08/10/2026
മൂർഖൻ പാമ്പിന്റെ കടിയേറ്റിട്ടും ജീവൻ പണയം വെച്ച് വീട്ടുകാരുടെ രക്ഷകയായി വളർത്തുനായ. ചങ്ങനാശേരി കാക്കാംതോട് കൊല്ലശേരിൽ കെ.എം. ടോണിയുടെ വീട്ടിലെ നാല് വയസ്സുള്ള 'റോസി' എന്ന ഗോൾഡൻ റിട്രീവർ ഇനത്തിൽപെട്ട വളർത്തുനായയാണ് സ്വന്തം ജീവൻ നോക്കാതെ യജമാനന്റെ കുടുംബത്തിന് കാവലായത്. വീട്ടിലുണ്ടായിരുന്ന ഒരു വയസ്സുള്ള കുഞ്ഞടക്കം മൂന്ന് പേരുടെ ജീവനാണ് റോസിയുടെ ധീരത കാരണം രക്ഷപ്പെട്ടത്.
കഴിഞ്ഞ ദിവസം വൈകിട്ട് മൂന്ന് മണിയോടെ ടോണിയുടെ അടുക്കളമുറ്റത്താണ് കൂറ്റൻ മൂർഖൻ പാമ്പിനെ കണ്ടത്. റോസിയുടെ സന്ദേഹജനകമായ കുര കേട്ട് ടോണിയും ഭാര്യ റെജിമോളും പുറത്തുവന്നു നോക്കിയപ്പോഴാണ് പത്തി വിടർത്തി നിൽക്കുന്ന വിഷപാമ്പിനെ കണ്ടത്. ഈ സമയം ഇവരുടെ ഒരു വയസ്സുള്ള കൊച്ചുമകൾ എലീഷയും വീട്ടിലുണ്ടായിരുന്നു.
ഉടൻ തന്നെ വീട്ടുകാർ വാഴപ്പള്ളി സ്വദേശിയായ പാമ്പുപിടിത്തക്കാരൻ ഷിനോ കുറ്റിശേരിയെ വിവരമറിയിച്ചു. എന്നാൽ ഷിനോ സ്ഥലത്തെത്തിയിട്ടും പാമ്പിനെ വിട്ടുകൊടുക്കാതെ റോസി മൂർഖന് മുന്നിൽ നിലയുറപ്പിക്കുകയായിരുന്നു. പിടിച്ചുമാറ്റാൻ ശ്രമിച്ചെങ്കിലും റോസി മാറിയില്ല. ഇതിനിടെ കൊത്താനായി ആഞ്ഞ മൂർഖനെ റോസി കടിച്ചുകുടഞ്ഞു. പോരാട്ടത്തിനിടയിൽ റോസിയുടെ മുഖത്ത് പാമ്പിന്റെ കടിയേൽക്കുകയായിരുന്നു.
പാമ്പ് ചത്തു എന്ന് പൂർണ്ണമായും ഉറപ്പാക്കിയ ശേഷമാണ് റോസി പിന്മാറിയത്. കടിയേറ്റ് ഗുരുതരാവസ്ഥയിലായ റോസിയെ ഉടൻ തന്നെ മൂലവട്ടം മുപ്പായിക്കാടുള്ള സ്വകാര്യ വെറ്ററിനറി ആശുപത്രിയിൽ പ്രവേശിപ്പിച്ചു. അടിയന്തരമായി ആന്റിവെനം നൽകിയതിനെ തുടർന്ന് രാത്രിയോടെ നായ അപകടനില തരണം ചെയ്തതായി ഡോക്ടർമാർ അറിയിച്ചു.
