07/06/2025
ଯଦି ମୁଁ..........
କେତେ ସୁନ୍ଦର ହେଇଥାନ୍ତା,
ଯଦି ମୁଁ ତୁମର ହୋଇଥାନ୍ତି,
ତୁମ ସୁଖ ଦୁଃଖ ହସ କାନ୍ଦ କୁ ଟିକେ ପାଖରୁ ନିରିଖି ଥାନ୍ତି,
ତୁମ ରାଗ କୁ ପାସୋରି, ତୁମ ହସକୁ ଆଦରି
ତୁମ ଇଚ୍ଛା କୁ ନମାରି, ତୁମ ମନକୁ ଆବୁରି,
ତୁମ ଅସହାୟ ସମୟର ସାହା ମୁଁ ଯେ ହୋଇଥାନ୍ତି,
ତୁମ ମନର ଭାବନା ହୋଇ, ତମ ଗପ ଆଳାପର ନାୟକ ହୋଇ,
ତୁମ ଡାଏରୀ ର ସେ ଗୋଲାପ ଫୁଲ ଦିଆ ପୃଷ୍ଠାରେ
ଲେଖା ହୋଇଥିବା ତୁମ ସେ ଗୁପ୍ତ ବ୍ୟାଖ୍ୟା ହୋଇ
ନିତି ମୁଁ ଗର୍ବିତ ହୋଇଥାନ୍ତି,
ଯଦି ମୁଁ ତୁମର ହେଇଥାନ୍ତି,
ତୁମ ସ୍ୱପ୍ନରେ, ତୁମ ମନ ଗହ୍ଵର ରେ, ତୁମ ନିଃଶ୍ୱାସ ର ଉଷ୍ଣତାରେ
ତୁମ ସଦ୍ୟସ୍ନାତ ଦେହର ବାସ୍ନା ରେ କେବଳ ମୁଁ ହିଁ ମିଲିଥାନ୍ତି,
କେତେ ସୁନ୍ଦର ହୋଇଥାନ୍ତା,
ଯଦି ମୁଁ ତୁମର ହୋଇଥାନ୍ତି
ତୁମ ହାତକୁ ମୋ ହାତେ ଧରି, ତୁମ ମଥାକୁ ସ୍ନେହ କରି
ତୁମ ଲୁହ ଦୁଇ ଟୋପା କୁ କେବେ ମୁ ପୋଛି ପାରିଥାନ୍ତି
ଯଦି କେବେ ମୁ ତୁମର ହେଇଥାନ୍ତି
ସେ ଜୀବନ ସତେ ହୋଇଥାନ୍ତା କିଛି ଅଲଗା,
କିଛି ପରିପୁଷ୍ପିତ, କିଛି ସୁବାସିତ, କିଛି ମଧୁର ଆବେଗିକ
ତୁମ ଆଡୁ ପ୍ରେମର ଆମନ୍ତ୍ରଣ ନ ମିଳିଥିଲେ ବି,
ତୁମକୁ ପାଖରେ ପାଇ, ତୁମ ଛାଇ କୁ ଛୁଇଁ,
ତୁମ ସ୍ମିତହାସ୍ୟ କୁ ଦେଖି
ଆନନ୍ଦିତ ମୁଁ ଯେ ହେଇଥାନ୍ତି,
ଯଦି ମୁଁ ତୁମର ହେଇଥାନ୍ତି,
ତୁମ ସହ ଚାଲନ୍ତି କେବେ ଥରେ - ଅସରା ସେ ପଥରେ
ହାତରେ ହାତ ଛନ୍ଦି, ଆଖିରେ ଭବିଷ୍ୟତ ସ୍ବପ୍ନ ବାନ୍ଧି
ନେହେରୁ ବଙ୍ଗଳାର ସେ ପଥର ବନ୍ଧରେ
କିମ୍ବା ସାନ୍ତିନିକେତନର ସେ ବରଗଛ ଛାଇ ତଳେ
ତୁମ ପ୍ରିୟ ଜାଗା ସବୁ ତୁମ ସହ ବୁଲି ଦେଖନ୍ତି
ତୁମେ ସ୍ମୃତି ବଖାଣିଲେ, ଜନ୍ହ ମାମୁ ଗପ ଭଳି ଆବେଗେ ସୁଣିଥାନ୍ତି
କେତେ ସୁନ୍ଦର ହେଇଥାନ୍ତା,
ଯଦି ମୁଁ ତୁମର ହୋଇଥାନ୍ତି
ବୈଶାଖ ର ସେ ଉଷ୍ମ ଖରାବେଳେ,
ଶ୍ରାବଣ ର ସେ ଆର୍ଦ୍ର ସଡକରେ
ଡଙ୍ଗାଭସା ର ଶୀତଳ ସକାଳରେ,
ଦୀପାବଳି ରେ ସେ ଦୀପଶିଖା ଆଲୁଅରେ
ତୁମ ହସ ହସ ମୁହଁ ଦେଖି
ନିଜକୁ ଭାଗ୍ୟବାନ ମନେ କରିଥାନ୍ତି,
କେତେ ସୁନ୍ଦର ହେଇଥାନ୍ତା,
ଯଦି ମୁଁ ତୁମର ହୋଇଥାନ୍ତି
କେବେ ଯଦି ଆଉ ଜନ୍ମ ହୁଏ ତମ ସମକକ୍ଷେ
ଗୁହାରି ଏତିକି ରଖିବି ସେ ବଡ଼ଠାକୁର ପାଖେ,
ସେ ଜନ୍ମରେ ଥରୁଟିଏ ହଉ ତମ ସହ ଦେଖା
ଆଉ ନ ଛାଡ଼ି ତୁମକୁ, ପାଖେ ରଖି ଦିଅନ୍ତି
କେତେ ସୁନ୍ଦର ହେବ,
ଯେବେ ମୁଁ ତୁମର ହୁଅନ୍ତି,,,
ଜ୍ଞାନ,,,,,
