Soumya Ranjan Patnaik, E/181 G G P Colony, Bhubaneswar (2025)

26/07/2025

ଗତକାଲି ଲଗାଣ ବର୍ଷା ସତ୍ବେ ଯେଉଁ ବନ୍ଧୁମାନେ ‘ଆମ ଓଡ଼ିଶାର ପ୍ରତିଷ୍ଠା ଦିବସ’ରେ ଯୋଗଦେଇ ଆମକୁ ଉତ୍ସାହିତ କଲେ ସେମାନଙ୍କୁ କେଉଁ ଭାଷାରେ କୃତଜ୍ଞତା ଜଣାଇବି, ମୁଁ ଜାଣି ପାରୁ ନାହିଁ। ସତୀ ସୀତା ଅଗ୍ନି ପରୀକ୍ଷାରେ ଉତ୍ତୀର୍ଣ୍ଣ ହେଲା ପରି, ସେମାନେ ବର୍ଷାର ଏ ପରୀକ୍ଷାରେ ଅତ୍ୟନ୍ତ ସଫଳତାର ସହିତ ଉତ୍ତୀର୍ଣ୍ଣ ହୋଇଛନ୍ତି ବୋଲି କହିବି। ପ୍ରତିକୂଳ ପରିବେଶକୁ ସାହସର ସହିତ ମୁକାବିଲା କରିବା ଭଲ ମଣିଷର ଅସଲ ପରିଚୟ। ଗତକାଲିର ବନ୍ଧୁମାନେ ନିଜେ ଉପସ୍ଥିତ ରହି ‘ଆମ ଓଡ଼ିଶା’ ପ୍ରତି ଯେଉଁ ଶ୍ରଦ୍ଧା ଓ ସମ୍ମାନ ଦେଇଛନ୍ତି ଆମେ ସେଥି ପାଇଁ ନିଜକୁ ଯୋଗ୍ୟ ବୋଲି ପ୍ରମାଣିତ କରିବାକୁ ଚେଷ୍ଟା କରିବୁ।
ଏ ଅବସରରେ 'ଆମ ଓଡ଼ିଶାର ନବକଳେବର'ର ବାର୍ତ୍ତା ବହନ କରି ଉନ୍ମୋଚିତ ହୋଇଥିବା ‘ଆମ ଓଡ଼ିଶା’ ସାପ୍ତାହିକକୁ ସ୍ବାଗତ କରି ଅନେକ ବନ୍ଧୁଙ୍କର ଶୁଭେଛା ଓ ଅଭିନନ୍ଦନ ବାର୍ତ୍ତା ପାଇଛି। ‘ସମ୍ବାଦ’ର ସମ୍ପାଦନା ଦାୟିତ୍ବରୁ ଅବ୍ୟାହତି ନେଇ ଏଇ ଛୋଟିଆ ପତ୍ରିକାର ସମ୍ପାଦନା ଦାୟିତ୍ବ ମୋତେ ଅତ୍ୟନ୍ତ ଆତ୍ମ-ସଚେତନ କରିଦେଇଛି। ୫୦ ବର୍ଷର ବୃତ୍ତିଗତ ଜୀବନରେ ଦୁଇଟି ଅବ୍ୟାହତିର ଅନୁଭବ ହୋଇଛି। ପ୍ରଥମଟି ବନାରସ ହିନ୍ଦୁ ବିଶ୍ବବିଦ୍ୟାଳୟର ଅଧ୍ୟାପନା ବୃତ୍ତିରୁ ଅବ୍ୟାହତି ନେଇ ଖବରକାଗଜ ଶିଳ୍ପରେ ପ୍ରବେଶ । ତାହା ଅତ୍ୟନ୍ତ ମଧୁର, ଆହ୍ବାନପୂର୍ଣ୍ଣ ଓ ଆନନ୍ଦଦାୟକ ଥିଲା। ଅନ୍ୟଟି ‘ସମ୍ବାଦ’ର ସମ୍ପାଦକ ଦାୟିତ୍ବରୁ ଅବ୍ୟାହତି । ଏହା ଅତ୍ୟନ୍ତ ତିକ୍ତ ଓ ଦୁଃଖଦାୟକ ଥିଲା। ମୋ ଜୀବନର ଏହା ଏକ ଅଭୁଲା, ଅଲିଭା, କଳାଦାଗ ହୋଇ ରହିବ। ‘ଆମ ଓଡ଼ିଶା’ର ଏଇ ନୂତନ ଦାୟିତ୍ବ କେତେ ପରିମାଣରେ ଏ ଦୁଃଖକୁ ଲାଘବ କରିପାରିବ ତାହା ‘ଆମ ଓଡ଼ିଶା’ ପରିବାରର ସଦସ୍ୟମାନଙ୍କ ଉପରେ ନିର୍ଭର କରୁଛି।
ଆସନ୍ତୁ ଆମ ସମୟର ‘ସର୍ବ ବୃହତ୍‌ ଓଡ଼ିଆ ପରିବାର’ରେ ଯୋଗଦେବା। ପ୍ରଭୁ ଶ୍ରୀ ଜଗନ୍ନାଥଙ୍କର ଆଶୀର୍ବାଦ କାମନାକରି ଓଡ଼ିଆ ‘ଅସ୍ମିତା’ର ଜୟଗାନ କରିବା !

14/04/2025

ଓଡ଼ିଆ ନବ ବର୍ଷର ହାର୍ଦ୍ଦିକ ଶୁଭେଚ୍ଛା ଓ ଅଭିନନ୍ଦନ। 🙏

ଆଜି ଦିନଟି ମୋ ପାଇଁ ଅନେକ ଦୃଷ୍ଟିରୁ ଉତ୍ସାହଜନକ ଥିଲା। ଆଜି ହନୁମାନଙ୍କର ଜନ୍ମଦିନ ହୋଇଥିବା ବେଳେ 'ସମ୍ବାଦ' ପରିସରରେ ଥିବା ହନୁମାନ ମନ୍ଦିରର ମଧ୍ୟ ପ୍ରତିଷ୍ଠା ଦିବସ ଥିଲା। ପୁଣି ଆଜି ମଧ୍ୟ ଡ. ବାବାସାହେବ ଆମ୍ବେଦକରଙ୍କର ଜନ୍ମଦିନ ଥିଲା। ସବୁ ବର୍ଷ ପରି ଦିନର ପ୍ରଥମାର୍ଦ୍ଧଟି ଭକ୍ତ ଓ ଶ୍ରଦ୍ଧାଳୁଙ୍କ ମେଳରେ କଟିଲା। ଅପରାହ୍ମରେ ଡେରାବିଶ ବ୍ଲକର ହଳଦିଆ ପାଟଣାଠାରେ 'ଡ. ଆମ୍ବେଦକର ଯୁବକ ସଂଘ-ପାଠାଗାର' ଆନୁକୁଲ୍ୟରେ ଅନୁଷ୍ଠିତ ଏକ ସମାରୋହରେ ଡ. ଆମ୍ବେଦକରଙ୍କର ପୂର୍ଣାବୟବ ପ୍ରତିମୂର୍ତ୍ତି ଉନ୍ମୋଚନ କରିବାର ଗୌରବ ମିଳିଲା। ଆମ୍ବେଦକରଙ୍କ ଆଦର୍ଶରେ ଅନୁପ୍ରାଣିତ, ଉତ୍ସାହୀ ବନ୍ଧୁମାନଙ୍କ ଉଦ୍ୟମରେ ଆୟୋଜିତ ସଭାରେ ମହିଳାମାନଙ୍କର ଉଲ୍ଲେଖନୀୟ ଉପସ୍ଥିତି ମୋତେ ପ୍ରଭାବିତ କରିଥିଲା। 'ମୂର୍ତ୍ତି ବଡ଼ ନୁହେଁ କୀର୍ତ୍ତି' - ଆମ୍ବେଦକରଙ୍କର ମୂର୍ତ୍ତିଟି ତାଙ୍କ କୀର୍ତ୍ତିକୁ ମନେପକାଇ ଆମ ଯୁବକମାନଙ୍କୁ ସଚେତନ କରାଇ ପାରିଲେ ଏ ସମାରୋହ ସାର୍ଥକ ହେବ। ଆମ୍ବେଦକର କୌଣସି ପ୍ରକାର ସୁବିଧା, ସୁଯୋଗ କିମ୍ବା ଆଶୀର୍ବାଦ ନ ପାଇ ସ୍ରୋତର ପ୍ରତିକୂଳରେ ଯାଇ ସଫଳତାର ଶୀର୍ଷତମ ସୋପାନରେ ପହଞ୍ଚି ପାରିଥିଲେ। ଆମ ଯୁବକମାନେ ଏପରି ଆହ୍ବାନକୁ ଗ୍ରହଣ କରିବା ପାଇଁ ସଂକଳ୍ପ ନେବେ ବୋଲି ମୁଁ ଆଶା କରୁଛି। 🙏

06/04/2025

ଦୀର୍ଘ ଏକସପ୍ତାହରୁ ଊର୍ଦ୍ଧ୍ବ ସମୟ ଧରି ଓଡ଼ିଶା ବାହାରେ ରହି ଓଡ଼ିଶାକୁ ଦୂରରୁ ଦେଖିବା ଫଳରେ ଅନେକ କଥା ମନକୁ ଆସୁଛି। ଏହି କେତେଦିନ ଧରି ଓଡ଼ିଶା ରାଜନୀତିରେ ଯାହା ସବୁ ଘଟୁଛି ତାହା ଦେଖି ଅମୋଦିତ ହେବା ଛଡ଼ା ଅନ୍ୟ ଗତି ନାହିଁ। ବିଶେଷକରି ନବୀନବାବୁଙ୍କ ଆଚରଣ ଓ ଉଚ୍ଚାରଣ ଆମକୁ ଅଧିକ ବ୍ୟଥିତ ଓ ବିବ୍ରତ କରୁଛି। ନବୀନବାବୁ ବେଶୀ କଥା କହନ୍ତି ନାହିଁ। ତେବେ ଯେତେବେଳେ ତାଙ୍କୁ ରାଜନୈତିକ ସହକର୍ମୀମାନେ ଧୋକା ଦିଅନ୍ତି, ସେ କ୍ଷୁବ୍ଧ ହୋଇ ଯେଉଁ ଭାଷା ବ୍ୟବହାର କରନ୍ତି ତା' ହେଲା "ବେଇମାନ୍"। ଆଜି 'Waqf Bills' ପ୍ରସଙ୍ଗରେ, ବିଜେପିକୁ ସମର୍ଥନ ଦେବା ନ ଦେବା ନେଇ ତାଙ୍କ ଦଳର ନେତାମାନଙ୍କର ଆଚରଣ ଓ ଉଚ୍ଚାରଣରୁ ଆମେ କ'ଣ ବୁଝିବା ? ନବୀନବାବୁଙ୍କୁ ଆମେ କେଉଁ ଭାଷାରେ ବର୍ଣ୍ଣନା କରିବା ? ମୋତେ ଲାଗେ, "ଚୁପ୍ ସୈତାନ୍" ଛଡ଼ା ଆଉ ଭଲ ଶବ୍ଦ ମିଳିବ ନାହିଁ।
ଦିନ ଥିଲା, ନବୀନବାବୁଙ୍କୁ ଓଡ଼ିଆମାନଙ୍କର 'ହୃଦୟ ସମ୍ରାଟ' ବୋଲି ତାଙ୍କର ତୋଷାମଦକାରୀମାନେ କହି ବୁଲୁଥିଲେ। ନବୀନବାବୁ ଏହାକୁ ନେଇ କ'ଣ ଭାବୁଥିଲେ ଜଣା ନାହିଁ। କିନ୍ତୁ ନିଶ୍ଚୟ ଉପଭୋଗ କରୁଥିବେ। ପିତାଙ୍କ ନାମରେ ଗଢ଼ିଥିବା ‘'ବିଜୁ ଜନତା ଦଳ, ଓଡ଼ିଶାବାସୀଙ୍କ ବଳ" ବୋଲି ସମସ୍ତେ କହୁଥିଲେ। ଆଜି କ'ଣ ହୋଇଛି ଯେ ଏତେ କଥା ଘଟି ଯାଉଛି, ଅଥଚ ସମ୍ରାଟ୍ ଚୁପ୍ ବସିଛନ୍ତି ! ବିଜୁ ଜନତା ଦଳର ବଳ କେଉଁଠି ହଜିଗଲା ଯେ ସେ ଏକ ସ୍ଥିର ନିଷ୍ପତ୍ତି ନେଇ ପାରୁନାହାନ୍ତି ? ଗୋଟିଏ ଦିନରେ ତିନି ଥର ଏ ପ୍ରସଙ୍ଗରେ ସେ ଭିନ୍ନ-ଭିନ୍ନ ନିଷ୍ପତ୍ତି ନେଇଛନ୍ତି; ପୁଣି ଶେଷରେ ବିବେକ କଥା କହିଛନ୍ତି !
ଦଳର ବିବେକ କ'ଣ, ତାହା ସ୍ପଷ୍ଟ ଜଣାପଡୁନାହିଁ। ବିଭିନ୍ନଆଡୁ ଟଣା-ଓଟରା ହୋଇ, ବିବେକ ଦଂଶନ ଭୋଗିବା ଛଡ଼ା ଅନ୍ୟ ବାଟ ନାହିଁ। ଇଂରାଜୀରେ କଥା ଅଛି- "Better late than never"। ଏବେବି ସମୟ ଅଛି, ଓଡ଼ିଶାର ସ୍ବାର୍ଥ ଓ ସ୍ବାଭିମାନକୁ ଅଗ୍ରାଧିକାର ଦେଇ ଏକ ଆଞ୍ଚଳିକ ଦଳ ଗଢ଼ିଥିବା ବନ୍ଧୁମାନେ ଓଡ଼ିଶାବାସୀଙ୍କୁ ଆଉ ଧୋକା ନ ଦିଅନ୍ତୁ। ମଣିଷ ମାତ୍ରେ ଭୁଲ୍ କରେ। ଭୁଲ୍‌କୁ ସ୍ବୀକାର କରି ଆଗେଇଯିବା ସୁପୁରୁଷର ଲକ୍ଷଣ। କିନ୍ତୁ ଭୁଲ୍‌କୁ ଜାଣିଶୁଣି ଠିକ୍ ବୋଲି ପ୍ରମାଣିତ କରିବାପାଇଁ ବାହାସ୍ଫୋଟ ମାରୁଥିବା ନେତାମାନେ ଜାଣିବା ଦରକାର ଯେ ଏହା କାପୁରୁଷର ଲକ୍ଷଣ। ଆଜି ନହେଲେ ବି କାଲି, ଈଶ୍ୱର ଏଥିପାଇଁ ଉଚିତ ନ୍ୟାୟ କରିବେ।🙏

01/04/2025

୨୦୨୫ର ଉତ୍କଳ ଦିବସ ପାଳନର ଅନୁଭବ ମୋ ପାଇଁ ଅନ୍ୟ ବର୍ଷଗୁଡ଼ିକଠାରୁ ଭିନ୍ନ ଥିଲା। ଏ ବର୍ଷ ମୋତେ ମୋର ପୁରାତନ ଶିକ୍ଷାନୁଷ୍ଠାନ ବନାରସ ହିନ୍ଦୁ ବିଶ୍ଵବିଦ୍ୟାଳୟ ତରଫରୁ ଏକ ବିଶେଷ ଉତ୍ସବରେ ଯୋଗ ଦେବା ପାଇଁ ନିମନ୍ତ୍ରଣ ମିଳିଥିଲା। ଯେ କୌଣସି ଛାତ୍ର ପାଇଁ ତା'ର ପୁରାତନ ଶିକ୍ଷାନୁଷ୍ଠାନ ସ୍ଵତନ୍ତ୍ର ମହତ୍ତ୍ଵ ରଖେ। ଦୀର୍ଘବର୍ଷର ବ୍ୟବଧାନରେ ମୁଁ ଏଠାକୁ ଆସିପାରିଥିବାରୁ ବିଶେଷ ଆନନ୍ଦିତ ହୋଇଥିଲି। ଏହା ଓଡ଼ିଶା ପ୍ରଦେଶର ଜନ୍ମଦିନ ଅବସରରେ 'କବିସମ୍ରାଟ ଉପେନ୍ଦ୍ର ଭଞ୍ଜ ଚେୟାର'ର ଶୁଭ ଉନ୍ମୋଚନର ଅବସର ହୋଇଥିବାରୁ ମୋର ଆନନ୍ଦ ଓ ଉତ୍ସାହ ଦ୍ଵିଗୁଣିତ ହେଲା।
ଓଡ଼ିଶା ସରକାର ଦେଇଥିବା ଅନୁଦାନକୁ ବିନିଯୋଗ କରି ବିଶ୍ବବିଦ୍ୟାଳୟ ପକ୍ଷରୁ ଏକ ସ୍ବତନ୍ତ୍ର ଢଙ୍ଗରେ ଏହି ଚେୟାରର ଉଦ୍ଦେଶ୍ୟ ପୂରଣ କରିବା ପାଇଁ କାର୍ଯ୍ୟକ୍ରମ ଆରମ୍ଭ ହେଲା। ବିଳମ୍ବରେ ହେଲେ ମଧ୍ୟ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତିର ପ୍ରଚାର ପ୍ରସାର ପାଇଁ କେନ୍ଦ୍ରୀୟ ବିଶ୍ଵବିଦ୍ୟାଳୟର ଏହି ଉଦ୍ୟମକୁ ମୁଁ ପ୍ରଶଂସା ନ କରି ରହି ପାରୁନାହିଁ। ପୁଣି ଏହା ଉତ୍କଳ ଦିବସ ଅବସରରେ ହୋଇଥିବାରୁ ଉଦ୍ୟୋକ୍ତା ବନ୍ଧୁମାନଙ୍କୁ ଅନେକ ଅନେକ ଅଭିନନ୍ଦନ ଓ କୃତଜ୍ଞତା ଜଣାଉଛି।🙏

17/01/2025

ସଂକ୍ରାନ୍ତି ପୁରୁଷ ଫକିର ମୋହନଙ୍କର ଜନ୍ମଦିନ ଅବସରରେ ତାଙ୍କ ଜନ୍ମ ମାଟିରେ ଫକିର ମୋହନ ସାହିତ୍ୟ ପରିଷଦ ଦ୍ଵାରା ଆୟୋଜିତ ଉତ୍ସଵରେ ଯୋଗଦେବାର ସୁଯୋଗ ପାଇଁ ମୁଁ ଅତ୍ୟନ୍ତ ଆନନ୍ଦିତ ଓ ଗର୍ବିତ। ଆଜି ଆମେ ସମସ୍ତେ ଅସ୍ମିତା କଥା କହୁଥିବା ବେଳେ ମୁଁ ଫକିର ମୋହନଙ୍କୁ ଆମ ଅସ୍ମିତାର ଅନ୍ୟତମ ଅକାଟ୍ୟ ପ୍ରମାଣ ଭାବରେ ସ୍ମରଣ କରିବାକୁ ଚାହୁଁଛି। ଫକିର ମୋହନ ନଥିଲେ ଆମ ଭାଷା ଓ ଓଡ଼ିଆ ଜାତି ଆଜି କେଉଁଠି ଥାଆନ୍ତା? ତାଙ୍କର ଦାୟାଦ ହୋଇ ତାଙ୍କ ଜନ୍ମଦିନ ପାଳନ କରିବାବେଳେ ଆମ ଆଚରଣ ଓ ଉଚ୍ଚାରଣରେ ଫକିର ମୋହନଙ୍କର ଓଡ଼ିଆ ଭାଷା ପ୍ରତି ଅବଦାନର କାଣିଚାଏ ପ୍ରତିଫଳିତ ହେଲେ ହିଁ ଏ ଉତ୍ସବ ପାଳନ କରିବାର ଅଧିକାର ଆମର ଅଛି ବୋଲି କହିପାରିବା।🙏

05/01/2025

ଔପନ୍ୟାସିକ କାହ୍ନୁଚରଣ ମହାନ୍ତି ଓଡ଼ିଆ ଅସ୍ମିତାର ଅନ୍ୟତମ ପ୍ରମାଣ ଥିଲେ। ଶ୍ରୀ କାହ୍ନୁଚରଣ ମହାନ୍ତିଙ୍କ ଉପନ୍ୟାସ ଉତ୍ସବ‌ରେ ‌ଯୋଗ ଦେବା ଅବସରରେ।🙏

03/01/2025

ଜାନକୀ ବଲ୍ଲଭ ପଟ୍ଟନାୟକଙ୍କ ଜୟନ୍ତୀ ଉପଲକ୍ଷେ ଖୋର୍ଦ୍ଧାସ୍ଥିତ ଜେ.ବି.ପଟ୍ଟନାୟକ ପାର୍କ ପରିସରରେ ପ୍ରିୟଜନଙ୍କ ମଧ୍ୟରେ🙏

01/01/2025

୨୦୨୪ ବର୍ଷଟି ଆମ ସମସ୍ତଙ୍କର ଆଶା ଓ ଆଶଙ୍କାର ବିପରୀତ ହୋଇଥିଲା। ଏହା କିନ୍ତୁ ଏକ ଅଦ୍ଭୁତ ପରିବର୍ତ୍ତନର ବାର୍ତ୍ତା ଦେଇଥିଲା। ୨୦୨୫ ସମସ୍ତଙ୍କ ପାଇଁ ଅନୁକୂଳ ହେବା ସଙ୍ଗେ-ସଙ୍ଗେ ପରିବର୍ତ୍ତନ ଆମ ବ୍ୟବସ୍ଥା ଏବଂ ଆଚରଣରେ ପ୍ରତିଫଳିତ ହେଉ, ଏହା ହିଁ ମୋର ପ୍ରଭୁ ଶ୍ରୀ ଜଗନ୍ନାଥଙ୍କ ନିକଟରେ ପ୍ରାର୍ଥନା। 🙏

25/12/2024

ପଣ୍ଡିତ ଦାମୋଦର ହୋତାଙ୍କର ୮୯ତମ ଜନ୍ମ ଉତ୍ସବରେ ଯୋଗ ଦେବା ଅବସରରେ ମୋର ଅନେକ କଥା ମନକୁ ଆସିଲା। ଶାସ୍ତ୍ରୀୟ ସଙ୍ଗୀତ କ୍ଷେତ୍ରରେ ପଣ୍ଡିତ ହୋତାଙ୍କର ଯଥେଷ୍ଟ ଅବଦାନ ରହିଛି। ଓଡ଼ିଶାର ସ୍ଵତନ୍ତ୍ର ଉଡ୍ର ପଦ୍ଧତିର ସେ କେବଳ ଜଣେ ପ୍ରବର୍ତ୍ତକ ନଥିଲେ ବରଂ ଏହାର ପ୍ରଚାର ଓ ପ୍ରସାର ପାଇଁ ଜୀବନସାରା ସଂଗ୍ରାମ କରିଥିଲେ। ତାଙ୍କର ପରିବାର ସଙ୍ଗୀତ ପ୍ରତି ସମ୍ପୂର୍ଣ୍ଣ ଭାବରେ ସମର୍ପିତ।"ସ୍ୱର-ରଙ୍ଗ" ଏହାର ଏକ ଉତ୍କୃଷ୍ଟ ପ୍ରମାଣ। ସୁଦୂର ଆମେରିକାରେ ଥାଇ ଜ୍ୟେଷ୍ଠ କନ୍ୟା ପ୍ରିୟମ୍ବଦା ମିଶ୍ର ପ୍ରତିବର୍ଷ ଓଡ଼ିଶାକୁ ଆସି ତାଙ୍କ ଦୁଇ କନିଷ୍ଠ ଭଗିନୀ ଯଥା କଳ୍ପନା ପାଢ଼ୀ ଏବଂ ମାନସୀ ହୋତାଙ୍କ ସହ ମିଶି ଏହି କାର୍ଯ୍ୟକ୍ରମ କରୁଥିବା ଅତ୍ୟନ୍ତ ଆନନ୍ଦର ବିଷୟ। ଯୋଗ୍ୟ ପିତାଙ୍କ ଯୋଗ୍ୟ ସନ୍ତାନ ଭଳି ତାଙ୍କର ତିନି କନ୍ୟା ଏହି କାର୍ଯ୍ୟକ୍ରମ ଯେପରି ପରିଚାଳନା କରୁଛନ୍ତି ତା' ଆମ ସମସ୍ତଙ୍କ ପାଇଁ ସ୍ବତନ୍ତ୍ର ବାର୍ତ୍ତା ରଖୁଛି। ବ୍ୟକ୍ତିଗତ ଭାବେ ମୋ ପାଇଁ ଅଧିକା ଆନନ୍ଦିତ ହେବାର କାରଣ ପଣ୍ଡିତ ହୋତା ମଧ୍ୟ ମୋ ପରି ବନାରସ ହିନ୍ଦୁ ବିଶ୍ୱବିଦ୍ୟାଳୟ ସହିତ ସଂପୃକ୍ତ ଥିଲେ। ଏ ଅବସରରେ ଗୁରୁ ପଣ୍ଡିତ ଡ. ଗୋପାଳ ଚନ୍ଦ୍ର ପଣ୍ଡାଙ୍କୁ ସମ୍ବର୍ଦ୍ଧିତ କରାଯାଇଥିଲା। ପୁଣି ଏହି ବର୍ଷଠାରୁ ଉତ୍ତର ପିଢ଼ିଙ୍କ ମଧ୍ୟରେ ଶାସ୍ତ୍ରୀୟ ସଙ୍ଗୀତର ରୁଚିକୁ ପ୍ରୋତ୍ସାହିତ କରିବା ପାଇଁ ଯୁବକଯୁବତୀଙ୍କ ମଧ୍ୟରେ ପ୍ରତିଯୋଗିତାର ଆୟୋଜନ କରି ପୁରସ୍କାର ବିତରଣ କରାଯାଇଥିଲା।

24/12/2024

ସୁସମ୍ବାଦ ଚାରିଟେବଲ ଟ୍ରଷ୍ଟ ଓ ୟୁଥ୍ ସଦନର ମିଳିତ ଉଦ୍ୟମରେ ପାଞ୍ଚଦିନଧରି ମକ୍ ପାର୍ଲିଆମେଣ୍ଟର ଆୟୋଜନ କରାଯାଉଛି। ଆଜି ମୋତେ ଏହି କାର୍ଯ୍ୟକ୍ରମରେ ଯୋଗଦେବାର ସୁଯୋଗ ମିଳିଥିଲା। ବିଭିନ୍ନ ମହାବିଦ୍ୟାଳୟ ଓ ବିଶ୍ଵବିଦ୍ୟାଳୟର ଛାତ୍ରଛାତ୍ରୀମାନେ ଯୋଗ ଦେଇଥିବା ଏହି କାର୍ଯ୍ୟକ୍ରମ ମତେ ଗଭୀର ଭାବରେ ପ୍ରଭାବିତ କରିଥିଲା। ବିଶ୍ଵବିଦ୍ୟାଳୟର ଛାତ୍ରଛାତ୍ରୀ ମାନଙ୍କ ଠାରୁ ଆମେ ଅନେକ କିଛି ଆଶା କରୁ। ଭବିଷ୍ୟତରେ ନେତୃତ୍ୱ ଏହି ମହାବିଦ୍ୟାଳୟ ସ୍ତରରୁ ହିଁ ତିଆରି ହେଇଥାଏ। ବିଡମ୍ବନାର କଥା ଯେ ଭବିଷ୍ୟତର ନେତୃତ୍ୱ ତିଆରି କାରଖାନା ଆମ ଓଡ଼ିଶାରେ ଗତ ୬ ବର୍ଷ ହେଲା ବନ୍ଦ ହୋଇପଡିଛି। ଛାତ୍ରସଂଘର ନିର୍ବାଚନ କେଜାଣି କାହିଁକି କରାଯାଉ ନାହିଁ। ଫଳରେ ଭବିଷ୍ୟତରେ ଓଡ଼ିଶା ପାଇଁ ନେତୃତ୍ବର ସଙ୍କଟ ତିଆରି ହେଉଛି ବୋଲି କହିଲେ ଅତ୍ୟୁକ୍ତି ହେବ ନାହିଁ। ତେବେ ଆମ ଛାତ୍ରଛାତ୍ରୀମାନଙ୍କର ଏ ନେଇ ଯେଉଁ ପ୍ରତିବାଦର ସ୍ୱର ଶୁଣା ଯିବା କଥା, ତା ହେଉନାହିଁ। ଏହା କିଛି କମ ବିଡ଼ମ୍ବନାର ବିଷୟ ନୁହେଁ। ଆମ ନେତାମାନେ ମହାବିଦ୍ୟାଳୟ ସ୍ତରୀୟ ପିଲାମାନଙ୍କର ଏହି କାର୍ଯ୍ୟକ୍ରମ ସ୍ବଚକ୍ଷୁରେ ଦେଖିବା କଥା।

22/12/2024

ନବୀନଙ୍କ ଜୀବନ ଏକ ଅଦ୍ଭୁତ ପ୍ରେମ କାହାଣୀ। ଯେ ଯାହାକୁ ଭଲ ପାଏ ସେ ତା'ର ସବୁ କିଛି (ଖାଦ୍ୟ, ପୋଷାକ, ଭାଷା ଇତ୍ୟାଦି) କୁ ଆଖି ବୁଜି ଗ୍ରହଣ କରିନିଏ। ଏହା ହେଉଛି ଭଲ ପାଇବାର ପ୍ରକୃତ ପ୍ରମାଣ।
ଓଡ଼ିଶାବାସୀ ୧୯୯୮ ପରଠାରୁ ନିଜର ସବୁ କିଛି ଦେଇ ତାଙ୍କୁ ଭଲ ପାଇଛନ୍ତି। ପ୍ରତି ନିର୍ବାଚନରେ ଅଧିକରୁ ଅଧିକ ଭୋଟ ଦେଇ ତାଙ୍କୁ ଗୌରବାନ୍ଵିତ କରିଛନ୍ତି। ସେ କିନ୍ତୁ ତାଙ୍କ ଭାଷାଟିକୁ ଶିଖିଲେ ନାହିଁ କିିିିମ୍ବା ଭଲ ପାଇପାରିଲେ ନାହିଁ। ଏହା ହେଉଛି ନବୀନଙ୍କ ଅଦ୍ଭୁତ ପ୍ରେମ କାହାଣୀ।

21/12/2024

କବି ଚକ୍ରଧର ରାଉତଙ୍କର ଶ୍ରାଦ୍ଧ ଉତ୍ସବରେ ଯୋଗ ଦେବା ଅବସରରେ, ନେଲସନ ମଣ୍ଡେଲା କହିଥିବା ଏକ କଥା ମୋ ମନକୁ ଆସିଲା। "ଗୋଟେ ଜାତିକୁ ପରାହତ କରିବାକୁ ହେଲେ କୌଣସି ଅସ୍ତ୍ର, ଶସ୍ତ୍ର ବା ସୈନ୍ୟବଳ ଦରକାର ନାହିଁ, ତା'ର ଶିକ୍ଷା ବ୍ୟବସ୍ଥାକୁ ନଷ୍ଟ କରିଦେବା ହିଁ ଯଥେଷ୍ଟ ହେବ"।
ଚକ୍ରଧର ରାଉତ ଏକାଧାରରେ ଜଣେ କବି ଓ ଛାତ୍ରବସ୍ଥଳ ଶିକ୍ଷକ ଥିଲେ। ସେ ବହୁ ମେଧାବୀ ଛାତ୍ରଙ୍କୁ ଗଢ଼ିଛନ୍ତି। ଆଜି କିନ୍ତୁ ଆମ ସରକାରୀ ବ୍ୟବସ୍ଥାରେ ତାଙ୍କ ଭଳି ଶିକ୍ଷକ ପାଇବା ବିରଳ। ଶିକ୍ଷା ବ୍ୟବସ୍ଥାଟି ନଷ୍ଟ ହୋଇଗଲେ ଗୋଟେ ଜାତି ଦୁଇ ଭାଗରେ ବିଭକ୍ତ ହୋଇଯାଏ। ଆଜି ଓଡ଼ିଶାର ଅବସ୍ଥା ଠିକ୍ ସେହିପରି ହୋଇଛି। ସରକାରୀ ସ୍କୁଲରେ ଶିକ୍ଷା ପାଇଥିବା ଛାତ୍ରଛାତ୍ରୀମାନେ ଗୋଟିଏ ବର୍ଗର। ଉଚ୍ଚମଧ୍ୟବିତ୍ତ ସଫଳ ପରିବାରର ପିଲାମାନେ ବେସରକାରୀ ସ୍କୁଲରେ ଶିକ୍ଷାଲାଭ କରି ଅନ୍ୟ ପକ୍ଷରେ ଏକ ଭିନ୍ନ ବର୍ଗ ସୃଷ୍ଟି କରିଛନ୍ତି। ଏହା କୌଣସି ଜାତି ପାଇଁ ଶୁଭଙ୍କର ନୁହେଁ। ଚକ୍ରଧର ରାଉତଙ୍କ ପ୍ରତି ଶ୍ରଦ୍ଧାଞ୍ଜଳି ଜଣାଇବାକୁ ହେଲେ ଆମ ଶିକ୍ଷା ବ୍ୟବସ୍ଥାକୁ ସୁଧାରିବାକୁ ହେବ ଏବଂ ସରକାରୀ ସ୍କୁଲ ଉପରେ ସମସ୍ତଙ୍କ ଭରସା ବଢ଼ାଇବାକୁ ହେବ।🙏

Soumya Ranjan Patnaik

26/07/2025

14/04/2025

06/04/2025

01/04/2025

17/01/2025

05/01/2025

03/01/2025

01/01/2025

25/12/2024

24/12/2024

22/12/2024

21/12/2024

Address

Website

Alerts

Contact The Business

Shortcuts

Share

Category