05/01/2026
#ခရစ်တော်ယေရှု၌ ရှိသော စိတ်သဘောကို သင်တို့၌လည်း ရှိစေကြလော့။” ဖိလိပ္ပိ ၂:၅
#ဒီ အဖွား (ခရစ်ယာန် ဟုတ်၊ မဟုတ်မသိပေမဲ့) သူမ၏ စိတ်သဘောသည် ဝိညာဥ်သဘော ပြည့်ဝတဲ့ သူပါ..
ကိုးရီးနိုင်ငံ၊ ဘူဆန်မြို့က Kyungsung University တက္ကသိုလ်မှာ ပညာသင်ကြားနေတဲ့ သီရိလင်္ကာ နိုင်ငံသူလေးက ကိုယ့်ကျောင်းစားရိတ် ကိုယ်ရှာပြီး တက်နေရတဲ့သူပါ။ ကျောင်းချိန်ပြင်ပမှာ သူက ရသမျှအလုပ်တွေကို လုပ်ရင်းနဲ့ ကျောင်းလခအတွက် ခြစ်ကုပ်ကပ်စုရပါတယ်။ လပေါင်းများစွာ ကျောင်းတဖက်နဲ့ အလုပ်လုပ်ပြီး စုဆောင်းခဲ့တာကြောင့် ဒီ Semester အတွက် ကျောင်းလခပေးဖို့ သူ့မှာ အလုံအလောက်ရှိသွားပါပြီ။
ဒီလိုနဲ့ ကျောင်းလခသွင်းဖို့ Deadline မရောက်ခင် တစ်ရက်အလို ၂၀၂၅ ခုနှစ် ဩဂုတ်လ ၂၆ ရက်နေ့မှာ သူက ကျောင်းလခသွင်းဖို့အတွက် သူ့စုဆောင်းထားသမျှ ပိုက်ဆံ ဝမ် ၁.၁၃ သန်းကို (အဲ့ဒီတုန်းက ပေါက်ဈေးနဲ့ ဒေါ်လာ ၈၁၅ ခန့်) စာအိတ်လေးထဲ ထည့်ပြီး အိမ်ကနေ ကျောင်းကို ထွက်လာခဲ့ပါတယ်။ သူကျောင်းနားကို မရောက်ခင်လေးမှာဘဲ သူ့ပိုက်ဆံထည့်ထားတဲ့အိတ်ကလေး ကျပျောက်သွားပြီဆိုတာကို သတိထားမိသွားတဲ့အတွက် အရမ်းစိတ်ပူသွားခဲ့ပါတယ်။ အဲ့ဒီအချိန်က မနက် ၉ နာရီခွဲလောက်ဘဲ ရှိပါသေးတယ်။ သိသိချင်းမှာဘဲ ချက်ချင်းလာရာလမ်းအတိုင်း အပြေးအလွှား လိုက်ရှာခဲ့ပေမယ့် မတွေ့တော့ပါဘူး။
ဒါကြောင့် သီရိလင်္ကာနိုင်ငံသူလေးက အနီးဆုံး ရဲစခန်းဖြစ်တဲ့ Daeyeon ရဲစခန်းကို ပြေးသွားပြီး သူ့ကျောင်းလခသွင်းဖို့ ပိုက်ဆံကျပျောက်သွားလို့ ရှာကူပေးဖို့ သွားပြီး အကူအညီတောင်းခဲ့ပါတယ်။ ကျောင်းလခက မနက်ဖြန် နောက်ဆုံးထား သွင်းရမှာဖြစ်ပါတယ်။ မသွင်းနိုင်ရင် သူ့ပညာရေး ရှေ့ဆက်ဖို့ အခက်အခဲဖြစ်သွားရုံတင်မက ကျောင်းသားဗီဇာနဲ့ နေနေတဲ့သူ့အတွက် ကိုးရီးယားမှာ ဆက်နေနိုင်ဖို့လဲ အခက်အခဲဖြစ်သွားမှာ ဖြစ်တဲ့အတွက် ကျောင်းသူလေးက ငိုနေရုံမှအပ ဘာမှ မတတ်နိုင်တော့ပါဘူး။
မိဘက မထောက်ပံ့နိုင်လို့ နိုင်ငံခြားမှာ ကိုယ့်ဒူးကိုယ်ချွန် အလုပ်လုပ်ပြီး ကျောင်းတက်နေရတဲ့သူတစ်ယောက် အနေနဲ့ ဒေါ်လာ ၈၁၅ နဲ့ ညီမျှတဲ့ပိုက်ဆံကို တစ်ရက်အတွင်း ဘယ်လိုမှ ပြန်မရှာနိုင်ဘူး။ နိုင်ငံခြားမှာ ဒီလောက်ပမာဏရှိတဲ့ ပိုက်ဆံ ချေးငှားပေးမယ့်သူလဲ မရှိဘူး။ ဒီပုံစံအတိုင်းဆိုရင် ကျောင်းလခကို အချိန်မှီ မသွင်းနိုင်တာကြောင့် မကြာခင်ဘဲ သူ့ဗီဇာလဲ ရပ်ဆိုင်းသွားရတော့မှာ ဖြစ်တယ်။ ဒါကြောင့်မို့လို့ ကျောင်းသူလေးက ရဲစခန်းမှာ အကြာကြီး ထိုင်ငိုနေခဲ့တယ်။
အိမ်ကို ပြန်ရောက်တဲ့အခါမှာလဲ ဒီလောက်များတဲ့ ပမာဏကို ကောက်ရတဲ့သူက ပြန်ပေးမှာ မဟုတ်တော့ဘူးလို့ ယုံကြည်နေတဲ့အတွက် တနေကုန် မစားနိုင် မသောက်နိုင်ဖြစ်ပြီး ငိုနေခဲ့တယ်။ မမြော်လင့်ဘဲ နေ့လည် ၂း၃၀ မှာ ရဲစခန်းက သူ့ကို ဖုန်းဆက်လာခဲ့တယ်။ ရဲစခန်းကို Jung Soon-ja ဆိုတဲ့ အသက် ၆၀ အရွယ် အမျိုးသမီးတစ်ယောက် စာအိတ်လေးတစ်ခုကိုင်ပြီး ရောက်လာခဲ့တယ်။ အဲ့ဒီစာအိတ်မှာက ကျောင်းသူလေးရဲ့ စုဆောင်းထားတဲ့ပိုက်ဆံတွေအပြည့်နဲ့။ ကျောင်းသူလေးက ဒီသတင်းကို ရတာနဲ့ ချက်ခြင်းဘဲ ရဲစခန်းကို ပြေးသွားခဲ့တယ်။ အဲ့ဒီမှာ အဖွား Jung Soon Ja က စာအိတ်ကလေးကိုင်ပြီး အသင့်စောင့်နေခဲ့တယ်။ သူရောက်လာတာနဲ့ သူ့ကို စာအိတ်ကလေး ကမ်းပေးခဲ့တယ်။ ကျောင်းသူလေးက ဝမ်းသာလွန်းလို့ အဖွားကို အကြိမ်ကြိမ်ဖက်ငိုပြီး ကျေးဇူးတင်စကားကို တုန်တုန်ယင်ယင်နဲ့ အထပ်ထပ်အခါခါ ပြောခဲ့တယ်။
ကျောင်းသူလေးက “ဒီကမ္ဘာကြီးမှာ အဖွားလို လူမျိုးလဲ ရှိသေးတယ်ဆိုတာ မသိခဲ့ဘူး” လို့ ကျေးဇူးတင်စကားပြောရင်းနဲ့ ပြောတဲ့အခါ အဖွား Jung Soon Ja က ကလေးမလေးကို ပြန်ထွေးပွေ့လိုက်ပြီး ကောက်ရတဲ့ ဘယ်သူမဆို သူ့လိုဘဲ လုပ်မှာပါလို့ ပြန်ပြောခဲ့တယ်။
အလုပ်ကို သွားတဲ့လမ်းမှာ ဒီပိုက်ဆံအိတ်ကို ကောက်ရတဲ့အချိန်မှာ အဖွားက ဒီလောက်များတဲ့ ပိုက်ဆံကို ကျပျောက်ခဲ့တဲ့သူက အရမ်းကို ဝမ်းနည်းနေမယ်၊ စိတ်ပူပင်သောကရောက်နေမယ်လို့ တွေးတယ်။ ဒါကြောင့်မို့လို့ သူ့အလုပ်ချိန် ပြီးတာနဲ့ ရဲစခန်းကို သွားပြီးပေးခဲ့တာပါတဲ့။ ဒီလိုပြန်ပေး လိုက်ရတဲ့အတွက် အရမ်းကို ကျေနပ်ပီတိဖြစ်မိတယ်လို့ ပြောခဲ့ပါတယ်။
ဒီသတင်းလေးကိုဖတ်လိုက်ရတော့ လောကကြီးမှာ အဖွားလိုလူမျိုးတွေလဲ ရှိနေသေးတာ သိရတဲ့အတွက် ကြည်နူးကျေနပ်တဲ့စိတ် ဖြစ်ရတာမို့ မိတ်ဆွေတို့ကိုလဲ မျှဝေလိုက်တာ ဖြစ်ပါတယ်။ အားလုံး ရွှင်လန်းချမ်းမြေ့ကြပါစေရှင့်။
Disclaimer:
All information is drawn from credible media reports. Any photos used remain the property of their respective owners. Full credit goes to the original journalists, photographers, and news organizations. This content is shared for educational, inspirational, and entertainment purposes only.
#ဖြစ်ရပ်မှန်
#ကိုးရီးယား
