29/12/2025
सुवास घिसिङ स्मृति पार्कमा सरसफाइ तथा वृक्षरोपण अभियान सम्पन्न।
गोर्खा राष्ट्रिय मुक्ति मोर्चाका संस्थापक अध्यक्ष सुवास घिसिङ तथा उहाँकी धर्मपत्नी धनकुमारी सुब्बा (घिसिङ) को मिरिकस्थित मञ्जुश्री पार्कमा समाधी निर्माण भएपछि, उक्त स्थलको संरक्षण र सम्बर्द्धनका लागि गोर्खा राष्ट्रिय मुक्ति मोर्चा दार्जीलिङ ब्राञ्च कमिटीद्वारा ‘सुवास घिसिङ स्मृति पार्क संरक्षण समिति’ गठन गरिएको छ।
समिति गठन पश्चात् दार्जीलिङ ब्राञ्च कमिटी अन्तर्गत रहेका विभिन्न समष्टिहरूले धारावाहिक रूपमा सरसफाइ अभियान, वृक्षरोपण तथा फलफूलका बिरुवा रोप्ने कार्यलाई निरन्तरता दिँदै आएका छन्। यस अभियानको उद्देश्य सुवास घिसिङ स्मृति पार्कलाई स्वच्छ, हरियालीयुक्त तथा ऐतिहासिक धरोहरका रूपमा संरक्षण गर्नु रहेको जनाइएको छ।
यसैक्रममा गोर्खा राष्ट्रिय मुक्ति मोर्चा सुके मानेभञ्ज्याङ समष्टिका अध्यक्ष अशोक बराइलीको नेतृत्वमा हिजो सुके मानेभञ्ज्याङ समष्टि, पोख्रेबुङ–चामुङ समष्टि तथा नागरी धजिया समष्टिको संयुक्त आयोजनामा समाधी स्थलमा श्रद्धाञ्जली अर्पण कार्यक्रम सम्पन्न गरिएको छ। उक्त कार्यक्रममा सरसफाइ तथा वृक्षरोपणको कार्य पनि सफलतापूर्वक सम्पन्न गरिएको पोख्रेबुङ–चामुङ समष्टिका अध्यक्ष निगम कार्कीले जानकारी दिएका छन्।अध्यक्ष कार्कीले थप जानकारी दिँदै भन्नुभयो कि, “गोर्खा जातिको निम्ति संवैधानिक व्यवस्था लागू नहुँदासम्म सुवास घिसिङ स्मृति पार्कको संरक्षण कार्यलाई निरन्तरता दिइनेछ।” उनले जनाए अनुसार अनुसार सुवास घिसिङ स्मृति पार्क गोर्खा समुदायको साझा धरोहर हो, जसको संरक्षण गर्नु सबैको जिम्मेवारी हो।
अन्त्यमा अध्यक्ष निगम कार्कीले सम्पूर्ण गोर्खा समाजलाई एकजुट भई सुवास घिसिङ स्मृति पार्कको संरक्षण र सम्बर्द्धनमा सक्रिय सहयोग गर्न अपिल समेत गरेका छन् ।
