30/09/2025
দাঁশায় চাঁদো রেনাঃ অনড়হেঁ
অনড়হিয়ৗ কো: হপনবাবু ।জ্যোৎস্না সরেন। শ্রীকান্ত সরেন। বাড়তাঙ সরেন। বিভূতি ভুষণ সরেন। রামলাল টুডু।গাতে টুয়ার। দুগাই টুডু। অমল হেমরম। কয়লাযুগী।
গোপেশ্বর মান্ডী। সুচাঁদ হাঁসদা। ঠ্যেন্টা মুর্মু। কিষ্কিন্ধ্যা মুরমু। সুনীল কুমার কিস্কু। আনন্দ মোহন হেমব্রম। সঞ্চিতা টুডু। কংকারাম হাঁসদা।। মলিন্দ হাঁসদা।।
দাঁশায়!!
দুকে আগুই। বাং দ দুকে সাহাই দাঁশায়। হায়! হায়!!
আদিবাসী সান্তাড়। হানে অকা যুগ খন। আর হঁ তিমিন যুগ চঃ। ভরম নাসাও রে হায় হায়। আইদৗর আৎকিরঃ কানরে হায় হায়। হায় হায় সান্তাড়াঃ জুমিদ দাড়ে। হায় হায় সান্তাড়াঃ উইহৗর ভাবনা। হায় হায় সান্তাড়াঃ মনে মুরুক।। কাশি গেলে। হাড়িয়ৗড় হোড়ো। হেলকাও হয়। পারম চালাঃ কানা অক্ত। আর আবো ডয়লাং আকানা।
অক্ত সাঁও। দাঁশায় চাঁদো দারায় কান রেঁহ। সাহাঃ কানা আপনার লেকাতে বাঞ্চাও তাঁহেন রেনাঃ রৗস্কৗ। মনে রিকিড়!!
১।।
# দাঁসায়
....হপন বাবু
কাশীগেলেদ দালায় দালায়,
হিসিদ হুলুয় হয়তে ।
ঝত পাকাড়গে হায়রে হায়রে,
দাঁসায় সেরেঞ সাঁওতে ।।
কাসায় রাঁওয়াঃ,বুয়াং সাডে,
দাঁসায় বঙ্গা খানগে ।
ঝমর ঝমর লিপুর সাডে,
সাঁওতে হাহাল মজগে ।।
দাঁসায় দাড়ান কড়াক সাঁওতে,
তাহেন গেয়াক গুরু ।
ঝাড় -ঝারনী, মানতার কতে,
বধাও কয়াক বঙ্গা-বুরু ।।
গুরু বেগর বাং গানঃআ,
দাঁসায় দাড়ান একাল ।
গুরু বাংখান মনে জিউয়ীরে,
বুঝআ আডিঃ রাওয়াল ।।
ছাতিক কদক রাস্কৗয় রেঁহ,
খেরয়াল কদ বাংগে ।
সারিগে বাংখান হায়রে হায়রে,
দাঁসায় বঙ্গাদ জাওগে ।।
২।।
#দাঁশায় বঙা রেনাঃ অনহড়ে ৷
••জ্যেৎস্না সোরেন ৷
ভাদর বঙা রেনাঃ কাশকম তুলৗম রিমিল..
বেওরায় ভেজা লেদা অগম সৗমুদ নীলরে;
দাঁশায় বঙা রেনাঃ হেমাল হিসিৎ হয়রে...
দাঁশায় দাঁড়ান নাগাম রেনাঃ তুন্খি তালাস৷
দাঁশায় বঙা রেনাঃ অত্হাসা পৗরকিত রে..
তারাল বাসাল মানওয়া কওয়াঃ রাঃ হমর ,
দেশ দিশম রে হো জুন্ডি সেঙ্গেল তে হো...
দায়াগে মৗনমী জীয়ন ছাটপাট লেন ৷
দাঁশায় বঙা রেনাঃ সেতাঃ শিশির দাঃরে..
গেলবার গুরু কওয়াঃ মেৎদাঃ মেসালেন,
গেলবার সেরমা ককয় যুগি ককয় রূপতে..
দিশমদিশম দাঁশায় দাঁড়ান ক ওন্ডোকলেনা
দাঁশায়বঙা রেনাঃহয় বান্ডোলরে হুদুড় দূর্গা
দিবি আয়ন কাজলাঃ হিসৗ কুপুত সেঙ্গেল.
ধৗরতি মালট রেনাঃ দুখ হারকেৎ কৗহনি..
ছাটকা রে ভূয়ৗং রাওয়াঃ হায়রে হায়রে ৷৷
দাঁশায় বঙা রেনাঃ ঝৗন্টি ঝিঙ্গৗ বাহারে...
এনহ পিপিড়জাং লুতি তেরম ক আবঃ,
এনহ উপৗল পরায়নি য়াঃ মনে মহক রূপ,.
পটে হোড়োরে সনা রং গেলে বেলে রেনাঃ৷
৩।।
#দাঁশায় মনে
••শ্রী কা ন্ত স রে ন।
ভাদররেনাঃ আকুল- বাকুল সিতোং
বাই-বাইতে লাড়েজ চালাঃ আ-
সেটেরঃ আয় দাসায় দন- দনতে।
দালায়- দালায় হোড়ো গেলে সাওতে
ঞেল ঞামঃ আ মিৎবার কাশীগেলে,
সেরমা রিমিল রে ঞেল ঞামঃ আ দাসায় চিনহা
পোন্ডরিমিল সখ মত বেনাও আয় চিতার
অনা চিতার দ যুগস্বাক্ষী,
রাসকা সাড়ের রেয়াঃ ঝারনা।
নওয়া রিমিলগে রূপ বদল কাতে
সাঁওয়ায় আয় ধারতী -
দারে নাড়ী ক রাসকাতে জিউয়ী লাড়েজ ক সাঁহেদা।
মানওয়া মনে রাসকা দারাম লাগিৎ তেয়ারঃ আ-
দেবী দুর্গা দিশাতে
ছাতিক ক -ক সাজাঃ আ মনে- মনেতে।
মনেয় লাই তাকওয়া, নিয়া ধাওদ জানিচ তিনাঃ চ রাসকায় আগু দারায়া।
আবোওয়াঃ মনেহ অটাং রিমিল লেকা
অটাং বাড়ায়া হায়- হায় কাতে।
৪।।
# কুংকি
••বাড়তাং সরেন
বাড়গে লাতার সিমৌ, মাদারগম বুটৌরে
বেলে মাদারগম তিয়ৌঃ তিকিন অক্তেরে,
লাফাং লাফাং ডৌরখন ইঞিঞ গৎলেদা,
গোছা পেরেচ মাদারগম আমেম হালাংলেদা।
আড়গো ফেডঃ অক্তেরে, চাঁদিঞ তাকিচ লেনা,
আমাঃ ম্যাৎখন, টড়ঃ টড়ঃ ম্যাৎ দাঃ জরলেনা।
দাঁশায় বঙ্গা বেল বরণ মাহা, সেতাঃতরারে
বৌইহৌড় তালা, বাহা পেরেচ পুখরী দাঃরে
পায়রা পায়রা আতে, উপৌল বাহাঞ সিৎলেদা,
রৌস্কৌতে সাড় বাহালেকা, আমেম লান্দালেদা।
বাহালেদাম রাওয়াল মনেতে, অনা বহঃসুৎরে
আমাঃ চিতৌরিঞ তেয়ারলেদা মনে ক্যানভাসরে।
অজৌয় গাডা ঢিপরে,সুর সুপুর পান্তে কাতে
লেগেম লেগেম আতুঃ দাঃ সেচ কয়ঃ কাতে,
ইঞাঃ লেঙ্গা দাবিরে, আমেম টেন্ডারলেনা
ইঞাঃ হড়মো জিউয়ী রুমুঞ রুমুঞ লেনা !
জুরি পতামলেকা, লবয় কাশি গাজাড়রে
রৌস্কৌ চাপেলেনা, হারা জুয়ৌন মনেরে।
সেরমা পারম,যুগ তায়ম, নিশুন অক্তেরে,
কুংকি, ঘানেঞ পাঁজামেয়া সেরমা রিমিল তালারে।
৫।। #দাঁশায় চাঁদো রেনাঃ রূপ
•• বিভূতি ভূষণ সরেন
গেল বার্ চাঁদো লাহা
সানামাঃ এম সাহা লেদা,
নাওয়া গারতে নাওয়া রুপতে
রুয়ৌড় হেচ্ এন দাঁশায় চাঁদো।
দাঁশায় বংগা দাঁশায় দাড়ান
কাটিচ্ -মারাং সানাম ক দারাম,
মড়ে দিন হাবিচ্ দাঁশায় এনেচ্
আজমঃ 'কামরু' গুরু আঃ সেরেঞ।
সারু সাকাম দাঃ লেকা
মনেরে রাস্কৌ-রমজ হেলকাঃ,
চেতান টলা সেন খন
দাঁশায় এনেচ্ ক বলন।
ভুয়াং সাডে তারকঃ কান
লাতার টলা সেন,
ঝাঁই, করতাল,সাকওয়া
তিরয়ো-বানামতে মহকাওয়া।
সাজঃ আকো আয়মা সাজতে
আঁদোড় আকো রু-রাহাতে,
দাঁশায় চাঁদো পারম চালাঃ
সানাম কওয়া রাস্কৌ সালাঃ।।
৬।। #দাঁশায়
•• রামলাল টুডু
ভাদর তায়ম হিজুঃ দাঁশায়
নেশ দিন যুদিয় সাঁওয়ায়
হপন বৗবু বৗহু লে ঞামায়
সোর - সোপোর করেগে ,
সহরায় তায়ম গে ।।
সৗঁগিঞ খন আঁজমঃ ত্রিয়ো সাডে
হেড়হেৎ সেরেঞ ক রেয়াঃ সাডে
বৗইহৗড়রে দাঃ অৗতু রেয়াঃ সাডে
বৗদরে পটে হোড়ো গটাগে,
কৗশি গেলে হঁ গটাগে ।।
দাঁশায় বঙ্গা টরডাং হাকো
অকয়দ বৗইহৗড় বৗঁড়শি হাকো
রেঙ্গেচ হড় রেঙ্গেচতে হাহো-পোপো
হোড়ো কহঁ আঁদাগাকো,
মাতকম লাঠেয়াকো ।।
দাঁশায় দাঁড়ান চেলা কড়াকো
সঙ্গেরে মেনায় গুরুবাবা তাকো
আতো- আতো এনেচ দাঁড়ানাকো
কয় চাওলে ক এমাকো,
বৗহু ক ঞেল তরাকো ।।
৭।।
#দাঁশায় যখন দারায়া
••গাতে টুওয়ৗর
দাঁশায় যখন দারায়া - বৗদ আড়ে গাডা আড়েরে
কৗশি বাহায় লাঁদায়া হৗড়য়ৗর সাজতে
ধৗরতি পুরি গটায় সাজাও আ
ছৗতনি সাপারম এমান বাহা
মহক সতেয় আঁতকাও আ ।
দাঁশায় যখন দারায়া
- রাবাং দারায় রেনাঃ বরগন
হিসিৎ হয়রে ভেজায়া
সিঁগৗড় তরা খন ঘাঁস ডগরে
জরয় শিশির জৗড়ি দাঃ রে
উপৗল বাহায় কয়গ ঝৗন্টিরে ঝিঁগৗ নৗড়ি ।
দাঁশায় যখন দারায়া
- পোঁড তুলৗম রাহলা রিমিল গটায় অটাং বাড়ায়া
জাঁহা তিনরে জৗড়ি দাঃ হোড়ো গাছিরেয় জরয়া
উন রেগেত বাডায়ঃ আকাল স্যে নেসে সাঁওয়ায় আ । দাঁশায় যখন দারায়
- দাঁশায় রেনাঃ হায় হায় তালারেহঁ রৗসকৗয় আগুয়া দাঁশায় খনগে লেতাড়ঃ পৗল পরব সেরেঞ থুতি অনলিয়ৗ অনড়হিয়ৗ তেয়ারায় তিনৗঃ নাওয়া পুথি ।
দাঁশায় যখন দারায়া
- হড়ম রেনাঃ তিনৗঃ লাঁগা আচ আচতেয় সাহায়া
বাং বাডায়ঃ মনেহঁ ভরঃ অকয় গড়য় এমঃ
দাঁশায় চেতান গৗহির দুলৗড় অকয়াঃহঁ বাং কমঃ আ ।
৮।।
#দাসাঁয়
••দুগাই টুডু
(অ)
• দাসাঁয় বোঁগা •
দাসাঁয় বোঁগারে রাহলা রিমিল
হানে সেরমারে অটাং বাড়াঃ,
বাইহাড়রে হোড়ো দারে গিদরো
হিসিৎ হিসিৎ হয়তে লাড়াঃ।
************
(আ)
• বেল বরন •
গুরু রাচা রেদ বেল বরন
চেলা কোড়াকো আদ ওরাম আকাদা,
বোঁগা বুরু মানত দহনউ কাতে
দাসাঁয় উনকো এনেচ সেরেঞ এদা।
***************
(ই)
•গুরু চেলা•
দাঁসায় করে গুরু চেলা
আতো টোলারে দাঁড়ান আকো,
কাঁসা করতাল মারাঃ পিনচর
লবয় ভূয়োং তাহেঁন তাকো ।
***************
(ঈ)
• নাগাম •
হায়রে - হায়রে দাঁসায় এনেচ সেরেঞ দ
খেল খেল বোঠেল - বোঠেল আঁজমঃ অনা ,
হড় হপনাঃ সেদায় মারে নাগাম কোদ
আয়মা কাথাগে গিদরো বাড়ায় বতেজঃকানা ।
***************
৯।।
#দাঁশায়
••অমল হেমরম
দাশায় চান্দো গড়া হোড়ো
গেলে লেওয়েৎ এন
দাশায় এনেচ কড়া হানকো
ঞেল কপে ক তিরয়ৌও এন।
বহ: রেবেৎ মারা: পিঞ্চার
তি' রে হতৎ ভুয়াং
আদম কোওয়া তি' রে থারি
রু এৎ ক ঠেয়ং ঠেয়ং।
সাজ তাক হ৺ আড়ি চরক
হয়তে অটাং আঞ্চার
হিলাও পিছু জাঙ্গা তড়া
সাডে ঝমর ঝমর।
সেরেঞ তালা গিদার ক মা
বোল এৎ ক দেহেল দেহেল
আডি চরক লেওয়ের কদর
আর হ৺ বোঠেল বোঠেল।
সোড়ে পে না সোড়ে পে
ধের কাঞ পে
অকয় বাপে জম দাড়েয়াঃ
ইঞ ইমাঞ পে।
আতো দিশম দাশায় চিতার
দমেগে উইহার হিজুঃ
পারম আকান অনা অক্ত
আদ, বাং গে রুয়ৌড় হিজুঃ।
১০।। #দাঁশায় সেটেরাকান
•• কয়মাযুগী ।
লীল সেরমারে পুঁড রাহলা মনকুশি মালকাঃ-
জখা জানিচ্ রিমিল খন ঝেড়ে ঝেড়ে দাঃ ,
আসুল আতিঞ মেরম কমাক ভিড়কৗঃ ,
তাসাদ্ ডগরে সেতাঃ শিশির ঝালকাঃ ।
বাঁদ পুখরি ডবহাঃ পেরেচ্ সাড়ের আকান ,
দাঃ তালারে আরাঃ উপৗলে লাঁদা জং কান ;
বৗদ বৗইহৗড় করে হৗড়য়ৗর হুড়ু গাছি,
পেরচ্ হড়ম সৗত সাজাও সদরঃ কান ।
নৗই গাডা আড়ে করে পুঁডগে তেহে তেহে ,
লবয় লবয় কাসি বাহাতে পেরেচ্ আকান ;
হৗড়য়ৗর রুপতে সাজাও কাতে ধারতি-
তঁবা দাঃ আরশিরে আয়াঃ রুপে ঞেঞেল কান।
শন সাপারম কিয়া জবা মালিন বাহা,
সাচারহে সাঁওতেয় খিলডু এনেচ্ জংকান ।
আঞ্চার লিসৗয় লাসায় ধাপি বিদলৗই -
এওয়ের আদের লাগিৎ সিরজনে সৗত আকান ।
যুয়ান জিউয়ী গায়গম বতর হড়ম রুমুই -
ধুতি দৗহড়ি মারাঃ পিঞ্চৗর, দাঁশায় সেটেরাকান ।
আতো আতো ভুয়ৗং সাডে কাঁসায় রাঁওয়াঃ কান-
গুরু-চেলা দিশম সাঁঘার লাগিৎক সাপড়াঃ কান।
১১।।
#ᱫᱟᱥᱟᱭ ᱪᱟᱸᱫᱚ
•• ᱜᱳᱯᱮᱥᱣᱚᱨ ᱢᱟ.ᱱᱰᱤ
ᱫᱟᱥᱟᱭ ᱪᱟᱸᱫᱚ ᱵᱚᱞᱚᱭ ᱮᱱᱟ
ᱮᱦᱚᱵ ᱮᱱᱟ ᱦᱩᱲᱩ ᱜᱮᱞᱮ,
ᱱᱟ.ᱭ ᱠᱟ.ᱥᱟ.ᱭ ᱜᱟᱰᱟ ᱟᱲᱮ ᱛᱮ
ᱯᱳᱸᱰ ᱜᱮ ᱠᱟ.ᱥᱤ ᱜᱮᱞᱮ ᱾
ᱦᱤᱥᱤᱫ ᱦᱤᱥᱤᱫ ᱦᱚᱭ ᱛᱮ
ᱦᱤᱞᱟ.ᱜ ᱞᱮᱣᱮᱨ ᱠᱚᱫᱚᱨ,
ᱯᱷᱳᱴᱮ ᱦᱩᱲᱩ,ᱠᱟ.ᱥᱤ ᱜᱮᱞᱮ
ᱨᱟ.ᱥᱠᱟ. ᱮ ᱥᱚᱫᱚᱨ ᱾
ᱵᱟ.ᱫᱽ ᱵᱟ.ᱭᱦᱟ.ᱲ ᱦᱟ.ᱲᱭᱟ.ᱨ ᱛᱮ
ᱮᱥᱮᱫ ᱟᱠᱟᱱ ᱜᱳᱴᱟ,
ᱪᱟ.ᱥᱤ ᱦᱚᱯᱚᱱᱟᱜ ᱡᱚᱢ ᱧᱩ
ᱥᱮᱨᱢᱟ ᱯᱩᱨᱟ.ᱣ ᱡᱳᱴᱟᱜ ᱾
ᱟ.ᱭᱩᱵ ᱟᱠᱟᱱ ᱥᱮ ᱥᱟᱱᱛᱟᱲ ᱟ.ᱛᱳ ᱨᱮ
ᱠᱚᱨᱛᱟᱞ ᱨᱟᱣᱟᱜ ᱠᱟᱱ,
ᱫᱟᱥᱟᱭ ᱫᱟᱬᱟᱱ ᱪᱟᱞᱟᱜ ᱞᱟ.ᱜᱤᱫ
ᱮᱱᱮᱪ ᱥᱟᱯᱲᱟᱜ ᱠᱟᱱ ᱾
ᱮᱱᱮᱪ ᱠᱟᱱᱟ ᱠᱚ ᱟ.ᱰᱤ ᱨᱟᱣᱟᱞ
ᱟᱦᱟᱞ ᱯᱮᱦᱮᱞ ᱯᱮᱦᱮᱞ,
ᱥᱮᱨᱮᱧ ᱮᱫᱼᱟ ᱠᱚ ᱦᱟᱭ ᱨᱮ ᱦᱟᱭ
ᱨᱟ.ᱥᱠᱟ. ᱪᱮᱦᱮᱞ ᱪᱮᱯᱮᱞ ᱾
ᱟᱛᱳ ᱟᱛᱳ ᱫᱟᱬᱟᱱ ᱦᱤᱞᱳᱜ
ᱥᱟᱡᱚᱜ ᱟᱠᱚ ᱱᱟᱱᱟ ᱦᱩᱱᱟ.ᱨ,
ᱟᱭᱳ ᱦᱚᱲᱟᱜ ᱥᱟᱡᱽ ᱯᱚᱥᱟᱠ
ᱟᱭᱢᱟ ᱦᱚᱲ ᱠᱚ ᱦᱩᱱᱟ.ᱨ ᱾
১২।। দাঁসায় চাঁদো
সুচাঁদ হাঁসদা
সানতাড় হপনাঃ আরে আনাঃ চাঁদো দাঁসায় ,
বৗদ বৗইহৗড়রে হুড়ু গাছি দালায় দালায় ৷
হালি হৗরয়ৗড় দারে নাড়িতে পেরেচ ধারতি ,
আহা ঞেঁল জংতে মনে জিওয়ী ভারতিঃ ৷
আনাজতে পেরেচ সানাম কচা বাড়গে ,
সরেস ঠাঁও এ হামেট আকাত সাসাং সারু ঝাড়গে ৷
গডা বাড়গেরে রাহেড় রামড়া হড়েচ ,
গৗই ডাংরা মিহু মেরম কো চেরেজ ৷
বৗদ বৗইহৗড় গাডা আড়েরে কাসি গেলে ,
মনে অরঃ গাওয়িচ লেকা দলে ৷
নোওয়া চাঁদো রেগে দুঃক পরব দাঁসায় ,
গটা পাকাড় আঁজমঃআ হায়রে হায় ৷
আঁজমঃআ কাঁসা করতাল ভুওয়ৗং সাডে ,
পাঁজা দুঃরে আবো হাঁডে নাডে ৷
ককয় যোগি সাজতে সাজাও কাতে ,
নিতহঁ মেনাঃ বনগে আয়নম কাজল পানতে ৷
১৩।।
#দাঁসায়
••ঠ্যেন্টা মুর্মূ
ভাদর সিতুং সাহায়েনা
সেটেরেনা হেমাল দাঁসায়
তাম তাসে তালে বিলি রে
সিম সি লেকা আঁসায় ।
পটেয়েনা হুড়ু গাছি
সেতেঞ এনা তোওয়া
ডৌর পেরেজ্ জ এনা
এঠে ঠ্যেব্যে লোওয়া ।
কামসাও বাড়ায় রাহ্-লা রিমিল
কাসকম তুলাম লেকা
সেরমা ইপিল ঞিন্দা বেড়া
ঞেলঃ আক বাক্ জুনু লেকা ।
চেহেল চেপেল পূখরি তালা
লান্দায় লেকা উপেল বাহা
ঝমর ঝমর লিপুর সাডে
ঝাঁই করতাল সাঁও দাঁসায় রাহা ।
তিরলা হপন ভেস তেক সাজঃ
বহঃ রে ফারকাঃ মারাঃ পিন্চা্র
তিরয়াও আকানাক গুরু চেলা
সাপড়াঃ কানা ক দিশম সাংঘার ।
১৪।।
# ভুওয়ৗং সাডে
••কিস্কিন্ধ্যা মুরমু
সেতাঃ রেনাঃ হেমাল শিশির'তে
অত্ তাসাৎ ঝান্টি ঝিঙ্গায় লাঁন্দায় ,
জৗড়ি দাঃ'তে নৗয় পুখরী চেড়েম্ চেড়েম্
খেৎরে প'টে গেলে হুড়ু গৗছি ;
বির বুরু দারে নৗড়ি জিয়ৗড় হৗরিয়ৗড়
পুডগে কৗসি গেলে হয়তে হিলাঃ ,
সাপারম বাহা স'তে আঁন্দমাদা হয় হিসিৎ।
মেৎতে ঞেলঃ হৗরিয়ৗড় মেনাঃ আটেৎ ,
রিলৗমালা সাফা সেরমারে ঘৗড়িগে
রিমিল ক জাওরা কাতে জৗড়ি গদ ;
রাচা ছাটকা ভিৎপিন্ডৗ লে-লৗনডুর,
বৗন্দে আকান সাচারহে ঞেলঃ মজ ।
সুনুম সিন্দুর মাড়ার্ সিক্ওযৗর
বগাঁ সাকম সাঁওতে
তুমদা টামাক ঝৗই করতাল আ'তে ;
অৗতু অৗতু অড়াঃ অড়াঃ দিসম ক সাঁঘার
গুরু চেলা রাচা ছৗটকারে ডিগিরে ডিগির
এনেচ্ সেরেঞ " হায়রে- - -হায় ",
খেরওয়াল বাখোল তালারে তারক
তাকেরঃ কাঁসা ঝৗই ভুওয়ৗং সাডে ।।
১৫।
#দাঁশায় চাঁদ
••সুনীল কুমার কিস্কু
দিশম দিশমক দাঁড়ান কান গুরুচেলা
কুড়ি হপন সাঝতে সাজাও কাতেঃ,
দাঁশায় দ দুঃখ আনাঃকান্
সাঁনতাড় কোআঃ সুখে রাপুদ আকাদ।
অকা দিশমরেবেন আপাৎ আকান
অকা দাঃলু ঘাটরে,অকা নাইরে
আয়নম কাজল বেন আঁগেন আকান,
দেশে অডকঃবেন দেশে গংলেবেন।
দাঁশায় দাঁড়ান গুরুবাবা চেলাকো
লাঁগাতেকো কারিঘাম চাবাওয়াকান
আরজো জাতিরেনাঃ বেবাড়িজ উৎপাৎতে,
আয়নম,কাজলকো আঁগিরকেৎ কিন অকা দিশমতে।
দাঁশায় চাঁদ দ দেবী দুর্গা পূজা
সাঁনতাড় কোআঃ একাল বাচং সভাঃ,
রাবন রাপাঃ দাঁশায় মেলা
ভীড়ঃ আডিঃ ঠেলা মেলা,
মেলা টাঁডিরে গুরু চেলা এনেচ
সানামক আতেঃ হেঁসেচ সেকেচ।
দাঁশায় টাঁডি হাঁডি বাঠিরে
আলম তাঁহেন বুল গেতিচ।
১৬।
#ᱡᱷᱟᱴᱟ
•• ᱟᱱᱚᱱᱫᱚ ᱢᱳᱦᱚᱱ ᱦᱮᱢᱵᱨᱚᱢ
ᱵᱟ.ᱭᱦᱟ.ᱲ ᱦᱩᱲᱩ ᱜᱟ.ᱪᱷᱤ ᱨᱮ
ᱩᱭᱩᱜ ᱦᱟ.ᱥᱩl
ᱱᱚᱛᱮ ᱠᱟ.ᱥᱤ ᱫᱟᱨᱮ ᱨᱮ ᱜᱮᱨᱟᱝ ᱠᱷᱟᱱ
ᱚᱱᱛᱮ ᱥᱮᱨᱢᱟ ᱨᱮ ᱠᱟ.ᱥᱤ ᱵᱟᱦᱟᱜ-ᱟl
ᱵᱚᱦᱚᱜ ᱥᱟᱡᱚᱜ-ᱟ ᱨᱩᱯᱟ. ᱨᱟᱛᱟᱝ ᱛᱮ
ᱥᱮᱛᱟᱜ ᱥᱤ'ᱜᱟ.ᱲlᱧᱮᱞᱚᱜ-ᱟ ᱡᱤ'ᱲᱫ ᱡᱤ'ᱲᱤᱫl
ᱜᱤᱨᱩ ᱵᱮᱨᱠᱚ ᱨᱟᱠᱟᱵᱚᱜ-ᱟ ᱟ.ᱰᱤ ᱪᱚᱨᱚᱠ!
ᱵᱟ'ᱫᱮᱞᱟ ᱨᱮᱭᱟᱜ ᱫᱟᱜ ᱨᱮl
ᱠᱟ'ᱥᱟ ᱠᱚᱨᱛᱟᱞ ᱞᱤᱯᱩᱨ ᱵᱷᱩᱣᱟ.ᱝ
ᱨᱚᱯᱚᱲᱟᱠᱚl ᱟ.ᱰᱤ ᱜᱮ ᱥᱤᱵᱤᱞ!
ᱡᱚᱛᱚ ᱢᱤᱫ ᱡᱷᱟᱴᱟ ᱨᱮl
১৭।।
#ᱫᱟᱸᱥᱟᱭ ᱵᱚᱸᱜᱟ
••ᱥᱚᱧᱪᱤᱛᱟ ᱴᱩᱰᱩ
ᱫᱟᱸᱥᱟᱭ ᱵᱚᱸᱜᱟ ᱵᱚᱞᱚᱭᱮᱱ
ᱵᱟ.ᱭᱦᱟ.ᱲ ᱦᱩᱲᱩ ᱯᱚᱴᱮᱭᱮᱱ ,
ᱮᱱᱮᱪ ᱥᱮᱨᱮᱧ ᱪᱟᱢᱠᱮᱭᱮᱱ
ᱢᱟᱹᱱᱢᱤ ᱢᱚᱱᱮ ᱨᱟ.ᱥᱠᱟ.ᱭᱮᱱ ᱾
ᱚᱠᱟᱨᱮᱛᱤᱧ ᱜᱚ ᱱᱟᱭᱳ
ᱢᱟᱨᱟᱜ ᱯᱤᱧᱪᱟ.ᱨ ᱟᱨ ᱞᱤᱯᱷᱩᱨ ᱫᱚ?
ᱚᱠᱟᱨᱮᱛᱤᱧ ᱜᱚ ᱱᱟᱭᱳ
ᱥᱟᱡᱽ ᱵᱷᱩᱭᱟ.ᱝ,ᱛᱤᱨᱭᱳ ,ᱵᱟᱱᱟᱢ ᱫᱚ?
ᱪᱮᱛᱮ ᱠᱷᱟᱹᱛᱤᱨ ᱛᱮ ᱦᱚᱯᱚᱱ ᱵᱟᱵᱩ
ᱨᱚᱢ ᱡᱷᱚᱢ ᱪᱩᱲ ᱵᱟᱡᱩ ᱥᱟᱡᱽ ᱫᱚ,
ᱚᱠᱚᱭ ᱟᱭᱩᱨᱛᱮ ᱦᱚᱯᱚᱱ ᱵᱟᱵᱩ
ᱫᱤᱥᱚᱢ ᱫᱟᱲᱟᱱ ᱫᱚ ᱾
ᱟᱭᱱᱚᱢ ᱠᱟᱡᱚᱞ ᱯᱟᱱᱛᱮ ᱠᱷᱟ.ᱛᱤᱨ
ᱛᱤᱨᱞᱟ. ᱦᱚᱯᱚᱱ ᱨᱩᱯᱮᱨᱚ ᱥᱟᱡᱽ ᱫᱚ,
ᱜᱩᱨᱩ ᱱᱟᱭᱩᱨ ᱛᱮᱜᱮ ᱱᱟᱭᱳ
ᱫᱤᱥᱚᱢ ᱫᱟᱲᱟᱱ ᱫᱚ ᱾
ᱫᱤᱥᱚᱢ ᱜᱩᱨᱩ ᱥᱟᱸᱶ ᱧᱟᱯᱟᱢ ᱚᱠᱛᱮ
ᱜᱚᱸᱰ ᱡᱚᱦᱟᱨ ᱮᱯᱮᱢ ᱪᱟᱯᱟᱞ ᱯᱮ,
ᱥᱮᱨᱣᱭᱟ ᱨᱮᱭᱟᱜ ᱟ.ᱨᱤ ᱞᱮᱠᱟᱛᱮ
ᱜᱩᱱ ᱵᱤᱨᱫᱟᱹ ᱩᱫᱩᱜ ᱯᱮ ᱾
১৮।।
#আম আশ•
কংকারাম হাঁসদাতে
•
হায়াম হায়াম রেয়াড়
শিশির লহৎ ঘাস হর
তেরদেজ মার্শাল আহলা
পটে হোড়ো রেনাঃ জাদগো
করোনা বতর দেয়া কাতে
মহডা আকানাঞ ঞাপাম
একাল গে আম সাঁওগে।।
নেন্ডা নেন্ডাতে পারম আকানা
চাকলতাড়ি ছাতা দারায় কানা
শিলদা পাটা বিন্দা পাতা
নেস দ হেঁ চং বাং চং
অনাতে আদ মনে বাং
মনে জিওয়ি বাংগে বাতাঃ কানরে
তেরদেজ ঞিদা তাড়াম আকাদাঞ
সিয়াড় রেনাঃ সাপারম বাহা মহক শ
ঞুতুৎ ঞিদা আয়ুর ইদিঞ কানায়
মিৎ চাঁদো বার চাঁদো পে চাঁদো
তাঙ্গি তাঙ্গিতে মনে আদ বাং
বাং তাঙ্গি কানা শিলদা পাতা
মনে রিকিড় কাতেঃ লাহা আকানাঞ
তেরদেচ ঞিদা আম আশতে।।
১৯।সরেস সৗড়িয়ৗড়
দাঁসায় চাঁদো রেনাঃ
বুরু ধাসণা লেকা
উডাঃ রিমিল খন
মিৎ বার ঠপ
সাফা পুরমু দাঃ।।
পুরমু দাঃ দ চেদাঃ
বঙ্গা দাঃ তানা লেকা
হডম রুমুয় চানখাও কাতে
লিল সেরমা লাতার
বৗদ বৗইহৗড় হৗড়িয়ৗড়
হিসিৎ হয়তে লেগেম লেগেম
হৗলি হৗড়িয়ৗড় হোড়ো গাছি
রাসি আতো সহরায় জমক
ক্ষেত আড়ে গাডা ধারে
কাশি গেলে দাঁশায় লাকচাররে।।
পুরমু দাঃ রিমঝৗওতে
অকা ঘাড়িচ দ চাকলতাড়ি ছাতা খাণ
সারা ঘাড়িচ গে মনে উডৗঃ পাতা বিন্ডৗ
বাঁধ পুখরি দাঃরে বিয়ৗল বয়ল হাকো লেকা
সান্তাড় বয়হা কো কামশা কাণ পাতা রেগড়া
বাং খান বুয়ৗং করতাল রাওয়াঃ সাঁও।।
ঞু জম এনেচ সেরেঞ পাতা ছাতা
লেতাড় আকান হানে অকা বিদৗল খন
বাং একেণ রৗস্কৗ রমজ দ বাং আ
পাতা ছাতা রেগে মেসা আকানা
আবোনাঃ লাকচার সেরওয়া
মিদঃ মিলনঃ ঞাপামঃ রেনাঃ সারি
সাগুন সনৎ সরেস সাড়িয়ৗড় উইহৗর.......... ।।
.
আদ্রা-হাওড়া
শিরোমনি ফাস্ট প্যাসেঞ্জার
২০/৯/২০১৭
বাড়ায় তেনা:-নওয়া অনড়হেঁ কো দ ৩০ সেপ্টেম্বর ২০২০ সালরে www sarsagun.com web page রে অনড়হেঁ আর অনড়হিয়ৗ আখড়ারে উছৗন লেনা।
