Kozhencherry Media Centre

18/01/2026

അയിരൂർ പുതിയകാവ് ദേവി ക്ഷേത്രത്തിൽ മകരഭരണി ഉത്സവം കൊടിയേറി

പ്രസിദ്ധമായ അയിരൂർ പുതിയകാവ് ദേവീക്ഷേത്രത്തിൽ മകര ഭരണി ഉത്സവത്തിന് ഇന്ന് കൊടിയേറി. രാവിലെ 8:45നും 9നും മധ്യേ തന്ത്രിമുഖ്യൻ കുഴിക്കാട്ടില്ലത്ത് അക്കീരമൺ കാളിദാസൻ ഭട്ടതിരിപ്പാടിന്റെ മുഖ്യകാർമികത്വത്തിൽ ഉത്സവത്തിന് കൊടിയേറി മേൽശാന്തി ശങ്കരൻ നമ്പൂതിരി സഹകാർമികത്വം വഹിച്ചു..ജനുവരി 26 തിങ്കളാഴ്ച27 നാണ് ആറാട്ട്' . ജനുവരി 18 മുതൽ പള്ളിവേട്ട ദിനമായ 27 വരെ
രാവിലെ 4.30 ന് പള്ളി ഉണർത്തൽ , 5 ന് നിർമാല്യ ദർശനം, 6ന് ഗണപതിഹോമം, വിശേഷാൽ പൂജകൾ 6.30 ന് ലളിതാ സഹസ്രനാമ ജപം, 7.15 ന് ശ്രീബലി, 9 മുതൽ ഉച്ച കഴിഞ്ഞ് 3 മണി വരെ നാരയണിയ പാരായണം. വൈകിട്ട് 6.30 ന് ദീപാരാധന എന്നിവ നടക്കും . ഒന്നാം ദിനം വൈകിട്ട് 7ന് കലാവേദിയിൽ കൈ കൊട്ടിക്കളി , 8 മുതൽ ഗോകുല കലാസന്ധ്യ എന്നിവ നടന്നു.. 19 ന് 7 മുതൽ കൈ കൊട്ടിക്കളി , തിരുവാതിര ,20 ന് 7 മുതൽ തിരുവാതിര ,21 ന് വൈകിട്ട് 7 മുതൽ ഭക്തിഗാന തരംഗിണി , 22 ന് വൈകിട്ട് 7 മുതൽ കൈ കൊട്ടിക്കളി , 8 മുതൽ ഭക്തിഗാനമേള ,23 ന് 7 മുതൽ സംഗീതാർച്ചന എന്നിവ നടക്കും. 24 ന് രാവിലെ 9 മുതൽ സമൂഹസദ്യയ്ക്കായുള്ള കലവറ നിറയ്ക്കൽ ഘോഷയാത്ര .രാവിലെ 9 മണിക്ക് പുല്ലാട് ഭഗവതി ക്ഷേത്രത്തിൽ നിന്ന് ആരംഭിച്ച്കാഞ്ഞിറ്റുകര, നാരായണമംഗലം, മേലുകര, ചെറുകോൽ ,കാട്ടൂർ ,കാട്ടൂർ, പൂത്തേഴം,ഇടത്രാമൺ, വെള്ളിയറ, ചെറുകോൽപ്പുഴ, രാമേശ്വരം വഴി ക്ഷേത്രത്തിൽ എത്തിച്ചേരുന്നു. വൈകിട്ട് 7 30 മുതൽ നൃത്യ രഞ്ജിനി.ജനുവരി 25 രാവിലെ 10 മുതൽ ഉത്സവ ബലി വൈകിട്ട് 6 മുതൽ കാഴ്ച ശ്രീബലി ,സേവ ,ദീപാരാധന.9 30 ന് പടയണി ചൂട്ടുവെപ്പ് ,രാത്രി 10 30 മുതൽ കഥകളി .ജനുവരി 26 വൈകിട്ട് 4 മുതൽ സൗന്ദര്യലഹരി പാരായണം, ആറ് മുതൽ കാഴ്ചശ്രീബലി ,സേവ ,ദീപാരാധന .രാത്രി 9 30ന് ചൂട്ട് പടേനി , 10 ന് അമൃതം നാമജപം , വെളുപ്പിന് 1.30 ന് പള്ളിവേട്ട എഴുന്നള്ളത്ത്. ജനുവരി 27 ആറാട്ട് ദിവസം രാവിലെ 11. 30 മുതൽ സമൂഹസദ്യ ഉച്ചയ്ക്ക് 2 മുതൽ ഓട്ടൻതുള്ളൽ.രാത്രി 8 .30 ന് പഞ്ചവാദ്യം ,9 45 ന് കൊടിയിറക്ക് ,ആറാട്ട് എഴുന്നള്ളത്ത് .10 30 മുതൽ വയലിൻ നാദലയ വിസ്മയം .വെളുപ്പിന് രണ്ടിന് ആറാട്ട് തിരിച്ചു വരവ്. ഉത്സവ നടത്തിപ്പിനായുള്ള ഒരുക്കങ്ങൾ പൂർത്തിയായതായി ക്ഷേത്രോപദേശക സമിതി പ്രസിഡൻ്റ് അജയ് ഗോപിനാഥ് , വി.കെ അനിൽകുമാർ (സെക്രട്ടറി ) , ഹരീഷ് ടി എസ് ( വൈസ് പ്രസിഡൻ്റ് ) , രമേശ് ചന്ദ്രൻ (ജോ . സെക്രട്ടറി) , ബിജു പുളിക്കത്തറ എന്നിവർ അറിയിച്ചു.

18/01/2026

14- മത് ചെങ്ങന്നൂർ മാവേലിക്കര ഭദ്രാസന കൺവെൻഷൻ 21ന് തുടങ്ങും

മലങ്കര മാർത്തോമ്മാ സുറിയാനി സഭയുടെ ചെങ്ങന്നൂർ മാവേലിക്കര ഭദ്രാസനത്തിന്റെ 14- മത് ഭദ്രാസന കൺവൻഷൻ ജനുവരി 21 മുതൽ 25 വരെ ആറാട്ടുപുഴ ഡോ. സഖറിയാസ് മാർ തെയോഫിലോസ് സഫ്രഗൻ മെത്രാപ്പോലീത്താ സ്മാരക തരംഗം മിഷൻ ആക്ഷൻ സെന്ററിൽ വച്ച് നടക്കും. പത്തനംതിട്ട, ആലപ്പുഴ ജില്ലകളിലായി 92 ഇടവകകൾ ചെങ്ങന്നൂർ-മാവേലിക്കര ഭദ്രാസനത്തിന്റെ ഭാഗമാണ്.

ജനുവരി 21 ന് വൈകിട്ട് 6 മണിക്ക് ചെങ്ങന്നൂർ- മാവേലിക്കര ഭദ്രാസന അദ്ധ്യക്ഷൻ അഭിവന്ദ്യ ഡോ. യൂയാക്കിം മാർ കൂറിലോസ് സഫ്രഗൻ മെത്രാപ്പോലിത്താ അദ്ധ്യക്ഷത വഹിക്കുന്ന യോഗത്തിൽ വച്ച് മലങ്കര മാർത്തോമ്മാ സുറിയാനി സഭയുടെ പരമാദ്ധ്യക്ഷൻ മോസ്റ്റ് റവ. ഡോ. തിയഡോഷ്യസ് മാർത്തോമ്മാ മെത്രാപ്പോലീത്താ കൺവൻഷൻ ഉദ്ഘാടനം ചെയ്യും .അന്നേദിവസം ഭദ്രാസനം പുതുതായി ആരംഭിക്കുന്ന പുത്തൻകാവ് അസെൻഷൻ പാലിയേറ്റീവ് സെന്ററിന്റെ ഉദ്ഘാടനം മെത്രാപ്പോലീത്ത നിർവഹിക്കുന്നതായിരിക്കും. സമൂഹത്തിൽ പാർശ്വവൽക്കരിക്കപ്പെട്ട കിടപ്പുരോഗികളുടെ സാന്ത്വന പരിചരണത്തിനാണ് ഈ കേന്ദ്രം ആരംഭിക്കുന്നത്.

ജനുവരി 21 മുതൽ 24 വരെയുള്ള തീയതികളിൽ വൈകിട്ട് 6 മണിക്ക് കൺവൻഷൻ പൊതുയോഗങ്ങൾ നടത്തപ്പെട്ടുന്നതാണ്.ജനുവരി 22, 23 തീയതികളിൽ സി. എസ്. ഐ സഭയുടെ മോഡറേറ്റർ അഭിവന്ദ്യ ഡോ. കെ. റൂബെൻ മാർക്ക് മുഖ്യ സന്ദേശം നൽകും. റവ ഡോ. മോത്തി വർക്കി, റവ. ജോൺ ജി. വർഗീസ് (മാർത്തോമ്മാ സെമിനാരി, കോട്ടയം) എന്നിവരും പൊതുയോഗങ്ങളിൽ
ദൈവവചനം ശുശ്രൂഷ നിർവഹിക്കും.

ജനുവരി 23 രാവിലെ 10 മണിക്ക് സേവികാ സംഘത്തിൻ്റെയും സന്നദ്ധ സുവിശേഷക സംഘത്തിൻ്റെയും സംയുക്ത യോഗം നടത്തപ്പെടും. ഡോ. സിജിയാ ബിനു (ചെയർപേഴ്സൺ, ആത്മ) മുഖ്യ സന്ദേശം നൽകും. തുടർന്ന് 3 മണിക്ക് മിവ, കരുതൽ വോളന്റീയേഴ്സിന്റെ മീറ്റിംഗ് ഉണ്ടാവും. റവ. ബ്ലെസിൻ കെ. മോൻ
(റ്റി.എം.എ. ഐ. സി., അമലഗിരി, കോട്ടയം) സന്ദേശം നൽകും.

ജനുവരി 24 രാവിലെ 8 മണിക്ക് കുട്ടികളുടെ സമർപ്പണ ശുശ്രുഷ നടത്തപ്പെടും. ആചാര്യ റവ. ഐസക്ക് മാത്യു (മാർത്തോമ്മാ ദയറാ , പുനലൂർ) ശുശ്രൂഷയ്ക്ക് നേതൃത്വം നൽകും. രാവിലെ 10 മണിക്ക് കുട്ടികളുടെ തരംഗം മീറ്റിംഗിൽ റവ. സുജിത്ത് സാം മാമ്മൻ
(സി. എസ്. എസ്. എം, തിരുവല്ല) സന്ദേശം നൽകും. വൈകിട്ട് 3 മണിക്ക് യുവതരംഗം (ഭദ്രാസന യുവജന സമ്മേളനം) നടത്തപ്പെടും. ബ്രദർ ചെറി ജോർജ് ചെറിയാൻ
(യൂത്ത് ഫോർ മിഷൻ, മിഷ്യൻസ് ഇന്ത്യ, തിരുവല്ല) സന്ദേശം നൽകും.

ജനുവരി 25 ന് രാവിലെ 8 മണിക്ക് വിശുദ്ധ കുർബ്ബാന നടത്തപ്പെടും. അഭിവന്ദ്യ തോമസ് മാർ തിമഥിയോസ് എപ്പിസ്ക്കോപ്പാ നേതൃത്വം നൽകും. സമാപന സമ്മേളനത്തിൽ അഭിവന്ദ്യ ഡോ. യൂയാക്കിം മാർ കൂറിലോസ് സഫ്രഗൻ മെത്രാപ്പോലിത്താ അദ്ധ്യക്ഷത വഹിക്കുന്നതും അഭിവന്ദ്യ തോമസ് മാർ തിമഥിയോസ് എപ്പിസ്ക്കോപ്പാ മുഖ്യ സന്ദേശം നൽകുന്നതും ആയിരിക്കും.

കൺവൻഷന്റെ സുഗമമായ നടത്തിപ്പിനായി ഭദ്രാസന സെക്രട്ടറി റവ. ഡോ. തോമസ് സഖറിയ, ഭദ്രാസന ട്രഷറർ ശ്രീ. ജോജി ചെറിയാൻ എന്നിവരുടെ നേതൃത്വത്തിൽ വിവിധ ഉപസമിതികൾ പ്രവർത്തിക്കുന്നതായി റവ. ഡോ. ജോൺ ജോർജ് (ചെയർമാൻ, പബ്ലിസിറ്റി കമ്മിറ്റി)
ശ്രീ. ഷൈനു കോശി (കൺവീനർ, പബ്ലിസിറ്റി കമ്മിറ്റി) എന്നിവർ അറിയിച്ചു.

പ്രതിദിനം തുമ്പമൺ, ഇലന്തൂർ , ഇടയാറന്മുള , ചെങ്ങന്നൂർ, ഉമയാറ്റുകര, വെൺമണി , മാവേലിക്കര , കാർത്തികപ്പള്ളി എന്നീ എട്ടു സെന്ററുകളിൽ നിന്നുമായി 3000 ത്തിലേറെ ആളുകൾ പങ്കെടുക്കും.

09/01/2026

: ആകാശ പരിധികളെ അതിജീവിച്ച് അവർ സഫലമീയാത്രയിൽ പങ്കാളികളാവുന്നു. വിദ്യാഭ്യാസ വകുപ്പിലെ സമഗ്ര ശിക്ഷാ കേരള മിഷൻ്റെ പത്തനം തിട്ട ജില്ലാ കോഴഞ്ചേരി ബി. ആർ സി യുടെ ആഭിമുഖ്യത്തിൽ 19 ഭിന്നശേഷി കുട്ടികൾക്കായി വിമാന യാത്ര ഒരുക്കുന്നു. സാധാരണ കുട്ടികൾക്ക് ലഭിക്കുന്ന അവസരങ്ങൾ തങ്ങൾക്കും പ്രാപ്യമാണെന്ന തിരിച്ചറിവിലൂടെ ഈ കുട്ടികളിൽ വലിയ ആത്മ വിശ്വാസം വളർത്താൻ ഈ യാത്രാ പരിപാടി സഹായിക്കുമെന്ന് വിലയിരുത്തുന്നു. സമൂഹത്തിൻ്റെ മുഖ്യധാരയിൽ നിന്ന് പലപ്പോഴും മാറ്റി നിർത്തപ്പെടുന്നവരാണ് ഭിന്നശേഷി വിഭാഗക്കാർ. പൊതുവിടങ്ങൾ ഉപയോഗിക്കാൻ അവർക്കും കഴിയുമെന്നും മറ്റുള്ളവരുമായി ഇടപഴകുന്നതിലൂടെ സമൂഹ ചിന്താഗതിയിൽ മറ്റം വരുത്താൻ കഴിയുമെന്നും ബോധ്യപ്പെടാൻ സഫലമീ യാത്ര പരിപാടിയിലൂടെ കഴിയും. ഭിന്ന ശേഷിയുള്ള കുട്ടികളുമായി യാത്ര ചെയ്യാൻ പല രക്ഷിതാക്കളും മടിക്കുമ്പോൾ ഇത്തരം സംഘടിത യാത്രകൾ സുരക്ഷിത ബോധവും ആത്മവിശ്വാസവും നല്കുന്നതോടൊപ്പം തങ്ങളുടെ കുട്ടികൾക്ക് ലോകം ചുറ്റാൻ കഴിയുമെന്ന് അവരെ ബോധ്യപ്പെടുത്തുവാനും കഴിയും.
കോഴഞ്ചേരി ബി ആർ സി യുടെ കീഴിലുള്ള വിവിധ വിദ്യാലയങ്ങളിൽ നിന്ന് തെരഞ്ഞെടുത്ത 19 ഭിന്നശേഷി വിദ്യാർത്ഥികളും 3 രക്ഷിതാക്കളും 5 അദ്ധ്യാപകരുമടങ്ങുന്ന സംഘമാണ് സഫലമീയാത്ര പരിപാടിയിലുൾപ്പെടുന്നത്. ജനുവരി 12 തിങ്കളാഴ്ച രാവിലെ 10 മണിക്ക് കൊച്ചി വിമാനത്താവളത്തിൽ നിന്നും ആരംഭിച്ച് 10.50 ന് തിരുവനന്ത പുരം വിമാനത്താവളത്തിൽ എത്തി ച്ചേരുന്ന വിധമാണ് യാത്ര നിശ്ചയിച്ചിരിക്കുന്നത്. പ്രവാസിയും ലോക കേരള സഭാ അംഗവുമായ ജയിംസ് ചക്കാട്ട് ആണ് കുട്ടികളുടെ എല്ലാ യാത്ര , ഭക്ഷണ ചെലവുകളുൾപ്പടെ സഫലമീ യാത്ര സ്പോൺ ചെയ്തിരിക്കുന്നത്. യാത്രയിൽ പങ്കെടുക്കുന്ന കുട്ടികൾക്ക് യാത്രാ മംഗളങ്ങൾ നേരുവാൻ ഇന്ന് (9/ 1/ 2026 ) ഉച്ച കഴിഞ്ഞ് നാല് മണിക്ക് മാരാമൺ റിട്രീറ്റ് സെൻ്ററിൽ വച്ച് നടക്കുന്ന ചടങ്ങിൽ ജില്ലാ കളക്ടർ പ്രേം കൃഷ്ണൻ മുഖ്യാതിഥി ആയിരിക്കും. മുൻ എം.എൽ എ രാജു ഏബ്രഹാം , കോഴഞ്ചേരി ഗ്രാമ പഞ്ചായത്ത് പ്രസിഡൻ്റ് ജോമോൻ പുതുപ്പറമ്പിൽ എന്നിവർ ക്കൊപ്പം വിദ്യാഭ്യാസ വകുപ്പിലെ ഉന്നത അധികാരികളും പങ്കെടുക്കും. പന്ത്രണ്ടാം തീയതി തിരുവനന്തപുരം വിമാനത്താവളത്തിൽ നടക്കുന്ന സ്വീകരണ ചടങ്ങിൽ ഉന്നത വിദ്യാഭ്യാസമന്ത്രി ആർ ബിന്ദു , ആരോഗ്യ - വനിതാ ശിശുക്ഷേമ വകുപ്പ് മന്ത്രി വീണാ ജോർജ് , സർവ ശിക്ഷാ കേരളാ പ്രതിനിധികൾ എന്നിവർ പങ്കെടുക്കുമെന്ന് യാത്രാ കോ ഓർഡിനേറ്ററായ പ്രവാസി വെൽഫെയർ ബോർഡ് ഡയറക്ടർ ജോർജ് വർഗീസ് ഇടയാറന്മുള, എസ്. എസ് .കെ ജില്ലാ കോ ഓർഡിനേറ്റർ റെനി ആൻറണി , ജില്ലാ പ്രോഗ്രാം ഓഫീസർ ആരതി കൃഷ്ണ , സഫലമീ യാത്ര കോ ഓർഡിനേറ്റർ പ്രിയ പി നായർ എന്നിവർ അറിയിച്ചു.

07/01/2026

കുഴിക്കാല സി എം എസ് ഹയർ സെക്കണ്ടറി സ്കൂളിൽ സർഗ സന്ധ്യ
കോഴഞ്ചേരി: കഴിഞ്ഞ മൂന്ന് വർഷമായി കുഴിക്കാല സി എം എസ് ഹയർ സെക്കൻഡറി സ്കൂളിൽ നടന്നുവരുന്ന സർഗ്ഗസന്ധ്യയുടെ ഈ വർഷത്തെ ആഘോഷം 2026 ജനുവരി 9 വെള്ളിയാഴ്ച നടക്കും വൈകിട്ട് 6 30 മുതൽ രാത്രി പത്ത് വരെ സ്കൂൾ ഗ്രൗണ്ടിൽ വച്ചാണ് സംഘടിപ്പിച്ചിരിക്കുന്നത്.വൈകിട്ട് ഏഴിന് ആരോഗ്യമന്ത്രി വീണ ജോർജ് സർഗ്ഗസന്ധ്യ സീസൺ നാല് ഉദ്ഘാടനം ചെയ്യും. സി എസ് ഐ മധ്യകേരള മഹാ ഇടവക ബിഷപ്പ് റവ .തോമസ് ശമുവേൽ പൂർവ്വ അധ്യാപക വിദ്യാർത്ഥി സംഗമം ഉദ്ഘാടനം ചെയ്യും .കോമഡി താരങ്ങളായ എവിനും കെവിനും ചേർന്ന് കലാസന്ധ്യയുടെ ഉദ്ഘാടനം നിർവഹിക്കും .രാഷ്ട്രപതിയുടെ ശ്രേഷ്ഠ ദിവ്യാംഗ് ബാലക് പുരസ്കാരം നേടിയ മാസ്റ്റർ മുഹമ്മദ് യാസീൻ പരിപാടിയുടെ ഭാഗമായുള്ള ഭക്ഷ്യമേള ഉദ്ഘാടനം ചെയ്യും.സർഗ്ഗസന്ധ്യ പദ്ധതിയുടെ ഭാഗമായി ഈ വർഷം നടപ്പിലാക്കുന്ന സമ്പൂർണ്ണ സംതൃപ്ത വിദ്യാലയം എന്ന നവീന പദ്ധതി ആൻ്റോആൻറണി എം.പി ഉദ്ഘാടനം ചെയ്യുമെന്ന് പ്രധാന അധ്യാപകൻ ഷിബു ജോയ്, മല്ലപ്പുഴശ്ശേരി ഗ്രാമപഞ്ചായത്ത് പ്രസിഡണ്ട് ബെന്നി കുഴിക്കാല, സംഘാടകസമിതി ഭാരവാഹികളായ തോമസ്കുട്ടി .സി .ഈശോ ,എം അജീഷ്, ഷിബുകാഞ്ഞിക്കൽ ,അനിൽ മാത്യു എന്നിവർ അറിയിച്ചു.

07/01/2026

: മഹാനടൻ്റെ മാതൃഭാഗ്യം ലഭിച്ച ഇലന്തൂർ പുന്നയ്ക്കൽ തറവാട് ശാന്തകുമാരിയമ്മയുടെ വേർപാടിൽ വിതുമ്പുന്നുണ്ടാവും. മോഹൻലാലിൻ്റെ അച്ഛൻ വിശ്വനാഥൻ നായരുടെയും വീട് ഇലന്തൂരിൽ തന്നെയാണ്. ഇലന്തൂർ പരിയാരം മണപ്പാടത്ത് വീട്ടിൽ പാർവത്യാരായിരുന്ന രാമൻ നായരുടെച്ചും ഗൗരിക്കുട്ടിയമ്മയുടെയും മൂത്ത മകനായിരുന്നു വിശ്വനാഥൻ നായർ. വിശ്വനാഥൻ നായർക്ക് സെക്രട്ടറിയേറ്റിൽ ജോലി കിട്ടിയപ്പോൾ തന്നെ വിവാഹാലോചനകൾ തുടങ്ങി. കാരണവന്മാർ നടത്തുന്ന വിവാഹാലോചനകൾക്കിടയിൽ വിശ്വനാഥൻ നായർ തന്നെയാണ് ശാന്തകുമാരിയുടെ കാര്യം അച്ഛനോട് പറയുന്നത്. പ്രതാപത്തോടെ കഴിയുന്ന പുന്നയ്ക്കൽ തറവാട്ടിലേക്ക് തൻ്റെ സുഹൃത്തും പാർവത്യാരുമായ കല്ലിൽ കൃഷ്ണപിള്ളയെ വിവാഹ ആലോചനയുമായച്ചു. അങ്ങനെ പുന്നയ്ക്കൽ വീട്ടിൽ ഗൗരിക്കുട്ടിയമ്മയുടെയും ഡപ്യൂട്ടി തഹസിൽദാർ ആയിരുന്ന പത്മനാഭപിള്ളയുടെയും മകൾ ശാന്തകുമാരിയെ വിശ്വനാഥൻ നായർ ജീവിത സഖിയാക്കി. താമസം തിരുവനന്തപുരത്തേക്ക് മാറ്റിയെങ്കിലും തൻ്റെ മൂത്തമകൻ പ്യാരിലാലിനേയും രണ്ടാമത്തെ മകൻ മോഹൻലാലിനേയും പ്രസവിക്കാൻ പുന്നയ്ക്കൽ തറവാട്ടിലാണെത്തിയത്. അങ്ങനെ മലയാളത്തിൻ്റെ മഹാനടൻ ഇലന്തൂരിൻ്റെ മണ്ണിൽ പിറന്നു . പിച്ചവെച്ചു. പിന്നീട് മോഹൻലാലിൻ്റെ ബാല്യകൗമാര കാലം തിരുവനന്തപുരത്തായിരുന്നെങ്കിലും ഇലന്തൂരുമായി പൊക്കിൾകൊടി ബന്ധമുണ്ടാവാൻ പുന്നയ്ക്കൽ തറവാട്ടിലെ ശാന്തകുമാരിയമ്മ കാരണമായി. ശാന്തകുമാരി വളർന്നത് ഇലന്തൂരിലും പത്തനംതിട്ടയിലുള്ള അച്ഛൻ്റെ വീട്ടിലുമായിട്ടായിരുന്നു. ഇലന്തൂർ പഞ്ചായത്ത് മുൻ പ്രസിഡൻ്റായിരുന്ന പുന്നയ്ക്കൽ പി.എസ് ശ്രീധരൻ പിള്ളയുടെ സഹോദരിയായ ഗൗരിക്കുട്ടിയമ്മയുടെ മകളാണ് മോഹൻലാലിൻ്റെ മാതാവായ ശാന്തകുമാരിയമ്മ . 14 വർഷമായി ആരോഗ്യപ്രശ്നങ്ങളോടെ കഴിയുകയായിരുന്നു ശാന്തകുമാരി.
രണ്ട് വർഷം മുൻപ് കുടുംബക്കാവിലെ പൂജകളിൽ പങ്കെടുക്കാനും അമ്മയ്ക്കായി പ്രാർത്ഥിക്കാനുമായി മോഹൻലാൽ ഇവിടെ എത്തിയിരുന്നു.

ശാന്തകുമാരിയമ്മയുടെ സഹോദരൻ തലയോലപ്പറമ്പ് ദേവസ്വം ബോർഡ് കോളജ് റിട്ട പ്രിൻസിപ്പൽ പി എസ് ഭാസ്കരൻ പിള്ളയുടെ മകൻ ആണ് പ്രശസ്ത സിനിമാ സംവിധായകനും തിരക്കഥാകൃത്തുമായ ബി. ഉണ്ണികൃഷ്ണൻ.
പുന്നയ്ക്കൽ തറവാട്ടിൽ ഇപ്പോൾ ആരും താമസമില്ല .ശാന്തകുമാരിയമ്മ യുടെ അമ്മാവൻ ശ്രീധരൻ പിള്ളയുടെ മക്കൾ ശ്രീലേഖയും ശ്രീലതയും തറവാട് സംരക്ഷിച്ചു പോരുന്നു . സാംസ്കാരിക ഗ്രാമമായ ഇലന്തൂരിൻ്റെ മണ്ണിൽ മലയാളത്തിൻ്റെ മഹാനടൻ പിച്ചവെയ്ക്കുന്നതിന് കാരണക്കാരിയായ സുകൃതം ചെയ്ത ശാന്തകുമാരിയമ്മയ്ക്ക് പടേനി ഗ്രാമത്തിൻ്റെ പ്രണാമം.
എൻ്റെ നാടിൻ്റെ ആദരാഞ്ജലികൾ

16/11/2025

ആറന്മുള പാർത്ഥസാരഥി ക്ഷേത്രത്തിൽ 12 കളഭവും അവതാര ചാർത്തും .:
ആറന്മുള പാർത്ഥസാരഥി ക്ഷേത്രത്തിലെ ഈ വർഷത്തെ 12 കളഭം ഉത്സവവും ദശാവതാര ചാർത്തും 17 മുതൽ 28 വരെ നടക്കും.എല്ലാദിവസവും രാവിലെ 4.30 ന് നിർമ്മാല്യദർശനം,നിറമാല, തിരുക്കുറൽ ജപം ,ഏഴിന് ഭാഗവത പാരായണം 12ന് കളഭാഭിഷേകം എന്നിവ നടക്കും.17ന് വൈകിട്ട് അഞ്ചിന് കുട്ടികളുടെ പഞ്ചവാദ്യം അരങ്ങേറ്റം .ആറിന് മത്സ്യാവതാരദർശനം, 6 30 ന് വത്സൻ തില്ലങ്കേരിയുടെ പ്രഭാഷണം.7 30ന് അന്നദാനം .എട്ടിന് മോഹിനിയാട്ടം. 18ന് വൈകിട്ട് ആറുമണിക്ക് കൂർമാവതാരദർശനം , 7 30ന് പി. എം വ്യാസൻ്റെ പ്രഭാഷണം .എട്ടിന് തിരുവാതിര കളി.19ന് വൈകിട്ട് ആറിന് വരാഹാവതാരദർശനം. 6 30ന് ആർ ഗോപാലകൃഷ്ണൻ കൊടുമണ്ണിൻറെ പ്രഭാഷണം. 20ന് വൈകിട്ട് ആറിന് നരസിംഹാവതാരദർശനം .6 30ന് ഡോ .എം എം ബഷീറിൻറെ പ്രഭാഷണം. എട്ടിന് നൃത്ത നൃത്യങ്ങൾ .21ന് വൈകിട്ട് ആറിന് വാമനാവതാരദർശനം, 6 30ന് ഒ എ സ് സതീഷിന്റെ പ്രഭാഷണം. എട്ടിന് നൃത്ത നൃത്യങ്ങൾ.22ന് വൈകിട്ട് 6ന് പരശുരാമാവതാരദർശനം.6 30ന് കെ പി ശശികലയുടെ പ്രഭാഷണം.എട്ടിന് ഭരതനാട്യ കച്ചേരി.23ന് വൈകിട്ട് 6 ന് ശ്രീരാമാവതാരദർശനം.6 30ന് ആർ വി ബാബുവിന്റെ പ്രഭാഷണം. എട്ടിന് കഥകളി.24ന് വൈകിട്ട് 6 30ന് ബലരാമ അവതാരദർശനം.6 30ന് എം എ കബീറിന്റെ പ്രഭാഷണം.എട്ടിന് നൃത്ത നൃത്യങ്ങൾ.25ന് വൈകിട്ട് അഞ്ചിന് സോപാനസംഗീതം.ആറിന് ശ്രീകൃഷ്ണാ അവതാരദർശനം. 6 30ന് സ്വാമി ശക്തി ശാന്താനന്ദ മഹർഷി യുടെ പ്രഭാഷണം.എട്ടിന് ചെണ്ടമേളം.26ന് വൈകിട്ട് നാലിന് അഷ്ടപദി സമർപ്പണം .ആറിന് മോഹിനി ദർശനം.6 30ന് വിദ്യാസാഗർ ഗുരുമൂർത്തിയുടെ പ്രഭാഷണം.വൈകിട്ട് 8 ന് ഭജൻസ് .27ന് വൈകിട്ട് ആറിന് ഗജേന്ദ്രമോക്ഷം ദർശനം 6 30ന് ഭാഗവത ഹംസം ഉഷ എസ് പിള്ളയുടെ പ്രഭാഷണം ,എട്ടിന് മാൻഡുലിൻകച്ചേരി.28ന് വൈകിട്ട് 5:30ന് കാഴ്ച ശ്രീബലി ,സേവ .ആറിന് പാർത്ഥസാരഥി ദർശനം.7 30ന് രാജേഷ് നാദാപുരത്തിന്റെ പ്രഭാഷണം എട്ടിന് ഭക്തിഗാനാഞ്ജലി എന്നിവ നടക്കുമെന്ന് ഉപദേശക സമിതി ഭാരവാഹികളായ വിജയൻനടമംഗലത്ത് , ശശി കണ്ണങ്കേരിൽ , മുരുകൻ ആർ .ആചാരി, ശ്രീജിത്ത് വടക്കേടത്ത്, നാരായണൻകുട്ടി എന്നിവർ അറിയിച്ചു

02/11/2025

സിപിഎം ലോക്കൽ കമ്മിറ്റിയംഗം ബി ജെ പി യിൽ ചേർന്നു.
: സി പി എം അയിരൂർ ലോക്കൽ കമ്മിറ്റിയംഗവും ഇരവിപേരൂർ തിരുവല്ല ഈസ്റ്റ് കോപ്പറേറ്റീവ് ബാങ്ക് ഡയറക്ടർ ബോർഡംഗവുമായിരുന്ന ടി എൻ ചന്ദ്രശേഖരൻ നായർ ബി ജെ പിയിൽ ചേർന്നു. ബി ജെ പി നിയോജക മണ്ഡലം ജനറൽ സെക്രട്ടറി ,കർഷക മോർച്ച ജില്ലാ വൈസ് പ്രസിഡൻ്റ് തുടങ്ങിയ ചുമതലകൾ വഹിച്ചിട്ടുള്ള ചന്ദ്രശേഖരൻ നായർ നാലു വർഷം മുൻപാണ് ബി ജെ പി വിട്ട് സി പി എമ്മിൽ ചേർന്നത്.ഇന്നലെ രാവിലെ ഇടപ്പാവൂരിൽ കൂടിയ ബി ജെ പി ഏഴാം വാർഡ് കൺവൻഷനിൽ വെച്ച് ബിജെ.പി. ജില്ലാ പ്രഭാരി അഡ്വ. ബി രാധാകൃഷ്ണമേനോൻ ചന്ദ്രശേഖരൻ നായരെ ഷാളണിയിച്ചു സ്വീകരിച്ചു. യോഗത്തിൽ വാർഡ് കൺവീനർ പ്രിയംവദാ ശിവകുമാർ അദ്ധ്യക്ഷത വഹിച്ചു. , , ജില്ലാ വൈസ് പ്രസിഡൻ്റ് . അജിത് പുല്ലാട് യോഗം ഉൽഘാടനം ചെയ്തു. ഏഴാം വാർഡ് മെമ്പർ എൻ. ജി. ഉണ്ണികൃഷ്ണൻ , ബിജെപി ജില്ലാ സെക്രട്ടറി പി.വി അനോജ് കുമാർ , അയിരൂർ മണ്ഡലം പ്രസിഡൻ്റ് സിനു എസ് പണിക്കർ, പഞ്ചായത്ത് കമ്മിറ്റി പ്രസിഡൻ്റ് 'അജയ് ഗോപിനാഥ്, ജില്ലാ വൈസ് പ്രസിഡൻ്റ്ബിന്ദു പ്രസാദ്, ഗ്രാമ പഞ്ചായത്ത് അംഗം അനുരാധ ശ്രീജിത്ത് ,പഞ്ചായത്ത് സംയോജക് ഹരികൃഷ്ണൻ, ശ്യാംകുമാർ , ബൈജു കെ എന്നിവർ സംസാരിച്ചു.

02/11/2025

കോഴഞ്ചേരി ഉപജില്ലാ കലോത്സവം നവംബർ 3 മുതൽ 5 വരെ ആറന്മുളയിൽ നടക്കും. രാവിലെ 9.30ന് ആറന്മുള ഗവ.വൊക്കേഷണൽ ഹയർ സെക്കൻഡറി സ്കൂളിൽ തയാറാക്കിയിരിക്കുന്ന പ്രധാന വേദിയിൽ മന്ത്രി വീണാ ജോർജ് ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ജോർജ്ജ് ഏബ്രഹാം അദ്ധ്യക്ഷത വഹിക്കും. ആർ.അജയകുമാർ, ജെ. ഇന്ദിരാദേവി, സാലി ഫിലിപ്പ് , ജയശ്രീ മനോജ് , കെ.ആർ സന്തോഷ് , മിനി സോമരാജൻ , ജോർജ് തോമസ് തുടങ്ങിയവർ സംസാരിക്കും. ആറന്മുള വിച്ച് എസിന് പുറമെ മല്ലപ്പുഴശേരി എം.ടി.എൽ.പി സ്കൂളും ചേർന്നാണ് കലോത്സവം സംഘടിപ്പിക്കുന്നത്. 61 സ്കൂളുകളിൽ നിന്നായി 2500ലധികം കുട്ടികൾ കലോത്സവത്തിൽ പങ്കെടുക്കും. ഏഴ് വേദികളിലായി നടക്കുന്ന കലോത്സവത്തിൽ 264 ഇനം മത്സര ഇനങ്ങളുണ്ടാവും. 5ന് വൈകിട്ട് 7ന് നടക്കുന്ന സമാപന സമ്മേളനം ആന്റോ ആന്റണി എം.പി ഉദ്ഘാടനം ചെയ്യും. ജില്ലാ പഞ്ചായത്ത് അംഗം ഓമല്ലൂർ ശങ്കരൻ അദ്ധ്യക്ഷത വഹിക്കും . കുമാരി ദേവനന്ദ രാജീവ് , മല്ലപ്പുഴശ്ശേരി ഗ്രാമപഞ്ചായത്ത് പ്രസിഡന്റ് മിനി ജിജു ജോസഫ് തുടങ്ങിയവർ സംസാരിക്കും. കലോത്സവത്തിന്റെ വിജയത്തിനായി വിവിധ സബ് കമ്മിറ്റികളുടെ നേതൃത്വത്തിൽ ഒരുക്കങ്ങൾ പൂർത്തിയായ തായി ഉപജില്ലാ വിദ്യാഭ്യാസ ഓഫീസർ സന്ധ്യ എസ് , ജനറൽ കൺവീനർ ഇന്ദു എ. ആർ , സ്വീകരണ കമ്മിറ്റി കൺവീനർ അനിൽ കുമാർ സി.കെ , പ്രോഗ്രാം കമ്മിറ്റി കൺവീനർ ബിറ്റി അന്നമ്മ തോമസ് , ബിജു ടി നായർ എന്നിവർ പത്രസമ്മേളനത്തിൽ അറിയിച്ചു.

19/10/2025

കേരള ജനതയെ ഐശ്വര്യ പൂർണമായ ജീവിത ക്രമത്തിലേക്കു നയിക്കുവാൻ വേദത്തിലേക്ക് മടങ്ങുവാൻ തയ്യാറാവണമെന്ന് കൊളത്തൂർ അദ്വൈതാശ്രമം മഠാധിപതി സ്വാമി ചിദാനന്ദപുരി അഭിപ്രായപ്പെട്ടു. സ്വാമി വിവേകാനന്ദനും ഭാരതീയ ഋഷി പരമ്പരയിൽ പെട്ട സന്യാസി സമൂഹത്തിനോട് ആവശ്യപ്പെട്ടതാണത്. വേദത്തെ സമൂഹത്തിലേക്ക് വാരി വിതറൂ എന്നായിരുന്നു ആ ആഹ്വാനം. കേരളത്തിനാവശ്യം നശീകരണത്തിൻ്റെ നവകേരളമല്ല. വേദ സംസ്കാരത്തെ വളച്ചൊടിച്ച് അന്ധകാരാധിഷ്ഠിതമായ അനാചാരങ്ങൾക്കിടയാക്കിയ മധ്യകാല കേരളഘട്ടമല്ല ആഹ്വാനം കൊണ്ട് ഉദ്ദേശിക്കുന്നത്. യഥാർത്ഥ വേദ സത്ത ഉൾക്കൊണ്ടു കൊണ്ടു തന്നെയാണ് ചട്ടമ്പി സ്വാമിയും ശ്രീ നാരായണ ഗുരുവും അയ്യാസ്വാമികളും മന്നത്ത് പത്മനാഭനും അയ്യൻകാളിയും പണ്ഡിറ്റ് കറുപ്പനും ഇരുണ്ട നൂറ്റാണ്ടുകളെ അതിജീവിക്കാൻ സമൂഹത്തെ പ്രാപ്തമാക്കിയത് . സ്വത്വത്തെ തിരിച്ചറിഞ്ഞ് ആചരണത്തിലൂടെ സംസ്കാരത്തെ തലമുറകളിലേക്ക് പകർന്നു നല്കുന്ന കുടുംബാന്തരീക്ഷം കേരളത്തിലെ ഹിന്ദു സമൂഹം വീണ്ടെടുക്കണം. ഒപ്പം. വിദ്യാഭ്യാസവും അധ്യാനവും ദേശസ്നേഹവും ഉള്ള തലമുറയാണ് വേണ്ടത്. എല്ലാവരിലും ഈശ്വരനെ കണ്ടെത്താൻ കഴിവുള്ള ഹിന്ദു നിലനില്ക്കുന്നത് കൊണ്ടാണ് ഭാരതത്തിൽ മതേതരത്വം നിലനില്ക്കുന്നത്. ഹിന്ദു എന്ന തായ് വേരില്ലെങ്കിൽ ജാതി ഇല്ല എന്ന് ജാതി അഭിമാനികൾ മനസിലാക്കണം. ഇന്നും ആരാധനാലയങ്ങളിൽ പരസ്പരം കയറാനും കയറ്റാനും തയ്യാറാവാത്ത സമൂഹങ്ങൾ മതത്തിൻ്റെ പേരിൽ ഒന്നിച്ചു നില്ക്കുമ്പോൾ ആരാധാനാലയങ്ങളിൽ ഒന്നിച്ചു പോകുന്ന ഹിന്ദു സമൂഹം ഭിന്നിച്ചു നില്ക്കുന്ന അവസ്ഥയാണ് കേരളത്തിലുള്ളത്. ഇത് മാറണം. സമ്പത്ത് സന്താനം , സംസ്കാരം , സംഘടിത ബലം ഇവ ആർജിച്ച് കേരളത്തിലെ ഹിന്ദു സമൂഹം ഉണർവ് വീണ്ടെടുക്കണമെന്നും അദ്ദേഹം അഭിപ്രായപ്പെട്ടു. മാർഗ്ഗദർശകമണ്ഡലത്തിൻ്റെ ആഭിമുഖ്യത്തിൽ കേരളത്തിലെ സന്യാസി ശ്രേഷ്ഠൻമാർ നയിക്കുന്ന ധർമ്മ സന്ദേശ യാത്രയോടനുബന്ധിച്ച് കോഴഞ്ചേരിയിൽ നടന്ന ഹിന്ദു മഹാ സംഗമത്തിൽ ധർമ്മ സന്ദേശം നല്കി സംസാരിക്കുകയായിരുന്നു അദ്ദേഹം.
വള്ളിക്കോട് ശ്രീരാമകൃഷ്ണാശ്രമം മഠാധിപതി ആപ്തലോകാനന്ദ സ്വാമി അദ്ധ്യക്ഷത വഹിച്ചു. സ്വാമിനി ദേവി ജ്ഞാനാഭ നിഷ്ഠനന്ദ ഗിരി ആ മുഖ പ്രഭാഷണം നടത്തി. സ്വാമി പ്രജ്ഞാനന്ദ തീർത്ഥ പാദർ, മഹാ മണ്ഡലേശ്വർ പ്രഭാകരാനന്ദ സരസ്വതി , ബ്രഹ്മ കുമാരി ജ്യോതി ബിന്ദു ബഹൻ , സ്വാമി ചിദാനന്ദപുരി മഹാരാജ് , സ്വാമി സർവാത്മാനന്ദ ,സ്വാമിനി ഭവ്യാമൃത പ്രാണ , മാതാജി കൃഷ്ണാനന്ദ പൂർണ്ണിമ എന്നിവർ സംസാരിച്ചു. യാത്രയുടെ ഭാഗമായി രാവിലെ ആറന്മുളയിൽ ഹിന്ദു നേതൃസമ്മേളനവും നടന്നു.

18/10/2025