ଟାଇମପାସ: ଦୁଇ ପାଦ ଆଗରେ
ପ୍ରିୟ ବହିବନ୍ଧୁ!
ଦୁଇହଜାର ଛ’ ମସିହାରେ ଗୋଟାଏ ଅଯାଚିତ ସ୍ୱପ୍ନରୁ ଆରମ୍ଭ ହୋଇଥିବା ‘ଟାଇମ୍ପାସ୍’ ପ୍ରକାଶନ ଆପଣମାନଙ୍କ ନିରବଚ୍ଛିନ୍ନ ସୁମନାସ ଓ ସାନ୍ନିଧ୍ୟ ଯୋଗୁଁ ଆଜି ସଫଳତାର 15 ବର୍ଷରେ ପହଞ୍ଚିପାରିଛି; ଏଥିପାଇଁ ମୁଁ ଆପଣମାନଙ୍କୁ ଶ୍ରଦ୍ଧା, ସମ୍ମାନ ଓ କୃତଜ୍ଞତା ଜଣାଉଛି ।
2006 ମାର୍ଚ୍ଚ 9 ତାରିଖରେ ମାତ୍ର ତିନିଟି ବହିରୁ ଯାତ୍ରା ଆରମ୍ଭ କରିଥିବା ଏଇ ଉଚ୍ଚାଭିଳାଷୀ ପ୍ରକାଶନ ସଂସ୍ଥା ଇତିମଧ୍ୟରେ ପାଖାପାଖି 800 ବହି, ତାହାପୁଣି କେବଳ ସାହିତ୍ୟବହି ଛାପି ଆପଣମାନଙ୍କର ଏତେ ନିକଟତର ହୋଇପାରିବା ଆମ ପାଇଁ ନିଶ୍ଚୟ ସୌଭାଗ୍ୟର ବିଷୟ । ଓଡ଼ିଶାର ମାନ୍ଦା ବହିବଜାର, ସରକାରୀ ପ୍ରୋତ୍ସାହନର ଅଭାବ, ଉଦାସୀନ ପାଠକୀୟତା ଓ ପାଠ୍ୟପୁସ୍ତକ ବ୍ୟତୀତ ଅନ୍ୟ ‘ବହି’ ପ୍ରତି ସାଧାରଣରେ ବିତୃଷ୍ଣା ଆଦି ପାରଂପରିକ ପ୍ରତିବନ୍ଧକ ଯଦିଓ ଆମ ଆଗରେ ଛିଡ଼ା ହୋଇଛନ୍ତି, ତଥାପି ଆମେ ସେସବୁକୁ ନୂଆନୂଆ ଢଙ୍ଗରେ, ରଙ୍ଗରେ, ଶୈଳୀରେ ଓ ପ୍ରକାରରେ ଚ୍ୟାଲେଂଜ୍ କରି 15 ବର୍ଷ ପାର୍ କରିପାରିଛୁ; ଏହା ଭାବିଲେ ବିସ୍ମିତ ଲାଗୁଛି । ଆମର ପରୀକ୍ଷାନିରୀକ୍ଷାକୁ ସହୃଦୟତାର ସହ ସ୍ୱୀକାର, ବରଦାସ୍ତ ଓ ପ୍ରଶଂସା କରିଥିବା ଲେଖକ, ପାଠକ, ସମାଲୋଚକ, ବିକ୍ରେତା... ଏପରିକି ଈର୍ଷୁକ ଓ ଅପପ୍ରଚାରକ ସମସ୍ତେ ଏଥିପାଇଁ ଧନ୍ୟବାଦାର୍ହ ।
ବିଗତ 15 ବର୍ଷ ଭିତରେ ଅନ୍ୟ ପ୍ରକାଶନ ସଂସ୍ଥା ତୁଳନାରେ ‘ଟାଇମ୍ପାସ୍’ ଅଧିକ କ’ଣ କରିଛି, ତାହା ନିଜ ମୁହଁରେ ବଖାଣିଲେ ଆତ୍ମବଡ଼ିମା ହେବ ପରା! ତଥାପି ଗୋଟିଏ ଧାଡ଼ିରେ କୁହାଗଲେ ଏୟା ହେବ ଯେ ‘ଟାଇମ୍ପାସ୍ ସବୁବେଳେ ବହିର ଦୁନିଆରେ ଦୁଇପାଦ ଆଗରେ ରହିବାକୁ ଚେଷ୍ଟା କରିଛି’ । ବଦଳୁଥିବା ସମୟ ସଙ୍ଗେ ତାଳଦେଇ ଚାଲିବା ସହ ଦୁଇପାଦ ଆଗକୁ ଆସି ଚିନ୍ତାକରିବାରେ ‘ଟାଇମ୍ପାସ୍’ ନିଜ ମୌଳିକ ଓ ସୃଜନଶୀଳ ଦୃଷ୍ଟିକୋଣ ଅବଶ୍ୟ ଜାହିର୍ କରିଛି; ଯେଉଁଥିପାଇଁ ଅନ୍ୟ ସମସାମୟିକ ପ୍ରକାଶନ ସଂସ୍ଥାମାନଙ୍କ ପାଇଁ ଏହା ଅନେକ କ୍ଷେତ୍ରରେ ଉଦାହରଣ, ଆଦର୍ଶ ଓ ଅନୁକରଣୀୟ ହୋଇପାରିଛି ।
...
ସ୍ୱଚ୍ଛ ସୁନ୍ଦର ପ୍ରକାଶନ ପରିପାଟୀ (ଲେ-ଆଉଟ୍), ଆଧୁନିକ ଓ ଡିିଜିଟାଲ୍ ପ୍ରଚ୍ଛଦ, ପରୀକ୍ଷାମୂଳକ ଉପସ୍ଥାପନା ସହ ପୁସ୍ତକ ତଥା ଲେଖକଙ୍କର ପ୍ରଚାରପ୍ରସାର ପାଇଁ ଲିଫ୍ଲେଟ୍, ପୁସିଂକାର୍ଡ, ବିଜ୍ଞାପନ, ହୋର୍ଡିଂ, ପୋଷ୍ଟର୍, ଉନ୍ମୋଚନ ଉତ୍ସବ, ଚର୍ଚ୍ଚା ଉତ୍ସବ, ବିଭିନ୍ନ ସ୍ଥାନରେ ଆୟୋଜିତ ପୁସ୍ତକମେଳାରେ ଯୋଗଦାନ, ସୋସିଆଲ୍ ମିଡ଼ିଆରେ ଲଗାତାର ପୋଷ୍ଟିଂ, ବେଷ୍ଟସେଲର୍ ପୁସ୍ତକକୁ ପୁରସ୍କାର ପ୍ରଦାନ, ବହି ଓ ଲେଖକଙ୍କ ଅଡ଼ିଓ-ଭିଜୁଆଲ୍, ୱେବ୍ସାଇଟ୍, କବିତା ଓ କଥାର ଅଡ଼ିଓ-ବୁକ୍, ଇ-ସପିଂ, ଏପରିକି ବର୍ତ୍ତମାନ ସମୟ ସହ ତାଳଦେଇ ମୋବାଇଲ୍ ଆପ୍ ମାଧ୍ୟମରେ ବହି ବିତରଣ ଭଳି ନାନାପ୍ରକାର ଭେଳିକି ଓ କାଣ୍ଡକାର୍ଖାନା କରି ବହିର ପ୍ରସାର କରିବାରେ ଟାଇମ୍ପାସ୍ ନିଜକୁ ସାବ୍ୟସ୍ତ କରିଛି । ସେଥିପାଇଁ ଅନେକେ ଏହାକୁ ଅତ୍ୟାଧୁନିକ ପ୍ରକାଶନ ଶିଳ୍ପର ଟ୍ରେଣ୍ଡସେଟର୍ ବୋଲି ଅବିହିତ କରିଥାନ୍ତି ।
‘ଟାଇମ୍ପାସ୍’ ଅନ୍ଲାଇନ୍ ସପିଙ୍ଗ୍ ନେଟ୍ୱର୍କ ‘ଆମାଜନ୍’ ସହ ଯୋଡ଼ିହୋଇଛି । ଦେଶ ଭିତରେ ରହୁଥିବା ଓଡ଼ିଆ ପାଠକଗଣ ଏହାର ଫାଇଦା ନେଇପାରିବେ ।
ଆଗରୁ କହିଛି ଯେ ସାହିତ୍ୟମନସ୍କ ‘ଟାଇମ୍ପାସ୍’ ସବୁବେଳେ ଚାହିଁଛି– ବହିର ପ୍ରସାର ହେଉ, ଲେଖକମାନେ ଷ୍ଟାର୍ ଷ୍ଟାଟସ୍ ପାଆନ୍ତୁ, ଓଡ଼ିଶାର ସାଂସ୍କୃତିକ ଆନ୍ଦୋଳନରେ ‘ବହି’ ଏକ ପ୍ରମୁଖ ଭୂମିକା ନେଉ । କେବଳ ଓଡ଼ିଶୀ ନାଚ ବା ଓଡ଼ିଆ ଭାଷାକୁ ଶାସ୍ତ୍ରୀୟ ଥାକରେ ରଖିଦେଲେ ଦାୟିତ୍ୱ ସରିଯାଏ ନାହିଁ, ବରଂ ସେଇଠୁ ହିଁ ଆରମ୍ଭହୁଏ ଅସଲ ଦାୟିତ୍ୱ । ସେ ଦାୟିତ୍ୱ ଯଦି ‘ଟାଇମ୍ପାସ୍’ ଯତ୍କିଂଚିତ୍ ନେଇପାରେ, ତାହା ହିଁ ହେବ ଆମ ଭାଷା-ସାହିତ୍ୟ ପାଇଁ ଗୌରବର ବିଷୟ ।
ସମସ୍ତଙ୍କୁ ପୁଣିଥରେ ଶୁଭେଚ୍ଛା, ପ୍ରେମ ଓ ସମ୍ମାନ ।
ସରୋଜ ବଳ
ମୁଖିଆ: ଟାଇମ୍ପାସ୍
