20/07/2025
FM ଛାତ୍ରୀଙ୍କ ବାପାଙ୍କ ଚିଠି ନେଇ ମୁହଁ ଖୋଲିଲେ ସଦର ବିଧାୟକ, କାହା ଉପରକୁ ଆଙ୍ଗୁଠି ଉଠାଇବା ଆଗରୁ ସତ୍ୟତା ପରଖିବା ଦରକାର
ବାଲେଶ୍ୱର ଜିଲ୍ଲା ଫକୀରମୋହନ କଲେଜ ଛାତ୍ରୀ ଆତ୍ମାହୁତି ଘଟଣାରେ ତିନୋଟି ପୃଥକ ପୃଥକ ଟିମ୍ ତଦନ୍ତ କରୁଛି । ଏହି ସମୟରେ ଛାତ୍ରୀଙ୍କ ବାପା ଆଇସିସିକୁ ପୂର୍ବରୁ ଲେଖିଥିବା ଏକ ଚିଠି ସାମ୍ନାକୁ ଆସିଛି । ଏହି ଚିଠିକୁ ନେଇ ଏବେ ରାଜନୀତି ଜୋର ଧରିଥିବା ବେଳେ ମୁହଁ ଖୋଲିଛନ୍ତି ବାଲେଶ୍ବର ସଦର ବିଧାୟକ ମାନସ ଦତ୍ତ ।
ସେ କହିଛନ୍ତି, କାହା ଉପରକୁ ଆଙ୍ଗୁଠି ଉଠାଇବା ଆଗରୁ ସତ୍ୟତା ପରଖିବା ଦରକାର । ଏହି ଚିଠି ୭ ତାରିଖରେ ମୃତକଙ୍କ ବାପା ଆଇସିସିଙ୍କୁ ଦେବାର ଅର୍ଥ ସେ ପୋଲିସକୁ କିଛି ଅଭିଯୋଗ କରିନାହାନ୍ତି । ଆଡ଼ିସନାଲ ଏସ୍ପି ତାଙ୍କୁ ଫୋନ୍ ମାଧ୍ୟମରେ ଗତ ୩୦ତାରିଖରେ ଖବର ଦେଇଥିଲେ । ପୋଲିସ ଅଭିଯୋଗ ନପାଇ କେଶ କରିନଥିଲା ଖାଲି ନିଜ ଆଡୁ ଷ୍ଟେସନ ଡାଏରୀ କରିଥିଲା । ସେ ଝିଅ ମଧ୍ୟ ମୋ ପାଖକୁ ଆଦୌ ଆସିନଥିଲା କି ଅଭିଯୋଗ କରିନଥିଲା ।
ଭୋଗରାଇ ବିଧାୟକ ଯେଉଁ ଅଭିଯୋଗ ଆଣିଛନ୍ତି ତା ଉପରେ ସେ କହିଛନ୍ତି, ଝିଅର ବାପା ତାଙ୍କର ଯଦି ବନ୍ଧୁ ତାହେଲେ ଏତେ ବଡ଼ ଘଟଣା କିପରି ଜାଣିପାରିଲେ ନାହିଁ । ଅନ୍ୟକୁ ଦୋଷ ଦେବା ଆଗରୁ ନିଜକୁ ବି ସମୀକ୍ଷା କରିବାର ଆବଶ୍ୟକତା ରହିଛି ବୋଲି ମାନସ ଦତ୍ତ କହିଛନ୍ତି ।
ସୂଚନାଯୋଗ୍ୟ ଯେ, ଆଇସିସି ଟିମ୍କୁ ଗତ ୭ ତାରିଖରେ ମୃତକଙ୍କ ବାପା ଏକ ଚିଠି ମାଧ୍ୟମରେ ଝିଅ ବିଷୟରେ ନିବେଦନ କରିଥିଲେ । ସେଥିରେ ତାଙ୍କର ଝିଅ କଲେଜରେ ଅନୁପସ୍ଥିତର କାରଣ ମଧ୍ୟ ଉଲ୍ଲେଖ କରିଥିଲେ । ଗତ ୩୦ ତାରିଖରେ ଫୋନ୍ ମାଧ୍ୟମରେ ସେ ଜାଣିବାକୁ ପାଇଥିଲେ ଯେ, ତାଙ୍କ ଝିଅଙ୍କୁ ପରୀକ୍ଷା ଦେବାରୁ ବାରଣ କରାଯାଇଛି ଓ ତାଙ୍କୁ ଆଇସିସି ଟିମ୍ ଆଗରେ ଉପସ୍ଥିତ ହେବାକୁ କୁହାଯାଇଛି । ମା’ଙ୍କ ଅପରେସନ ପାଇଁ ଝିଅ ୨୦/୨୨ ଦିନ କ୍ଲାସ୍ରେ ଅନୁପସ୍ଥିତ ଥିବା ବାପା ଚିଠିରେ ଉଲ୍ଲେଖ କରିଥିଲେ । ଏପରିକି ଏଚଓଡ଼ି ତାଙ୍କୁ ବିରକ୍ତି ପ୍ରକାଶ କରି ଧମକ ଚମକ ଦେଉଥିବା ମଧ୍ୟ ସେ ଚିଠିରେ ଲେଖିଥିଲେ । ତାର ଦୋଷତ୍ରୁଟି କ୍ଷମା କରି ତାଙ୍କୁ କୋର୍ସ ସାରିବାକୁ ସେ ନିବେଦନ ମଧ୍ୟ କରିଥିଲେ ।
