Pravasi News Malayalam, Ankleshwar (2026)

04/03/2026

യുഎഇയിൽ ഓൺലൈൻ പഠനം മാർച്ച് 6 വരെ നീട്ടി

അബുദാബി: യുഎഇയിലെ എല്ലാ വിദ്യാർത്ഥികൾക്കും ഓൺലൈൻ പഠനം 2026 മാർച്ച് 6 വെള്ളിയാഴ്ച്ച വരെ നീട്ടുന്നതായി വിദ്യാഭ്യാസ മന്ത്രാലയവും ഉന്നത വിദ്യാഭ്യാസ, ശാസ്ത്ര ഗവേഷണ മന്ത്രാലയവും ചേർന്ന് പ്രഖ്യാപിച്ചു.

രാജ്യത്തുടനീളം ഉള്ള പൊതു, സ്വകാര്യ സ്കൂളുകളിലും സർവകലാശാലകളിലും പഠിക്കുന്ന എല്ലാ വിദ്യാർത്ഥികൾക്കും ഈ തീരുമാനം ബാധകമായിരിക്കും. കൂടാതെ, അക്കാദമിക് സ്റ്റാഫുകളും അഡ്മിനിസ്ട്രേറ്റീവ് സ്റ്റാഫുകളും ഉൾപ്പെടെ വിദ്യാഭ്യാസ സ്ഥാപനങ്ങളിലെ ജീവനക്കാരെയും ഈ ക്രമീകരണം ബാധിക്കും.

നിലവിലെ സാഹചര്യങ്ങളെ പരിഗണിച്ചാണ് മുൻകരുതൽ നടപടിയായി ഓൺലൈൻ പഠനം തുടരുമെന്ന തീരുമാനം അധികൃതർ വ്യക്തമാക്കിയിട്ടുണ്ട്. വിദ്യാർത്ഥികളുടെ സുരക്ഷയും വിദ്യാഭ്യാസത്തിന്റെ തുടർച്ചയും ഉറപ്പാക്കുന്നതിന് ആവശ്യമായ എല്ലാ ക്രമീകരണങ്ങളും വിദ്യാഭ്യാസ സ്ഥാപനങ്ങൾ സ്വീകരിക്കണമെന്നും മന്ത്രാലയം നിർദേശിച്ചു.

വിദ്യാഭ്യാസവുമായി ബന്ധപ്പെട്ട പുതിയ അറിയിപ്പുകൾ ലഭിക്കുന്നതിനനുസരിച്ച് തുടർ തീരുമാനങ്ങൾ അറിയിക്കുമെന്ന് അധികൃതർ അറിയിച്ചു.

02/03/2026

വിമാന സർവീസ് തടസ്സം: കുടുങ്ങിയ യാത്രക്കാരെ സഹായിക്കാൻ യുഎഇ സർക്കാരിന്റെ പ്രത്യേക പദ്ധതി.

പ്രദേശത്തെ വർധിച്ചുവരുന്ന സംഘർഷാവസ്ഥയെ തുടർന്ന് ഉണ്ടായ വിമാന സർവീസ് തടസ്സങ്ങൾക്കിടയിൽ യുഎഇയിലെ വിവിധ എമിറേറ്റുകളിൽ കുടുങ്ങിയ ഏകദേശം 20,000 യാത്രക്കാരെ സഹായിക്കുന്നതിനായി യുഎഇ സർക്കാർ പ്രത്യേക പദ്ധതിക്ക് തുടക്കമിട്ടു.

വ്യാപകമായ വിമാന റദ്ദാക്കലുകളും വൈകിപ്പിക്കലുകളും മൂലം യാത്ര തുടരാൻ കഴിയാത്തവർക്കായി സർക്കാർ പിന്തുണയോടെ താമസവും ഭക്ഷണവും ഉൾപ്പെടെയുള്ള ചെലവുകൾ മുഴുവൻ സർക്കാർ ഏറ്റെടുക്കുന്നതാണ് പദ്ധതിയുടെ പ്രധാന സവിശേഷത.

യുഎഇയിലെ പ്രധാന വിമാനത്താവളങ്ങളായ അബുദാബിയിലെ സായിദ് ഇന്റർനാഷണൽ എയർപോർട്ടും ദുബൈ ഇന്റർനാഷണൽ എയർപോർട്ടും ഉൾപ്പെടെ വിവിധ കേന്ദ്രങ്ങളിൽ വ്യോമപാത അടച്ചതിനെ തുടർന്നാണ് വലിയ തോതിലുള്ള യാത്രാ തടസ്സങ്ങൾ ഉണ്ടായത്.

ഇതിനിടെ, അബുദാബി ഡിപ്പാർട്മെന്റ് ഓഫ് കൾച്ചർ ആൻഡ് ടൂറിസം (DCT അബുദാബി) ഹോട്ടലുകൾക്ക് പ്രത്യേക നിർദേശം നൽകി. രാജ്യത്ത് നിന്ന് മടങ്ങാൻ കഴിയാത്ത അതിഥികളുടെ താമസം നീട്ടുകയും ഭക്ഷണവും മറ്റ് സൗകര്യങ്ങളും ഉറപ്പാക്കുകയും ചെയ്യണമെന്ന് നിർദേശിച്ചിട്ടുണ്ട്.

ഇതുമായി ബന്ധപ്പെട്ട മുഴുവൻ ചെലവുകളും സർക്കാർ തിരിച്ചടയ്ക്കും.
അസാധാരണ സാഹചര്യങ്ങളിലും യാത്രക്കാരെ അധിക സാമ്പത്തികഭാരത്തിൽ നിന്ന് സംരക്ഷിക്കുകയും രാജ്യത്തിന്റെ അതിഥിസത്കാര പ്രതിബദ്ധത നിലനിർത്തുകയും ചെയ്യുന്നതാണ് ഈ നടപടിയിലൂടെ ലക്ഷ്യമിടുന്നത്.

അതിഥികളുടെ ക്ഷേമത്തിന് മുൻഗണന നൽകണമെന്ന് ഹോട്ടലുകൾക്ക് നിർദേശം നൽകിയിട്ടുണ്ടെന്നും നൽകിയ സേവനങ്ങളുടെ ബില്ലുകൾ നേരിട്ട് സർക്കാർ പരിഹാരത്തിനായി സമർപ്പിക്കണമെന്നും അധികൃതർ അറിയിച്ചു.

02/03/2026

പൊതുസുരക്ഷയെ കുറിച്ച് അധികൃതരുടെ മുന്നറിയിപ്പ്.

രാജ്യത്തിന്റെ പൊതുസുരക്ഷയെ ബാധിക്കാവുന്ന ഏതെങ്കിലും സംശയാസ്പദമായ വിവരം അല്ലെങ്കിൽ സംഭവങ്ങൾ ശ്രദ്ധയിൽപ്പെട്ടാൽ ഉടൻ തന്നെ ബന്ധപ്പെട്ട അധികാരികളെ അറിയിക്കണമെന്ന് അധികൃതർ പൊതുജനങ്ങളോട് അഭ്യർത്ഥിച്ചു.
സുരക്ഷയും ജാഗ്രതയും ഓരോ പൗരന്റെയും ഉത്തരവാദിത്വമാണെന്നും, സുരക്ഷാബോധത്തോടെ പ്രവർത്തിക്കുന്നത് സമൂഹത്തിന്റെ സമാധാനവും സ്ഥിരതയും ഉറപ്പാക്കുന്നതിൽ നിർണായകമാണെന്നും അവർ വ്യക്തമാക്കി.

അനാവശ്യ ഭീതിയുണ്ടാക്കുന്ന അഭ്യൂഹങ്ങൾ പ്രചരിപ്പിക്കാതിരിക്കുകയും, വിശ്വസനീയമായ വിവരങ്ങൾ മാത്രമേ പങ്കുവെക്കാവൂ എന്നും അധികൃതർ ഓർമ്മിപ്പിച്ചു.
പൊതുസുരക്ഷ ഉറപ്പാക്കുന്നതിനായി ലഭിക്കുന്ന എല്ലാ വിവരങ്ങളും ഗൗരവത്തോടെ പരിശോധിക്കപ്പെടുകയും പൂർണ്ണ രഹസ്യത്വത്തോടെ കൈകാര്യം ചെയ്യപ്പെടുകയും ചെയ്യുമെന്ന് ബന്ധപ്പെട്ട അധികാരികൾ അറിയിച്ചു.

02/03/2026

യു എ ഇ പാസ് ഉപയോഗത്തെക്കുറിച്ച് മുന്നറിയിപ്പ്; വ്യക്തിഗത വിവരങ്ങൾ സംരക്ഷിക്കാൻ അധികൃതരുടെ അഭ്യർത്ഥന

അബുദാബി: യു എ ഇയിലെ ഡിജിറ്റൽ സേവനങ്ങൾ വ്യാപകമായി ഉപയോഗിക്കുന്ന സാഹചര്യത്തിൽ, യു എ ഇ പാസ് (UAE PASS) ഉപയോഗവുമായി ബന്ധപ്പെട്ട് പൊതുജനങ്ങൾക്ക് മുന്നറിയിപ്പുമായി ടെലികമ്യുണിക്കേഷൻസ് ആൻഡ് ഡിജിറ്റൽ ഗവർമെന്റ് റെഗുലേറ്ററി അതോറിറ്റി (TDRA) രംഗത്തെത്തി.
യു എ ഇ പാസ് ഉപയോഗിക്കുന്നതിനിടെ വ്യക്തിഗത വിവരങ്ങളും രഹസ്യ ഡാറ്റയും സുരക്ഷിതമായി സൂക്ഷിക്കണമെന്ന് അധികൃതർ പൊതുജനങ്ങളോട് അഭ്യർത്ഥിച്ചു. ഡിജിറ്റൽ സേവനങ്ങൾ ഉപയോഗിക്കുമ്പോൾ അനാവശ്യമായി സ്വകാര്യ വിവരങ്ങൾ പങ്കുവെക്കാതിരിക്കണമെന്നും, ഔദ്യോഗികവും വിശ്വാസ്യതയുള്ള പ്ലാറ്റ്ഫോംങ്ങൾ മാത്രമേ ഉപയോഗിക്കാവൂ എന്നും TDRA വ്യക്തമാക്കി.

സംശയാസ്പദമായ ലിങ്കുകൾ, വ്യാജ സന്ദേശങ്ങൾ, അല്ലെങ്കിൽ അജ്ഞാത ആപ്പുകൾ വഴി ലോഗിൻ വിവരങ്ങൾ പങ്കുവെക്കുന്നത് ഒഴിവാക്കണമെന്ന് അധികൃതർ പ്രത്യേകമായി മുന്നറിയിപ്പ് നൽകി. സൈബർ തട്ടിപ്പുകൾ വർധിക്കുന്ന പശ്ചാത്തലത്തിലാണ് പുതിയ നിർദ്ദേശങ്ങൾ പുറത്തിറക്കിയത്.
ഡിജിറ്റൽ ഐഡന്റിറ്റി സേവനങ്ങൾ സുരക്ഷിതമായി ഉപയോഗിക്കുന്നതിലൂടെ മാത്രമേ വ്യക്തിഗത വിവരങ്ങൾ ദുരുപയോഗത്തിൽ നിന്ന് സംരക്ഷിക്കാൻ കഴിയൂ എന്നും TDRA കൂട്ടിച്ചേർത്തു.

പ്രധാന നിർദ്ദേശങ്ങൾ:

ഔദ്യോഗിക ആപ്പുകളും വെബ്സൈറ്റുകളും മാത്രം ഉപയോഗിക്കുക
OTP, പാസ്‌വേഡ് തുടങ്ങിയ വിവരങ്ങൾ ആരോടും പങ്കുവെക്കരുത്
സംശയാസ്പദമായ ലിങ്കുകൾ ഒഴിവാക്കുക
വ്യക്തിഗത ഡാറ്റ നൽകുന്നതിന് മുൻപ് പ്ലാറ്റ്ഫോം വിശ്വാസ്യത ഉറപ്പാക്കുക
ഡിജിറ്റൽ സുരക്ഷ ഉറപ്പാക്കുന്നതിൽ പൊതുജനങ്ങളുടെ ജാഗ്രത നിർണായകമാണെന്ന് അധികൃതർ ഓർമ്മിപ്പിച്ചു.

02/03/2026

അടിയന്തര സാഹചര്യങ്ങളിൽ സോഷ്യൽ മീഡിയ ഉപയോഗത്തിൽ ജാഗ്രത പാലിക്കണമെന്ന് NCEMA മുന്നറിയിപ്പ്

അബൂദാബി: അടിയന്തര സാഹചര്യങ്ങൾ നിലനിൽക്കുന്ന സമയങ്ങളിൽ സോഷ്യൽ മീഡിയ ഉപയോഗത്തിൽ പൊതുജനങ്ങൾ പരമാവധി ജാഗ്രത പാലിക്കണമെന്ന് യു.എ.ഇയിലെ National Emergency Crisis and Disaster Management Authority (NCEMA) അധികൃതർ അറിയിച്ചു. സമൂഹത്തിന്റെ സുരക്ഷയും പൊതുസമാധാനവും ഉറപ്പാക്കുന്നതിനായി ഓൺലൈൻ ഇടങ്ങളിൽ ഉത്തരവാദിത്തത്തോടെ പെരുമാറണമെന്ന് നിർദേശിച്ചു.

സ്ഥിരീകരിക്കാത്ത വിവരങ്ങൾ സാമൂഹ്യമാധ്യമങ്ങളിൽ പങ്കുവെക്കുന്നത് ഒഴിവാക്കണമെന്നും, സംഭവസ്ഥലങ്ങളിലെ ചിത്രങ്ങളോ വീഡിയോകളോ പകർത്തുകയോ പ്രചരിപ്പിക്കുകയോ ചെയ്യരുതെന്നും ഔദ്യോഗിക അറിയിപ്പിൽ വ്യക്തമാക്കുന്നു. ഇത്തരത്തിലുള്ള പ്രവർത്തനങ്ങൾ സുരക്ഷാ നടപടികളെ ബാധിക്കാനും അനാവശ്യ ആശങ്കക്കും തെറ്റിദ്ധാരണകൾക്കും കാരണമാകാനും സാധ്യതയുണ്ടെന്ന് അധികൃതർ മുന്നറിയിപ്പ് നൽകി.

അഭ്യൂഹങ്ങളോ ഔദ്യോഗികമല്ലാത്ത റിപ്പോർട്ടുകളോ പ്രചരിപ്പിക്കുന്നത് സമൂഹത്തിൽ ഭീതിയും ആശയക്കുഴപ്പവും സൃഷ്ടിക്കുമെന്ന് ചൂണ്ടിക്കാട്ടിയ NCEMA, അടിയന്തര സാഹചര്യങ്ങളിൽ സർക്കാർ പുറത്തുവിടുന്ന ഔദ്യോഗിക വിവരങ്ങൾ മാത്രമേ വിശ്വസിക്കാവൂ എന്നും വ്യക്തമാക്കി.

ജനങ്ങൾ ശാന്തത പാലിച്ച് ബന്ധപ്പെട്ട അധികാരികൾ നൽകുന്ന നിർദ്ദേശങ്ങൾ കൃത്യമായി പാലിക്കണമെന്നും അധികൃതർ അഭ്യർത്ഥിച്ചു.

01/03/2026

ഗൾഫ് രാജ്യങ്ങളിൽ CBSE 10 & 12 ബോർഡ് പരീക്ഷകൾ മാറ്റിവെച്ചു.

യുഎഇ ഉൾപ്പെടെയുള്ള ഗൾഫ് രാജ്യങ്ങളിലെ CBSE 10-ാം ക്ലാസ്, 12-ാം ക്ലാസ് ബോർഡ് പരീക്ഷകൾ താൽക്കാലികമായി മാറ്റിവെച്ചതായി അധികൃതർ അറിയിച്ചു. മേഖലയിലെ നിലവിലെ സാഹചര്യങ്ങളും വിദ്യാർത്ഥികളുടെ സുരക്ഷയും പരിഗണിച്ചാണ് ഈ തീരുമാനം എടുത്തത്.

പരീക്ഷകളുടെ പുതുക്കിയ തീയതികൾ പിന്നീട് ഔദ്യോഗികമായി പ്രഖ്യാപിക്കുമെന്ന് CBSE അധികൃതർ വ്യക്തമാക്കി. വിദ്യാർത്ഥികളും രക്ഷിതാക്കളും സ്കൂൾ അധികൃതരുമായി ബന്ധപ്പെട്ടു തുടർ നിർദേശങ്ങൾ പാലിക്കണമെന്ന് നിർദ്ദേശം നൽകിയിട്ടുണ്ട്.

വിദ്യാഭ്യാസ പ്രവർത്തനങ്ങളിൽ തടസ്സം കുറയ്ക്കുന്നതിനും പരീക്ഷകൾ സുരക്ഷിതമായി നടത്തുന്നതിനുമായി ആവശ്യമായ നടപടികൾ സ്വീകരിച്ചുവരുന്നതായും അധികൃതർ അറിയിച്ചു.

കൂടുതൽ വിവരങ്ങൾ CBSEയുടെ ഔദ്യോഗിക അറിയിപ്പുകൾ വഴി ഉടൻ ലഭ്യമാകും.

02/02/2026

മാനുഷികത മരവിക്കുന്ന മാധ്യമരംഗം : ബ്രേക്കിങ് ന്യൂസുകൾക്കിടയിൽ നഷ്ടപ്പെടുന്ന ധാർമ്മികത.

ജനാധിപത്യത്തിന്റെ നാലാം തൂണ് എന്ന് വിശേഷിപ്പിക്കപ്പെട്ടിരുന്ന മാധ്യമപ്രവർത്തനം ഇന്ന് വലിയൊരു പ്രതിസന്ധിയിലൂടെയാണ് കടന്നുപോകുന്നത്. സത്യം പറയുക എന്നതിലുപരി, 'ആദ്യം പറയുക', 'എത്രയും വേഗം വൈറൽ ആക്കുക' എന്ന വിപണന തന്ത്രത്തിലേക്ക് മാധ്യമങ്ങൾ ചുരുങ്ങിപ്പോയിരിക്കുന്നു. മാനുഷിക മൂല്യങ്ങളെക്കാൾ റേറ്റിംഗിനും വ്യൂസിനും (Views) മുൻഗണന നൽകുമ്പോൾ, അവിടെ ബലികഴിക്കുന്നത് മാധ്യമ ധാർമ്മികതയാണ്.

ഇന്നത്തെ മാധ്യമരംഗത്തെ ജീർണ്ണതയുടെ പ്രധാന കാരണങ്ങൾ താഴെ പറയുന്നവയാണ്:

1. കൂണുകൾ പോലെ മുളയ്ക്കുന്ന ഓൺലൈൻ മാധ്യമങ്ങൾ
ഇന്ന് ആർക്കും ഒരു സ്മാർട്ട്ഫോൺ ഉണ്ടെങ്കിൽ മാധ്യമപ്രവർത്തകനാകാം എന്ന അവസ്ഥയാണ്. കൃത്യമായ എഡിറ്റോറിയൽ മേൽനോട്ടമോ, വാർത്താ പരിശോധനയോ (Fact-checking) ഇല്ലാതെയാണ് പല ഓൺലൈൻ പോർട്ടലുകളും പ്രവർത്തിക്കുന്നത്.

ക്ലിക്ക്-ബെയ്റ്റ് സംസ്കാരം:

വാർത്തയുടെ ഉള്ളടക്കവുമായി യാതൊരു ബന്ധവുമില്ലാത്ത, തെറ്റിദ്ധരിപ്പിക്കുന്ന തലക്കെട്ടുകളും തമ്പ്‌നെയിലുകളും നൽകി വായനക്കാരെ ആകർഷിക്കുന്നു.

നിലവാരത്തകര്‍ച്ച:

ഭാഷാശുദ്ധിയോ, മാന്യതയോ ഇല്ലാത്ത അവതരണ രീതി പലപ്പോഴും അറപ്പുളവാക്കുന്നതാണ്. വ്യക്തിഹത്യയും അസത്യപ്രചാരണവും ഇവരുടെ പ്രധാന ആയുധങ്ങളായി മാറുന്നു.

2. സ്വകാര്യതയിലേക്കുള്ള കടന്നുകയറ്റം (അവസരോചിതം അല്ലാത്ത ഇടപെടലുകൾ).

ഒരു ദുരന്തമോ മരണമോ നടന്നാൽ അവിടെ ഓടിക്കൂടുന്ന ക്യാമറകൾ പലപ്പോഴും മനുഷ്യത്വമില്ലാത്ത കാഴ്ചയാണ്. ഉറ്റവരെ നഷ്ടപ്പെട്ട് നിൽക്കുന്നവരുടെ മുഖത്തേക്ക് മൈക്ക് നീട്ടി "ഇപ്പോൾ എന്തു തോന്നുന്നു?" എന്ന് ചോദിക്കുന്ന ക്രൂരമായ മാധ്യമപ്രവർത്തനം നാം നിത്യേന കാണുന്നു.
മരിച്ചവരുടെ ദേഹത്ത് ക്യാമറ സൂം ചെയ്യുന്നതും, കരയുന്ന ബന്ധുക്കളുടെ ദൃശ്യങ്ങൾ ബാക്ക്ഗ്രൗണ്ട് മ്യൂസിക് ഇട്ട് സംപ്രേഷണം ചെയ്യുന്നതും 'ഇമോഷണൽ മാർക്കറ്റിംഗ്' അല്ലാതെ മറ്റൊന്നുമല്ല.
ഒരു വ്യക്തിയുടെ സ്വകാര്യ നിമിഷങ്ങളിലേക്കോ, വേദനകളിലേക്കോ അനുവാദമില്ലാതെ കടന്നുചെല്ലുന്നത് മാധ്യമപ്രവർത്തനമല്ല, മറിച്ച് കടന്നുകയറ്റമാണ്.

3. ബ്രേക്കിങ് ന്യൂസിന് വേണ്ടിയുള്ള പരക്കം പാച്ചിൽ
വാർത്തകളുടെ വിശ്വാസ്യതയേക്കാൾ വേഗത്തിനാണ് ഇന്ന് പ്രാധാന്യം. "ഏറ്റവും ആദ്യം ഞങ്ങൾ റിപ്പോർട്ട് ചെയ്യുന്നു" എന്ന് വരുത്തിത്തീർക്കാൻ എന്തും വിളിച്ചു പറയുന്ന പ്രവണതയാണിത്.
അപൂർണ്ണമായ വിവരങ്ങൾ നൽകി ജനങ്ങളിൽ ഭീതി പടർത്തുന്നു.
തെറ്റായ വാർത്തകൾ നൽകിയ ശേഷം പിന്നീട് തിരുത്താമെന്ന ലാഘവബുദ്ധി സമൂഹത്തിൽ വലിയ പ്രത്യാഘാതങ്ങൾ സൃഷ്ടിക്കുന്നു.

പരിഹാരം എന്ത്?

മാധ്യമങ്ങൾ സ്വയം നിയന്ത്രിക്കാൻ തയ്യാറാകണം. അതോടൊപ്പം പ്രേക്ഷകരായ നമ്മളും മാറേണ്ടതുണ്ട്. നിലവാരമില്ലാത്ത വാർത്തകളെ തള്ളിക്കളയുവാനും, സ്വകാര്യതയെ മാനിക്കാത്ത റിപ്പോർട്ടിംഗിനെതിരെ പ്രതികരിക്കുവാനും സമൂഹം തയ്യാറാകണം.

മാനുഷികത ഇല്ലാതാകുന്നിടത്ത് മാധ്യമപ്രവർത്തനം അവസാനിക്കുകയും കച്ചവടം ആരംഭിക്കുകയും ചെയ്യുന്നു എന്ന് തിരിച്ചറിയുക.

01/02/2026

ഓൺലൈൻ പാർട്ട്-ടൈം ജോലി തട്ടിപ്പുകൾ വർധിക്കുന്നു: ദുബായ് പോലീസ് മുന്നറിയിപ്പ്.

ദുബായ്: അധിക വരുമാനം വാഗ്ദാനം ചെയ്യുന്ന വ്യാജ പാർട്ട്-ടൈം റിമോട്ട് ജോലികളുടെ പരസ്യങ്ങൾ സോഷ്യൽ മീഡിയയിൽ വ്യാപകമാകുന്നതായി Dubai Police മുന്നറിയിപ്പ് നൽകി. “ലളിതമായ ഓൺലൈൻ ടാസ്കുകൾ” ചെയ്യുന്നതിനിലൂടെ ഉടൻ പണം ലഭിക്കുമെന്ന് വാഗ്ദാനം ചെയ്യുന്ന ഇത്തരം ഓഫറുകൾ ഭൂരിഭാഗവും തട്ടിപ്പുകളാണെന്ന് പോലീസ് വ്യക്തമാക്കി.

വേഗത്തിൽ പണം നേടാമെന്ന ആകർഷക വാഗ്ദാനങ്ങൾ, രജിസ്ട്രേഷൻ ഫീസ് ആവശ്യപ്പെടൽ, ബാങ്ക് വിവരങ്ങൾ ചോദിക്കൽ എന്നിവ എല്ലാം അപകട സൂചനകളാണെന്ന് അധികൃതർ അറിയിച്ചു. യഥാർത്ഥ ജോലികൾ ഒരിക്കലും മുൻകൂർ പണമോ സ്വകാര്യ ബാങ്ക് വിവരങ്ങളോ ആവശ്യപ്പെടില്ലെന്നും പോലീസ് ഓർമ്മിപ്പിച്ചു.

പൊതുജനങ്ങൾ ജോലി ഓഫറുകളുടെ ഉറവിടം കൃത്യമായി പരിശോധിക്കണമെന്നും, സംശയകരമായ സന്ദേശങ്ങൾക്കോ പരസ്യങ്ങൾക്കോ പ്രതികരിക്കാതിരിക്കണമെന്നും നിർദേശം നൽകി. ഇത്തരത്തിലുള്ള സംശയാസ്പദ പ്രവർത്തനങ്ങൾ ശ്രദ്ധയിൽപ്പെട്ടാൽ eCrime പ്ലാറ്റ്‌ഫോം വഴി പരാതി നൽകുകയോ 901 നമ്പറിൽ ബന്ധപ്പെടുകയോ ചെയ്യണമെന്ന് ദുബായ് പോലീസ് അഭ്യർത്ഥിച്ചു.

28/01/2026

യുഎഇയിൽ സോഷ്യൽ മീഡിയ ഇൻഫ്ലുവൻസർമാർക്ക് മുന്നറിയിപ്പ്.

യുഎഇയിലെ സോഷ്യൽ മീഡിയ ഇൻഫ്ലുവൻസർമാർക്കും ഡിജിറ്റൽ കണ്ടന്റ് ക്രിയേറ്റർമാർക്കും നിർണായക അറിയിപ്പ്. മുമ്പ് യുഎഇ മീഡിയ കൗൺസിൽ എന്നറിയപ്പെട്ടിരുന്ന National Media Authority സോഷ്യൽ മീഡിയ പരസ്യങ്ങൾക്കുള്ള Advertiser Permit നേടുന്നതിനുള്ള അവസാന തീയതി പ്രഖ്യാപിച്ചു.
അധികൃതരുടെ അറിയിപ്പ് പ്രകാരം 2026 ജനുവരി 31നകം സോഷ്യൽ മീഡിയ പരസ്യ അനുമതി ലഭ്യമാക്കാത്തവർക്ക് Dh10,000 വരെ പിഴ ചുമത്തപ്പെടും.
ഇൻസ്റ്റഗ്രാം, ഫേസ്ബുക്ക്, യൂട്യൂബ്, ടിക്‌ടോക്ക് തുടങ്ങിയ പ്ലാറ്റ്‌ഫോമുകളിലൂടെ പരസ്യ ഉള്ളടക്കം പങ്കുവയ്ക്കുന്ന ഇൻഫ്ലുവൻസർമാർക്കും കണ്ടന്റ് ക്രിയേറ്റർമാർക്കും ഈ അനുമതി നിർബന്ധമാണ്. നിയമപരമായ ബുദ്ധിമുട്ടുകളും പിഴയും ഒഴിവാക്കാൻ യോഗ്യരായവർ ഉടൻ തന്നെ അപേക്ഷ സമർപ്പിക്കണമെന്ന് അധികൃതർ മുന്നറിയിപ്പ് നൽകി.

24/01/2026

പ്രവാസികൾ ഭാരതത്തിന്റെ രാഷ്ട്രദൂതന്മാർ : കേന്ദ്രമന്ത്രി സുരേഷ് ഗോപി,വേൾഡ് മലയാളി ഫെഡറേഷൻ അഞ്ചാമത് ഗ്ലോബൽ കൺവെൻഷൻ ദുബായിൽ സമാപിച്ചു.

ദുബായ്: ആഗോള പ്രവാസി മലയാളി സംഘടനയായ World Malayalee Federation (WMF)യുടെ അഞ്ചാമത് ദ്വിവത്സര ഗ്ലോബൽ കൺവെൻഷൻ പ്രൗഢഗംഭീരമായ ചടങ്ങുകളോടെ ദുബായിൽ സമാപിച്ചു. മൂന്ന് ദിവസങ്ങളിലായി നടന്ന കൺവെൻഷനിൽ ലോകത്തിന്റെ 167 രാജ്യങ്ങളിൽ നിന്നുള്ള പ്രതിനിധികൾ പങ്കെടുത്തു.

സമാപന സമ്മേളനം ഉദ്ഘാടനം ചെയ്ത കേന്ദ്ര ടൂറിസം–പെട്രോളിയം സഹമന്ത്രി ശ്രീ. സുരേഷ് ഗോപി, ഭാരതത്തിന്റെ വികസന കുതിപ്പിൽ പ്രവാസികൾ വഹിക്കുന്ന നിർണായക പങ്ക് എടുത്തുപറഞ്ഞു. പ്രധാനമന്ത്രി നരേന്ദ്ര മോദി വിശേഷിപ്പിക്കുന്നതുപോലെ, ഓരോ പ്രവാസിയും ഭാരതത്തിന്റെ ‘രാഷ്ട്രദൂതന്മാരാണെന്നും’ അദ്ദേഹം പറഞ്ഞു. കേരളത്തിന്റെ ടൂറിസം സാധ്യതകൾ ലോകത്തിനു മുന്നിൽ തുറന്നുകാട്ടാൻ പ്രവാസികളെക്കാൾ മികച്ച ബ്രാൻഡ് അംബാസഡർമാർ ഇല്ലെന്നും, ആയുർവേദം മുതൽ ഉത്തരവാദിത്ത ടൂറിസം വരെ കേരളത്തെ ലോകത്തിന്റെ നെറുകയിലെത്തിക്കാൻ കേന്ദ്രസർക്കാരിന്റെ എല്ലാ പിന്തുണയും ഉറപ്പാക്കാൻ താൻ വ്യക്തിപരമായി ശ്രമിക്കുമെന്നും അദ്ദേഹം വ്യക്തമാക്കി.
സമാപന ചടങ്ങിൽ സംസ്ഥാന കൃഷി വകുപ്പ് മന്ത്രി പി. പ്രസാദ്, ഡീൻ കുര്യാക്കോസ് എം.പി., ബ്രിസ്റ്റോൾ ബ്രാഡ്‌ലി സ്റ്റോക്ക് മേയർ ടോം ആദിത്യ, നടി ആശ ശരത്ത്, പാണക്കാട് മുനവറലി ശിഹാബ് തങ്ങൾ, ഡോ. സിദ്ധീഖ് അഹമ്മദ്, മുരളി തുമ്മാരുകുടി, ഡോ. വർഗീസ് മൂലൻ, മിഥുൻ രമേശ്, WMF ഫൗണ്ടർ ചെയർമാൻ ഡോ. പ്രിൻസ് പള്ളിക്കുന്നേൽ, ഗ്ലോബൽ ചെയർമാൻ ഡോ. ജെ. രത്നകുമാർ, ഗ്ലോബൽ പ്രസിഡന്റ് ഡോ. ആനി ലിബു തുടങ്ങിയവർ പങ്കെടുത്തു.
മൂന്ന് ദിവസങ്ങളിലായി നടന്ന കൺവെൻഷനിൽ ബിസിനസ് സമ്മിറ്റ്, വനിതാ സമ്മിറ്റ്, പ്രവാസി സമ്മിറ്റ്, വിദ്യാർത്ഥികളുടെ കുടിയേറ്റ വിഷയത്തിൽ മുരളി തുമ്മാരുകുടി നയിച്ച പ്രത്യേക സെഷൻ എന്നിവ സംഘടിപ്പിച്ചു. വയനാട് ഉരുൾപൊട്ടൽ ദുരന്തത്തിൽ വീട് നഷ്ടപ്പെട്ടവർക്കായി WMF നിർമ്മിച്ചു നൽകുന്ന വീടുകളുടെ താക്കോൽ കൈമാറ്റം ചടങ്ങിൽ നടന്നു. കേന്ദ്രമന്ത്രി സുരേഷ് ഗോപിയും ഡീൻ കുര്യാക്കോസ് എം.പിയും ചേർന്ന് കേരള സ്റ്റേറ്റ് കൗൺസിലിന് താക്കോൽ കൈമാറി. സ്ത്രീശാക്തീകരണത്തിന്റെ ഭാഗമായി 24 മണിക്കൂറും പ്രവർത്തിക്കുന്ന ‘കരുതൽ’ ഹെൽപ് ഡെസ്കിന്റെ ഉദ്ഘാടനവും കേന്ദ്രമന്ത്രി നിർവഹിച്ചു.

കൺവെൻഷനോടനുബന്ധിച്ച് തയ്യാറാക്കിയ സുവനീർ “ലോകജാലകം” സയ്യിദ് മുനവറലി ശിഹാബ് തങ്ങൾ പ്രകാശനം ചെയ്തു.
സംസ്ഥാന കൃഷി വകുപ്പ് മന്ത്രി പി. പ്രസാദ് ഉദ്ഘാടനം ചെയ്ത ബിസിനസ് സമ്മിറ്റിൽ ലോകത്തിന്റെ വിവിധ ഭാഗങ്ങളിൽ നിന്നുള്ള പ്രതിനിധികൾ പങ്കെടുത്തു. നെറ്റ്‌വർക്കിങ് സെഷനുകളും പാനൽ ചർച്ചകളും വഴി പുതിയ വ്യവസായ സാധ്യതകൾ സമ്മിറ്റ് മുന്നോട്ടുവച്ചു. പ്രമുഖ പ്രവാസി മലയാളികളെ ഉൾപ്പെടുത്തി തയ്യാറാക്കിയ “ഗ്ലോബൽ ഐക്കൺസ്” എന്ന പ്രീമിയം ഡയറക്ടറി ലുലു ഗ്രൂപ്പ് ഇന്റർനാഷണൽ മാർക്കറ്റിംഗ് & കമ്മ്യൂണിക്കേഷൻ ഡയറക്ടർ വി. നന്ദകുമാർ ഉദ്ഘാടനം ചെയ്തു. മീഡിയ കൺസൾട്ടന്റും ഗ്ലോബൽ പി.ആർ.ഒയുമായ നോവിൻ വാസുദേവാണ് ഡയറക്ടറിയുടെ ചീഫ് എഡിറ്റർ.

പ്രവാസി സമൂഹത്തിൽ നടത്തിയ ജീവകാരുണ്യ പ്രവർത്തനങ്ങളെ മുൻനിർത്തി അഷ്‌റഫ് താമരശ്ശേരിയെയും ശിഹാബ് കൊട്ടുകാടിനെയും പ്രവാസി സമ്മിറ്റിൽ ആദരിച്ചു. 2026–27 കാലഘട്ടത്തിലേക്കുള്ള ഗ്ലോബൽ കാബിനറ്റ് അംഗങ്ങളുടെ പ്രഖ്യാപനവും സത്യപ്രതിജ്ഞയും കൺവെൻഷനിൽ നടന്നു. തുടർച്ചയായി രണ്ടാം തവണയും ഡോ. ജെ. രത്നകുമാർ ഗ്ലോബൽ ചെയർമാനായി തിരഞ്ഞെടുക്കപ്പെട്ടു.
ആഫ്രിക്കൻ മലയാളികളുടെ ദീർഘകാല ആവശ്യമായ എത്യോപ്യൻ എയർലൈൻസിന് കേരളത്തിലേക്ക് ലാൻഡിംഗ് പെർമിഷൻ അനുവദിക്കണമെന്നാവശ്യപ്പെട്ട് ആഫ്രിക്കൻ റീജിയൻ കൗൺസിൽ കേന്ദ്രമന്ത്രി സുരേഷ് ഗോപിക്ക് നിവേദനം നൽകി. മികച്ച സംഘടനാ പ്രവർത്തനങ്ങൾക്ക് വിവിധ കൗൺസിലുകൾക്കും ഫോറങ്ങൾക്കും അവാർഡുകൾ സമ്മാനിച്ചപ്പോൾ, ബിസിനസ് രംഗത്തെ മികവിന് വ്യവസായികൾക്ക് സുരേഷ് ഗോപി പുരസ്‌കാരങ്ങൾ നൽകി. ആശാ ശരത് ഒരുക്കിയ നൃത്തവിരുന്നും വിവിധ കലാപരിപാടികളും കൺവെൻഷന് മാറ്റുകൂട്ടി. കൺവെൻഷൻ കൺവീനർ വർഗീസ് പെരുമ്പാവൂർ നന്ദി രേഖപ്പെടുത്തി.

Pravasi News Malayalam

04/03/2026

02/03/2026

02/03/2026

02/03/2026

02/03/2026

01/03/2026

02/02/2026

01/02/2026

28/01/2026

24/01/2026

Address

Website

Alerts

Contact The Business

Shortcuts

Share

Category

Listing takedown request