05/12/2025
বঙাইগাঁও জিলাৰ বিদ্যাপুৰৰ নাচোনকুটিত কলেজীয়া ছাত্ৰক হত্যা
বঙাইগাঁও জিলাৰ বিদ্যাপুৰ আৰক্ষী চকীৰ অন্তৰ্গত বগুলামাৰী গাঁৱৰ এজন কলেজীয়া ছাত্ৰৰ মৃতদেহ কালি আৰক্ষীয়ে নাচোনকুটিৰ এখন পথাৰত মাটিৰ তলৰ পৰা উদ্ধাৰ কৰে৷ মৃতদেহটো কাষৰীয়া বগুলামাৰী গাঁৱৰ লালমোহন বৰ্মনৰ পুত্ৰ তথা বাসুগাঁও মহাবিদ্যালয়ৰ স্নাতক পঞ্চম ষাণ্মাসিকৰ ছাত্ৰ নয়ন বৰ্মনৰ৷ কালি কাৰ্যবাহী দণ্ডাধীশৰ উপস্থিতিত আৰক্ষীয়ে মৃতদেহটো উদ্ধাৰ কৰে৷ আৰক্ষীয়ে সংবাদ মাধ্যমক জনোৱামতে যোৱা ১ ডিচেম্বৰৰ নিশাৰ পৰা সন্ধানহীন হৈ আছিল ২৫ বছৰীয়া নয়ন বৰ্মন। এই সম্পৰ্কে ছাত্ৰজনৰ পৰিয়ালৰ লোকে বিদ্যাপুৰ আৰক্ষী চকীত এজাহাৰ দাখিল কৰাত আৰক্ষীয়ে তদন্ত আৰম্ভ কৰে৷ সন্দেহবশতঃ আৰক্ষীয়ে বুধবাৰে আকেশ্বৰ বৰ্মন নামৰ লোক এজনক কৰায়ত্ত কৰে৷ আৰক্ষীয়ে আকেশ্বৰক জেৰা কৰাত হত্যাকাণ্ডৰ কথা পোহৰলৈ আহে৷ আৰক্ষীৰ জেৰাত আকেশ্বৰে নয়ন বৰ্মনক হত্যা কৰাৰ কথা স্বীকাৰ কৰে৷ আকেশ্বৰ বৰ্মনৰ পত্নীৰ সৈতে নয়নৰ অবৈধ সম্পৰ্ক থকাৰ সন্দেহতে আকেশ্বৰে নয়নক হত্যা কৰে৷ এক ডিচেম্বৰৰ নিশা নয়ন বৰ্মনে আকেশ্বৰ বৰ্মনৰ পত্নীৰ সৈতে দেখা কৰিবলৈ নাচোনকুটিলৈ যোৱাৰ সময়ত পূৰ্বৰে পৰা নয়নৰ অপেক্ষাত থকা আকেশ্বৰ বৰ্মনে নয়ন বৰ্মনক চোকা অস্ত্ৰৰে পেট আৰু পিঠিত ঘপিয়াই হত্যা কৰি মৃতদেহটো খেতিপথাৰত পুতি থয়। কালি আকেশ্বৰক লগত লৈ আৰক্ষী পথাৰখনত উপস্থিত হয় আৰু মাটি খন্দাই গাঁতৰ পৰা মৃতদেহটো উদ্ধাৰ কৰে৷ এই হত্যাকাণ্ডৰ সৈতে আৰু কোনো লোক জড়িত থকাৰ সন্দেহত আৰক্ষীয়ে অনুসন্ধান অব্যাহত ৰাখিছে৷
