24/08/2026
ଭରା ନଈରେ ବାପା ସାଜିଲା ବାହୁବଳି! ମାଡ଼ିଆସୁଛି ପ୍ରଖର ସୁଅ, କାନ୍ଧରେ ବସିଛି କୁନିଝିଅ...
ଦୁଇ ମାସର ଶିଶୁକୁ କାନ୍ଧରେ ଧରି ଉଛୁଳା ନାଳ ପାର ହେଉଛନ୍ତି ବାପା। ସାମ୍ନାରେ ଭରା ନାଳ, ଆଉ ପାଦ ତଳେ ନାହିଁ କୌଣସି ସୁରକ୍ଷିତ ରାସ୍ତା। ଶିଶୁକୁ ସୁରକ୍ଷିତ ଭାବେ ପାର କରାଇବା ପାଇଁ ନିଜ ଜୀବନକୁ ବାଜିରେ ଲଗାଇ ନାଳ ଭିତରେ ପଶୁଛନ୍ତି ବାପା। ଏଭଳି ଛାତି ଥରାଇଦେବା ଭଳି ଦୃଶ୍ୟ ସୁନ୍ଦରଗଡ଼ ଜିଲ୍ଲା କୋଇଡା ବ୍ଲକ କେ-ବଲାଙ୍ଗ ପଞ୍ଚାୟତର ବାକରଟୋଲା ଓ ଗାଢାଟୋଲା ଅଞ୍ଚଳରୁ ସାମ୍ନାକୁ ଆସିଛି। ବ୍ରିଜ୍ ନଥିବାରୁ ବର୍ଷା ଦିନେ ଏହି ଅଞ୍ଚଳର ଲୋକଙ୍କ ଜୀବନ ଦୁର୍ବିଷହ ହୋଇପଡ଼ୁଛି। ବର୍ଷା ହେଲେ ନାଳରେ ପାଣି ବଢ଼ିଯାଏ। ପାଣିର ସ୍ରୋତ ମଧ୍ୟ ଏତେ ଅଧିକ ରହେ ଯେ, ନାଳ ପାର ହେବା ବେଳେ ଯେକୌଣସି ସମୟରେ ବଡ଼ ଅଘଟଣ ଘଟିପାରେ। ତଥାପି ଜରୁରୀ ଆବଶ୍ୟକତା ପାଇଁ ଲୋକଙ୍କୁ ଏହି ବିପଦପୂର୍ଣ୍ଣ ରାସ୍ତା ଦେଇ ଯାତାୟାତ କରିବାକୁ ପଡ଼ୁଛି।
ସୂଚନା ଅନୁସାରେ, କେ-ବଲାଙ୍ଗ ମେଡିକାଲରୁ ଫେରୁଥିବା ସମୟରେ ଏହି ପରିବାରକୁ ନାଳ ପାର ହେବାକୁ ପଡ଼ିଥିଲା। କୋଳରେ ଥିଲା ମାତ୍ର ଦୁଇ ମାସର ଶିଶୁ। ନାଳରେ ପାଣି ଭରି ରହିଥିବା ବେଳେ ଶିଶୁକୁ କାନ୍ଧରେ ଧରି ବାପା ନାଳ ଭିତରେ ପଶିଥିଲେ। ଗୋଟିଏ ଭୁଲ ପାଦ ଓ ଗୋଟିଏ ମୁହୂର୍ତ୍ତର ଅସାବଧାନତା ଶିଶୁ ସମେତ ତାଙ୍କ ଜୀବନ ପାଇଁ ବିପଦ ଆଣିପାରିଥାନ୍ତା। କେବଳ ଏହି ପରିବାର ନୁହେଁ, ବର୍ଷା ଦିନେ ଏହି ନାଳ ପାର ହେବା ଏଠାକାର ଲୋକଙ୍କ ନିତିଦିନିଆ ସଂଘର୍ଷ ପାଲଟିଛି। ଗାଁରେ କେହି ଅସୁସ୍ଥ ହେଲେ ଆମ୍ବୁଲାନ୍ସ ଆସିବା ମଧ୍ୟ କଷ୍ଟକର ହୋଇପଡ଼େ। ଫଳରେ ରୋଗୀଙ୍କୁ ଖଟିଆରେ ବୋହି ନାଳ ପାର କରାଇବାକୁ ପଡ଼ୁଛି। ଅତି ଜରୁରୀ ସ୍ଥିତିରେ ମଧ୍ୟ ଲୋକଙ୍କ ପାଖରେ ଅନ୍ୟ କୌଣସି ବିକଳ୍ପ ନଥିବା କୁହାଯାଉଛି।
ସବୁଠାରୁ ଦୁଃଖଦ କଥା ହେଉଛି, ଜୀବନ ଚାଲିଗଲା ପରେ ମଧ୍ୟ ଏହି ସମସ୍ୟାରୁ ମୁକ୍ତି ମିଳୁନାହିଁ। ଗାଁରେ କାହାର ମୃତ୍ୟୁ ହେଲେ ଶବକୁ ମଧ୍ୟ ଏହି ନାଳ ପାର କରାଇ ନେବାକୁ ପଡ଼ୁଥିବା ଅଭିଯୋଗ ରହିଛି। ଅର୍ଥାତ୍ ଜୀବିତ ଥିବା ସମୟରେ ରୋଗୀ ହୁଅନ୍ତୁ କି ମୃତ୍ୟୁ ପରେ ଶବ—ସମସ୍ତଙ୍କ ପାଇଁ ଏହି ନାଳ ହିଁ ଏକମାତ୍ର ବାଧା ହୋଇ ଛିଡ଼ା ହୋଇଛି। ବର୍ଷା ଆସିଲେ ବାକରଟୋଲା ଓ ଗାଢାଟୋଲାର ଲୋକେ ଏକପ୍ରକାର ବାହ୍ୟ ଜଗତରୁ ବିଚ୍ଛିନ୍ନ ହୋଇପଡ଼ନ୍ତି। ଛାତ୍ରଛାତ୍ରୀଙ୍କ ଯାତାୟାତଠାରୁ ଆରମ୍ଭ କରି ରୋଗୀଙ୍କୁ ହସ୍ପିଟାଲ ନେବା ପର୍ଯ୍ୟନ୍ତ ପ୍ରତ୍ୟେକ କାମରେ ବିପଦ ରହିଥାଏ। ନାଳରେ ପାଣି କମିବା ପର୍ଯ୍ୟନ୍ତ ଅନେକ ସମୟରେ ଲୋକଙ୍କୁ ନିଜ ଘର ଅଞ୍ଚଳରେ ଅଟକି ରହିବାକୁ ପଡ଼େ। ଏହି ଦୃଶ୍ୟ ସାମ୍ନାକୁ ଆସିବା ପରେ ଏବେ ସ୍ଥାନୀୟ ଲୋକଙ୍କ ସମସ୍ୟାକୁ ନେଇ ପ୍ରଶ୍ନ ଉଠିଛି। ଏତେ ବର୍ଷ ଧରି ଲୋକେ ଜୀବନକୁ ବାଜିରେ ଲଗାଇ ନାଳ ପାର ହେଉଥିବା ବେଳେ କେବେ ହେବ ସ୍ଥାୟୀ ସମାଧାନ? କେବେ ନିର୍ମାଣ ହେବ ବ୍ରିଜ୍? ଏବେ ଏହି ପ୍ରଶ୍ନର ଉତ୍ତରକୁ ଅପେକ୍ଷା କରିଛନ୍ତି ବାକରଟୋଲା ଓ ଗାଢାଟୋଲାର ଲୋକେ।
