23/08/2026
শিয়ালমাৰীত ব্যৱসায়ীক অতৰ্কিতে আক্ৰমণ বন্দুকধাৰী ব্যক্তিৰ।
বিজনীৰ আমগুৰি অঞ্চলৰ এগৰাকী ব্যৱসায়ীক অতৰ্কিতে আক্ৰমণ কৰি গুৰুতৰভাৱে আহত কৰাৰ অভিযোগ উত্থাপিত হৈছে। ঘটনাক কেন্দ্ৰ কৰি বিজনী আৰক্ষী থানাত এজাহাৰ দাখিল ভুক্তভোগী ছফিৰুল ইছলামৰ।
ইচলামে এজাহাৰত উল্লেখ কৰা অনুসৰি, ২১ আগষ্ট ২০২৬, শুকুৰবাৰে দুপৰীয়া প্ৰায় ১:৩০ বজাত শিয়ালমাৰী ধান মিলৰ কাষত এই ঘটনা সংঘটিত হয়।
অভিযোগ অনুসৰি, ৰফিকুল ইছলাম ( ৪২) ভূষণ ৰহমান(২৯) সহ আন কেইবাজনো ব্যক্তিয়ে এজাহাৰকাৰীক অতৰ্কিতভাৱে আক্ৰমণ কৰি মাৰপিট কৰে।
ব্যৱসায়িক কাম-কাজক কেন্দ্ৰ কৰি পূৰ্বৰ বিবাদৰ পৰিণতিতে এই আক্ৰমণ সংঘটিত হোৱা বুলি এজাহাৰত অভিযোগ কৰা হৈছে। আক্ৰমণত এজাহাৰকাৰীৰ শৰীৰৰ বিভিন্ন অংশত আঘাত লাগে বুলি জানিব পৰা গৈছে।
ঘটনাৰ সন্দৰ্ভত এজাহাৰকাৰীয়ে আৰক্ষীৰ ওচৰত অভিযোগ দাখিল কৰি অভিযুক্তসকলৰ বিৰুদ্ধে আইনগত ব্যৱস্থা গ্ৰহণৰ অনুৰোধ জনাইছে।
ঘটনাটোক লৈ আৰক্ষীয়ে তদন্ত আৰম্ভ কৰিছে।
ভুক্তভোগী ছফিকুল ইচলামে সংবাদ মাধ্যমৰ সন্মুখত মন্তব্য কৰি কয় যে অতৰ্কিতে আক্ৰমণ কৰা কেইজনৰ ভিতৰত এজনৰ লগত আছিলে পিস্তল। পিছত স্থানীয় লোকে কাজিয়া দেখি ঘটনাস্থলীত জমা হোৱাত পিষ্টলধাৰীয়ে পলাই পত্ৰং দিয়ে । পিছত বিজনী আৰক্ষীক পিস্তলৰ কথা অৱগত কৰাত বিজনী আৰক্ষীয়ে ৰফিকুল ইছলামৰ ঘৰত অভিযান চলাই এটা পিস্তল চাৰিটা গুলী উদ্ধাৰ কৰে বুলি জানিব দিয়ে।
এই সন্দৰ্ভত বিজনী আৰক্ষীৰ তদন্ত অব্যাহত আছে।
