26/02/2025
◾ বিশ্বনাথত ৪৫ গৰাকী বিনিয়োগকাৰীয়ে স্বাক্ষৰ কৰিলে ৫০ খন বুজাবুজি চুক্তিত |
◾ এডভান্টেজ অসম ২.০ : জিলাখনৰ বিভিন্ন ক্ষেত্ৰত বিনিয়োগ কৰিব প্ৰায় দুশ কোটি টকা । অসমক ভাৰতৰ এক অন্যতম শ্ৰেষ্ঠ বিনিয়োগৰ গন্তব্য স্থান হিচাপে গঢ়ি তোলাৰ লক্ষ্যৰে আয়োজিত "এডভান্টেজ অসম ২.০" শীৰ্ষক বিনিয়োগ আৰু আন্তঃগাঁথনি সন্মিলনৰ লগত সংগতি ৰাখি, আজি বিশ্বনাথ জিলা প্ৰশাসনৰ উদ্যোগত আৰু জিলা উদ্যোগ আৰু বাণিজ্য কেন্দ্ৰৰ সহযোগত বিশ্বনাথৰ জিলা আয়ুক্তৰ সন্মিলন কক্ষত বিভিন্ন ক্ষেত্ৰত থলুৱা উদ্যোগী সকলৰ লগত ব্যৱসায় বৃদ্ধিৰ বাবে জিলা পৰ্যায়ত এক বুজাবুজি চুক্তি স্বাক্ষৰ অনুষ্ঠান আয়োজিত কৰা হয়।
এই প্ৰচেষ্টাৰ লগত সংগতি ৰাখি, আজি ৫ লাখৰ পৰা ৫০ কোটি টকাৰ ভিতৰত বিনিয়োগৰ পৰিকল্পনা কৰা ৪৫ গৰাকী ইচ্ছুক বিনিয়োগকাৰীয়ে বিশ্বনাথৰ লগত বুজাবুজি চুক্তিত স্বাক্ষৰ কৰে ।উল্লেখযোগ্য যে, জিলাখনত মুঠ ৪৫ গৰাকী ইচ্ছুক বিনিয়োগকাৰীয়ে বিভিন্ন উদ্যোগীক ক্ষেত্ৰত প্ৰায় দুশ কোটি টকা বিনিয়োগ কৰিব । আজিৰ এই অনুষ্ঠানৰ আৰম্ভণিতে, গুৱাহাটীৰ খানাপাৰাত কেন্দ্ৰীয় ভাৱে দেশৰ মাননীয় প্ৰধানমন্ত্ৰী নৰেন্দ্ৰ মোদীয়ে শুভ উদ্ধোধন কৰা "এডভান্টেজ অসম ২.০" শীৰ্ষক বিনিয়োগ আৰু আন্তঃগাঁথনি সন্মিলনৰ উদ্ধোধনী অনুষ্ঠানৰ পোনপটীয়াকৈ সম্প্ৰচাৰৰ ব্যৱস্থা কৰা হয় । জিলা পৰ্যায়ৰ অনুষ্ঠানটিত বিশ্বনাথ জিলাৰ জিলা আয়ুক্ত মুণিন্দ্ৰ নাথ ঙাটেই অৰ্থনৈতিক বিকাশ আৰু বিকাশৰ বাবে উদ্যোগৰ লাভালাভৰ বিষয়ে বিতংভাৱে বৰ্ণনা কৰে। তেওঁ জিলাখনৰ ব্যৱসায়ীসকলৰ মাজত প্ৰতিযোগিতামূলক তাগিদা বৃদ্ধিৰ ওপৰত গুৰুত্ব আৰোপ কৰে, যাৰ দ্বাৰা উন্নত সামগ্ৰী নিৰ্মাণৰ লগতে উন্নত সেৱা যাতে প্ৰদান কৰিব পৰা যায়। তেওঁ উপস্থিত সকলো বিষয়াক জিলাখনত ব্যৱসায়ৰ প্ৰচাৰৰ বাবে উদ্যোগীসকলৰ প্ৰতি ব্যৱসায় অনুকূল দৃষ্টিভংগী প্ৰদান কৰিবলৈও নিৰ্দেশ দিয়ে। জিলা পৰ্যায়ৰ আজিৰ অনুষ্ঠানটিত পঞ্জীয়নকৃত বিনিয়োগকাৰী উদ্যোগী সকলৰ লগতে বিশ্বনাথ জিলা পৰিষদৰ মুখ্য কাৰ্যবাহী বিষয়া অৰূপ পাঠক, গহপুৰ সম-জিলাৰ সম-জিলা আয়ুক্ত লুকুমনি বৰা, অতিৰিক্ত জিলা আয়ুক্ত (ৰাজহ) হৃদয় কুমাৰ দাস, জিলা উদ্যোগ আৰু বাণিজ্য কেন্দ্ৰৰ প্ৰধান পৰিচালক ৰঞ্জন বৰা প্ৰমুখ্যে জিলা প্ৰশাসনৰ শীৰ্ষ বিষয়াসকলে এই পোনপটীয়া সম্প্ৰচাৰৰ অনুষ্ঠানটি প্ৰত্যক্ষ কৰে আৰু বুজাবুজি চুক্তিত স্বাক্ষৰ কৰে।
