിക്കുകയും ചെയ്യുക എന്നുള്ളതാണ് 'പ്രാർത്ഥനയും ഭക്ഷണവും' പദ്ധതി ലക്ഷ്യമാക്കുന്നതെന്ന് സെക്രട്ടറി എം.ജെ. മാത്യു എടുത്തു കാട്ടി.
ഭക്തിയും വിശ്വാസവും ജീവകാരുണ്യപരമാക്കി മാറ്റാനുള്ള ശ്രമം കൂടിയാണിത്.
മനുഷ്യരുടെ വിശപ്പ് ശമിപ്പിക്കാനുള്ള ഭക്ഷണ വിഭവങ്ങൾ നേർച്ചയായി തുടരെ എത്തുമ്പോൾ ഒരു പ്രദേശത്തെ വിവിധ മതസ്ഥർക്ക് കൂടുതൽ ഉപകാരവും ആശ്വാസവുമായി മാറിയേക്കാവുന്ന പദ്ധതിയായി മാറുമെന്നാണ് വിശ്വാസം. ജീവിതത്തിൽ സംതൃപ്തി നിറയ്ക്കുന്ന ഒരു ഏർപ്പാട്.
ആരോഗ്യകരമായ ഭക്ഷണം എല്ലാവർക്കും അവകാശം എന്നതാണ് ഈ വിധത്തിലുള്ള പ്രചാരണങ്ങൾ കൊണ്ട് ടിആർഎ ലക്ഷ്യമാക്കുന്നത്.
ഫോട്ടോസ്:
1. ആലപ്പുഴ ബിഷപ് ഡോ. ജയിംസ് റാഫേൽ ആനാപറമ്പിൽ 'ടിആർഎ ഭക്ഷ്യ നീതി' കാമ്പയിന് തുടക്കം കുറിക്കുന്നു.
2. 'ടിആർഎ ഭക്ഷ്യ നീതി: എവിടെയും മായമില്ലാത്ത ഭക്ഷണം മനുഷ്യരുടെ അവകാശം' പോസ്റ്റർ.
19.10.2025
