26/08/2026
1501واں سالانہ جلوسِ محمدی ﷺ پُرامن اور شایانِ شان طریقے سے اختتام پذیر
الحمدللہ رب العالمین!
مرکزی درسگاہ دارالعلوم اہلِ سنت غوثیہ نظام العلوم، بلوها بازار، سدھارتھ نگر کے زیرِ اہتمام ہر سال کی طرح امسال بھی 1501واں سالانہ جلوسِ محمدی ﷺ نہایت عقیدت و محبت، جوش و خروش، نظم و ضبط اور پُرامن ماحول میں شایانِ شان طریقے سے منعقد ہوا۔
جلوس میں علاقے کی مختلف مساجد و مدارس سے وابستہ علماءِ کرام، ائمۂ مساجد، طلبہ اور ہزاروں کی تعداد میں عاشقانِ رسول ﷺ نے شرکت کی۔ شرکائے جلوس نے انتہائی عقیدت و احترام کے ساتھ بارگاہِ رسالت مآب ﷺ میں نذرانۂ عقیدت پیش کیا اور صلوٰۃ و سلام کا اہتمام کیا۔
جلوسِ محمدی ﷺ صبح تقریباً 11 بجے غوثیہ جامع مسجد سے قائدِ اہلِ سنت حضرت علامہ مولانا محمد ریحان رضا خان صاحب قبلہ، سربراہِ اعلیٰ دارالعلوم اہلِ سنت غوثیہ نظام العلوم، کی قیادت میں روانہ ہوا۔ جلوس مقررہ راستے سے گزرتا ہوا پورے چوراہے کا گشت کرتے ہوئے تقریباً 2 بجے دارالعلوم پہنچا، جہاں صلوٰۃ و سلام کے ساتھ جلوس کا اختتام ہوا۔
جلوس کے دوران شرکائے جلوس نے امن و سکون، نظم و ضبط اور باہمی احترام کا بھرپور مظاہرہ کیا۔ انتظامیہ اور منتظمین کی جانب سے جاری کردہ ضروری ہدایات پر بھی عمل کیا گیا، جس کے باعث پورا پروگرام خوشگوار، پُرامن اور منظم ماحول میں مکمل ہوا۔
جلوس کے اختتام کے بعد غوثیہ جامع مسجد میں 2:30 بجے اذانِ ظہر اور 2:45 بجے باجماعت نمازِ ظہر ادا کی گئی،نمازِ ظہر کے بعد حاضرین کو موئے مبارک شریف، آقا کریم ﷺ کی زیارت سے بھی شرفیاب ہونے کا موقع ملا، جس پر عاشقانِ رسول ﷺ نے بے حد عقیدت و محبت کا اظہار کیا۔
آخر میں مرکزی درسگاہ دارالعلوم اہلِ سنت غوثیہ نظام العلوم کی جانب سے تمام علماءِ کرام، ائمۂ مساجد، مدارس، طلبہ، رضاکاران، انتظامیہ، مقامی افراد اور تمام عاشقانِ رسول ﷺ کا تہہ دل سے شکریہ ادا کیا گیا جنہوں نے جلوسِ محمدی ﷺ میں شرکت کی، اور علمائے کرام کو رومال اور پھولوں کا ہار ڈال کر انکا استقبال کیا گیا۔
اللہ تعالیٰ اس حاضری کو اپنی بارگاہ میں شرفِ قبولیت عطا فرمائے، اس عظیم اجتماع کو خیر و برکت کا ذریعہ بنائے اور تمام عاشقانِ رسول ﷺ کو محبتِ رسول ﷺ پر قائم و دائم رکھے۔
آمین بجاہِ سید المرسلین ﷺ
منجانب:
مرکزی درسگاہ دارالعلوم اہلِ سنت غوثیہ نظام العلوم
بلوها بازار، سدھارتھ نگر، یوپی
