BN7 News Ravindra Jadhav, Belgaum (2025)

03/10/2025

गुंजी माऊली देवी यात्रोत्सवाला प्रारंभ : पाच दिवस चालणार यात्रा

खानापूर : खानापूर तालुक्यासह बेळगाव, गोवा व महाराष्ट्रातील भाविकांचे श्रद्धास्थान गुंजी येथील श्री माऊली देवी यात्रोत्सवाला आज सुरुवात झाली. सोमवार, दिनांक 6 ऑक्टोबर 2025 पर्यंत ही यात्रा चालणार आहे.
गुरुवार दिनांक 2 ऑक्टोबर रोजी पालखी उत्सवाने यात्रेला प्रारंभ झाला. 6 ऑक्टोबर रोजी यात्रेची सांगता होणार असून या दरम्यान विविध धार्मिक तसेच सांस्कृतिक कार्यक्रमांचे आयोजन करण्यात आले आहे.
शुक्रवार, 3 ऑक्टोबर रोजी सकाळी 8 वाजता इंगळ्यांचा कार्यक्रम, ओटी भरणे, तुलाभार, नवस फेडणे इत्यादी धार्मिक विधी संपन्न झाले. दुपारी 12 वाजता श्री माऊली जनसेवा फाउंडेशन, गुंजी यांच्यातर्फे महाप्रसाद कार्यक्रम झाला. रात्री 8 वा. शेजारती व प्रसाद
आणि रात्री 10 वा. सोशल फाउंडेशन पुरस्कृत श्री चव्हाटा नाट्य मंडळाचा ‘गारवा डाळिंबीचा’ हा नाट्यप्रयोग सादर केला जाणार आहे.
शनिवार, 4 ऑक्टोबर रोजी सकाळी 8 वा. धार्मिक विधी (इंगळ्यांचा कार्यक्रम, ओटी भरणे, तुलाभार, नवस फेडणे)
दुपारी 12 वा. संकल्प फाउंडेशन, गुंजी यांच्यातर्फे महाप्रसाद,रात्री 8 वा.: शेजारती व प्रसाद तर रात्री 10 वा. सांस्कृतिक कला युवामंच पुरस्कृत जल्लोष ऑर्केस्ट्रा, कोल्हापूर यांचा भव्य संगीत कार्यक्रम होणार आहे.
रविवार दिनांक 5 ऑक्टोबर व सोमवार, 6 ऑक्टोबर रोजी सकाळी 8 वा. धार्मिक विधी होणार आहेत.
सोमवार दिनांक सकाळी 11 वा. गाऱ्हाणे होऊन यात्रोत्सवाची सांगता केली जाणार आहे.
यात्रेच्या पार्श्वभूमीवर गावात उत्साहाचे वातावरण आहे.
भाविकांनी मोठ्या संख्येने यात्रेत सहभागी होऊन देवीचे दर्शन घ्यावे तसेच आयोजित धार्मिक व सांस्कृतिक कार्यक्रमांचा लाभ घ्यावा, असे आवाहन आयोजक मंडळाकडून करण्यात आले आहे.

03/10/2025

भाजप नेत्यांनी केली पीक नुकसानीची पाहणी

बेळगाव : बैलहोंगल तालुक्यातील नेसरगी भागात मुसळधार पावसामुळे गाजर व सोयाबीन पिकांचे मोठे नुकसान झाले आहे. या नुकसानीची पाहणी करण्यासाठी भाजप नेत्यांनी दौरा केला.
यावेळी जिल्हाधिकारी मोहम्मद रोशन, महसूल विभागाचे अधिकारी तसेच शेतकऱ्यांशी चर्चा करून माहिती घेतली.

"पिकांच्या नुकसानीमुळे आम्ही मोठ्या अडचणीत आहोत, मात्र आमची व्यथा ऐकण्यासाठी मंत्री किंवा स्थानिक आमदार आलेले नाहीत. तसेच अधिकाऱ्यांनी योग्य प्रकारे पंचनामा केलेला नाही" अशी तक्रार शेतकऱ्यांनी यावेळी व्यक्त केली.

या पाहणी दौऱ्यात विरोधी पक्षनेते आर. अशोक, विधानपरिषदेचे सदस्य एन. रवीकुमार, सी. टी. रवी, खासदार रमेश जिगजिनगी, राज्यसभेचे सदस्य ईरन्ना कडाडी, आमदार रमेश जारकीहोळी, शशिकला जोल्ले, विठ्ठल हलगेकर, माजी आमदार संजय पाटील, महंतेश दोडगौडर, तसेच विधानपरिषदेचे माजी सदस्य महंतेश कवटगीमठ आदी उपस्थित होते.

03/10/2025

इरण्णा कडाडी यांनी केली बेळगाव जिल्हा विभाजनाची मागणी

बेळगाव : बेळगाव जिल्ह्याचे विभाजन करून नवीन जिल्हा जाहीर करावा, अशी मागणी विधान परिषद सदस्य इरण्णा कडाडी यांनी केली आहे.

मुख्यमंत्री सिद्धरामय्या हे 4 ऑक्टोबर रोजी विविध विकास कामांच्या उद्घाटन व भूमिपूजनासाठी बेळगाव दौऱ्यावर येत आहेत. त्यांच्या या दौऱ्यादरम्यान त्यांनी, बेळगाव जिल्ह्याचे विभाजन करून नवीन जिल्हा जाहीर करावा, अशी मागणी इरण्णा कडाडी यांनी आयोजित पत्रकार परिषदेत केली आहे.
"भौगोलिकदृष्ट्या बेळगाव हा अत्यंत मोठा जिल्हा आहे. त्यामुळे बर्‍याच दिवसांपासून जिल्हा विभाजनाची मागणी होत आहे. मुख्यमंत्री बेळगावात आल्यावर त्यांनी नवीन जिल्ह्याची घोषणा करावी," अशी आमची ठाम भूमिका असल्याचे इरण्णा कडाडी यांनी प्रसार माध्यमांसमोर बोलताना म्हटले आहे.

03/10/2025

आलमट्टी जलाशयात 7.556 टीएमसी फूट गाळ : गाळामुळे घटली पाण्याची साठवण क्षमता

विजापूर : कर्नाटकमधील सर्वात मोठ्या धरणांपैकी एक असलेल्या आलमट्टी जलाशयात 7.556 टीएमसी फूट गाळ साचला आहे. यामुळे जलाशयाची पाणी साठवण क्षमता घटली आहे.
आलमट्टी जलाशयाची एकूण साठवण क्षमता 123.081 टीएमसी फूट आहे. मात्र गेल्या दोन दशकांत जलाशयात मोठ्या प्रमाणात गाळ साचल्यामुळे जलाशयाची साठवण क्षमता 7.556 टीएमसी फूटांनी घटली असल्याचे अभ्यासकांचे मत आहे.
सन 2023 मध्ये कर्नाटक इंजिनिअरिंग रिसर्च सेंटर (KERS) तर्फे आलमट्टीसह राज्यातील विविध जलाशयांच्या गाळ साचण्याबाबतचा अभ्यास अहवाल तयार करून सरकारकडे सादर करण्यात आला आहे. हा अहवाल संबंधित जलाशयांच्या मुख्य अभियंत्यांनाही सुपूर्द करण्यात आला आहे. आलमट्टी जलाशयात तब्बल 6.1 टक्के साठवण क्षमतेत घट झाल्याचे निष्कर्ष यातून समोर आले आहेत.

कर्नाटक इंजिनिअरिंग रिसर्च सेंटर (KERS) चे संचालक के. जी. महेश यांच्या माहितीनुसार, आलमट्टी जलाशयापासून हिप्परगीपर्यंत सुमारे 487 चौ.कि.मी. क्षेत्रात तीन महिने अभ्यास करण्यात आला होता. बोटीमध्ये बसवलेल्या इको साऊंड सिस्टम द्वारे पाण्याच्या तळाशी ध्वनितरंग सोडण्यात आले. त्यातून परत येणाऱ्या प्रतिध्वनींचे संगणक सॉफ्टवेअरद्वारे विश्लेषण करून पाणी व गाळ यांचे प्रमाण मोजण्यात आले. या अभ्यासाचे वैज्ञानिक विश्लेषण करून अंतिम अहवाल सरकारकडे पाठविण्यात आला आहे.

2001 पासून आलमट्टी जलाशयात एकूण 7.556 टीएमसी फूट गाळ साचल्याचे स्पष्ट झाले आहे. त्यामुळे जलाशयाची कमाल साठवण क्षमता 123.081 टीएमसी फूटांवरून 115.552 टीएमसी फूटांवर घसरली आहे. यामुळे सिंचन व इतर वापरासाठी पाण्याची टंचाई भासणार नाही, असे कृष्ण भाग्य जल निगम लिमिटेड (KBJNL) च्या अधिकाऱ्यांनी स्पष्ट केले आहे.
राज्यातील इतर जलाशयांचाही या अहवालात तुलनात्मक अभ्यास करण्यात आला आहे. 2022 मध्ये करण्यात आलेल्या सर्वेक्षणात नारायणपूर जलाशयात सर्वाधिक गाळ साचल्याचे नोंदले गेले. नारायणपूर जलाशयात 10.550 टीएमसी फूट गाळ साचल्यामुळे तब्बल 27.292 टीएमसी फूट साठवण क्षमतेत घट झाली आहे. गाळामुळे पाण्याच्या साठवण क्षमतेत होणाऱ्या नुकसानीच्या बाबतीत तुंगभद्रा जलाशय दुसऱ्या क्रमांकावर आहे.

01/10/2025

बेळगाव : नवदुर्गा उत्सव मंडळ आणि नवदुर्गा महिला मंडळ, भारत नगर, तिसरा क्रॉस, मच्छे, बेळगाव या उत्सव मंडळाने दुर्गादेवी मंडपात हळदी-कुंकू समारंभ आणि परिसरातील वयोवृद्ध व मान्यवरांच्या सत्कार समारंभाचे आयोजन करण्यात आले होते.

28/09/2025

' अंनिस 'च्या चार कार्यकर्त्यांना केले गेले ग्रंथमित्र पुरस्काराने सन्मानित

बेळगाव : महाराष्ट्र राज्य अंधश्रद्धा निर्मूलन समितीच्या, बेळगाव शाखेच्या चार कार्यकर्त्यांना ग्रंथमित्र पुरस्कार देऊन सन्मानित करण्यात आले.
बेळगाव शाखेचे सचिन जोतिबा अगसीमनी , एस.जी.पाटील, सूर्याजी पाटील आणि शिवाजी हसनेकर हे चार अंनिस कार्यकर्ते सन्मानाचे मानकरी आहेत.
लातूर येथील ओम लॉन्स मंगल कार्यालयाच्या सभागृहात महाराष्ट्र अंनिसच्या राज्य कार्यकारिणीची सभा झाली. यावेळी हे पुरस्कार प्रदान करण्यात आले.
यावेळी झालेल्या कार्यक्रमाच्या अध्यक्षस्थानी अंधश्रध्दा निर्मूलन समिती ट्रस्टचे अध्यक्ष गणेश चिंचोळी हे होते.
माजी खासदार डॉ. गोपाळराव पाटील यांच्या हस्ते समता वृक्षाला पाणी घालून या कार्यक्रमाचे उद्घाटन करण्यात आले. या पुरस्कार वितरणच्या कार्यक्रमाला पीपल्स सायन्स नेटवर्कचे डॉ. विवेक मोंटेरो, प्राचार्य डी.एच .थोरात, डॉ .हमीद दाभोळकर, मुक्ता दाभोळकर, मिलिंद देशमुख, प्रवीण देशमुख यांच्यासह अनेक मान्यवर उपस्थित होते.

23/09/2025

मच्छे- भारतनगर तिसरा क्रॉस येथील दुर्गामुर्तीचे दिमागात आगमन

बेळगाव : मच्छे येथील भारतनगर तिसरा क्रॉस मधील नवदुर्गा उत्सव मंडळ आणि नवदुर्गा महिला मंडळाच्या श्री दुर्गा मूर्तीचे आगमन मोठ्या दिमागात झाले.
दुर्गामाता की जय अशा जयघोषात देवीला आणण्यात आले.

यावेळी हाती टाळ घेऊन
'" भिडे आसमंती ध्वजा वैष्णवांची
उभी पंढरी आज नादावली
तुझे नाव ओठी, तुझे रूप ध्यानी
जिवाला तुझी आस गा लागली
जरी बाप साऱ्या जगाचा परि तू
आम्हा लेकरांची विठू माऊली

माऊली माऊली, माऊली माऊली
माऊली माऊली, रूप तुझे
माऊली माऊली, माऊली माऊली
माऊली माऊली, रूप तुझे

विठ्ठल विठ्ठल, विठ्ठल विठ्ठल
विठ्ठल विठ्ठल, विठ्ठल विठ्ठल

या गाण्यावर तसेच हाती पेटत्या पणत्या घेऊन
" मै तो आरती उतारू रे संतोषी माता की "
या गाण्यावर नृत्य करीत महिला भगिनीनी माता दुर्गा देवीची मूर्ती मंडपात आणली.

23/09/2025

जिनाप्पा वस्ताद तालीम ची दुर्गामाता मूर्ती आणली गेली जल्लोषात

बेळगाव : अनगोळ येथील जिनाप्पा वस्ताद तालीम ची दुर्गामाता मूर्ती जल्लोषात आणण्यात आली. फटाक्यांची आतषबाजी करीत आणि माता दुर्गादेवीचा जयघोष करीत सोमवारी रात्री मूर्तीचे आगमन झाले.

23/09/2025

कपिलनाथाच्या निलयात सिंहासनारूढ दुर्गामाता

बेळगाव : नवरात्रोत्सवानिमित्त श्रीक्षेत्र दक्षिणकाशी कपिलेश्वर मंदिर येथे सिंहासनारूढ दुर्गामाता मूर्ती प्रतिष्ठापित करण्यात आली आहे. कपिलेश्वर मंदिराचे विश्वस्त मंडळ व मंदिराचे सर्व सेवेकरी यांच्या उपस्थितीत हा दिमागदार सोहळा पार पडला.
यावेळी आकर्षक अशी विद्युत रोषणाई करण्यात आली होती. फटाक्यांच्या आतिषबाजीत आणि दुर्गामाता की जय च्या घोषात मूर्तीसमोरील पडदा हटवून मूर्तीचे दर्शन घडविण्यात आले.
चव्हाट गल्लीतील प्रसिद्ध कलाकार प्रवीण राणे यांनी ही सुंदर मूर्ती घडविली असून त्यांचा याप्रसंगी सत्कार करण्यात आला. आकर्षक विद्युत रोषणाई बद्दल पोगो साऊंड चे अभिजीत पवार व त्यांचे सहकारी यांचा सुद्धा देवस्थान ट्रस्टच्यावतीने सत्कार करण्यात आला.

20/09/2025

कुणबी-मराठा नोंद : येळ्ळूर महाराष्ट्र एकीकरण समितीची बैठक

येळ्ळूर : कर्नाटक सरकारच्यावतीने जातीनिहाय जनगणना दि. 22 सप्टेंबर ते 7 ऑक्टोबर 2025 पर्यंत करण्यात येणार आहे. जनगणना सर्वेक्षनात सर्व मराठा समाजातील नागरीकांनी धर्म- हिंदू, जात- मराठा, पोटजात- कुणबी आणि मातृभाषा- मराठी अशी नोंद करावी यासंदर्भात जनजागृती करण्यासाठी रविवार दि. 21 रोजी सायं. 6 वा. रॅली आयोजित करण्यात आली आहे. या रॅलीला उपस्थित राहण्या बरोबर सकल मराठा समाज्याच्यावतीने रविवारी मराठा मंदिर बेळगाव येथे 5 वाजता आयोजित केलेल्या मेळाव्याला मोठ्या संख्येने उपस्थित राहण्याचा निर्धार महाराष्ट्र एकीकरण समिती येळ्ळूरच्या बैठकीत व्यक्त करण्यात आला. बैठकीच्या अध्यक्षस्थानी माजी कृषी उत्पन्न बाजार समितीचे सदस्य श्री. वामनराव पाटील हे होते.
प्रारंभी श्री. प्रकाश अष्टेकर यांनी कुणबी-मराठा नोंदी केल्याने मराठा समाजातील विद्यार्थ्यांना शिक्षण आणि नोकरीत अनेक फायदे होणार आहेत. म्हणून युवकांनी सदर नोंदीसाठी विभागवार कमिट्या कराव्यात असे सांगितले. माजी ग्रामपंचायत उपाध्यक्ष श्री. दुद्दापा बागेवाडी मराठा समाजाला आरक्षणचा भविष्यात फायदा होणार असल्यामुळे कुणीबी-मराठा नोंद अत्यावश्यक असल्याचे सांगितले. युवा नेते दत्ता उघाडे यांनी सकल मराठाच्या माध्यमातून हे कार्य करण्यात येणार असल्याचे सांगितले. माजी ग्रामपंचायत सदस्य राजू पावले, श्री. बंडू देसाई, श्री. उदय जाधव यांचीही भाषणे झाली.
या बैठकीत म.ए. समितीचे कार्यकर्ते श्री. बंडू देसाई यांची बेळगाव तालुका मार्केटिंग सोसायटीच्या संचालकपदी बिनविरोध निवड झाल्याबद्दल त्यांचा शाल व श्रीफळ देऊन सत्कार करण्यात आला.
या बैठकीला माजी तालुका पंचायत सदस्य चांगदेव परीट, दौलत पाटील, शिवाजी सायनेकर, शिवाजी कदम, बाळू पाटील परशराम पावले, आनंद कंग्राळकर, आनंद घाडी भोला पाखरे, सुरज गोरल, बाळू धामणेकर, कृष्णा बिजगरकर, गणेश अष्टेकर, रामा पाखरे शुभम जाधव, संदीप मेलगे, पप्पू माणकोजी, सुधाकर पाटील, रघु हीरेमठ आदींसह बहुसंख्य नागरिक उपस्थित होते.
माजी ग्रामपंचायत सदस्य प्रकाश पाटील यांनी आभार मानले.

20/09/2025

शैक्षणिक आणि सामाजिक सर्वेक्षण जनजागृतीला वेग : किरण जाधव यांनी घेतल्या लोकांच्या गाठीभेटी : केले पत्रकांचे वाटप

बेळगाव : कर्नाटक सरकारच्या शैक्षणिक आणि सामाजिक सर्वेक्षण पत्रकात मराठा समाजातील लोकांनी धर्म, जात, पोटजात आणि मातृभाषा कशाप्रकारे नमूद करावी यासंदर्भात सकल मराठा समाज आणि मराठा समाजातील नेते मंडळींकडून जनजागृती करण्यात येत आहे. या अनुषंगाने मराठा समाजाचे युवा नेते किरण जाधव यांनी आज कपिलेश्वर कॉलनी, शास्त्रीनगर, गुडशेड रोड यासह आसपासच्या परिसरात यासंदर्भात जनजागृती केली.
त्यांनी या भागातील मराठा समाजातील लोकांच्या गाठीभेटी घेऊन जातनिहाय जनगणना पत्रकात धर्म हिंदू, जात मराठा, पोट जात कुणबी आणि मातृभाषा मराठी असे नमूद करण्याचे आवाहान केले. यावेळी त्यांनी या संदर्भातील नमुना पत्रकांचे वाटप केले.
पान नंबर 5 वरील अनुक्रमणिका 8 मध्ये धर्म हिंदू, अनुक्रमणिका 9 मध्ये जात मराठा, अनुक्रमणिका 10 मध्ये पोट जात कुणबी तर पान नंबर 6 वरील अनुक्रमणिका 15 मधील क्रमांक 6 मध्ये मातृभाषा मराठी असा उल्लेख करावा असे किरण जाधव यांनी याविषयीच्या प्रसार आणि प्रचारादरम्यान सांगितले.
शिक्षणात आरक्षण सवलती मिळण्यासाठी, सरकारी नोकरीत आरक्षण लागू होण्यासाठी तसेच सरकारी योजनेत लाभार्थी होण्यासाठी मराठी समाज बांधवांना ही शैक्षणिक आणि सामाजिक सर्वेक्षण नोंद उपकारक ठरणार असल्याचे यावेळी बोलताना किरण जाधव यांनी सांगितले.

19/09/2025

जातनिहाय जनगणना : होतेय मोठ्या प्रमाणात जनजागृती

नमूद करा ....धर्म हिंदू, जात मराठा, पोटजात कुणबी आणि मातृभाषा मराठी : केलं जातंय आवाहन

बेळगाव : येत्या 22 तारखेपासून सुरू होणाऱ्या जातनिहाय जनगणनेसंदर्भात मराठा समाजातील नेते मंडळीकडून मोठ्या प्रमाणात जनजागृती करण्यात येत आहे. त्या अनुषंगाने मराठा समाजाचे युवा नेते किरण जाधव यांनी आज बेळगावमधील नामांकित अशा नवहिंद को ऑपरेटिव्ह सोसायटी या पतसंस्थेला आणि मराठा सहकारी बँकेला भेट देऊन तेथील चेअरमन आणि संचालकाला जातनिहाय जनगणना पत्रकात मराठा समाजाने कशाप्रकारे माहिती नोंद करावी याची माहिती दिली.
यावेळी मराठा बँकेचे चेअरमन दिगंबर पवार यांनी संचालकांसमवेत माहिती घेऊन बँकेच्या सभासद, ग्राहक आणि हितचिंतकांना आवाहान करून, मराठा समाजातील लोकांनी जातनिहाय जनगणना पत्रकात आपली माहिती योग्य प्रकारे नमूद करावी. धर्म हिंदू, जात मराठा, पोटजात कुणबी आणि भाषा मराठी असे नमूद करावे असे आवाहन त्यांनी केले.
बँकेच्या संचालिका रेणू किल्लेकर यांनीही याविषयी माहिती देत, मराठा समाजातील नागरिकांनी जातीनिहाय जनगणनेसाठी आलेल्या अधिकाऱ्यांसमोर, मराठा समाजातील नेत्यांनी केलेल्या आवाहानुसार माहिती नमूद करावी असे सांगितले.
नवहिंद को-ऑपरेटिव्ह सोसायटीचे चेअरमन प्रकाश अष्टेकर यांनी, जातनिहाय जनगणनेवेळीधर्म हिंदू, जात मराठा आणि पोटजात कुणबी व मातृभाषा मराठी असे ठोसपणे नमूद करावे. जेणेकरून पुढील पिढीला याचा लाभ होईल असे म्हटले.
किरण जाधव हे विविध संघ संस्थांना भेटी देऊन तेथील पदाधिकारी तसेच संचालक मंडळांना जातनिहाय जनगणने दरम्यान भरावयाच्या माहितीविषयी मार्गदर्शन करीत आहेत.

BN7 News Ravindra Jadhav

03/10/2025

03/10/2025

03/10/2025

03/10/2025

01/10/2025

28/09/2025

23/09/2025

23/09/2025

23/09/2025

20/09/2025

20/09/2025

19/09/2025

Address

Telephone

Website

Alerts

Contact The Business

Shortcuts

Share

Category