31/08/2026
❤️ ਰਿਸ਼ਤੇ ਖੂਨ ਦੇ ਨਹੀਂ, ਦਿਲ ਦੇ ਹੁੰਦੇ ਨੇ… ਰੱਖੜੀ ਉਸ ਪਿਆਰ ਦੀ ਨਿਸ਼ਾਨੀ ਹੈ ❤️
ਮੇਰੇ ਦਾਦਾ ਜੀ ਸਰਦਾਰ ਸ਼ੇਰ ਸਿੰਘ ਜੀ, ਪਿੰਡ ਜੱਸੀ ਪੌਵਾਲੀ, ਬਠਿੰਡਾ ਦੇ ਸਰਪੰਚ ਰਹੇ। ਉਸ ਸਮੇਂ ਪਿੰਡ ਦੀਆਂ ਗਲੀਆਂ-ਨਾਲੀਆਂ ਦੀ ਸਫ਼ਾਈ ਲਈ ਉਹ ਮੋਹਨ ਲਾਲ ਨਾਮ ਦੇ ਇੱਕ ਬਹੁਤ ਹੀ ਸਰੀਫ਼ ਵਿਅਕਤੀ ਨੂੰ ਪਿੰਡ ਲੈ ਕੇ ਆਏ। ਮੋਹਨ ਲਾਲ ਜੀ ਜਦੋਂ ਵੀ ਸਾਡੇ ਪਿੰਡ ਵਿੱਚ ਕੰਮ ਕਰਦੇ, ਸਾਡੇ ਘਰ ਰੋਟੀ ਖਾਂਦੇ।
ਉਸ ਸਮੇਂ ਉਨ੍ਹਾਂ ਦੀ ਨਿੱਕੀ ਜਿਹੀ ਧੀ ਛੋਲੋ ਵੀ ਨਾਲ ਹੁੰਦੀ ਸੀ। ਬਚਪਨ ਤੋਂ ਹੀ ਉਸ ਨਾਲ ਮੇਰਾ ਪਿਆਰ ਅਤੇ ਲਗਾਅ ਬਣ ਗਿਆ। ਸਮਾਂ ਬੀਤਿਆ, ਮੋਹਨ ਲਾਲ ਜੀ ਦੀ ਪਤਨੀ ਸਵਰਗਵਾਸ ਹੋ ਗਈ, ਛੋਲੋ ਦਾ ਵਿਆਹ ਹੋ ਗਿਆ ਅਤੇ ਕਈ ਸਾਲ ਬਾਹਰ ਰਹਿਣ ਤੋਂ ਬਾਅਦ ਉਹ ਆਪਣੇ ਪਤੀ ਨਾਲ ਮੁੜ ਪਿੰਡ ਆ ਗਈ।
ਅੱਜ ਛੋਲੋ ਲਗਭਗ 45 ਸਾਲ ਦੀ ਹੈ, ਪਰ ਅੱਜ ਵੀ ਮੈਨੂੰ ਆਪਣਾ ਭਰਾ ਮੰਨਦੀ ਹੈ ਤੇ ਮੈਂ ਉਸਨੂੰ ਆਪਣੀ ਭੈਣ ਵਾਂਗ ਪਿਆਰ ਕਰਦਾ ਹਾਂ। ❤️
ਛੋਲੋ ਦੀਆਂ ਕਈ ਧੀਆਂ ਹੋਈਆਂ। ਮੈਂ ਹਮੇਸ਼ਾ ਉਸਨੂੰ ਆਪਣੀਆਂ ਧੀਆਂ ਨੂੰ ਪੜ੍ਹਾਉਣ ਲਈ ਸਮਝਾਉਂਦਾ ਰਿਹਾ। ਆਪਣੀ ਸਮਰੱਥਾ ਅਨੁਸਾਰ ਕਿਤਾਬਾਂ, ਪੜ੍ਹਾਈ ਦਾ ਸਮਾਨ ਅਤੇ ਹੋਰ ਮਦਦ ਵੀ ਕਰਦਾ ਰਿਹਾ। ਪਰ ਉਨ੍ਹਾਂ ਦੇ ਭਾਈਚਾਰੇ ਵਿੱਚ ਛੋਟੀ ਉਮਰ ਵਿੱਚ ਕੁੜੀਆਂ ਦੇ ਵਿਆਹ ਦੀ ਪੁਰਾਣੀ ਰੀਤ ਹੋਣ ਕਰਕੇ ਮੇਰੀ ਗੱਲ ਹਰ ਵਾਰ ਨਹੀਂ ਮੰਨੀ ਗਈ ਅਤੇ ਕਈ ਧੀਆਂ ਦਾ ਵਿਆਹ ਛੋਟੀ ਉਮਰ ਵਿੱਚ ਹੀ ਹੋ ਗਿਆ।
ਅੱਜ ਛੋਲੋ ਦੀ ਇੱਕ ਧੀ ਰਹਿ ਗਈ ਹੈ। ਮੈਂ ਅੱਜ ਵੀ ਰੋਜ਼ ਉਸਨੂੰ ਸਮਝਾਉਂਦਾ ਹਾਂ ਕਿ ਧੀ ਨੂੰ ਪੜ੍ਹਾਓ, ਉਸਨੂੰ ਆਪਣੇ ਪੈਰਾਂ ’ਤੇ ਖੜ੍ਹਾ ਹੋਣ ਦਿਓ। ਧੀ ਵੀ ਪੜ੍ਹਨਾ ਚਾਹੁੰਦੀ ਹੈ, ਪਰ ਹਾਲਾਤ ਅਤੇ ਸੋਚ ਕਈ ਵਾਰ ਰਾਹ ਰੋਕ ਲੈਂਦੇ ਨੇ।
ਛੋਲੋ ਦੇ ਪਤੀ ਦੇ ਦਿਹਾਂਤ ਵੇਲੇ ਵੀ ਮੈਂ ਆਪਣੀ ਸਮਰੱਥਾ ਅਨੁਸਾਰ ਉਸਦੇ ਇਲਾਜ ਅਤੇ ਪਰਿਵਾਰ ਦੀ ਮਦਦ ਕੀਤੀ। ਜਿੰਨੀ ਮੇਰੀ ਉਕਾਤ ਸੀ, ਮੈਂ ਉਨੀ ਕੋਸ਼ਿਸ਼ ਕੀਤੀ।
ਮੇਰੀਆਂ ਆਪਣੀਆਂ ਚਾਰ ਭੈਣਾਂ ਹਨ। ਸ਼ਾਇਦ ਉਹ ਕਦੇ-ਕਦੇ ਹੀ ਰੱਖੜੀ ਬੰਨ੍ਹਦੀਆਂ ਨੇ, ਪਰ ਛੋਲੋ ਅਤੇ ਹੋਰ ਕਈ ਗਰੀਬ ਪਰਿਵਾਰਾਂ ਦੀਆਂ ਧੀਆਂ ਹਰ ਸਾਲ ਮੈਨੂੰ ਰੱਖੜੀ ਬੰਨ੍ਹਦੀਆਂ ਨੇ। ਮੈਂ ਵੀ ਬੜੇ ਚਾਅ ਨਾਲ ਉਨ੍ਹਾਂ ਲਈ ਰੱਖੜੀਆਂ ਲੈ ਕੇ ਆਉਂਦਾ ਹਾਂ ਤੇ ਉਨ੍ਹਾਂ ਨੂੰ ਆਪਣੇ ਭੈਣਾਂ ਵਾਂਗ ਪਿਆਰ ਦਿੰਦਾ ਹਾਂ। ❤️
ਰੱਖੜੀ ਸਿਰਫ਼ ਇੱਕ ਧਾਗਾ ਨਹੀਂ… ਇਹ ਵਿਸ਼ਵਾਸ, ਪਿਆਰ ਅਤੇ ਰਿਸ਼ਤੇ ਦੀ ਨਿਸ਼ਾਨੀ ਹੈ।
ਆਓ ਇਸ ਰੱਖੜੀ ’ਤੇ ਇੱਕ ਵਾਅਦਾ ਕਰੀਏ—
ਹਰ ਧੀ ਨੂੰ ਪੜ੍ਹਾਈਏ, ਹਰ ਧੀ ਨੂੰ ਅੱਗੇ ਵਧਾਈਏ ਅਤੇ ਛੋਟੀ ਉਮਰ ਵਿੱਚ ਧੀਆਂ ਦੇ ਵਿਆਹ ਦੀ ਰੀਤ ਨੂੰ ਖ਼ਤਮ ਕਰਨ ਲਈ ਆਪਣਾ ਯੋਗਦਾਨ ਪਾਈਏ। 🙏❤️
ਸਾਰੇ ਭੈਣ-ਭਰਾਵਾਂ ਨੂੰ ਰੱਖੜੀ ਦੀਆਂ ਲੱਖ-ਲੱਖ ਵਧਾਈਆਂ। 🥰🙏
ਰੁਪਿੰਦਰ ਭੁਪਿੰਦਰ ਸਿੰਘ ਚੌਹਾਨ ਚੇਅਰਮੈਨ ਸਰਦਾਰ ਸੇਰ ਸਿੰਘ ਲੋਕ ਭਲਾਈ ਮੰਚ ਤੇ ਯੂਥ ਫਰੰਟ ਬਠਿੰਡਾ
#ਭੈਣਭਰਾ #ਭੈਣਭਰਾ_ਦਾ_ਪਿਆਰ #ਧੀਆਂ_ਨੂੰ_ਪੜ੍ਹਾਓ #ਧੀ_ਬਚਾਓ_ਧੀ_ਪੜ੍ਹਾਓ #ਧੀਆਂ_ਦੀ_ਪੜ੍ਹਾਈ #ਭੈਣ #ਭਰਾ #ਰਿਸ਼ਤੇ #ਪਿਆਰ #ਮਨੁੱਖਤਾ #ਸੇਵਾ #ਪੰਜਾਬ #ਪੰਜਾਬੀ
