06/06/2026
ପଶ୍ଚିମବଙ୍ଗ ବାଚସ୍ପତି ୫୮ ଜଣ ବିଧାୟକଙ୍କ ସ୍ୱାକ୍ଷରିତ ଚିଠି ଗ୍ରହଣ କରିଛନ୍ତି। ଅନ୍ୟ ଦୁଇ ଜଣ ବିଧାୟକ ମଧ୍ୟ ଏହି ଗୋଷ୍ଠୀରେ ଅଛନ୍ତି କିନ୍ତୁ ସେମାନେ ବର୍ତ୍ତମାନ ରାଜ୍ୟ ବାହାରେ ଅଛନ୍ତି ବୋଲି କୁହାଯାଇଛି।
ବଙ୍ଗର ନୂଆ ବିରୋଧୀ ଦଳ ନେତା ରୀତବ୍ରତ ବାନାର୍ଜୀ
ଏକ ସାମ୍ୱାଦିକ ସମ୍ମିଳନୀରେ ବିଦ୍ରୋହୀ ତୃଣମୂଳ କଂଗ୍ରେସ ନେତା ରୀତବ୍ରତ ବାନାର୍ଜୀ ଘୋଷଣା କରିଛି ଯେ ଦଳରୁ ବିଧାନସଭାକୁ ନିର୍ବାଚିତ ମୋଟ ୮୦ ବିଧାୟକଙ୍କ ମଧ୍ୟରୁ ୫୮ ଜଣ ବିଧାୟଙ୍କ ସମର୍ଥନ ରୀତବ୍ରତଙ୍କ ସହ ଅଛି।
ଟିଏମସି ବିଧାୟକ ଦଳ ହେଉଛି ୫୮ ଜଣ ବିଧାୟକଙ୍କ ଏକ ଦଳ ଯେଉଁମାନେ ଟିଏମସିର ଦଳୀୟ ଚିହ୍ନରେ ଜିତିଛନ୍ତି। ଆଉ ଦୁଇଜଣ ବିଧାୟକ ଆମ ସହିତ ଯୋଗଦେବାର ସମ୍ଭାବନା ଅଛି। ସେମାନେ ଆନୁଷ୍ଠାନିକ ଭାବରେ ସମର୍ଥନ ଦେବା ପରେ, ଆମର ଶକ୍ତି ଆହୁରି ବୃଦ୍ଧି ପାଇବ ବୋଲି ରୀତବ୍ରତ କହିଛନ୍ତି।
ସେ କହିଛନ୍ତି ଯେ ବାଚସ୍ପତି ବିଧାୟକ ଦଳର ସଂଶୋଧିତ ଗଠନକୁ ଅନୁମୋଦନ କରିଛନ୍ତି ଏବଂ ବିରୋଧୀ ଦଳ ପାଇଁ ନିର୍ଦ୍ଦିଷ୍ଟ କାର୍ଯ୍ୟାଳୟ ତାଙ୍କୁ ଦିଆଯାଇଛି। ବିଦ୍ରୋହୀ ଶିବିର ବିଧାୟକ ଦଳ ପାଇଁ ଏକ ନୂତନ ନେତୃତ୍ୱ ଦଳ ମଧ୍ୟ ଘୋଷଣା କରିଛି। ବାନାର୍ଜୀ କହିଛନ୍ତି ଯେ ଆଖରୁଜମାନ ଙ୍କୁ ବିଧାନସଭାରେ ମୁଖ୍ୟ ସଚେତକ ଭାବେ ନିଯୁକ୍ତ କରାଯାଇଛି ।
ବରିଷ୍ଠ ବିଧାୟକ ଜାଭେଦ ଅହମ୍ମଦ ଖାନ, ସନ୍ଦୀପନ ସାହା, ସାବିନା ୟାସମିନ ଏବଂ ଶିଉଲି ସାହାଙ୍କୁ ଉପନେତା ନିଯୁକ୍ତ କରାଯାଇଛି। ଏହି ନିଯୁକ୍ତି ସମ୍ପର୍କରେ ବାଚସ୍ପତିଙ୍କ ନିକଟକୁ ଚିଠି ଲେଖା ଯାଇଥିବାର ସେ କହିଛନ୍ତି।
ମମତା ବାନାର୍ଜୀଙ୍କୁ ରୀତବ୍ରତଙ୍କ ନିବେଦନ
ସଂଗଠନ ଭିତରେ ଚାଲିଥିବା ବିଦ୍ରୋହ ସତ୍ତ୍ୱେ ବିଧାୟକ ଦଳକୁ ମାର୍ଗଦର୍ଶନ ଜାରି ରଖିବାକୁ ବିଦ୍ରୋହୀ ଟିଏମସି ନେତା ଦଳର ସୁପ୍ରିମୋ ମମତା ବାନାର୍ଜୀଙ୍କୁ ଅନୁରୋଧ କରିଛନ୍ତି।
ସେ କହିଛନ୍ତି, "ଆମେ ମମତା ବାନାର୍ଜୀଙ୍କୁ ବିଧାୟକ ଦଳର ମୁଖ୍ୟ ପରାମର୍ଶଦାତା ଭୂମିକା ଗ୍ରହଣ କରିବାକୁ ଅନୁରୋଧ କରିବୁ।"
କଣ ପାଇଁ ସୃଷ୍ଟି ହେଲା ଫାଟ ?
ସରକାରୀ କାଗଜପତ୍ରରେ ଦଳର ଅନେକ ବିଧାୟକଙ୍କ ଦସ୍ତଖତ ଜାଲ କରାଯାଇଥିବା ଅଭିଯୋଗ ମଧ୍ୟରେ ଟିଏମସି ବିଧାନସଭାରେ ବିରୋଧୀ ଦଳ ନେତା ଭାବରେ ବରିଷ୍ଠ ବିଧାୟକ ଶୋଭନଦେବ ଚଟ୍ଟୋପାଧ୍ୟାୟଙ୍କୁ ନିଯୁକ୍ତ କରିବା ପରେ ଏହା ଆସିଛି ।
ରୀତବ୍ରତ ବାନାର୍ଜୀ ଏବଂ ବିଧାୟକ ସନ୍ଦିପନ ସାହା ବିଧାୟକ ଦଳ ନେତା ପଦ ପାଇଁ ଚଟୋପାଧ୍ୟାୟଙ୍କ ପ୍ରାର୍ଥୀତ୍ୱକୁ ସମର୍ଥନ କରି ବାଚସ୍ପତିଙ୍କୁ ପୂର୍ବରୁ ପ୍ରଦାନ କରାଯାଇଥିବା ଚିଠିରେ ଦସ୍ତଖତ ନେଇ ଚିନ୍ତା ପ୍ରକଟ କରିଥିଲେ।
ସେମାନଙ୍କ ଅଭିଯୋଗ ପରେ ପଶ୍ଚିମବଙ୍ଗ ଅପରାଧ ତଦନ୍ତ ବିଭାଗ (CID) ଏକ ତଦନ୍ତ ଆରମ୍ଭ କରିଥିଲା। ଦଳ ତା’ପରେ ଉଭୟ ନେତାଙ୍କୁ ବହିଷ୍କାର କରିଥିଲା।
ବରିଷ୍ଠ ତୃଣମୂଳ କଂଗ୍ରେସ ନେତା କୁନାଲ ଘୋଷ ପୂର୍ବରୁ କହିଥିଲେ ଯେ ଦଳ ଭିତରେ ମତଭେଦ ସମାଧାନ ହୋଇପାରିଥାନ୍ତା ଏବଂ ଏକ ଚ୍ୟାଲେଞ୍ଜିଂ ସମୟରେ ଅସନ୍ତୁଷ୍ଟ ଗୋଷ୍ଠୀ ସଂଗଠନକୁ ପଛରୁ ଛୁରା ମାରିବାର ଅଭିଯୋଗ କରିଥିଲେ।
