28/01/2025
ഇടിക്കൂട്ടിൽ മെഡലുകൾ വാരിക്കൂട്ടി അട്ടപ്പാടിയിലെ കുരുന്നുകൾ
സംസ്ഥാന കരാട്ടെ ചാമ്പ്യൻഷിപ്പിൽ മെഡൽ നേട്ടവുമായി അട്ടപ്പാടിയിലെ കുരുന്നുകൾ. തിരുവനന്തപുരം ജിമ്മി ജോർജ്ജ് സ്റ്റേഡിയത്തിൽ നടന്ന 45-ാമത് സംസ്ഥാന കരാട്ടെ ചാമ്പ്യൻഷിപ്പിലാണ് കുട്ടികൾ മെഡൽ നേട്ടം കൈവരിച്ചത്.
സബ് ജൂനിയർ, ജൂനിയർ, സീനിയർ, കേഡറ്റ്, അണ്ടർ 21 എന്നീ വിഭാഗങ്ങളിലായി നടന്ന മത്സരങ്ങളിൽ 2200 പേർ മത്സരിച്ചിരുന്നു. ഇവർക്കിടയിലാണ് ആത്മവിശ്വാസം നിറഞ്ഞ പ്രകടനത്തോടെ കുട്ടികൾ മെഡലുകൾ കരസ്ഥമാക്കിയത്. പ്രതിസന്ധികൾ തരണം ചെയ്ത് നേടിയ വിജയത്തിന് തിളക്കമേറെയാണെന്ന് കുട്ടികൾ പറഞ്ഞു. തിരുവനന്തപുരത്തേക്ക് പോകുവാൻ മതിയായ സാമ്പത്തികമില്ലാത്തതിനാൽ പലരും മടിച്ചു നിന്നിരുന്നു. ഇവർക്ക് ആദ്യാവസാനം മനോധൈര്യം പകർന്നത് പരിശീലകരായ ജ്ഞാന സൗന്ദരവും ഷൈജു മോഹനനുമാണ്.
എൻ.എസ്. അർജുൻ, ജെനി. ജെ, മീനാക്ഷി, സാസ്വിക എസ്.പി., അഖിൽ എം, നിരഞ്ജന, അഹല്യ എന്നിവരാണ് അട്ടപ്പാടിക്ക് വേണ്ടി മെഡൽ നേട്ടം കൈവരിച്ചത്. വിവിധ വിഭാഗങ്ങളിലായി ഒമ്പത് മെഡലുകളാണ് ഇവർ വാരിക്കൂട്ടിയത്. രണ്ട് ഗോൾഡ്, അഞ്ച് വെള്ളി, രണ്ട് വെങ്കലം എന്നീ മെഡലുകൾ കരസ്ഥമാക്കിയാണ് ടീം അട്ടപ്പാടിയിലേക്ക് മടങ്ങുന്നത്. യൂണിവേഴ്സൽ കരാട്ടെ അക്കാദമി വഴിയാണ് കുട്ടികൾക്ക് പരിശീലനം നൽകിയത്.
