13/08/2026
বোকাখাত, ১৩ আগষ্ট :
বিশ্বৰ বিভিন্ন প্ৰান্তৰ লগতে ১২ আগষ্টত আজি কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলতো বিশ্ব হাস্তী দিৱস উদযাপন কৰা হয় । বিশ্ব হস্তী দিৱসৰ লগত সংগতি ৰাখি ১২ আগষ্টৰ পুৱাতেই কাজিৰঙা ৰাষ্ট্ৰীয় উদ্যান খনৰ বোকাখাতৰ পৰা বুঢ়াপাহাৰলৈকে থকা সকলো এনিমেল কৰিডৰ পাৰ হৈ যোৱা ৭১৫ নং ৰাষ্ট্ৰীয় পথৰ দুয়ো কাষৰ আৱৰ্জনা পৰিস্কাৰ কৰা হয় । উদ্যান কৰ্তৃপক্ষৰ উদ্যোগত আয়োজিত এই আৱৰ্জনা পৰিস্কাৰ অভিযানত বোকাখাত জে ডি এছ জি মহাবিদ্যালয়, চন্দ্ৰ নাথ বেজবৰুৱা মহাবিদ্যালয়, কাজিৰঙা চৰকাৰী আদৰ্শ মহাবিদ্যালয় আৰু বোকাখাত উচ্চতৰ মাধ্যমিক বিদ্যালয়ৰ শতাধিক ছাত্ৰ ছাত্ৰী, বিভাগীয় বনকৰ্মী, পাৰিপাৰ্শ্বিক উন্নয়ন সমিতি, জীপ চাফাৰী সন্থা আৰু বিভিন্ন বেচৰকাৰী সংগঠনৰ প্ৰতিনিধিয়ে অংশ গ্ৰহন কৰে । আজি পুৱা ৫ বজাতে পানবাৰী এনিমেল কৰিডৰত কাজিৰঙাৰ সঞ্চালক ড০ চি ৰমেশ আৰু ডি এফ অ’ অৰুণ বিঘ্নেশে আনুষ্ঠানিক ভাৱে এই আৱৰ্জনা পৰিস্কাৰ অভিযান শুভাৰম্ভ কৰে । পৰৱৰ্তী সময়ত সকলোয়ে মিলি এনিমেল কৰিডৰৰ হাতী বিচৰণৰ এলেকাৰ পৰা ৮ শ কিলোগ্ৰামৰো অধিক আৱৰ্জনা সংগ্ৰহ কৰে ।
ইয়াৰ উপৰিও হস্তী দিৱসৰ লগত সংগতি ৰাখি ৰাষ্ট্ৰীয় উদ্যান খনৰ বাগৰি বনাঞ্চলত হাতীৰ চিকিৎসা শিৱিৰ আৰু গনেশ পূজাৰ আয়োজন কৰা হয় । কাজিৰঙাৰ বিভাগীয় পশু চিকিৎসক ডা০ সুলভ শৰ্মা, পানবাৰীৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰৰ জেষ্ঠ পশু চিকিৎসক ডা০ ভাস্কৰ চৌধুৰী, ডা০ মেহদি হাচান, কঁহৰা ৰাজ্যিক পশু চিকিৎসালয়ৰ ডা০ বিশ্বজিত বৰুৱা আৰু হস্তী বিশেষজ্ঞ কৌশিক বৰুৱা, বনাঞ্চলিক বিষয়া হিমাংশু গগৈ, মৃগাংক দাস, জিজ্ঞাস বৰুৱা, নীলয় বৰুৱা আৰু ম.দুপৱন নাথো এই চিকিৎসা শিৱিৰত উপস্থিত থাকে । এই অনুষ্ঠানতে ৱাইল্ড লাইফ ট্ৰাষ্ট অৱ ইণ্ডিয়াই বন্যপ্ৰাণীৰ চিকিৎসাৰ বাবে প্ৰদান কৰা এখন এম্বুলেঞ্চো নাৰিকল ভাঙি সঞ্চালক ড০ চি ৰমেশে উদ্বোধন কৰে । আজিৰ এই হস্তী দিৱসত আৰণ্যকৰ সঞ্জীৱ বেজবৰুৱা, ভুমিৰ উত্তম শইকীয়া, জীপ চাফাৰী সংস্থাৰ অংগদ বৰদলৈয়ে বিশেষ ভাৱে সহযোগ কৰে ।
